Ang “Templo” ug ang “Pangulo” Karon

“Bahin sa pangulo sa ilang taliwala, sa dihang sila mosulod, siya mosulod; ug sa dihang sila manggula, siya mogula.”​—EZEQUIEL 46:10.

1, 2. Unsang dakong kamatuoran ang motabang kanato sa pagbadbad ug daghan sa kahulogan sa panan-awon ni Ezequiel sa templo?

ANG ubang karaang mga rabbi wala matagbaw sa basahon sa Ezequiel. Sumala sa Talmud, ang uban kanila naghunahuna sa pagkuha pa gani sa basahon gikan sa listahan sa basahon nga gidawat ingong Balaang Kasulatan. Naglisod sila sa pagpatin-aw sa panan-awon sa templo ug gipahayag kana nga dili matugkad sa tawo. Ang ubang mga eskolar sa Bibliya naglibog sa panan-awon ni Ezequiel sa templo ni Jehova. Kita komosta?

² Sukad nga napasig-uli ang putli nga pagsimba, gipanalanginan ni Jehova ang iyang katawhan ug daghang pangidlap sa espirituwal nga pagsabot, lakip sa pagsabot kon unsa ang espirituwal nga templo sa Diyos​—ang samag-templo nga kahikayan ni Jehova alang sa putli nga pagsimba.a Kining dakong kamatuoran bahin sa espirituwal nga templo motabang kanato sa pagbadbad ug daghan sa kahulogan sa panan-awon ni Ezequiel sa templo. Atong hisgotan ug dugang ang upat ka bahin niining maong panan-awon​—ang templo, ang mga saserdote, ang pangulo, ug ang yuta. Unsay kahulogan niini karong adlawa?

Ang Templo ug Ikaw

 3. Unsay atong makat-onan gikan sa hataas nga kisame ug ang mga kinulit sa kuta diha sa mga ganghaan sa templo?

³ Handurawa nga kita naglibot sa pagtan-aw niining templo nga nakita sa panan-awon. Kita moduol ug motikang sa pito ka ang-ang paingon sa usa sa dagkong mga ganghaan. Sulod niining ganghaana, kita mohangad nga magtan-aw nga may dakong kahibulong. Ang kisame niini maoy kapin sa 30 metros sa ibabaw kanato! Sa ingon kita napahinumdoman nga ang mga sukdanan sa pagsulod sa kahikayan ni Jehova sa pagsimba hataas. Ang mga bidlisiw sa kahayag gikan sa mga bentana nagdan-ag sa mga kinulit nga mga kahoyng palma diha sa kuta, nga gigamit sa Kasulatan sa paglarawan sa pagkamatul-id. (Salmo 92:12; Ezequiel 40:14, 16, 22) Kining balaang dapit maoy alang sa mga matul-id sa moral ug sa espirituwal. Kaharmonya niana, kita buot nga magpabiling matul-id aron ang atong pagsimba dalawaton kang Jehova.​—Salmo 11:7.

 4. Kinsa ang gidid-an sa pagsulod sa templo, ug unsay gitudlo niini kanato?

⁴ Diha sa matag daplin sa ganghaan, adunay tulo ka lawak sa mga guwardiya. Pasudlon kaha kita sa mga guwardiya sulod sa templo? Gisultihan ni Jehova si Ezequiel nga walay tawong langyaw nga “dili tinuli sa kasingkasing” ang makasulod. (Ezequiel 40:10; 44:9) Unsay kahulogan niana? Dawaton sa Diyos ingong mga magsisimba kadto lamang nahigugma sa iyang mga kasugoan ug nagkinabuhi sumala niana. (Jeremias 4:4; Roma 2:29) Iyang gidawat ang sama kanila ngadto sa iyang espirituwal nga balongbalong, ang iyang balay sa pagsimba. (Salmo 15:1-5) Sukad nga napasig-uli ang putli nga pagsimba sa 1919, ang yutan-ong organisasyon ni Jehova nagtuboy ug nag-uswag sa pagpatin-aw sa iyang moral nga mga kasugoan. Kadtong motuyo sa pagsupak sa pagsunod dili na dawaton ngadto sa panag-ubanay sa iyang katawhan. Karong adlawa, ang pinasukad-sa-Bibliya nga batasan sa pagpalagpot sa mamumuhat ug daotan nga dili maghinulsol nakatabang sa pagtipig sa atong pagsimba nga mahinlo ug maputli.​—1 Corinto 5:13.

