Si Jehova Dili Maglangan

“Bisan [ang panan-awon] malangan, padayon sa pagpaabot niini; kay kini moabot gayod. Kini dili malangan.”—HABACUC 2:3.

 1. Unsang determinasyon ang gipasundayag sa katawhan ni Jehova, ug nakatukmod kini kanila sa paghimog unsa?

“AKO magpadayon sa pagtindog sa akong bantayanan.” Mao kanay lig-ong tinguha sa manalagna sa Diyos nga si Habacuc. (Habacuc 2:1) Ang katawhan ni Jehova sa ika-20ng siglo nakapakita ug sama niana nga determinasyon. Busa, sila misanong nga madasigon niini nga panawag nga gipalanog sa halandomong kombensiyon sa Septiyembre 1922: “Kini ang mga adlaw sa tanang adlaw. Tan-awa, ang Hari nagmando! Kamo mao ang iyang mga ahente sa pagmantala. Busa isangyaw, isangyaw, isangyaw, ang Hari ug ang iyang gingharian.”

 2. Sa dihang napasig-uli sa madasig nga kalihokan human sa Gubat sa Kalibotan I, unsay napahayag sa dinihogang mga Kristohanon?

² Human sa Gubat sa Kalibotan I, gipasig-uli ni Jehova ang matinumanong dinihogan nga nanghibilin sa usa ka kahimtang sa madasig nga kalihokan. Sama kang Habacuc, ang matag usa kanila niadtong tungora mipahayag: “Ako magpadayon sa pagtindog diha sa kuta; ug ako magpadayon sa pagbantay, aron masuta kon unsay iyang isulti kanako.” Ang Hebreohanong mga pulong alang sa “pagbantay” ug “pagguwardiya” gisublisubli diha sa daghang tagna.

“Kini Dili Malangan”

 3. Nganong kita kinahanglang magpadayon sa pagbantay?

³ Samtang ang mga Saksi ni Jehova nagpalanog sa pasidaan sa Diyos karon, sila kinahanglang alisto gayod kanunay sa pagpatalinghog sa panghinapos nga mga pulong sa dakong tagna ni Jesus: “Padayong magbantay, kay wala kamo mahibalo kon kanus-a moabot ang agalon sa balay, kon sa talitapos ba sa adlaw o sa tungang-gabii o sa tingtugaok sa manok o sayo sa buntag; aron nga sa dihang moabot siya sa kalit, dili kamo niya hikaplagan nga nangatulog. Apan ang akong ginaingon kaninyo akong ginaingon sa tanan, Padayong magbantay.” (Marcos 13:35-37) Sama kang Habacuc, ug nahiuyon sa mga pulong ni Jesus, kita kinahanglang magpadayon sa pagbantay!

 4. Sa unsang paagi ang atong kahimtang kaamgid niadtong kang Habacuc sa mga 628 W.K.P.?

⁴ Si Habacuc tingali nakatapos sa pagsulat sa iyang basahon sa mga 628 W.K.P., una pa nahimong pangunang gahom sa kalibotan ang Babilonya. Sa daghang tuig ang mga paghukom ni Jehova sa apostatang Jerusalem napalanog na. Bisan pa niana, walay klarong timailhan kon kanus-a ipatuman ang maong paghukom. Kinsay makatuo nga mga 21 ka tuig lamang kana sa ulahi ug nga ang Babilonya mahimong maglalaglag ni Jehova? Sa susama karon, kita wala mahibalo sa ‘adlaw ug takna’ nga gitakda alang sa kataposan niini nga sistema, apan si Jesus nakapasidaan na kanato: “Pamatud-i ang inyong kaugalingon nga andam, tungod kay sa takna nga wala ninyo hunahunaa nga kini mao, ang Anak sa tawo moabot.”—Mateo 24:36, 44.

