“Imantala Ninyo Kini Taliwala sa Kanasoran”

 1. Nganong ang pagsulti ni Jehova ngadto sa iyang manalagna ikapanig-ingon sa ngulob sa usa ka leyon?

NAKADUNGOG ka ba sukad ug ngulob sa usa ka leyon? Giingong kini kusog pa kay sa dahunog sa usa ka jackhammer. Unsay imong buhaton kon makadungog kag ngulob sa usa ka leyon sa duol diha sa malinawong gabii? Lagmit molihok ka dayon. Si Amos, usa sa 12 ka manalagna kansang mga sinulat atong gihisgotan, migamit niini nga kaamgiran: “Adunay leyon nga mingulob! Kinsay dili mahadlok? Ang Soberanong Ginoong Jehova misulti! Kinsay dili managna?” (Amos 3:3-8) Kon nakadungog ka nga si Jehova mismo misulti, dili ka ba molihok sama sa gihimo ni Amos? Siya milihok dayon ug nanagna batok sa napulo-ka-tribo nga nasod sa Israel.

 2. (a) Sa unsang paagi imong masundog si Amos sa pagtuman sa gitudlong buluhaton sa pagpanagna? (b) Unsay atong hisgotan niining kapituloha?

² Moingon ka tingali, ‘Apan dili ako manalagna!’ Mahimong mobati kang dili takos tungod kay wala ka makabatog pormal nga pagbansay isip manalagna. Apan hinumdomi si Amos. Sa giatubang sa nagsimbag-baka nga saserdote nga si Amazias, si Amos miingon: “Ako dili usa ka manalagna, ni ako anak sa usa ka manalagna; apan ako usa ka tig-alima sa mga hayop ug tigtudyok sa mga igos sa kahoyng sikomoro.” (Amos 7:14) Bisag ang iyang kagikan maoy timawa, si Amos andam motuman sa iyang tinudlong buluhaton isip usa ka manalagna ni Jehova. Komosta sa imong kabahin? Nakaamgo ka ba nga ikaw gihatagag usa ka asaynment nga susama sa pipila ka bahin sa iya sa 12 ka manalagna? Gisugo ka sa pagmantala sa mensahe sa Diyos karong panahona ingon man sa pagpanudlo ug sa paghimog mga tinun-an. Unsay imong pagtan-aw nianang seryosong asaynment? Unsa ang mensahe nga angay nimong imantala taliwala sa kanasoran? Bug-os ba nimong ginatuman ang maong asaynment? Unsay magtino kon ang imong buluhaton nagmalamposon? Atong hisgotan ang mga tubag.

 3. Sa unsang paagi ikaw makapakigbahin sa buluhaton nga susama sa iya sa mga manalagna kansang mga sinulat atong ginatun-an?

³ Nagapakigbahin ka ba gayod sa buluhaton nga sama sa iya sa mga manalagna? Basin wala ka makadungog sa ngulob sa leyon sa diwa nga dili ka laktod nga giinspirar ni Jehova. Hinuon, ikaw nakadungog gikan sa iyang Pulong, ang Bibliya, sa dinaliang mensahe bahin sa umaabot nga adlaw ni Jehova. Sumala sa among giingon sa Kapitulo 1 niining libroha, ang mga pulong “manalagna” ug “matagnaon” nagkalainlain ug mga kahulogan. Bisan pag ikaw dili tingali usa ka manalagna nga sama ni Amos o sa ubang karaang mga manalagna, ikaw makapahayag gihapon bahin sa umaabot. Sa unsang paagi? Ikaw makapahayag sa matagnaong mga mensahe nga imong natun-an diha sa mga panid sa Balaang Kasulatan, apil ang sa 12 ka manalagna. Karon na ang panahon sa pagbuhat gayod niana.