 5. (a) Unsang mga kaamgiran tali sa panan-awon ni Ezequiel ug sa panan-awon ni Juan ang natala sa Pinadayag 7:9-15? (b) Diha sa panan-awon ni Ezequiel, kinsa ang gihulagwayan sa 12 ka tribo nga nagsimba diha sa gawas nga sawang?

⁵ Ang ganghaan nabukas ngadto sa gawas nga sawang nga diha niini ang mga tawo nagsimba ug nagdayeg kang Jehova. Kini nagpahinumdom kanato sa panan-awon ni apostol Juan bahin sa “dakong panon” nga nagsimba kang Jehova “adlaw ug gabii diha sa iyang templo.” Ang mga kahoyng palma gilarawan niining duha ka panan-awon. Diha sa panan-awon ni Ezequiel ilang gidayandayanan ang mga kuta sa ganghaan. Diha sa panan-awon ni Juan ang mga magsisimba nagdalag mga sanga sa palma sa ilang mga kamot, nga nagsimbolo sa ilang kalipay sa pagdayeg kang Jehova ug sa pagdawat kang Jesus ingong ilang Hari. (Pinadayag 7:9-15) Diha sa konteksto sa panan-awon ni Ezequiel, ang 12 ka tribo sa Israel naghulagway sa “ubang mga karnero.” (Juan 10:16; itandi ang Lucas 22:28-30.) Ikaw ba usa usab niadtong nalipay sa pagdayeg kang Jehova pinaagi sa pagwali sa iyang Gingharian?

 6. Unsa ang katuyoan sa mga komedor diha sa gawas nga sawang, ug sa unsang pribilehiyo nga kini nagpahinumdom niadtong sakop sa ubang mga karnero?

⁶ Samtang maglibot kita sa gawas nga sawang, makita nato ang 30 ka komedor nga diha niini ang mga tawo nakig-ambit sa ilang kinabubut-ong mga halad. (Ezequiel 40:17) Karong adlawa, kadtong sakop sa ubang mga karnero dili maghalad ug mga halad nga mananap, apan dili sila moabot nga walay dala ngadto sa espirituwal nga templo. (Itandi ang Exodo 23:15.) Si apostol Pablo nagsulat: “Pinaagi [kang Jesus] managtanyag kita kanunay sa Diyos ug halad sa pagdayeg, nga mao, ang bunga sa mga ngabil nga nagahimo ug pagpahayag diha sa dayag sa iyang ngalan. Dugang pa, ayaw kalimti ang pagbuhat sa maayo ug ang pagpakig-ambitay sa mga butang sa uban, kay sa maong mga halad ang Diyos nahimuot pag-ayo.” (Hebreohanon 13:15, 16; Oseas 14:2) Dako gayod nga pribilehiyo ang pagtanyag kang Jehova ug mga halad nga ingon niana.​—Proverbio 3:9, 27.

 7. Ang pagsukod sa templo nagpasalig kanato ug unsa?

⁷ Si Ezequiel nagtan-aw samtang gisukod sa usa ka manulonda kining templo sa panan-awon. (Ezequiel 40:3) Sa susama, si apostol Juan gisultihan: “Tindog ug sukda ang santuwaryo sa templo sa Diyos ug ang halaran ug kadtong mga nagasimba diha niini.” (Pinadayag 11:1) Unsay kahulogan niini nga pagsukod? Sa duha ka kahimtang kini lagmit nagsilbi ingong usa ka garantiya, usa ka ilhanan nga walay makapugong kang Jehova sa pagtuman sa iyang mga saad labot sa putli nga pagsimba. Sa susama karong adlawa, kita makasalig nga walay bisan kinsa​—bisan mabangis nga pagsupak sa gamhanang mga kagamhanan—​ang makapugong sa pagpasig-uli sa putli nga pagsimba.

