AKOR

[Pagkasinalikway; Kasamok].

Usa ka walog o ubos nga patag nga nahimong bahin sa AS nga utlanan sa tribonhong teritoryo sa Juda. (Jos 15:7) Ang ngalan sa walog, nga nagkahulogang “Pagkasinalikway; Kasamok,” namugna tungod kay kini mao ang dapit diin si Acan ug ang iyang panimalay gibato hangtod nga namatay. Si Acan, tungod sa iyang pagkawat ug pagtago sa pipila ka inagaw gikan sa pagkabihag sa Jerico, nagdalag pagkasinalikway sa nasod sa Israel, lakip ang kapildihan sa ilang unang pagsulong sa Ai.​—Jos 7:5-26.

Gituohan sa pipila nga ang Walog sa Akor mao ang Wadi el Qilt, usa ka samag-lugot nga bul-oganang walog nga molatas duol sa Jerico. Apan, ang paghubit sa lokasyon niini ingon sa gipakita sa Josue 15:7 mopatim-aw nga nahimutang kini dapit sa H, ug ang giingon sa Isaias 65:10 nagpaila ug mas lapad, mas dako nga luna. Tungod niini, gituohan nga lagmit mao kini ang el Buqeiʽa (Biqʽat Hureqanya), usa ka umaw, ubos nga patag sa bukid o dal-as, nga miabot ngadto sa A ug sa H tabok sa Wadi Qumran (Nahal Qumeran) duol sa AK nga tumoy sa Patayng Dagat. Ang arkeolohikanhong pagsusi didto nagpakita nga dihay mga dapit sa karaang mga lungsod o mga kuta maingon man mga sistema sa mga diki.

Sa Oseas 2:15 si Jehova nahinumdom sa pagkabatan-on sa Israel panahon sa Pagpanggula, ug sa usa ka tagna sa pagpasig-uli gumikan sa umaabot nga pagkabihag, siya nagsaad nga “ang ubos nga patag sa Akor,” nga kanhi usa ka dapit sa pagkasinalikway, mahimo na unyang “usa ka ganghaan ngadto sa paglaom.” Ug, bisan pag ang dapit maoy usa ka kamingawan, diha sa samang tagna sa pagpasig-uli, gitagna sa Diyos nga ang ubos nga patag sa Akor mahimong “usa ka dapit-pahulayan sa mga baka.”​—Isa 65:10.