“Sila Makaila nga Ako Mao si Jehova”
“Dili ko na itugot nga pasipalahan pa ang akong balaan nga ngalan, ug ang mga nasod makaila nga ako mao si Jehova.”—EZEKIEL 39:7.
1, 2. Sa unsang paagi kita nahibalo nga dili motugot si Jehova nga pasipalahan ang iyang balaang ngalan sa walay kataposan?
ANG balaang ngalan ni Jehova gipasipalahan sa karaang mga Israelinhon. Kini ang gipatin-aw sa basahon ni Ezekiel. Apan ang katawhan sa Kakristiyanohan nagapasipala usab sa ngalan sa Diyos nga ilang giangkong gisimba.
2 Tugotan ba sa walay kataposan sa Unibersal nga Soberano nga pasipalahan ang iyang ngalan? Dili, kay siya nag-ingon: “Dili ko na itugot nga pasipalahan pa ang akong balaan nga ngalan, ug ang mga nasod makaila nga ako mao si Jehova.” (Ezekiel 39:7; tan-awa usab ang Ezekiel 38:23.) Unsay kahulogan niini? Ug unsang mga pagtulon-an ang atong makat-onan gikan sa ulahing mga kapitulo sa basahon ni Ezekiel?
Mga Tagna Batok sa Uban
3. (a) Unsay reaksiyon sa ubang mga nasod sa pag-antos sa Juda? (b) Tungod sa unsang espiritu nga gitangtang ang “hari” sa Tiro, ug sa unsang paagi kini nakaapektar kanato?
3 Human nga nalaglag ang Jerusalem, gihukman ang Ammon tungod sa pagpakitag kalipay sa pag-antos sa Juda, ug ang Moab tungod sa pagdawat ug matamayong tinamdan sa Juda. Sad-an ang Edom sa daotang tinguha, ug ang mapanimaslong espiritu sa Pilistihanon nakahatag “pagbadlong nga puno sa kaligotgot” sa Diyos. (Ezekiel 25:1-17; Proverbio 24:17, 18) Tungod sa pagkalipay sa katalagman sa Jerusalem, ang siyudad sa Tiro mahulog kang Nabucodonosor, kun Nebuchadrezzar (ang pagtitik duolduol sa Babilonyanhon). (Ezekiel 26:1-21) Sama siya sa barko nga pihong malunod. (Ezekiel 27:1-36) Ang “hari” sa Tiro (tingali sa iyang linya sa mga magmamando) gitangtang tungod sa mapahitas-ong espiritu sama kang Satanas. (Ezekiel 28:1-26) Sa pagkatinuod, angay kay kita sa makasasalang pagkamapahitas-on nga mopahimo kanato sa pagpasipala ngalan ni Jehova.—Salmo 138:6; Proverbio 21:4.
4. Unsay nahitabo kang Paraon ug sa Ehipto?
4 Si Ezekiel mitagna ug 40-ka tuig nga kalumpagan sa Ehipto. Ang iyang bahandi maoy bayad kang Nabucodonosor alang sa nahatag nga serbisyo sa militar sa pagpakanaog sa silot ni Jehova diha sa Tiro. (Ezekiel 29:1-21) Dihang gipatibulaag sa Diyos ang mga Ehiptohanon, ‘sila nakaila nga siya mao si Jehova.’ (Ezekiel 30:1-26) Naghulagway sa Ehipto, ang mapahitas-ong Paraon gipakasama sa usa ka hataas nga kahoyng sedro nga pagaputlon. (Ezekiel 31:1-18) Sa kataposan, nagbangon si Ezekiel ug mga pagbakho bahin kang Paraon ug sa pagkanaog sa Ehipto ngadto sa Sheol.—Ezekiel 32:1-32.
Ang Buluhaton sa Magbalantay
5. (a)Unsang mga sirkumstansiya lamang nga giuyonan sa Diyos ang espirituwal nga magbalantay? (b) Unsay kahulogan sa ‘paglakaw sa mga kabalaoran sa kinabuhi’?
