PANGANOD

Usa ka makitang pundok sa mga partikulo, nga sagad tubig o yelo, nga nag-utaw-utaw sa ibabawng kahanginan. Ang pangunang Hebreohanong pulong alang sa “panganod” maoy ʽa·nanʹ, nga sa kadaghanan nagpunting sa haligi sa “panganod” nga nagtultol sa mga Israelinhon latas sa desyertong kamingawan. (Ex 13:21) Ang “manipis nga abog,” “kapanganoran,” “panganoron nga kalangitan,” ug “kalangitan” mao ang gipasabot sa mga porma sa Hebreohanong shaʹchaq, nga gikan sa lintunganayng pulong nga nagkahulogang “dugmok nga pino; magahilis.” (Isa 40:15; Sal 36:5; Jer 51:9; Sal 89:37; Sal 18:42; Job 14:19) Ang Gregong mga pulong nga nagkahulogang “panganod” maoy neʹphos ug ne·pheʹle, samtang ang gnoʹphos nagtumong sa “dag-om.”​—Heb 12:1; Mat 17:5; Heb 12:18.

Sa Israel, gikan sa tungatunga sa Hunyo hangtod sa tungatunga sa Septiyembre, tin-aw ang kalangitan sa katibuk-an, gawas lamang sa mga panganod nga abog nga motungha ilabina sa hinapos sa ting-init, tungod sa init nga hangin sa S gikan sa desyerto. Dugang pa, ilabina sa Agosto, adunay panalagsang cirrostratus nga mga panganod gikan sa K nga dili magdalag ulan. Hinuon kini magustohan sa mga molupyo tungod kay kini mohatag ug diyutayng landong ug busa mohatag ug diyutayng kahupayan gikan sa kainit. (Isa 25:5; itandi ang Job 7:2.) Sa Septiyembre o Oktubre ang mga panganod subsob nga motungha sa kasadpang kapunawpunawan, nga magpundok ibabaw sa Mediteranyo, bisan tuod nga sagad sa tungatunga pa sa Oktubre magsugod ang ting-ulan. Apan sa ting-init, sa pipila ka bahin sa nasod, adunay mga gabon inigkabuntag nga mawala dayon inigsidlak sa adlaw.​—Os 6:4.

Sa ting-ulan, mahimong kalit kaayong motungha ang usa ka unos, nga magsugod ingong usa ka gamay kaayong panganod sa K. (1Ha 18:​44, 45) Ang paglaom sa mag-uuma modako inigtungha sa mga panganod ibabaw sa kasadpang mga bahin. (Luc 12:54) Apan, ang usa nga nagpanuko sa pag-ani tungod kay nagalantaw sa dili-matag-an nga mga panganod mawad-an sa iyang anihon. Kini nga kamatuoran gigamit sa pagtambag sa mga alagad sa Diyos nga magpadayon sa ilang buluhaton ubos sa tanang matang sa panahon.​—Ecc 11:4.

Ang kaalam ug pagkagamhanan ni Jehova nga Diyos nga Maglalalang gihawasan pinaagi sa iyang pagkontrolar sa mga panganod. Gihisgotan niya kini ingong “mga banga” nga magyabo ug magbubo sa mga sulod niini diha sa yuta. Siya miingon: “Kinsay tukmang makaihap sa mga panganod pinaagi sa kaalam, o ang mga banga sa langit​—kinsay makayabo kanila?” (Job 38:37) Iyang gihubit ang proseso sa pag-alisngaw ug pagpanibug-ok sa tubig, nga nag-ingon: “Iyang giisa sa itaas ang mga tinulo sa tubig; sila nasala ingong ulan alang sa iyang gabon, mao nga ang mga panganod motaligsik, sila motulo nga madagayaon ibabaw sa katawhan. Sa pagkatinuod, kinsay makatugkad sa mga lut-od sa panganod, sa mga dinaguok gikan sa iyang balongbalong?”​—Job 36:27-29.

