15. Aron makab-ot ang dako makaayong mga kausaban sa kalibotan, unsa ang usa ka hinungdanong butang nga kinahanglang mahitabo?

¹⁵ Apan, aron may mahimong kausaban nagkinahanglan kinig dakong pagbakwi sa kahimtang sa kalihokan nga naglungtad karon. Una, nagpasabot kini nga paphaon ang tanang presenteng kagamhanan sa yuta, sanglit ang tawhanong pagmando wala gayod makapatunghag maayong mga kahimtang. Apan kining makatay-og sa yuta nga kausaban maabot sa katakos ni Jehova. Pananglitan, ang Bibliya nag-ingon: “Iyang ginailis-ilisan ang mga takna ug mga panahon, nagatangtang ug mga hari ug nagapatindog ug mga hari.”​—Daniel 2:21.

Nagatangtang sa mga Kaaway

16, 17. (a) Sa unsang paagi gitagad ni Jehova si Paraon kinsa misupak sa Iyang katuyoan? (b) Sa unsang paagi natuman ang matagnaong pulong ni Jehova?

¹⁶ Palandonga ang gihimo ni Jehova sa gamhanong mga magmamando ug sa gingharian sa nangagi, ilabina niadtong misulay sa pagbabag sa iyang mga katuyoan. Sila nangapukan ug napadpad sa hangin sama sa abog, maingon man sa ilang mga imperyo. Pananglitan, anaa kadtong si Paraon sa Ehipto nga naghimo sa katawhan sa Diyos nga ulipon. Apan si Jehova adunay katuyoan alang sa iyang mga alagad, ug iyang gipadala si Moises sa pagsulti kang Paraon sa pagpagawas kanila. Apan, sa mapahitas-on miingon si Paraon: “Kinsa si Jehova, aron ako magapatalinghog sa iyang tingog?” Siya midugang: “Ako wala makaila kang Jehova ug, labaw sa tanan, dili ako motugot sa pagpalakaw sa Israel.”​—Exodo 5:2.

¹⁷ Gihatagan ni Jehova si Paraon ug daghang higayon sa pagbag-o sa iyang hunahuna. Apan, sa matag panahon, sumala sa gipadayag sa Exodo 11:10, si Paraon ‘nagpagahi sa kasingkasing.’ Apan, si Jehova adunay dili mabuntog nga gahom. Sa miabot ang iyang tinudlong panahon, iyang gipalumsan si Paraon ug ang iyang kasundalohan sa Pulang Dagat. Ang Exodo 14:28 nag-ingon: “Walay nahibilin kanila bisan usa.” Sa laing bahin, napanalipdan ug nakagawas ang mga alagad ni Jehova. Kini, miabot sa tukmang panahon sumala sa gitagna sa matagnaong pulong ni Jehova, sa kataposan sa 400 ka tuig nga yugto nga maoy iyang gisulti ngadto sa matinumanong Abraham sa nangaging mga kasiglohan.

18. Unsay gihimo ni Jehova kang Nabucodonosor sa Babilonya? Ngano?

¹⁸ Dayon anaa si Haring Nabucodonosor sa Babilonya. Nagpasiatab siya sa iyang gahom ug mga kahimoan, ingon nga daw usa siya ka diyos. Apan ang Daniel 4:31 miingon nga “sa diha pa ang pulong sa baba sa hari, dihay usa ka tingog nga nahulog sa langit: ‘Kanimo ginapamulong, O Nabucodonosor nga hari, “Ang gingharian mibulag gikan kanimo.”’” Gisultihan siya ni Jehova nga siya ipaubos sama sa mananap sa kapatagan hangtod, sumala sa gipamulong sa bersikulo 32, “siya makaila nga ang Labing Hataas mao ang Magmamando sa Gingharian sa katawhan, ug magahatag niini kang bisan kinsa nga iyang hing-uyonan.” Mao gayod kana ang nahitabo sa tukmang panahon nga gimbut-an ni Jehova alang niana.