 5. Unsa ilabina ang makapadasig bahin sa mga pulong sa Diyos nga narekord sa Habacuc 2:2, 3?

⁵ Sa maayong katarongan, gihatagan ni Jehova si Habacuc niining makapadasig nga sugo: “Isulat ang panan-awon, ug himoa kining matin-aw diha sa mga papan, aron mabasa ug maayo sa usa nga nagabasa niini sa makusog. Kay ang panan-awon alang pa sa natudlong panahon, ug kini nagadali paingon sa kataposan, ug kini dili magbakak. Bisan kini malangan, padayon sa pagpaabot niini; kay kini moabot gayod. Kini dili malangan.” (Habacuc 2:2, 3) Karon, ang pagkadaotan ug kapintasan kaylap sa tibuok yuta, nga nagpaila nga kita nagbarog na sa ngilit sa “dako ug makalilisang nga adlaw ni Jehova.” (Joel 2:31) Pagkamakapadasig ang kaugalingong mga pulong ni Jehova sa pasalig: “Kini dili malangan”!

 6. Sa unsang paagi kita maluwas sa umaabot nga adlaw sa gihukom nga kalaglagan?

⁶ Nan, sa unsang paagi kita maluwas sa umaabot nga adlaw sa gihukom nga kalaglagan? Si Jehova nagtubag pinaagi sa pagtandi niining kalainan tali sa mga matarong ug dili-matarong: “Tan-awa! Ang iyang kalag nagapaburot; kini dili matarong diha kaniya. Apan bahin sa usa nga matarong, siya mabuhi tungod sa iyang pagkamatinumanon.” (Habacuc 2:4) Ang mapahitas-on ug hakog nga mga magmamando ug mga tawo nakahatag ug lama sa mga yugto sa modernong kasaysayan sa dugo sa minilyong inosenteng mga biktima, ilabina diha sa duha ka gubat sa kalibotan ug sa etnikong mga pagpinatyanay. Sa kasukwahi, ang mahigugmaon-ug-pakigdait nga dinihogang mga alagad sa Diyos nakalahutay sa pagkamatinumanon. Sila mao ang “matarong nga nasod nga nagbantay sa kagawian sa pagkamatinumanon.” Kining nasora, duyog sa kauban niini, ang “ubang mga karnero,” nagsunod sa tambag: “Salig kamo kang Jehova sa tanang panahon, tungod kay anaa kang Jah Jehova ang Bato sa mga panahong walay tino.”—Isaias 26:2-4; Juan 10:16.

 7. Nahiuyon sa paggamit ni Pablo sa Habacuc 2:4, unsay atong kinahanglang himoon?

⁷ Nagsulat ngadto sa Hebreohanong mga Kristohanon, si apostol Pablo nagkutlo sa Habacuc 2:4 sa dihang nagsulti sa katawhan ni Jehova: “Kamo nanginahanglan ug pag-agwanta, aron nga, human ninyo mabuhat ang kabubut-on sa Diyos, kamo makadawat sa katumanan sa saad. Kay ‘diyutay kaayong panahon’ na lang, ug ‘siya nga moanhi moabot na ug dili maglangan.’ ‘Apan ang akong usa nga matarong mabuhi tungod sa pagtuo,’ ug, ‘kon siya mosibog, ang akong kalag walay kahimuot kaniya.’” (Hebreohanon 10:36-38) Ang atong panahon dili maoy panahon sa paglangaylangay o magpalit-ag sa materyalistiko, nabuang-sa-kalingawan nga mga dalan sa kalibotan ni Satanas. Unsay atong kinahanglang himoon hangtod ang “diyutay kaayong panahon” mahurot? Sama kang Pablo, kita nga iya sa balaan nga nasod ni Jehova kinahanglang ‘magapangab-ot sa mga butang sa unahan, nga mangagpas sa tumong alang sa ganti’ nga kinabuhing walay kataposan. (Filipos 3:13, 14) Ug sama kang Jesus, kita kinahanglang ‘mag-agwanta tungod sa kalipay nga gibutang sa atong atubangan.’—Hebreohanon 12:2.