Masambingayong Paggamit. Si Jehova, nga kaniya walay tawong makakita ug mabuhi pa, nagsimbolo sa iyang presensiya pinaagig usa ka panganod. Didto sa Bukid sa Sinai, sa panahon nga gihatag ang Balaod ngadto sa Israel, ang dag-om mitabon sa bukid; gikan sa panganod migula ang mga kilat ug dalugdog, ang budyong sa trompeta, ug ang makusog nga tingog. (Ex 19:16-19; 24:15; Heb 12:​18, 19) Gisultihan ni Jehova si Moises nga siya nagpakita niining paagiha aron nga siya makapakigsulti kang Moises ug, sa pagkadungog niini, ang katawhan magbutang ug pagtuo kang Moises ingong hawas sa Diyos.​—Ex 19:9.

Gipadala ni Jehova ang usa ka manulonda diha sa usa ka panganod ingong “iyang kaugalingong mensahero” sa pag-agak sa Israel pagawas sa Ehipto ug latas sa kamingawan. (Isa 63:9) Pinaagi sa hawas nga manulonda, si Jehova mitan-aw gikan sa panganod aron sa pagpaguliyang sa kampo sa mga Ehiptohanon. (Ex 13:​21, 22; 14:​19, 24, 25) Gigamit usab ni Jehova ang panganod sa pagbawtismo kanila ingong nasod ngadto kang Moises, nga ang katubigan anaa sa ilang isigkakilid ug ang panganod anaa sa ibabaw ug sa likod. Busa sila “nabawtismohan ngadto kang Moises pinaagi sa panganod ug sa dagat.”​—1Co 10:2; tan-awa usab ang Num 14:14.

Sa dihang gipatindog ang tabernakulo didto sa kamingawan, ang panganod mipuyo ibabaw niini ug “ang himaya ni Jehova mipuno sa tabernakulo,” mao nga si Moises dili makasulod. (Ex 40:​34, 35; itandi ang 1Ha 8:10-12; Pin 15:8.) Human niini ang panganod mipondo ibabaw sa Labing Balaan, diin didto nahimutang ang arka sa pakigsaad, ug ang panganod nahimong haligi sa kalayo inigkagabii. Walay duhaduha kini nga panganod makita sa bisan haing dapit sa kampo, mao nga nahimo kining sentro sa kampo. Sa dihang kini mopataas, ang Israel mangandam sa paggikan. Sa dihang kini mobalhin, mosunod sila sa direksiyon niini alang sa sunod nga dapit nga kampohan, bisan tuod ang eksaktong dapit nga kampohan mahimong gipili uban sa tabang ni Hobab, nga suheto kaayo sa dapit, lakip ang mga dapit nga daghag tubig ug ang ubang mga bahin sa dapit nga angayang kampohan alang sa maong hilabihan ka dakong panon.​—Ex 40:34-38; Num 10:29-32.

Sulod sa Labing Balaan, ibabaw sa arka sa pakigsaad, mao ang usa ka panganod nga hayag kaayo, ang bugtong kahayag nga nagdan-ag sa maong lawak. (Lev 16:2) Sa pinulongang Hebreohanon human sa kapanahonan sa Bibliya, kini gitawag nga Shechinah. Sa dihang mosulod ang hataas nga saserdote ngadto sa Labing Balaan sa Adlaw sa Pagtabon-sa-Sala dala ang dugo sa mga hayop, siya sa simbolikong paagi nagbarog sa presensiya ni Jehova. Sa ubang mga panahon, sa dihang siya dili mosulod ngadto sa Labing Balaan apan mobarog atubangan sa kortina aron magpakisayod kang Jehova alang sa iyang tubag maylabot sa usa ka mahinungdanong butang, siya giisip nga nagbarog atubangan kang Jehova.​—Num 27:21.

Sa usa ka hitabo ang kaugalingong tingog ni Jehova nadungog gikan sa hayag nga panganod, nga nagpahayag ug pag-uyon sa iyang bugtong nga Anak. Kini mao ang hayag nga panganod nga naglandong kang Jesus ug sa iyang tulo ka apostoles nga si Pedro, Santiago, ug Juan didto sa bukid diin nahitabo ang pagkausab sa dagway.​—Mat 17:5.