19. Nganong miabot ang dakong paghukom ni Jehova batok sa Babilonya ug sa magmamando niini, si Belsasar?

¹⁹ Ang kataposang hari nga nagmando sa Babilonya mao si Belsasar. Miabot na ang panahon ni Jehova aron kanang mananapong imperyo mapukan. Ngano? Tungod kay gibihag sa mga Babilonyanhon ang katawhan ni Jehova ug nagpasipala kang Jehova. Ang Daniel kapitulo 5 nag-asoy nga naghimog dakong kombira si Belsasar alang sa usa ka libo sa iyang mga opisyal. Dayon si Belsasar “nagsugo sa pagdala sa mga kopa nga bulawan ug salapi nga naagaw ni Nabucodonosor nga iyang amahan gikan sa templo [ni Jehova] didto sa Jerusalem, . . . ug gikan niini nanginom ang hari ug ang iyang mga prinsipe, ang iyang mga asawa ug mga puyopuyo.” (Daniel 5:2, 3) Matikdi kon unsay ilang sunod nga gibuhat: “Sila ming-inom sa bino, ug nanagdayeg sila sa mga diyosdiyos nga bulawan ug salapi, tumbaga, puthaw, ug kahoy ug bato.” (Daniel 5:4) Pinaagi sa pag-inom sa balaang mga kopa nga gigamit sa pagsimba kang Jehova, ilang gibiaybiay ug gipasipad-an si Jehova. Pinaagi sa pagsimba sa ilang bakak nga mga diyosdiyos, ilang gisimba si Satanas.

20, 21. Unsang balita ang gihatag ni Daniel kang Belsasar, ug sa unsang paagi kini natuman?

²⁰ Apan, niadtong gutloa usa ka makalilisang nga butang ang nahitabo. Ang mga tudlo sa usa ka kamot nakita nga nagsulat diha sa pader sa palasyo! Nakurat kaayo ang hari niini nga “nangluspad ang iyang panagway, ang iyang mga hunahuna nakapalisang kaniya, ug ang mga lutahan sa iyang hawak nangaluag, ug ang iyang mga tuhod nangurog.” (Daniel 5:6) Walay usa sa relihiyosong mga magtatambag ni Belsasar ang nakasabot sa sinulat, busa gipatawag ang alagad ni Jehova nga si Daniel sa pagbuhad niadto. Gipahibalo ni Daniel ang hari nga gikan kang Jehova ang maong balita, ug mao kini: “Giihap sa Diyos ang mga adlaw sa imong gingharian ug gitapos kini. . . . Ikaw gitimbang sa timbangan ug nakitang nakulangan. . . . Ang imong gingharian gibahin na ug gihatag ngadto sa Midianhon ug sa mga Persianhon.”​—Daniel 5:26-28.

²¹ Niadtong mismong gabhiona, gisulong sa Medianhon ug Persianhong kasundalohan ang siyudad nga miagi sa ganghaan nga gipasagdang bukas. Sumala sa gitapos sa Daniel 5:30: “Niana mismong gabhiona si Belsasar . . . gipatay.” Ang pagkapukan sa Babilonya nakatugot sa katawhan ni Jehova sa pagpauli sa ilang yutang-natawhan sa eksaktong 70 ka tuig sukad sa ilang pagkabihag. Tukma gayod kadto sa orasan ni Jehova, sumala sa gipadayag sa Jeremias 29:10.

22, 23. Sa unsang paagi giatubang ni Jehova si Haring Herodes Agripa I, kinsa misupak sa mga Kristohanon sa unsang siglo?

²² Sa unang siglo, si Haring Herodes Agripa I mao ang kataposang hari sa Palestina, nga bahin sa Imperyo sa Roma. Gipabilanggo ni Herodes si apostol Pedro, ug iyang gipanglutos ang ubang mga Kristohanon. Iya pa ganing gipapatay si apostol Santiago. (Buhat 12:1, 2) Mihikay usab si Herodes ug malaglagong gladyatoryal nga mga kombati ug ubang paganong mga pasundayag. Kining tanan nagpanghimakak sa iyang pangangkon nga usa siya ka magsisimba sa Diyos.

