Salig Kang Jehova ug Mabuhi!

 1. Nganong nagkinahanglan tang tanan ug kahupayan?

KITANG tanan nagkinahanglag paghupay. Tingali ang atong kinabuhi punog kabalaka, kapakyasan, ug kasakit. Basin nag-antos ta tungod sa katigulangon, sakit, o pagkamatay sa minahal. Ang pipila kanato gidaogdaog. Nagkadaghan ang mga tawong bayolente. Tinuod, kombinsido ta nga kining “makuyaw nga mga panahong lisod sagubangon” maoy pamatuod nga nagkinabuhi ta niining “kataposang mga adlaw” ug nagkaduol na ang bag-ong kalibotan. (2 Tim. 3:1) Pero, dugay na tingali tang nagpaabot nga matuman ang mga saad ni Jehova, ug basin nagkadaghan ang atong problema. Busa asa man ta makakaplag ug kahupayan?

2, 3. (a) Unsay atong nahibaloan bahin kang Habacuc? (b) Nganong susihon nato ang Habacuc?

² Aron matubag kana, susihon nato ang basahon sa Habacuc. Bisag wala idetalye sa Bibliya ang kinabuhi ug kalihokan ni Habacuc, ang basahong gitawag sa iyang ngalan makadasig gyod nato. Ang iyang ngalan lagmit nagpasabot ug “Mabinationg Paggakos.” Puwedeng magtumong ni sa makapahupayng gakos ni Jehova o sa paagi nga ang iyang mga magsisimba masaligong naghawid niya. Si Habacuc nakigsulti ug nangutana sa Diyos. Sama rag nangutana siya para nato, kay giinspirar ni Jehova si Habacuc sa pagsulat sa ilang panag-estoryahay.​—Hab. 2:2.

³ Kining panag-estorya sa magul-anong propeta ug ni Jehova mao ray gisulti sa Kasulatan bahin kang Habacuc. Ang iyang basahon maoy bahin sa “tanang butang nga gisulat kanhi” ug girekord sa Pulong sa Diyos, “aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Sa unsang paagi makabenepisyo ta sa basahon sa Habacuc? Makatabang nâ nato nga masabtan kon unsay kahulogan sa pagsalig kang Jehova. Dugang pa, ang tagna ni Habacuc nagpasalig nato nga posibleng magmalinawon ang atong hunahuna bisan pa sa atong mga kasakit ug problema. Ato nang hinumdoman samtang susihon nato pag-ayo ang Habacuc.

 4. Nganong naguol pag-ayo si Habacuc?

⁴ Basaha ang Habacuc 1:2, 3. Si Habacuc nabuhi sa lisod kaayong panahon. Naguol siya pag-ayo kay daghan ang daotan ug bayolenteng mga tawo sa iyang palibot. Kanus-a matapos ang ilang pagkadaotan? Nganong dugay kaayong milihok si Jehova? Puro inhustisya ug pagdaogdaog na lang ang nakita ni Habacuc. Gibati niyang wala siyay mahimo. Busa nianang makapaguol kaayong panahon, gihangyo niya si Jehova nga molihok. Basin nagsugod paghunahuna si Habacuc nga wala magpakabana si Jehova. Morag dugay pa siyang molihok. Mibati ba sab kag ingon ana?

 5. Unsang importanteng leksiyon ang atong makat-onan sa Habacuc? (Tan-awa ang hulagway sa sinugdan sa artikulo.)

⁵ Nawad-an bag pagsalig si Habacuc kang Jehova ug sa Iyang mga saad? Wala! Ang pagsulti niya kang Jehova sa iyang mga problema ug kabalaka imbes sa mga tawo nagpakita nga wala siya mawad-ig paglaom. Dayag nga naglibog siya kon nganong wala pa molihok si Jehova ug kon nganong gitugot Niya nga mag-antos siya pag-ayo. Pinaagi sa pag-inspirar kang Habacuc nga isulat ang iyang mga kabalaka, si Jehova nagtudlo natog importanteng leksiyon: Dili ta angayng mahadlok sa pagsulti Niya sa atong mga kabalaka o pagduhaduha. Gani, giawhag ta niya nga isulti kaniya ang atong gibati. (Sal. 50:15; 62:8) Ang Proverbio 3:5 nagdasig sab nato nga ‘mosalig kang Jehova sa bug-os natong kasingkasing ug dili mosalig sa kaugalingong pagsabot.’ Lagmit gipadapat na kana ni Habacuc.