 8. Kinsa ang “tawo” sa Habacuc 2:5, ug nganong siya dili molampos?

⁸ Ang Habacuc 2:5 nagbatbat ug “usa ka tawong kusgan” kinsa, kasukwahi sa mga alagad ni Jehova, napakyas sa pagkab-ot sa iyang tumong, bisan pag iyang “gipadako ang iyang kalag sama sa Sheol.” Kinsa kining tawhana nga “dili matagbaw”? May kinaiya nga dili matagbaw sama nianang sa Babilonya sa panahon ni Habacuc, kining daghag-bahin nga “tawo,” karon gilangkoban sa politikanhong mga gahom— kaha Pasista, Nazi, Komunista, o bisan kadtong ginaingong demokratikanhon—nakiggubat aron magpadako sa iyang kayutaan. Iyang gipuno usab ang Sheol, ang lubnganan, sa inosenteng mga kalag. Apan kining mabudhion nga daghag-bahin nga “tawo” sa kalibotan ni Satanas, nga nahubog sa iyang pagpaimportante sa kaugalingon, dili molampos sa “pagtigom alang sa iyang kaugalingon sa tanang kanasoran ug sa pagtipon sa tanan alang sa iyang kaugalingon sa tanang katawhan.” Si Jehova nga Diyos lamang ang makapahiusa sa tanang katawhan, ug iyang tumanon kini pinaagi sa Mesiyanikong Gingharian.—Mateo 6:9, 10.

Ang Una sa Lima ka Madulaon nga Kaalaotan

9, 10. (a) Unsay gipadayon sa pagpahayag ni Jehova pinaagi kang Habacuc? (b) Mahitungod sa linimbong nga ganansiya, unsay kahimtang karon?

⁹ Pinaagi sa iyang manalagnang Habacuc, si Jehova mipadayon sa pagpahayag sa sunodsunod nga lima ka kaalaotan, mga paghukom sa kalaglagan nga kinahanglang ipatuman sa pag-andam sa yuta aron pagapuy-an sa matinumanong mga magsisimba sa Diyos. Ang maong mga matarong-ug-kasingkasing ‘mohisgot ug sambingay’ nga ipadayag ni Jehova. Atong mabasa sa Habacuc 2:6: “Alaot siya nga nagpatubo niadtong dili iya—Oh hangtod kanus-a!—ug nga nagpabug-at sa iyang kaugalingon sa mga utang!”

¹⁰ Ang gipasiugda dinhi mao ang linimbong nga ganansiya. Diha sa kalibotan libot kanato, ang dato misamot ka dato, ug ang pobre misamot ka pobre. Ang mga negosyanteg mga droga ug mga mangingilad nakabaton ug daghang bahandi, samtang daghan sa mga tawong kabos gigutom. Un-kuwarto sa populasyon sa kalibotan ginaingon nga nag-ilaid sa kawalad-on. Ang mga kahimtang sa pagkinabuhi makalilisang diha sa daghang nasod. Kadtong nangandoy sa pagkamatarong dinhi sa yuta moingon: “Oh hangtod kanus-a” nga kining pagkawalay-kaangayan magpadayon sa pagdaghan! Bisan pa niana, ang kataposan haduol na! Sa pagkatinuod, ang panan-awon “dili malangan.”

11. Unsay giingon ni Habacuc bahin sa pag-ula sa tawhanong dugo, ug nganong makaingon kita nga dako ang pagkasad-an sa dugo sa yuta karon?