Sa dihang si Jesus mikayab sa langit, sumala sa rekord, “usa ka panganod ang misakgaw kaniya gikan sa ilang panan-aw.” (Buh 1:9) Ang mga tinun-an wala makakita kang Jesus nga nagsakay sa usa ka panganod, apan hinunoa, nasalipdan siya sa panganod maong sila wala na makakita kaniya. Kini motabang kanato sa pagsabot sa mga pulong ni Jesus maylabot sa iyang presensiya: “Ilang makita ang Anak sa tawo nga moanhi diha sa panganod uban ang gahom ug dakong himaya,” ug sa giingon sa Pinadayag: “Siya moanhi uban sa mga panganod, ug ang tanang mata makakita kaniya.” (Luc 21:27; Mat 24:30; Pin 1:7) Sa nahisgotang mga kahimtang ang mga panganod naghawas sa dili-makitang presensiya; apan ang mga nakaobserbar “makakita” sa kahulogan niini pinaagi sa ilang “mga mata” sa hunahuna. Niining bahina ang makitang pisikal nga mga panghitabo magpaarang sa usa ka tawo nga nagtan-aw nga “makakita” o makasabot sa dili-makitang presensiya ni Kristo.​—Tan-awa usab ang Mat 24; Mar 13; Pin 14:14.

Sa dihang si Jesus mianhi sa yuta, uban ang tanang ilhanan sa pagka-Mesiyas, ang mga Hudiyo sa pagkamahakogon wala moila kaniya tungod kay ilang gipangayo ingong pamatuod sa iyang pagka-Mesiyas nga literal niyang tumanon ang panan-awon sa Daniel 7:​13, 14, diin ang Anak sa tawo gipakitang nagsingabot uban sa mga panganod sa kalangitan atubangan sa Karaan sa mga Adlaw, si Jehova nga Diyos, aron sa pagdawat sa iyang gingharian. Nasaypan nila ang iyang presensiya labot sa pagmando sa Gingharian ingong ang iyang unang pag-abot. Iyang gisultihan sila nga walay ingon nianang ilhanan nga ihatag kanila.​—Luc 11:29.

Pabor. Ang “mga panganod” may maayong kahulogan alang niadtong kinsa nakapahimuot sa Diyos. Ang Proverbio 16:15 nag-ingon nga ang maayong kabubut-on sa hari maoy “ingon sa panganod sa ulan sa tingpamulak.” Ang kahimtang nga tabonan o salipdan sa panganod ang usa ka butang aron kini dili makita gigamit sa paghubit sa buhaton ni Jehova sa mga sala sa iyang katawhan, sa pagpapas sa ilang mga kalapasan “ingon sa panganod.” (Isa 44:22) Sa kasukwahi, iyang alihan pinaagi sa bagang panganod ang pagduol niadtong mga rebelyoso, aron ang ilang pag-ampo dili makalahos.​—Lam 3:44.

Pagkadaling-mahanaw, pagkadili-kasaligan. Ang gabon sa kabuntagon nga dali rang mahanaw sa mahulagwayon gigamit sa pagtumong sa mabalhinon, dili-magdugay nga mahigugmaong-kalulot sa Epraim ug Juda ngadto sa Diyos, maingon man usab sa hamubong paglungtad sa Epraim tungod sa ilang pagliso ngadto sa bakak nga pagsimba.​—Os 6:4; 13:3.

Ang tawong nanghambog bahin sa iyang pagpanghatag, apan wala gayod maghimo niana, makapahigawad sama ra sa panganod nga walay ulan. (Pr 25:14) Kadtong nangangkon nga mga Kristohanon apan nagpadayon sa imoralidad, nagadaot ug nagahugaw sa kongregasyon, gipakasama sa mga panganod nga walay-tubig nga gipadpad sa hangin tungod sa ilang matinguhaong pagsunod sa unodnong mga pangibog.​—Jud 12; tan-awa ang GABON.