EDER

1. Usa ka kaliwat ni Berias sa tribo ni Benjamin nga mipuyo sa Jerusalem.​—1Cr 8:​1, 15, 16, 28.

2. Usa ka kaliwat ni Musi sa Levihanong banay ni Merari, gitudlo sa usa ka pag-alagad sa panahon ni David.​—1Cr 23:​21, 23-25; 24:30.

3. Usa ka siyudad sa habagatang bahin sa Juda. (Jos 15:21) Sanglit ang kataposang duha ka Hebreohanong mga konsonante sa ngalang Eder kon bayloon maoy sama sa Hebreohanong mga konsonante sa ngalang Arad, ug sanglit ang Septuagint (Vatican Manuscript Num. 1209) naggamit sa ngalang “Ara” inay sa ngalang “Eder” niini nga teksto, gituohan sa kadaghanang eskolar nga ang Eder mao ra ang Arad (Tel ʽArad), mga 28 km (17 mi) sa S sa Beer-seba.

4. [Panon].

Usa ka torre duol sa dapit diin nagpatindog si Jacob (Israel) sa iyang tolda human sa kamatayon ni Raquel. Bisan tuod ang tukmang nahimutangan niini wala mahibaloi, lagmit nahimutang kini tali sa Betlehem ug Hebron. Ang ngalang Eder nagpaila nga nahimo kining silonganan sa mga magbalantay ug nagsilbing bantayanang torre diin ilang malantaw ang ilang mga panon sa kahayopan. (Gen 35:​19, 21, 27) Samtang si Jacob nagpatindog ug tolda dinhi, ang iyang anak nga lalaki nga si Ruben ‘naghugaw sa higdaanan ni Jacob,’ pinaagi sa pagpakigrelasyon sa puyopuyo ni Jacob nga si Bilha.​—Gen 35:22; 49:​3, 4.

Ang samang Hebreohanong ekspresyon nga gihubad dinhi nga “torre sa Eder” (migh·dal-ʽeʹdher) gigamit ni Miqueas (4:8) sa dihang siya naghisgot sa “torre sa panon.” Kini nga ekspresyon lagmit nagtumong sa ngalan sa gikampohang dapit ni Jacob ug gigamit maylabot sa pagpasig-uli sa “nagtakiang” nga katawhan ni Jehova. (Miq 4:7) Kay napasig-uli ang “Zion,” sila malantawan diha sa lantawanang “torre” ug sa ingon mabantayan batok sa dugang kapeligrohan. Ang maong ilustrasyon kaharmonya sa ubang mga pagtandi diha sa tagna ni Miqueas; siya naghisgot sa Mesiyas ingong ang usa nga “magbantay” (Miq 5:2-4) ug ang katawhan ni Jehova ingong ang ‘panon sa panulondon sa Diyos.’​—Miq 7:14.