5 Gipahinumdoman si Ezekiel sa iyang buluhaton ingong magbalantay. (Ezekiel 33:1-7) Sa pagkatinuod, uyonan lamang sa Diyos ang espirituwal nga magbalantay kon iyang tumanon ang iyang buluhaton ug pasidan-an ang daotan. (Basaha ang Ezekiel 33:8, 9.) Nan, sama kang Ezekiel, ang dinihogang “magbalantay” nga matang maisogong nagwali sa mga pasidaan sa Diyos. Sanglit wala may kalipay ang Diyos sa kamatayon sa mga daotan, dili niya panilngon ang ilang daang rekord batok kanila kon sila mamati sa mga pasidaan ug ‘magalakaw sa kabalaoran sa kinahuhi.’ Sa mga adlaw ni Ezekiel, ang paglakaw sa maong mga kabalaoran nagkahulogan sa pagtuman sa Kasugoan, apan kini karong adlawa nagkahulogan sa pagdawat sa halad-lukat ni Kristo ug sa pagkamahimong iyang sumusunod. (1 Pedro 2:21) Walay daotan bahin sa paagi sa pagsilot o sa paghatag ug ganti sa Diyos sa mga tawo, ug ang pagkahimong luwas latas sa “dakong kasakitan” nagadepende sa pagsunod sa iyang mga kabalaoran.—Ezekiel 33:10-20; Mateo 24:21.
6. Karong adlawa, sa unsang paagi ang kadaghanan sama sa mga bihag sa panahon ni Ezekiel?
6 Dihang hapit nang matapos ang 607 W.K.P., gitaho sa usa ka lalin ang kalaglagan sa Jerusalem, ug gipahayag na usab ni Ezekiel ang mensahe ni Jehova. (Ezekiel 33:21-29) Unsay reaksiyon sa mga binihag? (Basaha ang Ezekiel 33:30-33.) Karong adlawa, daghan ang sama sa mga binihag nga Hudiyo nga alang kanila miawit si Ezekiel ug ‘matahom nga alawiton sa gugma.’ Dihang ang mga dinihogan ug ang ilang mga kauban moduaw sa balay ug balay, malipay kining mga tawhana sa tingog sa mensahe sa Gingharian apan dili modawat niana. Alang kanila, sama kini sa usa ka mananoy nga alawiton sa gug-ma, apan sila dili mopahinungod kang Jehova, ug sila dili maluwas sa “dakong kasakitan.”
Ang “Usa ka Magbalantay” ni Jehova
7. Unsang mga aksiyon ni Jehova sa atong panahon ikatandi sa iyang pakig-atubang sa iyang mga karnero sa mga adlaw ni Ezekiel?
7 Diha sa mensahe ni Ezekiel human nga napukan ang Jerusalem, gihukman ni Jehova ang mga tigpasipala sa Iyang balaang ngalan, ang kagamhananong “mga magbalantay sa Israel.” Pagkahaom niadtong pulonga alang sa mga magmamando sa Kakristiyanohan! (Basaha ang Ezekiel 34:1-6.) Dili sama sa Maayong Magbalantay, si Jesu-Kristo, ang politikanhong mga magmamando sa Kakristiyanohan nagpatambok sa ilang kaugalingon sa materyal nga paagi gikan sa “mga karnero.” (Juan 10:9-15) Sama sa pagluwas sa Diyos sa iyang mga karnero pinaagi sa pagtangtang sa pagkamagmamando sa hakog nga mga magbalantay dihang nalaglag ang Juda, sa ingon iyang luwason ang iyang mga karnero pinaagi sa paghikaw sa mga magmamando sa Kakristiyanohan sa ilang awtoridad sa panahon sa “dakong kasakitan.” (Pinadayag 16:14-16; 19:11-21) Nagpakita si Jehova ug gugma sa iyang samag-karnerong mga katawhan dihang iyang giluwas sila gikan sa Babilonya sa 537 W.K.P., sama sa iyang pagpakita sa maong hiyas dihang iyang gigamit ang Dakong Siro, si Jesu-Kristo, sa pagpagawas sa nanghibilin sa espirituwal nga Israel gikan sa pagkaulipon sa Babilonyang Bantogan sa 1919 K.P.-Ezekiel 34:7-14.