 8. Kinsa ang mosulod sa mga ganghaan ngadto sa sulod nga sawang, ug bahin sa unsa nagpahinumdom kining mga ganghaana kanato?

⁸ Samtang motabok kita sa gawas nga sawang, makakita kita nga adunay tulo ka ganghaan nga nagpaingon sa sulod nga sawang; ang sulod nga mga ganghaan naglinya ug samag gidak-on sa mga ganghaan sa gawas. (Ezequiel 40:6, 20, 23, 24, 27) Ang mga saserdote lamang ang makasulod sa sulod nga sawang. Ang sulod nga mga ganghaan nagpahinumdom kanato nga ang dinihogan kinahanglang makakab-ot sa mga sukdanan ug mga kasugoan sa Diyos, apan ang mao gihapong mga sukdanan ug mga kasugoan naghatag ug giya sa tanang tinuod nga mga Kristohanon. Apan unsa ang buluhaton sa mga saserdote, ug unsay kahulogan niini karong adlawa?

Matinumanong mga Saserdote

9, 10. Sa unsang paagi nagtagana ug espirituwal nga instruksiyon ang “harianong pagkasaserdote,” ingon sa gilandongan sa saserdotehanong matang diha sa panan-awon ni Ezequiel?

⁹ Sa wala pa ang Kristohanong panahon, bug-at nga mga trabaho ang gihimo sa mga saserdote diha sa templo. Ang pag-ihaw sa mga hayop alang sa halad, paghalad niini diha sa halaran, ug ang pag-alagad sa isigkasaserdote ug sa mga tawo makakapoy gayod nga trabaho. Apan sila adunay laing hinungdanong trabaho. Si Jehova nagsugo sa mga saserdote: “Kinahanglang ilang tudloan ang akong katawhan sa kalainan sa balaang butang ug sa mahugawng butang; ug kinahanglang ilang ipaila kanila ang kalainan sa mahugaw ug sa mahinlo.”​—Ezequiel 44:23; Malaquias 2:7.

¹⁰ Ikaw ba nagpabili sa paghago ug ubos nga pag-alagad nga gihimo sa dinihogan ingong usa ka lawas, “usa ka harianong pagkasaserdote,” alang sa putli nga pagsimba? (1 Pedro 2:9) Sama sa pagkasaserdote sa mga Levihanon sa karaan, sila nanguna sa paghatag ug espirituwal nga instruksiyon, nga nagtabang sa mga tawo sa pagsabot kon unsa ang mahinlo ug dalawaton sa mga mata sa Diyos ug kon unsa ang dili. (Mateo 24:45) Ang maong instruksiyon, nga nagagikan sa pinasukad-sa-Bibliya nga mga publikasyon ug Kristohanong mga tigom ug mga kombensiyon, nakatabang sa minilyon nga mapasig-uli ngadto sa Diyos.​—2 Corinto 5:20.

11. (a) Sa unsang paagi gipasiugda sa panan-awon ni Ezequiel ang bili sa pagkahinlo sa bahin sa mga saserdote? (b) Niining kataposang mga adlaw, sa unsang paagi ang dinihogan gihinloan sa espirituwal nga diwa?

¹¹ Apan, ang mga saserdote kinahanglang mohimo pa ug labaw kay sa pagtudlo lamang sa uban nga magmahinlo; sila kinahanglang hinlo usab sa ilang kaugalingon. Sa ingon, nakakita si Ezequiel ug pamaagi sa paghinlo alang sa pagkasaserdote sa Israel. (Ezequiel 44:10-16) Sa susama, ang kasaysayan nagpakita nga sa 1918, si Jehova milingkod “ingong maglulunsay” diha sa iyang espirituwal nga templo, nga nagsusi sa dinihogan saserdotehanong matang. (Malaquias 3:1-5) Kadtong gilantaw nga mahinlo sa espirituwal o naghinulsol sa nangaging idolatriya gitugotan sa pagpadayon sa pribilehiyo sa pag-alagad diha sa iyang espirituwal nga templo. Bisan pa, sama kang bisan kinsa, ang tagsatagsa sa mga dinihogan mahimong mahugaw​—sa espirituwal ug sa moral. (Ezequiel 44:22, 25-27) Sila kinahanglang magkugi aron makapabiling ‘walay buling sa kalibotan.’​—Santiago 1:27; itandi ang Marcos 7:20-23.