²³ Apan, miabot ang gitakdang panahon sa Diyos sa pagsilot niining mga kaaway. Ang Buhat 12:21 ngadto sa 23 nagsugilon kanato: “Sa adlaw nga gitagal si Herodes misul-ob sa iyang harianong besti ug milingkod sa iyang trono ug mipakigpulong. Ug misinggit ang mga tawo nga nag-ingon: ‘Kana tingog sa usa ka diyos, dili sa tawo!’” Unsay sunod nga nahitabo? Ang Bibliya nag-ingon: “Dihadiha gihampak siya sa manulonda ni Jehova, tungod kay wala niya ihatag ang himaya ngadto sa Diyos; ug gikaon siya sa mga ulod ug namatay.” Kini maoy lain pang panig-ingnan sa “pagtangtang [ni Jehova] ug mga hari,” sumala sa gipamulong sa Daniel 2:21.

Kon Unsay Kahulogan sa mga Takna ug mga Panahon ni Jehova Alang sa Atong Adlaw

“Ang matag kahoy nga wala mamungag maayong bunga pagaputlon ug igasalibay ngadto sa kalayo.”—MATEO 7:19.

1. Unsay atong makat-onan gikan sa paagi sa pag-atubang ni Jehova sa mga magmamando sa nangagi?

ANG rekord sa kasaysayan nagpamatuod sa kamatuoran nga si Jehova makahimo sa pag-ilis sa “mga takna ug mga panahon, nagatangtang ug mga hari ug nagapatindog ug mga hari.” (Daniel 2:21) Sa nangaging mga siglo, kon mosibo sa iyang katuyoan, iyang gitangtang si Paraon, Nabucodonosor, Belsasar, Herodes Agripa I, ug uban pa. ‘Apan,’ tingali moingon ang uban, ‘kadtong mga hitaboa maoy karaan na kaayong kasaysayan. Unsay labot nila kanato?’ Sila may dakog kalabotan kanato tungod kay kini adunay dakong pagtulon-an. Ang atong makat-onan gikan niadtong mga hitaboa mao nga kon moabot na ang panahon ni Jehova alang niini, iyang taposon ang pagmando sa mga lider sa kalibotan. Ug kon iyang buhaton kini, iyang hatagag gahom ang magmamando nga iyang pinili.

2. Alang sa unsa nga miabot ang takna ni Jehova sa atong adlaw?

² Sa atong adlaw, miabot na usab ang panahon ni Jehova sa “pagtangtang ug mga hari ug sa pagpatindog ug mga hari.” Apan sa dili pa “magpatindog” ug Hari nga iyang pinili, wagtangon una sa Diyos ang tanang mga magmamando niining kalibotana, maingon man ang bug-os nga sistema sa mga butang nga ilang gimandoan. Ngano? Tungod kay sila, sama kang Belsasar sa karaang Babilonya, “gitimbang ug nakitang nakulangan.” Ang kahimtang karon kaamgid sa gipamulong sa alagad sa Diyos nga si Daniel ngadto kang Belsasar: “Giihap sa Diyos ang mga adlaw sa imong gingharian ug gitapos kini.” (Daniel 5:26, 27) Busa, sa atong panahon, si Jehova “magadugmok sa mga hari sa adlaw sa iyang kasuko. Siya magpakanaog ug silot sa kanasoran.”​—Salmo 110:5, 6.

“Nakitang Nakulangan”

3, 4. Mahitungod sa kalinaw, sa unsang paagi ang mga magmamando sa kalibotan “nakitang nakulangan” niining sigloha?