 6. Nganong importante ang pag-ampo?

⁶ Si Habacuc mismo ang nakigsuod kang Jehova, ang iyang kasaligang Higala ug Amahan. Wala soloha ni Habacuc ang iyang problema, nga nagsalig lang sa iyang kaugalingong pagsabot. Hinunoa, giampo niya ang iyang mga kabalaka, nga nagpakitag maayong ehemplo kanato. Dugang pa, si Jehova, ang Tigpatalinghog sa pag-ampo, nag-awhag nato nga mosalig niya pinaagi sa pagsulti kaniya sa atong mga kabalaka. (Sal. 65:2) Kon ato nang buhaton, makita nato ang tubag ni Jehova sa atong mga pag-ampo​—ang iyang mainitong gakos pinaagi sa iyang mapinanggaong giya. (Sal. 73:23, 24) Tabangan ta niya nga mahibaloan ang iyang hunahuna bisag unsay atong giantos. Ang atong kinasingkasing nga pag-ampo maoy usa sa nindot kaayong mga paagi sa pagpakita sa atong pagsalig sa Diyos.

 7. Unsay reaksiyon ni Jehova dihang gisulti ni Habacuc ang iyang mga kabalaka?

⁷ Basaha ang Habacuc 1:5-7. Human masulti kang Jehova ang iyang mga kabalaka, lagmit naghunahuna si Habacuc kon sa unsang paagi molihok si Jehova. Ingong mabination ug masinabtanong Amahan, wala siya kasab-i ni Jehova sa iyang sinserong reklamo. Nahibalo ang Diyos nga si Habacuc nag-antos ug nangayog tabang. Sa mga pulong nga gitumong ngadto sa masinupakong mga Hudiyo, gisultian ni Jehova si Habacuc kon unsay hapit nang mahitabo. Lagmit si Habacuc ang unang gipahibalo ni Jehova nga hapit na Niyang silotan ang mga daotan.

 8. Nganong naglibog si Habacuc sa tubag ni Jehova?

⁸ Gipakita ni Jehova kang Habacuc nga andam Siyang molihok. Hapit na niyang silotan kanang bayolente ug daotang henerasyon. Pinaagi sa pag-ingong “sa inyong mga adlaw,” gipakita ni Jehova nga ang paghukom mahitabo gyod samtang buhi pa si Habacuc ug ang iyang mga kontemporaryo. Ang tubag ni Jehova dili maoy gidahom ni Habacuc. Mao ba ni tubag sa iyang reklamo? Ang gisulti ni Jehova klarong nagpasabot nga mograbe ang pag-antos sa Juda.a Ang mga Caldeanhon (mga Babilonyanhon) bangis ug way kaluoy, mas bayolente pa kay sa mga Israelinhon, kinsa nahibalo sa mga sukdanan ni Jehova. Nganong gamiton ni Jehova kining way kaluoy ug paganong nasod sa pagsilot sa iyang katawhan? Kon ikaw pa si Habacuc, unsa kahay imong reaksiyon?

 9. Unsa pay gikalibgan ni Habacuc?

⁹ Basaha ang Habacuc 1:12-14, 17. Nasabtan ni Habacuc nga gamiton ni Jehova ang Babilonya aron hukman ug silotan ang mga daotan sa iyang palibot, pero naglibog gihapon siya. Bisan pa niana, mapainubsanon niyang giingnan si Jehova nga Siya mao gihapon ang iyang “Bato.” (Deut. 32:4; Isa. 26:4) Si Habacuc mapailobon gihapong mosalig sa gugma ug pagkamaayo sa Diyos. Ang determinasyon sa propeta naghatag niyag kompiyansa nga mohangyo pag-usab kang Jehova. Nganong tugotan man sa Diyos nga mograbe ang kahimtang sa Juda? Nganong dili man dayon siya molihok? Nganong tugotan man sa Labing Gamhanan nga mograbe ang kagul-anan? Nganong ‘magpakahilom’ siya nga midaghan man ang mga daotan? Kon buot hunahunaon, siya ang “Balaang Usa”; “putli kaayo ang [iyang] mga mata aron motan-aw sa daotan.”