 4. Sa unsang diwa natuman karon ang tagna sa Joel 2:28-32?

⁴ Tan-awa ang maong butang gikan sa laing punto-debista. Gihisgotan ni Jehova nga Diyos sa manalagnang si Joel ang usa ka panahon nga ang katawhan sa tanang matang managna, sa mas dakong kahulogan nianang pulonga: “Human niana mahitabo gayod nga ibubo ko ang akong espiritu sa tanang matang sa unod, ug ang inyong mga anak nga lalaki ug ang inyong mga anak nga babaye managna. Kon bahin sa inyong tigulang nga mga lalaki, sila magadamgo ug mga damgo. Kon bahin sa inyong batan-ong mga lalaki, sila makakita ug mga panan-awon.” (Joel 2:28-32) Sa adlaw sa Pentekostes 33 K.P., gipadapat ni apostol Pedro kining kasulatana ngadto sa pagbubo sa balaang espiritu niadtong nagtigom sa usa ka lawak sa itaas sa Jerusalem ug sa ilang pagsangyaw human niadto bahin sa “halangdong mga butang sa Diyos.” (Buhat 1:12-14; 2:1-4, 11, 14-21) Tagda karon ang atong panahon. Ang tagna ni Joel adunay dakong katumanan sukad sa sinugdan sa ika-20ng siglo. Ang dinihogan-sa-espiritung mga Kristohanon—lalaki ug babaye, batag tigulang—nagsugod sa ‘pagpanagna,’ nga mao, pagmantala sa “halangdong mga butang sa Diyos,” apil ang maayong balita sa Gingharian, nga karon natukod na sa mga langit.

 5. (a) Unsang pribilehiyo ang nabatonan natong tanan? (b) Unsay nalangkit sa pagtanyag ug “mga toreyong baka sa [imong] mga ngabil” ug nganong usa kini ka kadungganan alang kanimo?

⁵ Bisag wala ipanganak sa balaang espiritu aron mahimong mga anak sa Diyos, ang “usa ka dakong panon” sa “ubang mga karnero” nagasulti sa dinihogang mga sumusunod ni Jesu-Kristo: “Mouban kami kaninyo, kay kami nakadungog nga ang Diyos nagauban kaninyo.” (Pinadayag 7:9; Juan 10:16; Zacarias 8:23) Bisan kon ikaw nakabaton sa paglaom nga kinabuhing walay kataposan sa mga langit kaha o sa yuta, ikaw adunay pribilehiyo sa pagtanyag sa “mga toreyong baka sa [imong] mga ngabil.” (Oseas 14:2) Unsay kahulogan sa maong mga pulong diha sa tagna ni Oseas? “Ang mga toreyong baka . . . mao ang kinamaayohang mga hayop alang sa mga halad-pasalamat,” matod sa eskolar sa Bibliya nga si C. F. Keil. Gitumong ni apostol Pablo ang Oseas 14:2, nga misulat: “Itanyag nato kanunay sa Diyos ang halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan.” (Hebreohanon 13:15) Oo, ang mga pulong ‘mga toreyong baka sa atong mga ngabil’ nagtumong sa kinamaayohan sa atong mga ngabil, ang mga pulong nga atong ginasulti sa pagdayeg kang Jehova.

 6. Nganong angay natong susihon ang kalidad sa atong mga halad sa pagdayeg?

⁶ Ikaw naghalad kang Jehova ug mga halad sa pagdayeg sa dihang naghimo kag kinasingkasing nga mga pag-ampo kaniya, nagpahayag ug mapabilhon nga mga komento mahitungod kaniya panahon sa Kristohanong mga tigom, ug madasigong nagsangyaw sa publiko ngadto sa ubang mga tawo. Hinuon, ang matag usa kanato mahimong mosukna, ‘Sa dihang magpakig-ambit ako sa maong mga kalihokan, unsa ang kalidad sa akong halad?’ Gikan sa mga butang nga imong nakat-onan, walay duhaduha nga wala ka makaangay sa mga saserdote sa adlaw ni Malaquias nga sa dayag nagdalag may-depektong mga hayop ngadto sa halaran sa Diyos. Kinahanglang ipasiugda ni Jehova pinaagi ni Malaquias ang dili-maayong kalidad sa ilang mga halad, kay wala sila maghunahuna nga nagtamay sila sa lamesa ni Jehova. (Malaquias 1:8) Busa angay natong susihon ang kalidad sa atong mga halad sa pagpaneguro nga kini maoy kinamaayohan ug walay depekto.

