Ang mga Alagad ni Jehova Adunay Tinuod nga Paglaom
“Ang mga nahibilin ni Jacob mahimong sama sa yamog gikan kang Jehova sa taliwala sa daghang mga katawhan . . . nga wala maglaom sa tawo.”—MIQUEAS 5:7.
1. Sa unsang paagi ang espirituwal nga Israel maoy usa ka tuboran sa kahayahay?
SI Jehova mao ang dakong Magbubuhat sa ulan ug yamog. Walay-kapuslanan nga molaom sa mga tawo sa pagtagana ug yamog o kaha ulan. Misulat si manalagnang Miqueas: “Ang mga nahibilin ni Jacob mahimong sama sa yamog gikan kang Jehova sa taliwala sa daghang mga katawhan, sama sa dagayang ulan sa katanoman, nga wala maglaom sa tawo o maghulat sa mga anak sa yutan-ong tawo.” (Miqueas 5:7) Kinsa ang modernong-adlaw nga “mga nahibilin ni Jacob”? Sila mao ang espirituwal nga mga Israelinhon, ang nahibilin sa “Israel sa Diyos.” (Galacia 6:16) Alang sa “daghang mga katawhan” sa yuta, sila maoy sama sa makapahayahay nga “yamog gikan kang Jehova” ug “dagayang ulan sa katanoman.” Oo, ang dinihogang mga Kristohanon karon maoy panalangin gikan sa Diyos alang sa katawhan. Ingong mga magmamantala sa Gingharian, gigamit sila ni Jehova sa paghatag sa mga tawo sa iyang mensahe sa tinuod nga paglaom.
2. Nganong kita adunay tinuod nga paglaom bisan pag nagkinabuhi niining gubot nga kalibotan?
2 Dili ikatingala nga kining kalibotana walay tinuod nga paglaom. Ang kahuyang sa politika, moral nga kadaot, krimen, krisis sa ekonomiya, terorismo, gubat—atong madahom ang maong mga butang diha sa kalibotan nga gidominar ni Satanas nga Yawa. (1 Juan 5:19) Daghan ang nahadlok kon unsay mahitabo sa umaabot. Apan, ingong mga magsisimba ni Jehova, kita dili mahadlok, kay kita adunay seguradong paglaom alang sa umaabot. Kana maoy tinuod nga paglaom tungod kay kana gipasukad sa Pulong sa Diyos. Kita adunay pagtuo kang Jehova ug sa iyang Pulong tungod kay ang iyang isulti kanunayng matuman.
3. (a) Nganong si Jehova molihok batok sa Israel ug Juda? (b) Nganong ang gisulti ni Miqueas mapadapat karon?
3 Ang dinasig-sa-Diyos nga tagna ni Miqueas magpalig-on kanato sa paglakaw diha sa ngalan ni Jehova ug maghatag kanato ug pasukaranan alang sa matuod nga paglaom. Sa ikawalong siglo W.K.P., sa dihang si Miqueas nanagna, ang katawhang may pakigsaad sa Diyos nabahin ngadto sa duha ka nasod—ang Israel ug Juda—ug ang duha wala magtagad sa pakigsaad sa Diyos. Ang resulta mao ang moral nga kadaot, relihiyosong apostasya, ug naghingapin nga materyalismo. Busa, nagpasidaan si Jehova nga siya molihok batok kanila. Siyempre, ang mga pasidaan sa Diyos gitumong ngadto sa mga tawo nga nabuhi sa panahon ni Miqueas. Apan, ang modernong-adlaw nga situwasyon susama gayod nianang sa panahon ni Miqueas nga ang iyang gisulti mapadapat usab karon. Madayag kini samtang atong konsiderahon ang hinungdanong mga punto sa pito ka kapitulo sa basahon sa Miqueas.
Kon Unsay Gipadayag sa Sumaryo
4. Unsang impormasyon ang gihatag sa Miqueas kapitulo 1 hangtod sa 3?
4 Susihon nato sa daklit ang mga unod sa basahon sa Miqueas. Sa kapitulo 1, giyagyag ni Jehova ang pag-alsa sa Israel ug Juda. Tungod sa ilang pagkamalinapason, ang Israel pagalaglagon ug ang silot sa Juda makaabot bisan hangtod sa mga ganghaan sa Jerusalem. Ang kapitulo 2 nagpadayag nga ang mga adunahan ug gamhanan nagdaogdaog sa mga mahuyang ug walay-mahimo. Bisan pa niana, may saad usab ang Diyos. Ang katawhan sa Diyos tapokon ug hiusahon. Ang kapitulo 3 nagtaho bahin sa gipahayag ni Jehova batok sa mga pangulo sa nasod ug sa malinapasong mga manalagna. Ang mga pangulo nagtuis sa hustisya, ug ang mga manalagna naglitok ug mga bakak. Bisan pa niini, si Miqueas gihatagan ug gahom sa balaang espiritu aron sa pagpahayag sa nagsingabot nga paghukom ni Jehova.
