EPRATA

[Pagkamabungahon].

1. Ang asawa ni Caleb (Kelubai) nga anak nga lalaki ni Hesron sa tribo ni Juda. Siya naminyo kang Caleb samtang sila naulipon pa sa Ehipto, human sa kamatayon sa asawa ni Caleb nga si Azuba. Si Eprata nahimong inahan ni Hur ug sa ulahi nahimong apohan-sa-tuhod ni Bezalel, ang batid nga artesano nga ilado kaayo sa pagtukod sa tabernakulo.​—1Cr 2:​9, 19, 50; 4:4; Ex 35:30-35.

2. Lagmit ang unang ngalan sa Betlehem o usa ka ngalan nga gigamit sa dapit nga palibot niini. Ang mga ngalan nga Betlehem ug Eprata duyog nga gigamit sa ubay-ubayng mga teksto. Ang asoy bahin sa kamatayon ni Raquel nag-ingon nga siya gilubong “samtang nagpaingon sila sa Eprat [Eprata], buot ingnon, Betlehem.” (Gen 35:​16, 19; 48:7) Ang mga sakop sa banay ni Elimelek gitawag ug “mga Epratahanon gikan sa Betlehem,” ug didto sa Betlehem mibalik ang iyang nabalong asawa nga si Noemi gikan sa Moab. (Ru 1:​2, 19) Ang panalangin nga gilitok alang kang Boaz sa panahon sa iyang kaminyoon kang Ruth maoy aron siya mahimong “tinamod sa Eprata ug mahimong inila sa Betlehem.” (Ru 4:11) Ug sa kataposan, sa tagna labot sa pagkatawo sa Mesiyas, ang mga ngalan gikombinar ingong “Betlehem Eprata.” (Miq 5:2) Tungod niini mopatim-aw nga ang paghisgot sa Eprata diha sa Salmo 132:​6, nga naghisgot labot sa kabalaka ni David alang sa arka sa pakigsaad, mapadapat usab ngadto niining pinuy-anang lungsod ni David.​—Tan-awa ang BETLEHEM Num. 1.