8. Unsay buhaton ni Jehova kon daogdaogon sa ‘tambok nga karnero’ ang panon, ug sa unsang paagi atimanon sa luyoluyong mga magbalantayng Kristohanon ang mga karnero?
8 Gihatagan sa Diyos ang iyang karnero ug malumong pag-amoma. (Basaha ang Ezekiel 34:15, 16.) Kon daogdaogon sa ‘tambok nga karnero’ ang panon sa Diyos karon, siya “pakan-on” ni Jehova pinaagi sa pagpalagpot karon ug sa kalaglagan diha sa “dakong kasakitan.” Sa 1914 nagbutang si Jehova ibabaw sa dinihogang nanghibilin ug “usa ka magbalantay” si Jesu-Kristo. Sukad sa 1935 siya nangulo sa pagtigom sa “dakong panon” sa “ubang mga karnero,” nga karong adlawa nag-alagad uban sa dinihogang ‘mga karnero sa sibsibanan ni Jehova.’ Sama sa Diyos ug ni Kristo, angay atimanon sa luyoluyong mga magbalantayng Kristohanon kining tanang mga karnero sa kalumo.—Ezekiel 34:17-31; Pinadayag 7:9; Juan 10:16; Salmo 23:1-4; Buhat 20:28-30.
Usa ka “Tanaman sa Eden”!
9. Sanglit gitino ni Jehova nga sundon sa yuta sa Juda ug Israel ang adlawng-igpapahulay, unsay iyang gihimo?
9 Palandonga pag-usab ang nalumpag nga yuta sa Juda ug Israel. Sanglit gitino sa Diyos nga sundon niini ang adlawng-igpapahulay pinaagi sa paghimo niining walay magpuyo sulod sa 70 ka tuig, siya milihok sa pagsanta sa Edom ug sa ubang mga nasod gikan sa pag-okupar niadtong teritoryoha. (2 Cronicas 36:19-21; Daniel 9:2) Sa pagkatinuod, ang Edom ug ang bukirong dapit niini sa Seir nalumpag usab, sumala sa gitagna, nga nailog sa mga Babilonyanhon sa 602-601 W.K.P.—Ezekiel 35:1-36:5; Jeremias 25:15-26.
10. Ang pagbalik sa nanghibilin sa Juda sa 537 W.K.P., nagtudlo sa unsang mga hitabo sa atong adlaw?
10 Ang pagkabalik sa nanghibilin sa Juda, sa 537 W.K.P., nagtudlo sa makalipayng mga hitabo sa atong adlaw. Sa 1919 “ang mga bukid sa Israel,” o ang espirituwal nga yuta sa dinihogang mga saksi ni Jehova, gipapuy-an pag-usab uban sa nakabalik sa espirituwal nga nanghibilin. (Ezekiel 36:6-15) Gihinloan sila sa Diyos gikan sa relihiyosong kahugawan ug gibutang kanila ang “usa ka bag-ong espiritu” nga nakapabunga kanila sa iyang balaang espiritu. (Galacia 5:22, 23) Ug aron ang ngalan ni Jehova dili mapasipalahan sa mga kalibotanon tungod kay iyang gipanton ang iyang katawhan, dagaya niyang gipanalanginan ang nanghibilin.—Ezekiel 36:16-32.
11. Kaharmoniya sa Ezekiel 36:33-36, unsay gihimo sa Diyos sa espirituwal nga yuta sa dinihogang nanghibilin?
11 Human nga mibalik ang nanghibilin sa Juda, kanang nalumpag nga yuta gihimong mabungahong “tanaman sa Eden.” (Basaha ang Ezekiel 36:33-36.) Sa susama, sukad sa 194 gihimo ni Jehova ang nalumpag niadto nga yuta sa dinihogang nanghibilin nga usa ka mabungahong espirituwal nga paraiso, nga karon gipakig-ambitan sa “dakong panon.” Sanglit kining espirituwal nga paraiso gipuy-an man sa balaang katawhan, pasagding ang dedikadog Kristohanon maningkamot sa paghimo niining mahinlo.—Ezekiel 36:37, 38.