10. Nganong mobati ta usahay ug sama sa gibati ni Habacuc?

¹⁰ Usahay, mobati tag sama sa gibati ni Habacuc. Mamati ta kang Jehova. Uban ang bug-os nga pagsalig, atong gibasa ug gitun-an ang iyang Pulong, ug naghatag ni natog paglaom. Atong nahibaloan ang iyang mga saad pinaagi sa instruksiyon gikan sa iyang organisasyon. Pero basin makapangutana gihapon ta, ‘Kanus-a matapos ang atong pag-antos?’ Unsay atong makat-onan sa sunod nga gihimo ni Habacuc?

11. Unsay determinadong buhaton ni Habacuc human siya mamati kang Jehova?

¹¹ Basaha ang Habacuc 2:1. Ang pagpakig-estorya ni Habacuc kang Jehova nakahatag niyag kalinaw sa hunahuna. Busa determinado siyang magpadayon sa paghulat nga molihok si Jehova. Dili ni kinalitkalit nga reaksiyon, kay gipakita niya pag-usab ang iyang determinasyon dihang siya miingon: “Sa hilom ako maghulat sa adlaw sa kasakit.” (Hab. 3:16) Ang ubang matinumanong mga alagad sa Diyos mapailobon sab nga naghulat. Nagdasig ni nato nga magpadayon sa paghulat nga molihok si Jehova.​—Miq. 7:7; Sant. 5:7, 8.

12. Unsay atong makat-onan kang Habacuc?

¹² Unsay atong makat-onan sa determinasyon ni Habacuc? Una, dili gyod ta mohunong sa pag-ampo kang Jehova, bisag unsa pay atong kalisdanan. Ikaduha, kinahanglang mamati ta kang Jehova pinaagi sa iyang Pulong ug organisasyon. Ikatulo, kinahanglang mapailobon tang maghulat kang Jehova, nga bug-os mosalig nga hupayon niya sa iyang gitakdang panahon ang atong kasakit. Kon padayon tang makig-estorya, mamati, ug maghulat kang Jehova, sama kang Habacuc, makabaton sab tag kalinaw sa hunahuna, nga makatabang nato sa paglahutay. Ang atong paglaom makatabang nato nga magmapailobon ug magmalipayon bisan pa sa atong kalisdanan. Ang paglaom maghatag natog pagsalig nga molihok ang atong langitnong Amahan.​—Roma 12:12.

13. Unsay pasalig diha sa Habacuc 2:3?

¹³ Basaha ang Habacuc 2:3. Seguradong nalipay si Jehova sa desisyon ni Habacuc nga maghulat. Nahibalo gyod ang Labing Gamhanan sa kalisdanan ni Habacuc. Busa, gihupay siya sa Diyos pinaagi sa mahigugmaong pagpasalig kaniya nga matubag ra ang iyang sinserong mga pangutana. Hapit nang matapos ang tanan niyang gikabalak-an. Sama rag giingnan sa Diyos si Habacuc: “Pailob lang. Salig nako. Moabot ra ang akong tubag bisan pag mora nig nalangan!” Gipahinumdoman ni Jehova si Habacuc nga may gitakda Siyang panahon sa pagtuman sa Iyang mga saad. Gitambagan niya si Habacuc nga maghulat sa katumanan sa Iyang mga saad. Busa, dili gyod madismayar ang propeta.

14. Unsay angay natong determinasyon panahon sa kalisdanan?

¹⁴ Ang mapailobong paghulat kang Jehova ug pagpamati kaniya maghatag natog pagsalig ug kalinaw sa hunahuna bisan pa sa mga kalisdanan. Miingon si Jesus nga makasalig ta kang Jehova ingong Dakong Tigtakda sa Panahon, nga dili ta magpokus sa “mga panahon o mga yugto sa panahon” nga wala pa ipadayag sa Diyos. (Buh. 1:7) Busa, dili gyod ta mosurender kondili maghulat nga mapainubsanon, masaligon, ug mapailobon, nga pahimuslan ang higayon pinaagi sa pag-alagad kang Jehova kutob sa atong mahimo.​—Mar. 13:35-37; Gal. 6:9.