¹¹ Gisultihan sa manalagna ang usa nga daotan: “Tungod kay imong gilungkab ang daghang kanasoran, ikaw pagalungkabon sa tanang nahibilin sa katawhan, tungod sa pag-ula sa dugo sa tawo ug sa kadaot nga nahimo ngadto sa yuta, sa lungsod ug sa tanang nagapuyo niana.” (Habacuc 2:8) Pagkadakong pagkasad-an sa dugo ang atong nakita diha sa yuta karon! Si Jesus yanong nag-ingon: “Ang tanang mogamit sa espada mamatay pinaagi sa espada.” (Mateo 26:52) Apan, sa ika-20ng siglo lamang, ang sad-an sa dugo nga mga nasod ug etnikong mga grupo maoy responsable sa pagpatay sa kapin sa usa ka gatos ka milyong tawo. Pagkaalaot niadtong nakigbahin niini nga mga pinatyanay!

Ang Ikaduhang Kaalaotan

12. Unsa ang ikaduhang kaalaotan nga girekord ni Habacuc, ug sa unsang paagi kita makatino nga ang ganansiya nga nakuha pinaagi sa panglimbong walay kapuslanan?

¹² Ang ikaduhang kaalaotan, nga narekord diha sa Habacuc 2:9-11, naagoman sa “usa nga nanguwarta sa linimbong nga paagi alang sa iyang balay, aron ipahimutang ang iyang salag sa itaas, aron maluwas gikan sa gahom nga makadaot!” Ang linimbong nga ganansiya walay kapuslanan, ingon sa gipatin-aw sa salmista: “Ayaw kahadlok tungod kay ang usa ka tawo nakabaton ug bahandi, tungod kay ang himaya sa iyang balay midugang, kay sa dihang siya mamatay walay iyang madala nga bisan unsa; ang iyang himaya dili manaog uban kaniya.” (Salmo 49:16, 17) Nan, maayong tagdon ang maalamong tambag ni Pablo: “Ihatag ang sugo kanilang kinsa dato sa karong sistema sa mga butang nga dili magmapahitas-on sa kaisipan, ug nga magpahimutang sa ilang paglaom, dili sa walay-kasegurohang bahandi, apan sa Diyos, kinsa nagahatag kanato sa tanang butang nga dagaya alang sa atong kalipayan.”—1 Timoteo 6:17.

13. Nganong kinahanglang magpadayon kita sa pagpalanog sa pasidaan sa Diyos?

¹³ Pagkahinungdanon nga ang mga mensahe sa paghukom sa Diyos ipalanog karon! Sa dihang misupak ang mga Pariseo sa panon sa mga tawo nga nagpasidungog kang Jesus ingong “ang Usa nga nagaanhi ingong Hari sa ngalan ni Jehova,” siya miingon: “Ako magasulti kaninyo, Kon kini sila pabiling maghilom, ang mga bato managpaninggit.” (Lucas 19:38-40) Sa susama, kon ang katawhan sa Diyos karon mapakyas sa pagyagyag sa pagkadaotan nga naglungtad niining kalibotana, ‘ang bato mosinggit gikan sa kuta.’ (Habacuc 2:11) Busa kita sa maisogon magpadayon sa pagpalanog sa pasidaan sa Diyos!

Ang Ikatulong Kaalaotan ug ang Isyu sa Pagkasad-an sa Dugo

14. Ang mga relihiyon sa kalibotan maoy responsable sa unsang pagkasad-an sa dugo?

¹⁴ Ang ikatulong kaalaotan nga gipahayag pinaagi kang Habacuc naghisgot bahin sa isyu sa pagkasad-an sa dugo. Nag-ingon ang Habacuc 2:12: “Alaot siya nga nagatukod ug siyudad pinaagi sa pag-ula sa dugo, ug lig-ong nagtukod ug lungsod pinaagi sa pagkadili-matarong!” Niini nga sistema sa mga butang, ang pagkadili-matarong ug pag-ulag dugo kasagarang mag-uban. Ilabina, ang mga relihiyon sa kalibotan maoy responsable sa labing mangilngig nga mga pinatyanay sa kasaysayan. Atong hisgotan lamang ang mga Krusada, diin ang gitawag nga mga Kristohanon nagsangkaay batok sa mga Muslim; ang Katolikong Inkwisisyon sa Espanya ug Latin Amerika; ang Katloan ka Tuig nga Gubat sa Uropa tali sa mga Protestante ug mga Katoliko; ug ang madugoon niining tanan, ang duha ka gubat sa kalibotan sa atong siglo, diin ang duha nagsugod diha sa natad sa Kakristiyanohan.