³ Sa unsang mga paagi nga “nakitang nakulangan” ang mga magmamando may labot sa mga hitabo sa kalibotan? Sila sa dakong bahin ang mabasol sa nagakahitabo sa tawhanong pamilya sa atong panahon, usa ka panahon nga puno sa mga katalagman nga dili hitumbasan sa bisan unsa pang panahon. Pananglitan, sa 1914 lamang duolan sa ginatos ka milyong tawo ang nangamatay sa nagkalainlaing mga gubat! Karon, gihulga sa nukleyar nga hinagiban ang kaluwasan sa kinabuhi sa yuta. Karon mismong gutloa, libolibo sa nukleyar nga mga missile, nga may tripulanteng andam sa pagtiro, nagapunting sa mga lugar nga daghang populasyon.

⁴ Mahitungod sa nukleyar nga gubat, ang magasing Science mitaho niining makuyawng obserbasyon: ‘Diha sa bisan unsang dakong pagbayloay sa nukleyar, may kalagmitang mapuo ang dakong bahin sa tanom ug mananap sa yuta. Lakip na ang pagkapuo sa katawhan.’ Ang opisyal sa kagamhanan sa Uropa miingon: “Dili maisip ang mga kapildihan pinaagi sa mga siyudad kondili pinaagi sa tibuok nga kontinente.” Ang presidente sa nasod sa Latin Amerika miingon bahin sa gastos sa depensa: “Ang katawhan naglawig sa gabok nga barko nga may kalagmitang malunod . . . Kon kini malunod, apil ug kalunod ang tanan nga anaa niini.” Ug ang mantalaang Hapones miingon: “Ang kalibotan daw nagkalayo gikan sa [kalinaw] kay sa bisan unsang panahon sa kasaysayan.”

5, 6. Unsa ang ekonomikanhong kahimtang sa kadaghanang kayutaan ug mga katawhan?

⁵ Apan, ang kanasoran padayong nagagasto ug dugang ug dugang diha sa mga armamento. Ang gastos karon misaka ug duolan sa usa ka trilyong dolyares (U.S.) sa usa ka tuig! Ang usa ka tuboran miingon nga ang kalibotan nakagastog mga 50 ka pilo nga salapi sa matag sundalo kay gigasto niini sa matag bata nga nagtungha. Tagda, usab, ang taho sa Hiniusang Kanasoran nga nagpakita nga labing menos 450 ka milyong tawo sa kalibotan ang gipanggutom ug ang ilang gidaghanon nagsaka. Laing taho nag-ingon nga “kada tuig 30 ngadto sa 40 ka milyong tawo ang himalatyon tungod sa kagutom” sa wala maugmad nga kanasoran. Kini, nag-ingon usab, nga duolan sa katunga niadtong himalatyon maoy mga bata nga ubos sa singko anyos.

⁶ Ang usa ka opisyal sa kagamhanan sa usa ka dakong nasod sa South Africa nag-ingon nga “40 porsiento sa mga trabahante nagpuyo sa bug-os nga kakabos.” Sa laing nasod didto, naapektohan ang 51 porsientong mga mamumuo tungod sa kakulangan sa trabaho sa kaulohang siyudad niini. Ang taho mitapos: “Ang kontinente sa 260 ka milyong katawhan midangat sa pinakagrabeng kapit-osan sa katunga nga siglo.” Dayon, matikdi kining tulo ka ulohan nga gikan sa nagkalainlaing mga nasod: “‘Makalilisang’ ang Proporsiyon sa Kawalad-on.” “Misaka ang Proporsiyon sa Kawalad-on.” “Kawalad-on Masakit nga Kasinatian.” Gikan ba kining mga tahoa sa dili ugmad nga kanasoran? Dili, gikan kini sa mga opisyales sa kagamhanan sa Canada, sa Tinipong Bansa, ug sa Pederal Republika sa Alemanya. Oo, bisan ang gitawag nga adunahang nasod nagkalisodlisod usab.