5. Unsay diwa sa Miqueas mga kapitulo 4 ug 5?
5 Ang kapitulo 4 nagtagna nga sa kataposang bahin sa mga adlaw, ang tanang nasod moadto sa hataas nga bukid sa balay ni Jehova aron magpatudlo kaniya. Sa dili pa kana mahitabo, ang Juda madestiyero sa Babilonya, apan luwason siya ni Jehova. Ang kapitulo 5 nagpadayag nga ang Mesiyas matawo sa Betlehem sa Juda. Siya magabantay sa iyang katawhan ug magaluwas kanila gikan sa daogdaogang mga nasod.
6, 7. Unsang mga punto ang gipresentar diha sa mga kapitulo 6 ug 7 sa tagna ni Miqueas?
6 Nasulat sa Miqueas kapitulo 6 ang mga akusasyon ni Jehova batok sa iyang katawhan diha sa matang sa usa ka legal nga kaso. Unsay iyang nahimo nga nagrebelde man sila? Wala. Sa pagkatinuod, ang iyang mga kinahanglanon makataronganon kaayo. Buot niya nga ang iyang mga magsisimba magpasundayag ug hustisya ug magmaluloton ug magmakasaranganon samtang sila magalakaw uban kaniya. Imbes buhaton kana, ang Israel ug Juda mialsa ug kinahanglang makaagom sa mga sangpotanan niana.
7 Sa kataposang kapitulo niining tagnaa, gisaway ni Miqueas ang pagkadaotan sa mga tawo nga nabuhi sa iyang panahon. Apan, wala maluya ang iyang buot kay siya determinadong ‘magpakita ug mahulatong tinamdan’ kang Jehova. (Miqueas 7:7) Ang kataposang bahin sa libro naghatag ug pasalig nga si Jehova maluoy sa iyang katawhan. Ang kasaysayan nagpamatuod nga natuman kining maong paglaom. Sa 537 W.K.P., sa dihang natapos ang pagdisiplina ni Jehova sa iyang katawhan, maluluy-on niyang gipasig-uli ang usa ka nahibilin ngadto sa ilang kaugalingong yuta.
8. Unsaon nimo pagsumaryo ang mga unod sa basahon sa Miqueas?
8 Pagkanindot nga impormasyon ang gipadayag ni Jehova pinaagi kang Miqueas! Kining inspirado nga basahon naghatag ug pasidaang mga panig-ingnan kon sa unsang paagi ang Diyos makiglabot niadtong nag-angkon nga nag-alagad kaniya apan wala magmatinumanon. Kini nagtagna sa mga panghitabo karon. Ug kini naghatag sa tambag sa Diyos kon unsaon nato paggawi niining malisod nga mga panahon aron molig-on ang atong paglaom.
Ang Soberanong Ginoong Jehova Nagsulti
9. Sumala sa Miqueas 1:2, unsay buhaton ni Jehova?
9 Susihon nato karon ang basahon ni Miqueas nga mas detalyado. Sa Miqueas 1:2, atong mabasa: “Patalinghog, Oh kamong mga katawhan, kamong tanan; pamati, Oh yuta ug ang tanan nga anaa kanimo, ug tugoti nga mahimong saksi batok kaninyo ang Soberanong Ginoong Jehova, si Jehova gikan sa iyang balaang templo.” Kon ikaw nagkinabuhi pa sa panahon ni Miqueas, kanang mga pulonga sa walay duhaduha nakadani sa imong pagtagad. Sa pagkatinuod, nadani niini ang imong pagtagad tungod kay si Jehova nagasulti gikan sa iyang balaang templo ug nagsulti dili lamang ngadto sa Israel ug Juda kondili sa mga tawo usab sa tanang dapit. Sa adlaw ni Miqueas, ang mga tawo dugay na kaayong wala magtagad sa Soberanong Ginoong Jehova. Sa dili madugay, mausab kana. Si Jehova determinadong mohimog mahukmanong aksiyon.