Panaghiusa Gipasig-uli
12. Sa unsang paagi ang pagbuhi pag-usab sa karaang Hudiyohanong nasod giilustrar diha sa Ezekiel 37:1-14, ug unsa ang modernong katugbang niini?
12 Diha sa pagkabihag sa Babilonya, ang mga Hudiyo halos patay nga nasod, samag bukog diha sa uma. (Ezekiel 37:1-4) Apan unsay sunod nga nakita ni Ezekiel? (Basaha ang Ezekiel 37:5-10.) Kadtong maong mga bukog gibalikan ug kusog, gituboan ug unod, ug panit, ug gibuhi pag-usab pinaagi sa gininhawa sa kinabuhi. (Ezekiel 37:11-14) Gibanhaw sa Diyos ang Hudiyohanong nasod dihang gipahimuslan sa 42,360 ka tawo gikan sa tanang mga banay sa Israel ug 7,500 ka dili-Israelinhon ang ilang higayon sa pagpuyo pag-usab sa Juda, sa pagtukod pag-usab sa Jerusalem ug sa templo mini, ug sa pagpasig-uli sa tinuod nga pagsimba sa ilang yutang-natawhan. (Esdras 1:1-4; 2:64, 65) Sa susama, sa 1918 ang gilutos nga nanghibilin sa espirituwal nga Israel nahimong sama niadtong ugang mga bukog—namatay may labot sa ilang buluhaton sa pagsangyaw sa publiko. Apan sa 1919 gibuhi sila pag-usab ni Jehova ingong mga magmamantala sa Gingharian. (Pinadayag 11:7-12) Kining panagtugbang angay makalig-on sa atong pagsalig nga kining mga dinihogan ug ang ilang mga kauban nga naglangkob sa yutan-ong organisasyon mao ang gigamit ni Jehova karong adlawa.—Tan-awa ang 1975 Year-book of Jehovah’s Witnesses, panid 87-125.
13. Sa unsang paagi giilustrar ang organisasyonal nga panaghiusa sa karaang katawhan ni Jehova diha sa Ezekiel 37:15-20, ug unsay katugbang niini?
13 Sa unsang paagi ang pagpasig-uli sa organisasyonal nga panaghiusa taliwala sa karaang katawhan ni Jehova gilarawan? (Basaha ang Ezekiel 37:15-20.) Dunay modernong katugbang sa pag-usa sa duha ka sungkod (ang usa gitiman-an alang sa duha ka banay sa gingharian sa Juda, ug ang lain alang sa napulo ka banay sa Israel). Sa panahon sa Gubat sa Kalibotan I, gisulayan sa pagbungkag sa ambisyosong mga tawo ang panaghiusa sa mga alagad sa Diyos, apan sa 1919 ang matinumanong mga dinihogan nahiusa diha kang Kristo, ang ilang “usa ka hari” ug “usa ka magbalantay.” Dugang pa, sama sa kapin sa 7,500 ka dili-Israelinhon nga mibalik sa Juda, kadtong sakop sa “dakong panon” karon nahiusa uban sa dinihogang nanghibilin. Pagkadakong kalipay nga malakip diha sa espirituwal nga paraiso, nag-alagad kang Jehova diha sa panaghiusa ilalom sa atong “usa ka hari”!—Ezekiel 37:21-28.
Moatake si Gog!