7. Unsang mga obserbasyon ang gipahayag bahin sa mga krimen ug kapintasan nga kaylap sa atong panahon?

⁷ Diha sa kadaghanang kayutaan kining mga problemaha mapadayag sa bul-og sa krimen, kapintasan, ug terorismo. Pananglitan, sa Tinipong Bansa ang Federal Centers for Disease Control miingon nga sa matag tuig kapin sa 50,000 ka Amerikano ang gipamatay ug naghikog! Busa, ang editoryal sa The New York Times miingon: “Dili na makontrolar kining mga butanga.” Laing editoryal miingon: “Kini maoy panahon sa internasyonal nga kagubot.” Busa, bisan pa sa kasiglohan sa paningkamot, kasinatian, ug teknolohikal nga kauswagan, ang mga lider sa kalibotan wala makahatag sa kadaghanan sa ilang katawhan sa ilang pangunang mga panginahanglan.

8. Nagpamatuod sa unsa ang rekord sa kasaysayan?

⁸ Sa pagkatinuod, ang rekord sa kasaysayan, sa karaan ug sa moderno nagpamatuod nga ang tawo, sa iyang kaugalingon, wala makabaton sa mga kasulbaran. Ang politikal, ekonomikanhon, ug relihiyosong pagmando niining kalibotana dili gayod makapatunghag kalinaw, kasegurohan, kalipay, maayong panglawas, ug kinabuhi nga atong gitinguha ug gikinahanglan. Busa, kining kalibotana kinahanglang lalagon! Ug lalagon gayod kini kay mao kanay katuyoan ni Jehova. Maingon gayod kini sa gipamulong sa Bibliya: “Ang wasay gikataon na diha sa gamot sa mga kahoy; busa, ang tanang kahoy, nga wala mamungag maayong bunga pagaputlon ug igasalibay ngadto sa kalayo.”​—Lucas 3:9.

Laing Katarongan sa Paghukom

9. Unsay paglantaw sa mga lider sa kalibotan bahin sa mga katuyoan ni Jehova?

⁹ Ang daotang bunga nga gipamunga niining kalibotana ug sa mga lider niini mao ang usa sa katarongan kon ngano si Jehova, tapos nakatimbang sa kalibotan, nakakaplag niining nakulangan, ug magalaglag niini. Apan adunay laing katarongan: Wala tagda sa mga lider sa kalibotan si Jehova​—ang Maglalalang ug Soberano sa Uniberso​—sa ilang mga kalihokan. Wala silay tinuod nga kaikag sa iyang katuyoan o sa mga takna o mga panahon. Maoy hinungdan nga ang Unang Corinto 2:8 tukmang nag-ingon bahin kanila: “Walay bisan usa sa mga punoan sa mga sistema sa mga butang karon ang nakasabot niining [balaang] kaalam.” Busa ang Salmo 146:3 nagtambag kanato: “Ayaw pag-ibutang ang inyong pagsalig sa mga prinsipe, ni sa mga anak sa tawo nga kaniya walay kaluwasan.”

10, 11. (a) Unsa ang kinahanglang buhaton niadtong nagatinguha sa pagkahibalo kang Jehova? (b) Sa unsang paagi nahibalo ang mga alagad sa Diyos sa mga butang nga wala mahibaloi sa uban?

¹⁰ Apan, ang Proverbio 3:5, 6 miawhag: “Sumalig ka kang Jehova sa bug-os mong kasingkasing ug ayaw pagsalig sa imong kaugalingong salabotan. Sa tanan nimong mga dalan ilha siya, ug siya magatul-id sa imong mga alagianan.” Ang mga tawo nga mohimo niini dili magpabilin nga walay paglaom niining kalibotana. Panalanginan sila ni Jehova pinaagi sa iyang espiritu aron sila makadangat sa pagkahibalo sa iyang mga katuyoan ug sa iyang mga takna ug mga panahon alang kanila. Sumala sa gipamulong sa Buhat 5:32, si Jehova mohatag sa iyang balaang espiritu “ngadto kanila nga nagasunod kaniya ingong magmamando.”

