TUNTON

Usa ka pisi nga ang tumoy gisab-itan ug metal, bato, o lapok ingong pangpabug-at aron magpabiling tul-id ang pisi ug tungod niana mahimong makatukod ug mga paril ug ubang mga tinukod nga tul-id ug eskuwalado. Ang pangpabug-at mismo usahay tawgon nga tunton. Ang mga panday, mga kantero, ug ubang mga artesano sa karaang kapanahonan migamit ug tunton.

Maylabot sa pagtukod pag-usab sa templo sa Jerusalem, si Zorobabel gihulagway nga adunay tunton diha sa kamot, nga sa literal, “ang bato [o, pabug-at], ang lata,” sumala sa Masoretikong teksto. (Zac 4:​9, 10) Ingon sa gitagna, dili lamang ang patukoranan sa templo ang gipahiluna ni Zorobabel kondili ubos sa iyang pagdumala natapos ang buluhaton.​—Esd 3:8-10; 6:​14, 15.

Diha sa panan-awon, nakita ni Amos si Jehova nga nagtindog diha sa usa ka paril nga gitukod ginamit ang usa ka tunton, ug busa usa ka paril nga sa sinugdan tul-id ug eskuwalado. Si Jehova nakita nga nagbitbit ug usa ka tunton, ug ang manalagna gisultihan nga ang Diyos nagpahimutang ug tunton diha sa taliwala sa Iyang katawhan. Sanglit ang Israel wala makakab-ot sa sukdanan sa pagkatul-id sa espirituwal nga paagi, nga wala molihok uyon sa mga kinahanglanon sa Diyos, si Jehova magpakanaog ug hustisya ug ‘dili na magpasaylo pa niini.’ Ang hatag-as nga mga dapit sa Israel mahimong biniyaan, ang iyang mga sangtuwaryo pagagun-obon, ug ang Diyos “motindog batok sa balay ni Jeroboam uban ang usa ka espada.” (Am 7:7-9) Uyon niini nga mga pulong, ang Israel gipukan ug ang Samaria gilaglag sa mga Asiryanhon niadtong 740 W.K.P.