 7. Kinahanglanon ang kaisog aron imantala ang unsang bahin sa atong duha-ug-bahin nga mensahe?

⁷ Ang paghalad sa ‘mga toreyong baka sa atong mga ngabil’ nagkinahanglag kaisog, dili ba? Tungod kana kay ang mensahe nga atong ipahayag sa mga tawo may duha ka bahin, ug dili gayod popular ang usa ka bahin. Ang manalagnang si Joel misulti sa katawhan sa Diyos: “Imantala ninyo kini taliwala sa kanasoran, ‘Balaana ang gubat! Pukawa ang gamhanang mga tawo! Paduola sila! Patungasa sila, ang tanang tawong manggugubat!’” (Joel 3:9) Pagkadakong hagit kini sa kanasoran sa dihang ipadapat sa atong adlaw! Kini maoy usa ka deklarasyon sa matarong nga pakiggubat ni Jehova batok sa katawhan nga walay pagtagad sa Diyos. Samtang si Jehova nagsugo sa iyang katawhan nga “pagasalsalon ang ilang mga espada nga mga punta sa daro ug ang ilang mga bangkaw nga mga galab,” siya nagmando sa kaawayng mga nasod nga ‘pagasalsalon ang ilang mga punta sa daro ingong mga espada ug ang ilang mga galab ingong mga bangkaw.’ (Miqueas 4:3; Joel 3:10) Oo, ang mga kaaway sa Diyos kinahanglang mangandam sa pagpakiggubat sa Maglalalang sa uniberso. Kana dili gayod makapahupay nga mensahe nga atong ipahayag.

 8. Nganong ‘ang mga nahibilin ni Jacob’ gipanig-ingon sa usa ka leyon?

⁸ Sa mensahe sa manalagnang si Miqueas, kadtong naghalad sa ‘mga toreyong baka sa ilang mga ngabil’ gipanig-ingon sa usa ka leyon. Misulat siya: “Ang mga mahibilin ni Jacob taliwala sa kanasoran . . . mahimong sama sa usa ka leyon sa taliwala sa mga mananap sa kalasangan, sama sa usa ka may-lambungay nga nating leyon sa taliwala sa mga panon sa karnero, nga, sa dihang kini moagi, magyatak ug magkuniskunis; ug walay manluluwas.” (Miqueas 5:8) Nganong haom man ang maong pagtandi? Sa atong adlaw, ang katawhan sa Diyos, nga gipangunhan sa dinihogang nahibilin, kinahanglang magpakitag samag-leyon nga kaisog diha sa pagmantala sa nagapasidaang mensahe ngadto sa kanasoran.a

 9. (a) Kanus-a ka angayng magpakitag samag-leyon nga kaisog? (b) Sa unsang paagi makabaton kag kaisog sa dihang mag-atubang sa pagkamasupakon o pagkadili-matinagdanon?

⁹ Ikaw ba maisogon sama sa usa ka leyon diha sa pagmantala sa nagapasidaang bahin sa mensahe? Mahimong nagkinahanglan ka sa maong kaisog dili lang inigbarog nimo atubangan sa mga tawong may awtoridad kondili inigpakigsulti usab nimo sa imong kaubang mga estudyante sa eskuylahan o mga kauban sa trabahoan o sa imong dili-magtutuo nga mga paryente. (Miqueas 7:5-7; Mateo 10:17-21) Sa unsang paagi makabaton kag kaisog sa dihang makaatubang sa pagkamasupakon o pagkadili-matinagdanon? Pamati kon sa unsang paagi si Miqueas nakatuman sa lisod nga buluhaton nga mao ang pagpasidaan bahin sa kalaglagan sa Samaria ug sa Jerusalem: “Ako napuno sa gahom, pinaagi sa espiritu ni Jehova, ug sa hustisya ug pagkagamhanan, aron isulti kang Jacob ang iyang pagsukol ug sa Israel ang iyang sala.” (Miqueas 1:1, 6; 3:8) Mahimong ikaw usab ‘mapuno sa gahom’ kay mahimong makadawat ka usab ug dagayang suplay sa mohatag-ug-gahom nga espiritu sa Diyos. (Zacarias 4:6) Pinaagi sa pagsalig sa Diyos diha sa pag-ampo, ikaw makaarang sa pagpahayag sa mga pulong nga makapahinabo nga may mga dalunggan nga mosanting.—2 Hari 21:10-15.