14. Kinsa si Gog sa Magog, ug unsang aksiyon ang iyang himoon? (Ezekiel 38:1-17)
14 Sunod, usa ka dramatikanhong hitabo gi-tagna. Naglaom nga mapasipalahan ang ngalan sa Diyos ug malaglag ang Iyang katawhan, ang Gog sa Magog moatake sa nanghibilin sa espiri-tuwal nga Israel, nga naghawas sa “babaye” ni Jehova, o langitnong organisasyon. (Pinadayag 12:1-17) Si Gog mao “ang magmamando niining kalibotana,” si Satanas nga Yawa. Iyang nadawat kanang ngalang Gog human nga gipalagpot siya gikan sa langit, human nga natawo ang Gingharian sa 1914. (Juan 12:31) “Ang yuta sa Magog” mao ang dapit nga diin si Gog ug ang iyang mga demonyo gitambog sa teritoryo sa yuta. Human nga laglagon sa batok-relihiyosong mga panon ang Kakristiyanohan ug ang nahibilin sa Babilonyang Bantogan, ipahinabo ni Jehova nga atakehon ni Gog ang daw walay depensang nanghibilin sa espirituwal nga Israel ug ang ilang dedikadong mga kauban.—Ezekiel 38:1-17; Pinadayag 17:12-14.
15. Unsay mahitabo dihang atakehon ni Gog ang mga Saksi ni Jehova?
15 Unsay mahitaho dihang atakehon ni Gog ang mga Saksi ni Jehova? (Basaha ang Ezekiel 38:18-23.) Luwason ni Jehova ang iyang katawhan! Ang iyang mga hinagiban mao ang kusog nga ulan, dagkong ulan nga yelo, kalayo, tumang kamatay. Tungod sa kalibog, ang mga panon ni Gog mag-unay sa pagbakyaw sa ilang espada sa usag usa. Apan sa dili pa sila paphaon sa Diyos sa ilang paglungtad, ‘sila makaila nga siya mao si Jehova.’
16. (a) Unsay mahitabo sa “yuta sa Magog”? (b) Sa unsang paagi makaapektar kanato ang kahibalo sa gitagnang mga hitabo may labot sa Gog?
16 Dihang si Satanas ug ang iyang mga demonyo itambog sa bung-aw, “ang yuta sa Magog,” nga maoy ilang ubos nga kahimtang diha sa yuta, mahanaw sa kataposan. (Pinadayag 20:1-3) Hilabihan ka daghan ang mga hinagiban sa gubat ni Gog nga sa ingon nagkinahanglan ug igo-igong panahon sa paghipos niana. Ang mga langgam ug mga mananap maoy mokaon sa wala-malubong nga mga lawas sa panon ni Gog. Sa unsang paagi ang kahibalo bahin niining mga butanga makaapektar kanato? Aw, ang kasayoran nga haduol na ang pag-atake ni Gog ug nga luwason ni Jehova ang iyang katawhan angay mopadako sa atong pagtuo ug mohatag kanatog kalipay nga ang maong mga hitabo mosangpot sa pagbalaan sa dugay nang gipasipalahang ngalan sa Diyos!—Ezekiel 39:1-29.
Tan-awa ang Sangtuwaryo ni Jehova!
17. (a) Unsang panan-awon ang gihatag kang Ezekiel sa 593 W.K.P.? (b) Pamatuod sa unsa ang paglungtad sa templo diha sa panan-awon?
17 Sa 593 W.K.P, ang ika-14 nga tuig human nga nalumpag ang templo sa Jerusalem, si Ezekiel gihatagan ug panan-awon sa usa ka bag-ong sangtuwaryo sa pagsimba ni Jehova. Gisukod sa manulondaong giya sa manalagna dako kadto kaayo. (Ezekiel 40:1-48:35) Kining maong templo naghulagway sa “tinuod nga balongbalong, nga gipatindog ni Jehova,” ug kini dunay “mga hulad sa langitnong mga butang.” Misulod si Jesu-Kristo sa Labing Balaan, ang “langit mismo,” sa 33 K.P. aron sa pagtanyag sa Diyos sa bili sa iyang halad lukat. (Hebreohanon 8:2; 9:23, 24) Ang templo nga nakita sa panan-awon nagpamatuod nga ang putli nga pagsimba molahutay sa atake ni Gog. Pagkadakong kahupayan alang sa mga mahigugmaon sa ngalan ni Jehova!