12. Nganong angayng pabilhan nato ang buluhaton sa mga dinihogan?

¹² Ang matag usa kanato tingali mangutana, ‘Nagpabili ba ako sa panig-ingnan nga gihatag sa dinihogan sa ilang daghang tuig sa matinumanong pag-alagad? Ako ba nagasundog sa ilang pagtuo?’ Maayo alang niadtong sakop sa dakong panon sa paghinumdom nga dili kanunay nga makauban nila ang dinihogan dinhi sa yuta. Mahitungod sa mga saserdote diha sa panan-awon ni Ezequiel, si Jehova nag-ingon: “Ayaw ninyo sila hatagi ug panulondon [nga yuta] sa Israel: Ako ang ilang panulondon.” (Ezequiel 44:28) Sa susama, ang dinihogan walay dumalayong dapit dinhi sa yuta. Sila adunay langitnong panulondon, ug kadtong sakop sa dakong panon naglantaw niini ingong pribilehiyo sa pagtabang ug pagdasig kanila samtang ania pa sila dinhi sa yuta.​—Mateo 25:34-40; 1 Pedro 1:3, 4.

Ang Pangulo​—Kinsa Siya?

13, 14. (a) Nganong ang pangulo maoy sakop sa ubang mga karnero? (b) Kinsay gilarawanan sa pangulo?

¹³ Karon usa ka makaiikag nga pangutana motungha. Nan, kinsa ang gihawasan sa pangulo? Sanglit siya gihisgotan ingong usa ka indibiduwal ug ingong usa ka grupo, kita makadahom nga siya naghawas sa usa ka matang sa mga tawo. (Ezequiel 44:3; 45:8, 9) Apan kinsa? Sa pagkatinuod dili ang dinihogan. Diha sa panan-awon, siya suod nga naglihok uban sa mga saserdote, apan siya dili usa kanila. Dili sama sa saserdotehanong matang, siya gihatagan ug panulondon diha sa yuta ug busa siya adunay umaabot dinhi sa yuta, dili sa langit. (Ezequiel 48:21) Dugang pa, ang Ezequiel 46:10 nag-ingon: “Bahin sa pangulo sa ilang taliwala, sa dihang sila [ang mga tribo nga dili mga saserdote] mosulod [sa gawas nga sawang sa templo], siya mosulod; ug sa dihang sila manggula, siya mogula.” Siya dili mosulod sa sulod nga sawang kondili nagsimba diha sa gawas nga sawang, mosulod ug mogula sa templo uban sa mga tawo. Kining mga butanga nagbutang sa pangulo sa taliwala sa dakong panon sa ubang mga karnero.

¹⁴ Matin-aw, ang pangulo adunay usa ka responsabilidad taliwala sa katawhan sa Diyos. Diha sa gawas nga sawang, siya molingkod sa balkon sa Ganghaan sa Sidlakan. (Ezequiel 44:2, 3) Kini nagpaila ug usa ka katungdanan sa pagkamagtatan-aw, nga sama nianang sa tigulang nga mga lalaki sa Israel nga nanglingkod sa ganghaan sa siyudad ug nagapanghukom. (Ruth 4:1-12; Proverbio 22:22) Kinsa taliwala sa ubang mga karnero ang naghupot ug katungdanan sa pagkamagtatan-aw karong adlawa? Ang mga ansiyano nga adunay yutan-ong paglaom nga gitudlo sa balaang espiritu. (Buhat 20:28) Busa ang pangulo nga matang karon giandam nga may palaaboton sa pag-alagad sa ulahi sa usa ka katungdanan sa pagkamagdudumala diha sa bag-ong kalibotan.

15. (a) Sa unsang paagi naghatag ug kadan-agan ang panan-awon ni Ezequiel labot sa relasyon sa mga ansiyano nga mga sakop sa dakong panon ug sa dinihogan saserdotehanong matang? (b) Unsang pagpanguna ang gihimo sa dinihogang mga ansiyano diha sa yutan-ong organisasyon sa Diyos?