10. Sa unsang paagi makasundog kita kang Sofonias diha sa pagmantala sa mensahe bahin sa “adlaw ni Jehova”?

¹⁰ Buot nimo nga magmaisogon, apan angay kang magmataktikanhon usab sa pagduol sa mga tawo dala ang nagapasidaang mensahe. Kita kinahanglang “magmalumo [o “mataktikanhon”] sa tanan,” bisan pag ang mensahe maoy kabahin sa nagsingabot nga “adlaw ni Jehova.” (2 Timoteo 2:24; Joel 2:1, 11; Sofonias 1:14) Sa makausa pa, kita makakat-on gikan sa 12 ka manalagna. Maisogon silang nagpahayag sa mga mensahe sa paghukom gikan ni Jehova, apan sila may konsiderasyon niadtong nagpatalinghog. Pananglitan, ang manalagnang si Sofonias wala magpanuko sa pagsulti nga maisogon ngadto sa mga prinsipe (o mga tawong hamili) sa iyang panahon kansang mga tanlag gikubalan na, apan wala niya ilakip pagsaway ang matinumanong Haring Josias. (Sofonias 1:8) Sa dihang magpahayag sa nagapasidaang mensahe, makatabang ba kita sa mga tawo pinaagi sa pag-isip nga sila posibleng mga karnero, nga dili magbaton ug negatibong panghunahuna bahin kanila?—Mateo 25:32-34.

11. (a) Unsa ang ikaduhang bahin sa duha-ug-bahin nga mensahe nga atong gidala? (b) Sa unsang paagi makasundog ka sa 12 ka manalagna sa dihang nagmantala sa adlaw ni Jehova?

¹¹ Unsa ang laing bahin sa duha-ug-bahin nga mensaheng atong gidala? Ang maong bahin gipasiugda diha sa Miqueas kapitulo 5. “Ang mga nahibilin ni Jacob mahimong sama sa yamog gikan kang Jehova sa taliwala sa daghang mga katawhan, sama sa dagayang ulan sa katanoman, nga wala maglaom sa tawo o maghulat sa mga anak sa yutan-ong tawo.” (Miqueas 4:1; 5:7) Tungod sa maayong balita nga ilang gidala ngadto sa “daghang mga katawhan” karon, ang “mga nahibilin” sa espirituwal nga Jacob o Israel, ug ang ilang mga kauban maoy sama sa makapahayahay nga “yamog gikan kang Jehova” ug sa “dagayang ulan sa katanoman.” Angay kitang makakat-on ug daghan gikan sa kataposang 12 ka basahon sa Hebreohanong Kasulatan may kalabotan sa ikaduhang bahin sa atong mensahe, sanglit kadtong mga manalagna nagmantala dili lang bahin sa kalaglagan apan bahin usab sa kapasig-ulian. Sa imong ministeryo, ginapasiugda mo ba ang makapalig-ong bahin sa mensahe mahitungod sa adlaw ni Jehova?

12, 13. (a) Unsay kahulogan sa pagpanig-ingon sa katawhan sa Diyos ngadto sa hugpa sa mga insekto? (b) Unsay imong pagbati bahin sa imong nabasa sa Joel 2:7, 8?

¹² Busa, sa unsang paagi imong ginamantala kining duha-ug-bahin nga mensahe? Gipanig-ingon sa manalagnang si Joel ang buluhaton sa katawhan sa Diyos ngadto sa sunodsunod nga hampak sa mga insekto, apil sa mga dulon. (Joel 1:4) Apan nganong moingon kita nga ang katawhan ni Jehova maoy sama sa hugpa sa mga insekto? Tungod kay, ingon nga makita sa Joel 2:11, ang Diyos nagpaila sa maong mga insekto ingong “iyang kasundalohan.” (Ang katawhan sa Diyos gisimbolohan usab sa mga dulon diha sa basahon sa Pinadayag. Tan-awa ang Pinadayag 9:3, 4.) Ang buluhaton sa mga insekto nga gibatbat ni Joel nahisamag nagalamoy nga kalayo, ug ang ilang giagian nga maorag sama sa “tanaman sa Eden” nahimong “usa ka biniyaang kamingawan.” (Joel 2:2, 3) Sa unsang paagi imong ikapakita nga ikaw nahibalo sa kahulogan sa tagna ni Joel?