18. Unsa ang pipila ka narekord nga mga bahin sa nakitang templo diha sa panan-awon?
18 Ang templo dunay daghang mga bahin. Pananglitan, dihay unom ka mga ganghaan sa gawas ug sa sulod nga ganghaan niini. (Ezekiel 40:6-35) Katloan ka komedor (hayan alang sa mga tawo nga mangaon sa mga halad sa komunyon ) anaa sa gawas nga sawang. (40:17) Ang halaran sa sinunog nga halad anaa sa sulod nga sawang. (43:13-17) Ang kahoyng halaran, tingali sunoganan sa insenso, anaa sa unang lawak sa templo. (41:21, 22) Ang Labing Balaan maoy 20 ka manikong gilapdon, ug ang paril libot sa templo maoy 500 ka tangbo, (5,100 ka tiil) sa kada kilid. Pagkadako nga balay nga puno sa himaya sa Diyos!—Ezekiel 41:4; 42:16-20; 43:1-7.
19. Sa unsang paagi makaapektar kanato ang mga detalye sa templo ug sa kamatuoran nga kadtong nag-alagad didto kinahanglang makaabot sa sukdanan sa Diyos?
19 Ang daghang mga detalye sa templo, mga halad, mga gasa, ug mga piyesta makapukaw kanato sa kahinungdanon sa pagsunod sa mga instruksiyon sa organisasyon sa Diyos nga mainampingon, nasayod nga ang tanang paningkamot kinahanglang himoon aron sa paghimaya kang Jehova ug sa iyang pagsimba. (Ezekiel 45:13-25; 46:12-20) Kadtong nag-alagad sa templo kinahanglang makaabot sa hataas nga mga sukdanan sa Diyos, ug sila gisugo sa pagtudlo sa mga tawo sa ‘kalainan sa butang balaan ug sa butang mahugaw.’ (Ezekiel 44:15, 16, 23) Kini angay mopalihok kanito sa paghupot sa pagkabalaan ingong katawhan ni Jehova.—Efeso 1: 3, 4.
20. (a) Unsay gisimbolohan sa tubig nga miagos gikan sa templo diha sa panan-awon? (b) Unsay epekto unya niining simbolikong tubig?
20 Gikan sa templo nag-agos ang usa ka suba nga makaayo, o gipatam-is, nga parat nga tubig sa Patayng Dagat, busa kini puno sa daghang isda. (Ezekiel 47:1-11) Kining tubiga nagsimbolo sa tagana sa Diyos sa kinabuhing dayon, lakip sa halad lukat ni Jesus, nga igo alang sa mga makalabang-buhi, sa atake ni Gog ug sa uban, lakip niadtong pagabanhawon. (Juan 5:28, 29; 1 Juan 2:2; Pinadayag 22:1, 2) Ang Patayng Dagat naghawas sa kahimtang nga niana nagalungtad ang katawhan—pagkatinunglo sa napanunod nga sala ug kamatayon ug sa pagmando usab ni Satahas. Sama sa daghang isda diha sa gipatam-is nga katubigan sa Patayng Dagat, ang nalukat nga katawhan molambo ilalom sa naayong mga kahimtang sa Mesiyanikong pagmando.
21. Unsay tagamtamon sa matinumanong katawhan diha sa bag-ong kalibotan sumala sa gipakita sa Ezekiel 47:12?
21 Ang pag-ayo nalangkit usab sa mga kahoy nga nanubo sa daplin sa suba diha sa panan-awon. (Basaha ang Ezekiel 47:12.) Diha sa bag-ong kalibotan, ang matinumanong katawhan makatagamtam sa hingpit nga pisikal ug espirituwal nga panglawas. Ug ngano man nga dili? Ang mga dahon sa mga kahoy nga nakita sa panan-awon dunay padayong mga sambog nga makaayo. Pagkadakong panalangin alang niadtong nakaila ug nag-alagad kang Jehova!
Unya Sila Makaila!