10. Nganong hinungdanon kanato ang giingon sa Miqueas 1:2?
10 Mao usab sa atong panahon. Ang Pinadayag 14:18-20 nagpakita nga si Jehova nagpadala na usab ug mga mensahe gikan sa iyang balaang templo. Sa dili madugay mohimo siyag mahukmanong aksiyon, ug ang hinungdanong mga hitabo makatugaw na usab sa katawhan. Niining panahona, ang daotang “paras sa yuta” iitsa ngadto sa dakong pug-anan sa kasuko ni Jehova, nga moresulta sa bug-os nga kalaglagan sa sistema sa mga butang ni Satanas.
11. Unsay kahulogan sa giingon sa Miqueas 1:3, 4?
11 Pamati sa pagabuhaton ni Jehova. Ang Miqueas 1:3, 4 nag-ingon: “Tan-awa! si Jehova nagagula gikan sa iyang dapit, ug siya tinong manaog ug magatamak sa hatag-as nga mga dapit sa yuta. Ug ang mga bukid mangatunaw sa ilalom niya, ug ang ubos nga kapatagan mangapikas, sama sa talo tungod sa kalayo, sama sa katubigan nga gibubo sa usa ka titip nga dapit.” Biyaan ba ni Jehova ang iyang langitnong pinuy-anan ug literal nga motamak sa kabukiran ug kapatagan sa Yutang Saad? Dili. Dili na kinahanglang buhaton niya kana. Ang iya lamang buhaton mao ang pagliso sa iyang pagtagad ngadto sa yuta aron matuman ang iyang kabubut-on. Dugang pa, dili ang literal nga yuta, kondili ang mga molupyo ang mag-antos sa mga butang nga gihubit. Sa dihang molihok si Jehova, ang resulta maoy malaglagon para sa mga dili-matinumanon—nga daw ang kabukiran nangatunaw sama sa talo ug ang kapatagan nangapikas tungod sa linog.
12, 13. Kaharmonya sa 2 Pedro 3:10-12, unsay makapalig-on sa atong paglaom?
12 Ang matagnaong mga pulong sa Miqueas 1:3, 4 mahimong magpahinumdom kanimo sa laing inspiradong tagna bahin sa malaglagong mga hitabo dinhi sa yuta. Sumala sa natala diha sa 2 Pedro 3:10, si apostol Pedro misulat: “Ang adlaw ni Jehova moabot ingon sa usa ka kawatan, diin ang mga langit mahanaw uban ang nagsagitsit nga kabanha, apan ang mga elemento tungod sa hilabihang kainit mangatunaw, ug ang yuta ug ang mga buhat diha niana mahikyad.” Susama sa tagna ni Miqueas, ang giingon ni Pedro dili mapadapat sa literal nga mga langit ug yuta. Kini nagtumong sa dakong kasakitan nga modangat niining dili-diyosnong sistema sa mga butang.
13 Bisan pa nianang nagsingabot nga katalagman, ang mga Kristohanon makasalig sa umaabot, sama sa gihimo ni Miqueas. Sa unsang paagi? Pinaagi sa pagsunod sa tambag nga makita sa mosunod nga mga bersikulo sa sulat ni Pedro. Ang apostol mipatugbaw: “Angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!” (2 Pedro 3:11, 12) Ang atong paglaom alang sa umaabot maseguro kon atong ugmaron ang masinugtanong kasingkasing ug seguroon nga ang atong panggawi maoy balaan ug ang atong kinabuhi natugob sa mga buhat sa diyosnong pagkamahinalaron. Aron maseguro ang atong paglaom, kinahanglang hinumdoman usab nato nga ang adlaw ni Jehova tinong moabot.
14. Nganong ang Israel ug Juda takos nga silotan?
14 Gipatin-aw ni Jehova kon nganong ang iyang karaang katawhan takos nga silotan. Ang Miqueas 1:5 nag-ingon: “Kining tanan maoy tungod sa kalapasan ni Jacob, tungod sa kasal-anan sa balay sa Israel. Unsa ang kalapasan ni Jacob? Dili ba ang Samaria? Ug unsa ang hatag-as nga mga dapit sa Juda? Dili ba ang Jerusalem?” Ang Israel ug Juda naglungtad tungod kang Jehova. Bisan pa niana, sila mirebelde kaniya, ug ang ilang pagrebelde nahitabo bisan diha sa ilang tagsatagsa ka kaulohang mga siyudad, ang Samaria ug Jerusalem.