15. (a) May pagpaluyo o pag-uyon sa iglesya, unsay padayong ginahimo sa mga nasod? (b) Ang Hiniusang Kanasoran molampos ba sa pagdis-armar niining kalibotana?

¹⁵ Ang usa sa kinangilngigang bahin sa ikaduhang gubat sa kalibotan mao ang Nazi Holocaust, nga nakapatay ug minilyong Hudiyo ug ubang mga inosente sa Uropa. Karon lang bag-o nga ang Romano Katolikong herarkiya sa Pransiya miadmitir nga kini wala motutol sa pagpadala sa ginatos ka libong biktima ngadto sa mga lawak nga patyanan sa Nazi. Bisan pa niana, ang mga nasod nagpadayon sa pag-andam sa pag-ulag dugo, nga may pagpaluyo o pag-uyon sa iglesya. Naghisgot bahin sa Ortodoksong Iglesya sa Rusya, ang magasing Time (internasyonal nga edisyon) dili pa dugay miingon: “Ang napasig-uling iglesya dako usab ug impluwensiya sa usa ka natad nga dili-mahanduraw kaniadto: ang makina sa gubat sa Ruso. . . . Ang pagbendisyon sa mga jet-fighter ug baraks halos naandan na. Niadtong Nobyembre, sa Danilovsky Monastery sa Moscow, ang kaulohan sa Russian Patriarchate, ang iglesya nagbendisyon pa sa nukleyar nga mga tipiganan sa Rusya.” Ang Hiniusang Kanasoran makasanta ba sa pagpadaghan sa yawan-on nga mga instrumento sa gubat niining kalibotana? Dili gayod! Sumala sa mantalaang The Guardian sa London, Inglaterra, usa ka tawo nga nakadaog sa Nobel Peace Prize mikomento: “Makatugaw gayod nga ang lima ka permanenteng mga membro sa UN Security Council maoy lima sa pangunang tigsuplay ug mga armas sa kalibotan.”

16. Unsay himoon ni Jehova labot sa mga nasod nga tigpasiugda ug gubat?

¹⁶ Ipatuman ba ni Jehova ang paghukom batok sa mga nasod nga tigpasiugda ug gubat? Ang Habacuc 2:13 nag-ingon: “Tan-awa! Dili ba gikan kang Jehova sa mga panon nga ang mga tawo nagabudlay alang lamang sa kalayo, ug nga ang nasodnong mga pundok nagahago alang lamang sa kakawangan?” “Si Jehova sa mga panon”! Oo, si Jehova adunay langitnong mga panon sa manulonda, nga iyang gamiton sa paglaglag sa makigubaton nga katawhan ug kanasoran!

17. Sa unsang sukod nga ang kahibalo ni Jehova magapuno sa yuta human ipatuman ang iyang paghukom diha sa mapintas nga nasodnong mga pundok?

¹⁷ Unsay mosunod human nga ipatuman ni Jehova ang paghukom batok sa maong mapintas nga nasodnong mga pundok? Ang Habacuc 2:14 naghatag ug tubag: “Ang yuta mapuno sa kahibalo sa himaya ni Jehova maingon nga ang katubigan nagatabon sa dagat.” Pagkatahom nga palaaboton! Sa Armagedon, ang pagkasoberano ni Jehova mabayaw sa walay kataposan. (Pinadayag 16:16) Siya nagpasalig kanato nga iyang ‘himayaon ang dapit mismo sa iyang mga tiil,’ kining yuta nga atong gipuy-an. (Isaias 60:13) Ang tanang tawo pagatudloan sa iya sa Diyos nga dalan sa kinabuhi, aron ang kahibalo bahin sa mahimayaong mga katuyoan ni Jehova magapuno sa yuta maingon nga ang katubigan nagatabon sa kadagatan.