¹³ Hunahunaa kon unsa ka makugihon ang maong gagmayng mga linalang. Kini gipahayag ni Joel niining paagiha: “Modagan sila sama sa mga tawo nga gamhanan. Mokatkat sila sa paril sama sa mga tawo nga manggugubat. Ug ang tagsatagsa kanila molakaw diha sa kaugalingon niyang mga dalan, ug sila dili mosimang sa ilang mga alagianan. Ug sila dili magtinuloray. Sama sa usa ka tawo nga lig-on ug lawas diha sa iyang dalan, sila mopadayon sa paglakaw; ug bisan pag ang pipila mapukan taliwala sa mga udyong, ang uban dili mosimang.” (Joel 2:7, 8) Walay “paril” sa pagsupak ang makapugong kanila ug sa hampak nga ilang gipahinabo. “Bisan pag ang pipila mapukan taliwala sa mga udyong,” nga mao ang nahitabo sa maunongong mga Kristohanon nga gipatay sa malupigong mga kaaway, gipadayon sa uban ang buluhaton, nga gituman ang asaynment nga gihatag ni Jehova kanila. Determinado ka bang magpabilin sa asaynment sa pagmantala sa adlaw ni Jehova hangtod mohukom ang Diyos nga nahuman na kini? Mahimong ginatuman mo pa ang buluhaton isip kapuli sa pipila ka maunongong mga Kristohanon nga namatay.

14. Sa unsang paagi makatabang ka sa makugihon nga pagsangyaw?

¹⁴ Ang pagkamakugihon mao ang gipasiugda sa tagna. Sa unsang paagi makatabang ka sa personal sa makugihong pagsangyaw ingon sa gibatbat diha sa tagna ni Joel? Pinaagi sa pagpakigbahin sa pagpamalaybalay ug unya pagbalikduaw aron tudloan kadtong nagpakitag interes. Ikaw usab makabalikduaw aron mahibalag kadtong wala maabti sa balay. Sa ingon imong gipasundayag nga nakasabot ka sa matagnaong kabatbatan. Ug sa dihang mosangyaw ka sa mga tawo diha sa kadalanan, basin imong mahibalag kadtong dili mahibalag sa laing paagi. Ania pay laing paagi: Mahimo kang makatabang sa mga tawong nanglalin gikan sa ubang mga nasod diha sa imong silinganan.b Igmat ka ba nianang tanang kahigayonan, sa ingon makatabang sa makugihon nga pagsangyaw karon?

15. Unsay mamatikdan bahin sa sanong sa katawhan ngadto sa mga mensahe sa 12 ka manalagna?

¹⁵ Unsay sanong sa katawhan sa mensahe bahin sa makalilisang nga adlaw ni Jehova? Dili ka angayng matingala nga makaatubang kag pagkamasupakon o pagkadili-matinagdanon. Nahitabo kana sa daghang manalagna sa Diyos, nga ang kadaghanan kanila may bug-at nga nagapasidaang mga mensahe nga ipahayag. (Jeremias 1:17-19; 7:27; 29:19) Bisan pa niadto, ang daghang manalagna nakakitag makapadasig nga mga resulta! Labing menos lima kanila—si Jonas, Miqueas, Sofonias, Haggeo, ug Zacarias—nakapatandog sa mga kasingkasing sa pipila ka tawo mao nga sila naghinulsol sa ilang nangaging mga sala ug nagbag-o sa ilang panggawi.

16. Unsa ang bunga sa panlimbasog ni Miqueas ingong usa ka manalagna?

¹⁶ Ang buluhaton ni Sofonias ingong manalagna lagmit nakatandog kang Haring Josias mao nga iyang gisugdan ang pagpasig-uli sa maputling pagsimba. Maisogong gimantala ni Miqueas ang usa ka mensahe sa paghukom batok sa mga pangulo sa Juda, ug ang mga gibuhat ni Haring Ezequias nahiuyon sa mga pulong ni Miqueas. (Miqueas 3:1-3) Makapaikag, ang pipila ka ansiyano sa adlaw ni Jeremias nagtawag sa sanong ni Ezequias ingong maayong panig-ingnan sa dihang sila miingon nga ang hari ‘nahadlok kang Jehova ug naglukmay sa nawong ni Jehova.’ (Jeremias 26:18, 19; 2 Hari 18:1-4) Ubos sa pagpanguna ni Ezequias, ang katawhan sa Juda ug ang matinguhaong mga tawo gikan sa amihanang gingharian nagsaulog sa Paskuwa ug sa Pista sa mga Tinapay nga Walay Igpapatubo, nga ang pista gilugwayan pag usa ka semana. Unsay resulta sa ilang pagbalik ngadto sa matuod nga pagsimba? “Dihay dakong pagmaya sa Jerusalem.” (2 Cronicas 30:23-26) Gisugdan ni Miqueas ang pagmantala sa mensahe sa Diyos bahin sa kalaglagan ngadto sa apostatang nasod ubos kang Haring Ahaz. Apan, nakita sa manalagna ang maayong mga bunga sa iyang mga panlimbasog sa dihang ang anak ni Ahaz nga si Ezequias namati sa mensahe.