¹¹ Busa ang mga alagad sa Diyos nahibalo sa mga butang nga wala mahibaloi sa mga magmamando niining kalibotana. Sila nahibalo sa mga katuyoan ni Jehova ug sa iyang mga panahon. Ang Unang Pedro 1:11 nag-ingon nga, sa nangagi, ang mga alagad sa Diyos “nagpadayon sa pagsusi kon unsang partikular nga panahon o unsang panahona ang gipasabot diha kanila sa espiritu.” Pinaagi sa balaang espiritu nga nagpadayag niini, si apostol Pablo nakaingon ngadto sa tinuod nga kaubang mga magsisimba: “Kamo nahibalo sa panahon.” (Roma 13:11) Sanglit ang mga alagad ni Jehova karon nagsunod kaniya ingong magmamando, ang balaang espiritu sa Diyos nagbutyag usab ngadto kanila kon unsa nang panahona kini sumala sa iyang panglantaw. Ang Amos 3:7 nag-ingon: “Ang Soberano Ginoong Jehova dili magbuhat sa bisan unsa gawas kon ang iyang tinago ipadayag niya sa iyang mga alagad nga mga manalagna.”

Lain Pang Katarongan

12, 13. Unsa ang laing malig-ong katarongan kon nganong nakita ni Jehova kining kalibotana ug ang mga lider niini nga nakulangan?

¹² Moagak kini kanato sa lain pa gayong katarongan kon nganong nakita ni Jehova kining kalibotana ug ang mga lider niini nga nakulangan ug molaglag kanila. Hinumdomi ang gihimo ni Paraon, Belsasar, Herodes, ug ubang mga magmamando sa nangagi sa mga alagad ni Jehova. Sila mibatok, milutos, ug mipatay pa gani kanila. Kadtong maong mga magmamando may tulobagon sa Diyos tungod niadto.

¹³ Kaamgid usab kini sa atong panahon. Ang nagkalainlaing mga magmamando sa kalibotan misupak, milutos, ug nagpamatay pa gani sa makigdaitong mga alagad ni Jehova. Kining mga magmamandoa “nagasultig dagkong mga pulong batok sa Labing Hataas, ug . . . padayong nagasakit sa mga balaan sa Labing Gamhanan.” (Daniel 7:25; 11:36) Apan ang dinasig nga asoy sa Isaias 54:17 mipahayag: “Walay hinagiban nga gibuhat batok kanimo nga magmalamposon . . . Mao kini ang panulondon sa mga alagad ni Jehova.” Busa, ang tanang mga kaaway ipaubos, sama sa uban sa nangagi. Sa laing bahin, nagsaad si Jehova ug kaluwasan ug kauswagan sa iyang katawhan.

Haduol na ang Kataposang Panahon

14, 15. (a) Unsang yugtoa sa panahon nga kita nagakinabuhi, ug unsang mga pasidaan ang kinahanglan natong sundon? (b) Bisan pa sa mga paningkamot sa mga lider sa kalibotan unsa ang moabot sa madali?

¹⁴ Busa, unsa nang panahona kini sumala sa panglantaw sa Diyos? Panahon na kini sa kataposan niining kalibotana. Misalop na ang adlaw niini. Nagkakilumkilum na. Hapit nang moabot ang tingtugnaw diha niini. Ang tanang ebidensiya sa katumanan sa tagna sa Bibliya ug sa orasan ni Jehova nagpakita nga kita nagkinabuhi na sa “kataposang mga adlaw,” sa “konklusyon sa sistema sa mga butang.” (2 Timoteo 3:1-5) Busa kinahanglang atong patalinghogan ang pasidaan ni Jesus: “Padayon kamo sa pag-ampo nga ang inyong pagkalagiw dili mahitabo sa tingtugnaw.” (Mateo 24:20) Kon moabot ang gabii, o tingtugnaw niining kalibotana, ulahi na unya kaayo ang pagpangita sa kahimuot ni Jehova.