¹⁵ Apan, unsa ang relasyon karon tali sa dinihogan saserdotehanong matang ug sa maong tigulang nga mga lalaki kinsa, ingong bahin sa dakong panon, nag-alagad sa mga katungdanan sa pagkamagtatan-aw? Ang panan-awon ni Ezequiel nagpakita nga ang mga ansiyano nga mga sakop sa dakong panon adunay mapaluyohon ug ubos nga papel, samtang ang dinihogan mao ang nagapanguna sa espirituwal. Sa unsang paagi? Hinumdomi, ang mga saserdote diha sa panan-awon gihatagan ug responsabilidad sa pagtudlo sa mga tawo sa espirituwal nga mga butang. Sila gisugo usab sa paglihok ingong mga maghuhukom sa legal nga mga butang. Dugang pa, ang mga Levihanon gitudlo sa “mga katungdanan sa pagkamagtatan-aw” diha sa mga ganghaan sa templo. (Ezequiel 44:11, 23, 24) Matin-aw, ang pangulo kinahanglang magpasakop sa espirituwal nga mga pag-alagad ug pagpangulo sa mga saserdote. Nan, tukma nga sa modernong mga panahon ang dinihogan mao ang nagapanguna sa putli nga pagsimba. Pananglitan, ang mga sakop sa Nagamandong Lawas sa mga Saksi ni Jehova gipili gikan sa ilang taliwala. Ang maong matinumanong dinihogang mga ansiyano nagbansay sa nagkaugmad nga pangulong matang sa daghan nang katuigan, nga nag-andam sa umaabot nga mga sakop niining maong matang alang sa adlaw sa dihang sila hatagan sa bug-os sa ilang awtoridad diha sa bag-ong kalibotan sa Diyos sa umaabot.

16. Sumala sa Isaias 32:1, 2, sa unsang paagi angay molihok ang mga ansiyano?

¹⁶ Unsang matanga sa mga magtatan-aw kining umaabot nga mga membro, nga nahalinya alang sa gipadakong mga responsabilidad ingong pangulo nga matang? Ang tagna nga makita diha sa Isaias 32:1, 2 nag-ingon: “Tan-awa! Usa ka hari maghari sa pagkamatarong; ug bahin sa mga prinsipe, sila magmando ingong mga prinsipe diha sa hustisya. Ug ang matag usa kinahanglang mapamatud-ang sama sa usa ka salimbong batok sa hangin ug tagoanan batok sa bagyo, ingon sa mga sapa sa tubig diha sa usa ka mamala nga yuta, sama sa landong sa usa ka dakong bato diha sa usa ka uga nga yuta.” Kining tagnaa nagakatuman karon samtang ang Kristohanong mga ansiyano​—dinihogan ug ubang mga karnero—​naglihok sa pagpanalipod sa panon batok sa ‘mga bagyo’ sama sa paglutos ug pagkawala sa kadasig.

17. Sa unsang paagi pagalantawon sa Kristohanong mga magbalantay ang ilang kaugalingon, ug sa unsang paagi angay pagalantawon sila sa panon?

¹⁷ Ang mga pulong “prinsipe” ug “pangulo,” nga samag kahulogan sa Hebreohanon, wala gamita ingong mga titulo nga gilaraw aron sa pagbayaw ug mga tawo. Hinunoa, gihubit niini ang gipangabaga nga responsabilidad niining mga tawhana sa pag-atiman sa mga karnero sa Diyos. Si Jehova hugot nga nagpasidaan: “Igo na kana alang kaninyo, Oh mga pangulo sa Israel! Kuhaa ang kapintasan ug pagpanglungkab, ug buhata ang hustisya ug pagkamatarong.” (Ezequiel 45:9) Maayo alang sa tanang ansiyano karong adlawa nga mosunod niining tambaga. (1 Pedro 5:2, 3) Ang panon, sa baylo, miila nga si Jesus nakatagana ug mga magbalantay ingong “mga gasa nga mga tawo.” (Efeso 4:8) Ang ilang mga kuwalipikasyon gilatid diha sa dinasig nga Pulong sa Diyos. (1 Timoteo 3:1-7; Tito 1:5-9) Sa ingon ang mga Kristohanon nagsunod sa pagpanguna sa mga ansiyano.​—Hebreohanon 13:7.