17. Unsay nalampos ni Haggeo ug Zacarias?

¹⁷ Tagda usab ang mga manalagnang si Haggeo ug Zacarias. Sila nag-alagad taliwala sa nahibalik nga mga Hudiyo, nga nahimong dili matinagdanon ug nagmahunahunaon sa kaugalingon. (Haggeo 1:1, 2; Zacarias 1:1-3) Sa panahong nadawat sa duha ka manalagna ang ilang mga asaynment, milabay na ang 16 ka tuig sukad sa pagpahiluna sa patukoranan sa templo. Ang katawhan ‘nanagdagan, ang tagsatagsa alang sa iyang kaugalingong balay’ samtang ang balay ni Jehova maoy “guba.” Si Haggeo miawhag sa mga Hudiyo: “‘Magmalig-on, kamong tanang katawhan sa yuta,’ mao ang giingon ni Jehova, ‘ug magtrabaho kamo.’” Unya unsay nahitabo? ‘Gipalihok ni Jehova ang espiritu’ ni Gobernador Zorobabel, sa hataas nga saserdoteng si Josue, ug ‘ang tanang nahibilin sa katawhan.’ Ingong resulta, ilang nahuman ang trabaho sa templo.—Haggeo 1:9, 12, 14; 2:4.

18, 19. (a) Unsay sanong sa katawhan diha sa pipila ka nasod sa pagmantala sa adlaw ni Jehova? (b) Sa unsang paagi ikaw mosanong sa panginahanglan nga ipahayag ang nagapasidaang mensahe sa tanang tawo?

¹⁸ Ang kadaghanan sa 12 ka manalagna nagpahayag ug mga mensahe ngadto sa nasod nga nakapahinungod na kang Jehova. Kita basin magsangyaw ngadto sa mga tawo nga wala gayod makaila sa matuod nga Diyos, apan kita makakat-on gihapon gikan sa mga resulta sa mga kalihokan sa mga manalagna. Sa daghang teritoryo usab karon, ginadawat sa mga tawo ang dinaliang mensahe bahin sa adlaw ni Jehova. Atong nakita ang mga resulta sama nianang gitagna ni Zacarias: “Nianang adlawa daghang kanasoran ang tinong mahiuban ngadto kang Jehova, ug sila mahimong akong katawhan; ug ako mopuyo taliwala kanimo.” (Zacarias 2:11) Sa pagkakaron, sa literal nga diwa, ang katawhan sa “daghang kanasoran” nagdawat sa mensaheng gipahayag sa katawhan sa Diyos. (Pinadayag 7:9) Si Zacarias mitagna: “Daghang katawhan ug gamhanang kanasoran mangadto gayod aron sa pagpangita kang Jehova sa mga panon didto sa Jerusalem ug aron sa paglukmay sa nawong ni Jehova.” Sila gibatbat ingong “napulo ka tawo gikan sa tanang pinulongan sa mga nasod” nga mokupot sa sidsid sa usa ka espirituwal nga Israelinhon, nga magaingon: “Mouban kami kaninyo, kay kami nakadungog nga ang Diyos nagauban kaninyo.”—Zacarias 8:20-23.

¹⁹ Matikdi ang paghisgot sa “tanang pinulongan sa mga nasod.” Ang Bibliya ug literatura sa Bibliya ginahubad ngadto sa daghang pinulongan, ug ang mga Saksi ni Jehova nagabansay ug mga ministro sa pagtudlo sa katawhan sa “tanang pinulongan sa mga nasod.” (Mateo 28:19, 20; Buhat 1:8) Ikaw tingali nakakat-on ug laing pinulongan aron tabangan ang mga tawo diha sa inyong dapit nga nagasulti sa maong pinulongan. Ug ubay-ubay ang andam magtuon ug usa o duha ka bag-ong pinulongan ug mobalhin sa pagpuyo sa mga nasod diin daghan ang maikagong nagdawat sa maayong balita. Mahimo kaha nga ikaw mobalhin sa pagpuyo sa maong mabungahong mga teritoryo ug sa ingon niana ‘magmantala niini taliwala sa kanasoran’? Palandonga kana nga mainampoon. Kon ikaw adunay pamilya, balikbalika ninyo paghisgot ingong pamilya ang maong posibilidad sa pagbalhin, nga ibutang kanunay ang maong tumong sa atubangan sa inyong nagtubo nga mga anak.