¹⁵ Ang panahon sa paglaglag niining mapasipalahon sa Diyos nga kalibotan moabot sa madali. Kon kini moabot, puwersadong tangtangon ni Jehova ang tanang mga magmamando sa kalibotan gikan sa pangatungdanan. Bisan unsa pa sila ka sinsero, ang ilang walay bunga ug walay paglaom nga mga plano matapos. Tinuod, mosulay sila sa paglipay sa ilang katawhan pinaagi sa kasabotan bahin sa mga hinagiban ug sa nagkalainlaing mga plano alang sa kalinaw ug kasegurohan, bisan pa sa ‘balaang mga tuig,’ apan ang martsa magapadayon hangtod sa kataposang paghusay diha sa gubat sa Diyos sa Armageddon.​—Pinadayag 16:13-16.

16. Kinsay gihatagan ni Jehova sa pagmando sa kalibotan?

¹⁶ Dugang pa, hinumdomi nga dili lang kay “nagatangtang ug mga hari” si Jehova kondili siya “nagapatindog ug mga hari.” (Daniel 2:21) Ang langitnong mga kasundalohan nga gamiton ni Jehova sa pagpakanaog sa iyang mga paghukom sa Armageddon pangunahan sa usa ka Magmamando nga iyang ‘gipatindog’ alang sa tibuok yuta. Kanang usa mao ang iyang matinumanong Anak, si Jesu-Kristo, nga karon napahiluna na sa langitnong gahom ug himaya. Gitawag siya sa Pinadayag 19:16 nga “Hari sa mga hari ug Ginoo sa mga ginoo.” Ang Daniel 7:14 nag-ingon: “Ngadto kaniya gihatag ang pagmando ug himaya ug gingharian, aron ang katawhan, mga nasod ug pinulongan manag-alagad kaniya. Ang iyang pagmando mao ang pagmando nga walay kataposan nga dili umalagi, ug ang iyang gingharian mao kadtong dili mabungkag.”​—Tan-awa usab ang Daniel 2:44.

17, 18. (a) Unsay gipahayag sa Pulong sa Diyos nga mahitabo niadtong dili moila kaniya ug sa iyang tinudlong Magmamando alang niining yutaa? (b) Kinsa pa ang nahibalo nga hamubo na lamang ang panahong nahibilin?

¹⁷ Sa yanong pinulongan ang matagnaong Pulong sa Diyos nagsulti kanato kon unsay mahitabo niadtong dili modawat kang Jehova ug sa iyang tinudlong Magmamando sa tibuok yuta. Kini nag-ingon: “Ug unya nakita ko ang usa ka manulonda nga nagtindog sa adlaw, ug siya misinggit sa makusog nga tingog ug gisinggitan ang tanang mga langgam nga nanaglupad sa kinatung-an sa kalangitan: ‘Umari kamo, tambong kamo sa dakong panihapon sa Diyos, sa pagkaon sa unod sa mga hari ug sa unod sa mga kapitan ug sa unod sa mga kusgan ug sa unod sa mga kabayo ug sa unod sa nagkabayo kanila, ug sa unod sa tanang tawong gawas ug sa ulipon ug sa diyutay ug sa mga dagko.’”—Pinadayag 19:17, 18.

¹⁸ Gibatbat sa Jeremias 25:33 kini niining paagiha: “Ug ang mga pinatay ni Jehova niadtong adlawa molukop gikan sa usa ka tumoy sa yuta ngadto sa laing tumoy sa yuta. Sila dili pagahilakan, ni pagahiposon o igalubong. Sila mahimong kinalibang sa ibabaw sa nawong sa yuta.” Oo, kataposan na kining panahon sa bug-os nga daotang sistema sa mga butang ni Satanas. Ug bisan siya nasayod niana! Ang Pinadayag 12:12 nag-ingon nga siya nasayod nga “hamubo nga lamang ang iyang panahon” nga nahabilin.