18. Unsa ang pipila ka responsabilidad sa umaabot nga pangulo nga matang karon, ug unsay responsabilidad niini sa umaabot?

¹⁸ Sa panahon sa Bibliya ang ubang mga pangulo dako kaayo ug awtoridad, ang uban menos. Karong adlawa, ang mga ansiyano sa dakong panon adunay nagkalainlaing mga responsabilidad. Ang uban nag-alagad sa usa ka kongregasyon; ang uban nag-alagad ug daghang kongregasyon ingong nagapanawng mga magtatan-aw; ang uban nag-alagad sa tibuok nga mga nasod ingong mga sakop sa Komite sa Sanga; ang uban direktang nagtabang sa nagkalainlaing mga komite sa Nagamandong Lawas. Diha sa bag-ong kalibotan, si Jesus magtudlo ug “mga prinsipe sa tibuok yuta” aron manguna taliwala sa mga magsisimba ni Jehova sa yuta. (Salmo 45:16) Walay duhaduha siya magpili ug daghan kanila taliwala sa matinumanong mga ansiyano karon. Sanglit kining mga tawhana nagpamatuod sa ilang kaugalingon karon, siya mopili sa pagpiyal ngadto sa daghan ug mas dagkong mga pribilehiyo sa umaabot sa dihang iyang ipadayag ang papel sa pangulo nga matang diha sa bag-ong kalibotan.

Ang Yuta sa Katawhan sa Diyos Karon

19. Unsay gihawasan sa yuta sa panan-awon ni Ezequiel?

¹⁹ Gilarawan usab sa panan-awon ni Ezequiel ang napasig-uling yuta sa Israel. Unsay gihawasan niining bahina sa panan-awon? Ang ubang mga tagna sa pagpasig-uli nagtagna nga ang yuta, ang Israel, mahimong paraiso sama sa Eden. (Ezequiel 36:34, 35) Karon, atong gitagamtam ang usa ka napasig-uling “yuta,” ug kini usab, sa usa ka diwa, samag Eden. Sa samang paagi, kita kanunayng naghisgot sa atong espirituwal nga paraiso. Gibatbat sa Ang Bantayanang Torre ang atong “yuta” ingong “ang dapit sa kalihokan” sa piniling katawhan sa Diyos.b Bisag asa nga dapit ang alagad ni Jehova, siya anaa nianang napasig-uling yuta basta nga siya maningkamot sa pagtuboy sa tinuod nga pagsimba pinaagi sa paglakaw diha sa mga tunob ni Kristo Jesus.​—1 Pedro 2:21.

20. Unsang prinsipyo ang atong makat-onan gikan sa “balaang amot” diha sa panan-awon ni Ezequiel, ug sa unsang paagi ikapadapat nato kining prinsipyoha?

²⁰ Komosta ang bahin sa yuta nga gitawag ug “balaang amot”? Kini mao ang amot sa mga tawo agig tabang sa mga saserdote ug sa siyudad. Sa susama, “ang tanang tawo sa yuta” gipaamot ug bahin sa yuta alang sa pangulo. Unsay kahulogan niini karong adlawa? Dili, sa pagkatinuod, angay pabug-atan ang katawhan sa Diyos sa suweldadong klero nga matang. (2 Tesalonica 3:8) Hinunoa, ang tabang nga gihatag ngadto sa mga ansiyano sa panguna maoy espirituwal. Naglakip kini sa pagtabang sa buluhaton nga ginahimo karon ug pagpakita ug matinabangon, mapinasakopong espiritu. Bisan pa, sama sa mga adlaw ni Ezequiel, kini nga amot ihatag “ngadto kang Jehova,” dili ngadto sa kang bisan kinsang tawo.​—Ezequiel 45:1, 7, 16.