22. Unsay nagpakita nga ipahimutang sa Diyos ang mga tawo sa dapit nga iyang pilion diha sa Paraiso?
22 Pinaagi sa pagtabang sa organisasyon ni Jehova karong adlawa, atong maugmad ang mga hiyas nga mopahimo kanatong matinabangon dihang ipahimutang sa Diyos ang mga tawo nga iyang pilion diha sa yutan-ong Paraiso. Nga dunay pagpahimutang sa mga tawo gipaila sa kamatuoran nga ang mga banay gihatagan ug lugar sa amihanan ug sa habagatan sa usa ka administratibong luna nga nakita ni Ezekiel diha sa panan-awon. Kadtong tulo ka bahin nga “amot” sa yuta naglakip sa usa ka seksiyon alang sa dili mga saserdoteng Levitihanon ug laing luna alang sa saserdote nga niana nahimutang ang templo diha sa panan-awon. Diha sa sentro sa habagatan nga bahin mao ang siyudad nga dunay mga trabahante gikan sa nagkalainlaing banay ilalom sa usa ka pundok sa “pangulo,” ang samag prinsipeng mga hawas sa Mesiyas diha sa “bag-ong yuta.”—Ezekiel 47:13-48:34; 2 Pedro 3:13; Salmo 45:16.
23. Aron mahimong bahin sa nalukat nga katawhan nga magpuyo sa Paraiso, unsay atong angay buhaton karon?
23 Naentrono diha sa iyang langitnong sangtuwaryo, panalanginan sa Diyos ang simbolikong siyudad nga nakita ni Ezekiel. (Basaha ang Ezekiel 48:35.) Kanang yutan-ong lingkoranan sa administrasyun paganganlan ug Jehova-Shammah, o “Si Jehova Mismo Atua Didto.” Padayon sa pagpakita sa dili-mapakyas nga gugma alang sa Diyos, ug ikaw mahimong bahin sa nalukat nga katawhan nga magpuyo sa Paraiso, dihang walay bisan usa sa yuta mahiagom sa espirituwal nga kangitngitan kondili ang tanan makaila nga si Jehova mao ang usa nga buhi ug tinuod nga Diyos. (Habacuc 2:14) Likayi nga mapugos sa pag-ila sa ngalan sa Diyos nga supak sa imong kabubut-on dihang laglagon ang daotan. Pagbaton ug pagtuo, pagpakita nga ikaw naglaom nga mahimong usa sa mga maluwas dihang iyang tumanon ang mga pulong: “Ang mga nasod makaila nga ako mao si Jehova.”—Ezekiel 36:23.
Unsay Imong Ikasulti?
◻ Diha sa unsang mga sirkumstansiya lamang nga uyonan ni Jehova ang espirituwal nga magbalantay?
◻ Sa unsang paagi giatiman ni Jehova ang iyang mga karnero, ug sa unsang paagi tagdon sila sa Kristohanong mga magbalantay?
◻ Sa unsang paagi giilustrar ang pagkabuhi-pag-usab sa Hudiyohanong nasod? (Ezekiel 37:1-14) Unsa ang modernong katugbang niini?
◻ Kinsa si Gog sa Magog, ug unsay mahitabo dihang iyang atakehon ang mga Saksi ni Jehova?
◻ Unsay gisimbolohan sa tubig nga nag-agos gikan sa templo nga nakita diha sa panan-awon?
[Mapa/Hulagway sa panid 25]
(Alang sa aktuwal nga pagkahan-ay, tan-awa ang publikasyon)
Ang balaang amot ug mga lugar sa tribo
THE GREAT SEA
ENTERING IN TO HAMATH
DAN
ASHER
NAPHTALI
MANASSEH
EPHRAIM
REUBEN
JUDAH
THE CHIEFTAIN
Holy Contribution
En-Eglaim
BENJAMIN
SIMEON
En-gedi
ISSACHAR
ZEBULUN
Tamar
GAD
Meribath-Kadesh
Salt Sea
Jordan River
Sea of Galilee
[Hulagway sa panid 23]
Si Jehova naghatag sa iyang mga karnero ug malumo nga pag-amoma, sama sa karaang mga magbalantay. Busa ang Kristohanong mga magbalantay angay magtagad sa panon sa Diyos uban sa kalumo