Ang Daotang mga Buhat Nagdagsang
15, 16. Ang mga tawo nga nabuhi sa panahon ni Miqueas sad-an sa unsang daotan nga mga buhat?
15 Ang usa ka pananglitan sa pagkadaotan sa mga tawo nga nabuhi sa panahon ni Miqueas tataw nga gihubit diha sa Miqueas 2:1, 2: “Alaot kadtong nagalaraw sa makadaot, ug kadtong nagabuhat sa daotan, diha sa ilang mga higdaanan! Sa kahayag sa kabuntagon ilang gibuhat kini, tungod kay kini anaa sa gahom sa ilang kamot. Ug gitinguha nila ang kaumahan ug gisakmit kini; ang mga balay usab, ug giagaw kini; ug gitikasan nila ang usa ka tawo nga lig-on ug lawas ug ang iyang panimalay, ang usa ka tawo ug ang iyang panulondon.”
16 Ang hakog nga mga tawo nagtukaw aron sa paglaraw kon unsaon pag-ilog ang mga uma ug balay sa ilang mga silingan. Sa buntag, magdalidali sila sa paghimo sa ilang gilaraw. Dili unta sila mohimo nianang daotang mga buhat kon nahinumdom pa sila sa pakigsaad ni Jehova. Ang Moisesnong Balaod dunay mga kahikayan nga manalipod sa mga kabos. Ilalom niana, walay pamilya nga permanenteng mawad-an sa iyang panulondon. Apan, dili interesado niana ang mga tawong dalo. Wala nila tagda ang giingon sa Levitico 19:18, nga nag-ingon: “Higugmaon mo ang imong isigkatawo sama sa imong kaugalingon.”
17. Unsay mahitabo sa dihang kadtong nag-angkong nag-alagad sa Diyos nag-una sa materyal nga mga butang?
17 Nagpakita kini kon unsay mahitabo sa dihang ang mga tawo nga nag-angkong nag-alagad sa Diyos magpasagad sa espirituwal nga mga tumong ug mangita pag-una sa materyal nga mga butang. Gipasidan-an ni Pablo ang mga Kristohanon sa iyang adlaw: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” (1 Timoteo 6:9) Sa dihang ang usa ka tawo naghimo sa pagbaton ug salapi nga maoy iyang pangunang tumong sa kinabuhi, siya, sa pagkatinuod, nagasimba sa bakak nga diyos—ang mga Bahandi. Kanang maong bakak nga diyos walay itagana nga seguradong paglaom alang sa umaabot.—Mateo 6:24.
18. Unsay mahitabo sa mga materyalistiko sa adlaw ni Miqueas?
18 Daghang tawo sa adlaw ni Miqueas nakakat-on pinaagi sa mapait nga kasinatian nga ang pagsalig sa materyal nga mga butang kawang lamang. Sumala sa Miqueas 2:4, si Jehova nag-ingon: “Nianang adlawa adunay magpatugbaw sa usa ka panultihon labot kaninyo ug tinong magminatay, magminatay gayod. Adunay magaingon: ‘Kami giagawan gayod! Ang bahin sa akong katawhan iyang giusab. Iya gayod kining gikuha gikan kanako! Ngadto sa dili-matinumanon iyang gibahin ang among kaumahan.’” Oo, kadtong nangawat sa mga balay ug uma mawad-an sa ilang panulondon sa pamilya. Sila idestiyero ngadto sa langyawng nasod, ug ang ilang mga kabtangan mahimong inagaw sa “dili-matinumanon,” sa ato pa, sa mga tawo sa kanasoran. Ang tanang paglaom alang sa malamboong umaabot mahugno.
19, 20. Unsay nahitabo sa mga Hudiyo nga misalig kang Jehova?
19 Apan, ang paglaom niadtong nagasalig kang Jehova dili mahigawad. Si Jehova matinumanon sa iyang mga pakigsaad uban kang Abraham ug David, ug siya maluoy niadtong kinsa, sama kang Miqueas, nahigugma kaniya ug nagbangotan tungod sa pagkabulag sa ilang mga isigkatawo gikan sa Diyos. Alang sa mga matarong, dunay kapasig-ulian sa gitakdang panahon sa Diyos.