20. Unsang tinamdan ang gipaila ni Jehova bahin sa katawhan sa Nineve?

²⁰ Ang laing manalagna nga nagmantala ngadto sa katawhan nga lagmit dili mamati sa iyang mga pulong mao si Jonas. Ang mga tawo sa Nineve, bisan ang hari mismo, midawat sa mensahe ni Jonas, nga nagbutang ug pagtuo kang Jehova. Ang Diyos nangutana mismo: “Dili ba diay ako masubo alang sa Nineve nga dakong siyudad, diin adunay kapin sa usa ka gatos ug kawhaan ka libo ka tawo nga wala mahibalo sa kalainan tali sa ilang tuong kamot ug sa ilang wala?” (Jonas 4:11) Hunahunaa ang maong mga pulong langkit sa kon unsay nagtukmod kanimo aron imantala ang makalilisang nga adlaw ni Jehova ngadto sa uban. Gibati mo ba nga ikaw utangan kang Jehova tungod sa pagluwas kanimo pinaagi sa halad lukat? Gibati mo ba nga ikaw may responsabilidad ingong napahinungod nga alagad ni Jehova? (1 Corinto 9:16, 17) Kini maoy lig-ong mga katarongan sa pagmantala sa adlaw ni Jehova. Apan, dugang pa, ‘nasubo’ ka ba alang sa mga tawong imong gisangyawan bahin sa adlaw ni Jehova? Pagkadako unya sa imong kalipay sa dihang ang kaluoy nga sama sa gibati sa Diyos magtukmod kanimo sa pagpakigsulti sa mga tawo bahin nianang adlawa!

21. Unsay imong makat-onan gikan sa panig-ingnan ni Amos sa pagsagubang sa panghulga ni Amazias?

²¹ Wala kaayo kita masayod sa mga sanong nga nasinati ni Joel, Abdias, Nahum, Habacuc, ug Malaquias. Ato hinuong nasayran ang usa ka sanong nga nasinati ni Amos. Grabe ang pagsupak ni Amazias kang Amos, nga giakusar si Amos nga nagplano konog daotan batok sa hari ug misulay siya sa pagpugong kang Amos sa pagwali sa Bethel. (Amos 7:10-13) Maisogong gisagubang ni Amos ang maong pagsupak. Ang mga relihiyonista usab karon mahimong mosulay sa pag-impluwensiya sa pipila ka politikanhong mga lider aron lutoson ang katawhan ni Jehova o idili pa ang ilang mapuslanong buluhaton sa pagsangyaw. Sundogon mo ba si Amos diha sa maisogong pagmantala sa maayong balita bisan pa sa pagsupak?

22. Nganong makaingon ka nga ang ministeryo malamposon diha sa inyong teritoryo?

²² Bisan pag nasinati sa 12 ka manalagna ang nagkadaiyang mga sanong, silang tanan nagtuman sa ilang asaynment. Ang sanong sa katawhan sa duha-ug-bahin nga mensahe nga atong gidala dili mao ang hinungdanon kondili ang atong pagdala ngadto kang Jehova sa ‘mga toreyong baka sa atong mga ngabil,’ ang atong kinamaayohang “halad sa pagdayeg.” (Oseas 14:2; Hebreohanon 13:15) Unya itugyan nato sa Diyos ang mga resulta niana. Iyang agnihon kadtong tinuod nga mga karnero. (Juan 6:44) Dugang pa, ikaw mahimong malamposon ingong magmamantala sa mensahe sa Diyos bisan kon unsay sanong sa mga tawo. Makasalig ka gayod nga ‘ang mga tiil sa usa nga nagdalag maayong balita, ang usa nga nagmantalag pakigdait,’ maoy matahom sa mga mata niadtong mapasalamatong nagdawat sa maayong balita. Apan labaw sa tanan, kana matahom sa mga mata ni Jehova. (Nahum 1:15; Isaias 52:7) Tungod kay duol na kaayo ang dakong adlaw ni Jehova, magmadeterminado sa pagpadayon sa pagbuhat sa gitagna ni Joel alang sa atong panahon: “Imantala ninyo kini taliwala sa kanasoran, ‘Balaana ang gubat! Pukawa ang gamhanang mga tawo!’” Nagpasabot kana sa pagpakiggubat sa Diyos batok sa mga nasod.—Joel 3:9.