21. Unsay atong makat-onan gikan sa pagbahin sa yuta diha sa panan-awon ni Ezequiel?

²¹ Dili lamang ang pangulo ug ang mga saserdote ang gihatagan ug mga dapit niining napasig-uling yuta. Ang pagbahin sa yuta nagpakita nga ang matag usa sa 12 ka tribo adunay seguradong panulondon. (Ezequiel 47:13, 22, 23) Busa kadtong sakop sa dakong panon dili lamang makabaton ug dapit diha sa espirituwal nga paraiso karon kondili makadawat usab ug usa ka bahin sa yuta sa dihang ilang mapanunod ang usa ka yutan-ong dapit sa Gingharian sa Diyos.

22. (a) Unsay gihawasan sa siyudad diha sa panan-awon ni Ezequiel? (b) Unsay atong makat-onan gikan sa pagkaadunay mga ganghaan sa siyudad sa tanang kiliran?

²² Sa kataposan, unsay gihawasan sa siyudad diha sa panan-awon? Dili kini usa ka langitnong siyudad, kay kini nahimutang sa taliwala sa “mahugaw” (dili-balaan) nga yuta. (Ezequiel 48:15-17) Busa yutan-on gayod kini. Buweno, unsa ba ang siyudad? Dili ba naghatag kini ug ideya sa mga tawo nga nagtipon ingong usa ka pundok ug nagporma ug usa ka butang nga tinukod ug organisado? Oo. Busa, ang siyudad mopatim-aw nga naglarawan sa yutan-ong administrasyon nga makahatag ug kaayohan sa tanan nga molangkob sa matarong yutan-ong katilingban. Kini molihok sa kabug-osan niini sa umaabot nga “bag-ong kalibotan.” (2 Pedro 3:13) Ang mga ganghaan sa siyudad sa tanang kiliran, usa alang sa matag tribo, naghulagway sa pagkabukas niini. Karong adlawa, ang katawhan sa Diyos wala mailalom sa usa ka tago, sekretong administrasyon. Ang mga igsoon nga may katungdanan maoy daling-maduol; ang mga prinsipyo nga naggiya kanila nahibaloan sa tanan. Ang kamatuoran nga ang mga tawo nga gikan sa tanang tribo nagtikad sa yuta nga nagsuportar sa siyudad nagpahinumdom kanato nga ang ubang mga karnero nagsuportar, bisan sa materyal nga paagi, sa mga kahikayan sa administrasyon nga gihimo alang sa katawhan sa Diyos sa tibuok kalibotan.​—Ezequiel 48:19, 30-34.

23. Unsay atong pagahisgotan sa sunod nga artikulo?

²³ Apan, komosta ang suba nga nagdagayday gikan sa sangtuwaryo sa templo? Kon unsay gilarawanan niana karon ug ngadto sa umaabot mao ang ulohan sa ikatulo ug kataposang artikulo niining seryala.

[Mga footnote]

Mga Punto nga Repasohon

◻ Unsay gilarawanan sa templo diha sa panan-awon ni Ezequiel?

◻ Kinsay gilarawanan sa mga saserdote nga nag-alagad sa templo?

◻ Unsa ang pangulo nga matang, ug unsa ang pipila ka mga responsabilidad niini?

◻ Unsa ang yuta diha sa panan-awon ni Ezequiel, ug sa unsang diwa nga gibahin kini ngadto sa 12 ka tribo?

◻ Unsay gilarawanan sa siyudad?

[Diagram/​Mapa sa panid 15]

(Alang sa aktuwal nga pagkahan-ay, tan-awa ang publikasyon)

Ang pagbahin sa yuta ingon sa paglarawan sa panan-awon ni Ezequiel

ANG NAPULOG-DUHA KA TRIBO

Ang Dakong Dagat

Dagat sa Galilea

Subang Jordan

Salt Sea

DAN

ASER

NEPTALI

MANASES

EPRAIM

RUBEN

JUDA

ANG PANGULO

BENJAMIN

SIMEON

ISACAR

ZABULON

GAD

[Diagram]

GIPADAKONG BALAANG AMOT

A. “Si Jehova Mismo Atua Didto” (Jehova-Shammah); B. ang mabungahong yuta sa siyudad

Bahin sa mga Levihanon

Sangtuwaryo ni Jehova

Bahin sa mga Saserdote

B A B