20 Nahitabo kana sa 537 W.K.P., human mapukan ang Babilonya ug sa dihang ang usa ka nahibilin sa mga Hudiyo namalik sa ilang yutang natawhan. Nianang panahona, ang giingon sa Miqueas 2:12 dunay unang katumanan. Si Jehova nag-ingon: “Tigomon ko gayod ang Jacob, kamong tanan; sa walay pakyas tapokon ko ang mga nahibilin sa Israel. Hiusahon ko sila, sama sa usa ka panon sa mga karnero diha sa toril, sama sa usa ka panon sa kahayopan taliwala sa sibsibanan niini; kini sila mahimong saba tungod sa mga tawo.” Pagkamahigugmaon ni Jehova! Human disiplinaha ang iyang katawhan, iyang gitugotan ang usa ka nahibilin sa pagbalik ug pag-alagad kaniya didto sa yuta nga iyang gihatag sa ilang mga katigulangan.
Kahibulongang mga Katumbas sa Atong Adlaw
21. Sa unsang paagi ang mga kahimtang karon susama nianang sa adlaw ni Miqueas?
21 Sa dihang atong gikonsiderar ang unang duha ka kapitulo sa Miqueas, nahingangha ka ba sa pagkahibalo nga susama gayod ang mga panghitabo karon? Sama sa panahon ni Miqueas, daghan karon ang nag-angkon nga nag-alagad sa Diyos. Apan, sama sa Juda ug Israel sila nagkabahinbahin ug naggubatay pa gani sa usag usa. Daghang adunahan sa Kakristiyanohan ang nagdaogdaog sa mga kabos. Nagkadaghang pangulo sa relihiyon ang nagtugot sa mga panggawi nga dayag nga gisaway sa Bibliya. Dili ikatingala nga ang Kakristiyanohan sa dili madugay matapos duyog sa ubang sakop sa “Dakong Babilonya,” ang tibuok-kalibotang imperyo sa bakak nga relihiyon! (Pinadayag 18:1-5) Apan, sa pagsundog sa sumbanan sa panahon ni Miqueas, si Jehova aduna unyay matinumanong mga alagad nga magpabilin dinhi sa yuta.
22. Unsang duha ka pundok ang naglaom sa Gingharian sa Diyos?
22 Sa 1919, ang matinumanong dinihogan nga mga Kristohanon sa kataposan mibulag sa Kakristiyanohan ug nagmantala sa maayong balita sa Gingharian ngadto sa tanang kanasoran. (Mateo 24:14) Una sa tanan, sila nangita sa uban pang mga sakop sa espirituwal nga Israel. Dayon ang “ubang mga karnero” gitigom, ug ang duha ka pundok nahimong “usa ka panon, usa ka magbalantay.” (Juan 10:16) Bisan tuod sa pagkakaron sila nag-alagad sa Diyos diha sa 234 ka kayutaan, kining tanang matinumanon nga mga magsisimba ni Jehova tinuod nga ‘nahiusa.’ Sa pagkakaron, ang toril nahimong ‘saba tungod sa mga lalaki,’ maingon man sa mga babaye ug mga bata. Sila naglaom, dili niining sistemaha sa mga butang, kondili sa Gingharian sa Diyos, nga sa dili madugay mosangko ngadto sa usa ka yutan-ong paraiso.
23. Nganong kombinsido ka nga segurado ang imong paglaom?
23 Mahitungod sa matinumanong mga magsisimba ni Jehova, ang kataposang bersikulo sa Miqueas kapitulo 2 bersikulo 13 nag-ingon: “Ang ilang hari moagi sa ilang atubangan, uban kang Jehova nga mag-una kanila.” Nakita ba nimo ang imong kaugalingon nianang maong parada sa kadaogan, nga nagsunod sa imong Hari, si Jesu-Kristo, diin si Jehova mismo ang nag-una? Kon mao, makaseguro ka nga tino ang imong kadaogan ug segurado ang imong paglaom. Mas madayag pa kini samtang atong konsiderahon ang uban pang hinungdanong mga punto sa tagna ni Miqueas.
Unsaon Nimo Pagtubag?
• Sa adlaw ni Miqueas, nganong si Jehova mihukom sa paglihok batok sa Juda ug Israel?
• Unsay mahimong mahitabo sa dihang kadtong nag-angkong nag-alagad sa Diyos nag-una sa materyal nga intereses?
• Human konsideraha ang Miqueas mga kapitulo 1 ug 2, nganong kombinsido ka nga segurado ang imong paglaom?
[Hulagway sa panid 9]
Ang tagna ni Miqueas magpalig-on kanato sa espirituwal
[Mga hulagway sa panid 10]
Sama sa Hudiyong nahibilin sa 537 W.K.P., ang espirituwal nga mga Israelinhon ug ang ilang mga kauban nagpalambo sa matuod nga pagsimba