15, 16. (a) Unsang mga saad ang atong makita sa Habacuc? (b) Unsay atong makat-onan niini nga mga saad?

¹⁵ Si Jehova nagsaad sa matarong nga misalig kaniya: “[Ang matarong] magpadayong buhi tungod sa iyang pagkamatinumanon,” ug “ang yuta mapuno sa kahibalo sa himaya ni Jehova.” (Hab. 2:4, 14) Oo, kadtong mapailobong mosalig sa Diyos gantihan ug kinabuhi.

¹⁶ Kon tan-awon, ang saad sa Habacuc 2:4 morag simple lang nga pamulong. Pero, nakita ni apostol Pablo nga importante kaayo ang pasalig ni Jehova maong katulo ni niya gikutlo sa iyang mga sulat! (Roma 1:17; Gal. 3:11; Heb. 10:38) Bisag unsa pay kalisdanan nga ginaantos sa matarong, kon siya may pagtuo ug pagsalig sa Diyos, makita niya ang katumanan sa Iyang mga saad. Giingnan ta ni Jehova nga magpokus sa umaabot.

17. Unsay gipasalig kanato sa Habacuc?

¹⁷ Ang Habacuc naghatag ug hinungdanong leksiyon alang kanato nga nagkinabuhi niining kataposang mga adlaw. Si Jehova nagsaad ug kinabuhi ngadto sa mga matarong nga motuo ug mosalig kaniya. Busa, magpadayon ta sa pagpalig-on sa atong pagtuo ug pagsalig sa Diyos, bisag unsa pang kalisdanan ug kabalaka ang atong giatubang. Pinaagi kang Habacuc, gipasaligan ta ni Jehova nga Siya motabang ug magluwas kanato. Gihangyo ta niya nga mosalig kaniya ug mapailobong maghulat sa iyang gitakdang panahon dihang magmando na sa yuta ang Gingharian. Nianang panahona, ang tibuok yuta mapuno sa malipayon ug malumo nga mga magsisimba.​—Mat. 5:5; Heb. 10:36-39.

18. Unsay epekto sa gisulti ni Jehova diha kang Habacuc?

¹⁸ Basaha ang Habacuc 3:16-19. Dako kaayog epekto kang Habacuc ang gisulti ni Jehova. Iyang gipamalandong ang makapahinganghang mga butang nga gihimo ni Jehova para sa iyang katawhan. Napalig-on niana ang iyang pagsalig. Nahibalo siya nga hapit nang molihok si Jehova! Nakapahupay nâ sa propeta, bisan pag nahibalo siya nga taudtaod pa siyang mag-antos. Ang sinserong pagduhaduha ni Habacuc napulihag lig-on ug malipayong pagsalig nga luwason siya ni Jehova. Iyang gisulti ang usa sa labing halandomong mga pulong sa pagsalig nga narekord sa Bibliya. Ang pipila ka eksperto naghunahuna nga ang bersikulo 18 literal nga nagpasabot, “Ako molukso sa kalipay diha sa Ginoo; ako magsayawsayaw sa kalipay diha sa Diyos.” Pagkanindot nga pasalig kanato! Si Jehova wala lang maghatag nato ug nindot nga mga saad, kondili nagpasalig siya nga duna siyay ginahimo karon aron matuman ang iyang mga saad.

19. Sa unsang paagi mahupayan ta sama kang Habacuc?

¹⁹ Walay duhaduha, ang importanteng mensahe ni Habacuc mao ang pagsalig kang Jehova. (Hab. 2:4) Aron padayon tang mosalig kang Jehova, kinahanglang palig-onon nato ang atong relasyon kaniya pinaagi sa (1) paglahutay diha sa pag-ampo, nga isulti kang Jehova ang tanan natong kabalaka; (2) pagpamati pag-ayo sa Pulong ni Jehova ug sa bisan unsang instruksiyon gikan sa iyang organisasyon; ug (3) matinumanon ug mapailobong paghulat kang Jehova. Mao nay gibuhat ni Habacuc. Bisag magul-anon siya sa sinugdan sa iyang basahon, sa kataposan niini, siya masaligon ug malipayon. Hinaot sundogon nato siya aron mahupayan sab ta sa mabinationg gakos ni Jehova! May lain pa bang makahupay nato niining daotang kalibotan?