Ang Ikaupat ug Ikalimang mga Kaalaotan

18. Unsang ikaupat nga kaalaotan ang gipahayag pinaagi kang Habacuc, ug sa unsang paagi gipabanaag niini ang moral nga kahimtang sa kalibotan karon?

¹⁸ Ang ikaupat nga kaalaotan gihubit diha sa Habacuc 2:15 niining mga pulonga: “Alaot kadtong nagpainom sa iyang isigkatawo, nga nagdugang niana sa imong kaaligutgot ug kasuko, aron sila mahubog, aron sa pagsud-ong sa ilang mga bahin sa lawas sa kaulaw.” Kini nagsugyot sa mapatuyangon, badlongong kahimtang sa modernong kalibotan. Ang imoralidad niini, nga gipaluyohan bisan sa matugotong relihiyosong mga pundok, misamot sa pagkatalamayon. Ang mga hampak, sama sa AIDS ug ubang mapasa sa sekso nga mga sakit, naghatag ug kadaot sa tibuok yuta. Imbes ipabanaag ang “himaya ni Jehova,” ang ako-una nga kaliwatan karon misamot sa pagkadaot ug nagpaingon ngadto sa pagpatuman sa paghukom sa Diyos. “Tugob sa kaulawan inay sa himaya,” kining daotang kalibotan hapit nang moinom gikan sa panaksan sa kasuko ni Jehova, nga naghawas sa iyang kabubut-on diha niana. ‘Ang kaulawan motabon sa himaya niini.’—Habacuc 2:16.

19. Ang pasiuna sa ikalimang kaalaotan nga gipahayag ni Habacuc may kalabotan sa unsa, ug nganong ang maong mga pulong makahuloganon sa kalibotan karon?

¹⁹ Ang pasiuna sa ikalimang kaalaotan kusganong nagpasidaan batok sa pagsimba sa linilok nga mga larawan. Gisugo ni Jehova ang manalagna sa pagpahayag niining kusganong mga pulong: “Alaot siya nga nagaingon ngadto sa kahoy: ‘Pagmata na!’ ngadto sa amang nga bato: ‘Bangon na! Kini manudlo’! Tan-awa! Kini sinapawan sa bulawan ug plata, ug wala gayoy gininhawa sa sulod niini.” (Habacuc 2:19) Hangtod karon, ang Kakristiyanohan ug ang gitawag nga kapaganohan moyukbo sa ilang mga krusipiho, mga Madona, mga larawan, ug ubang kokaamgid sa tawo ug hayop. Walay usa niini ang molihok aron sa pagluwas sa ilang mga magsisimba sa dihang moabot si Jehova aron ipatuman ang paghukom. Ang ilang mga butang nga sinapawan ug bulawan ug plata wala gayoy kapuslanan kon itandi sa kahalangdon sa walay kataposang Diyos, si Jehova, ug sa mga himaya sa iyang buhing mga kalalangan. Hinaot nga atong bayawon ang iyang walay-sama nga ngalan sa walay kataposan!

20. Sa unsang kahikayan sa templo nga kita nakapribilehiyo sa pag-alagad nga malipayon?

²⁰ Oo, ang atong Diyos, si Jehova, takos sa tanang pagdayeg. Uban ang dulot nga pagbati sa pagtahod kaniya, atong patalinghogan kanang kusganong pasidaan batok sa idolatriya. Apan pamati! Si Jehova nagsulti pa gihapon: “Si Jehova anaa sa iyang balaang templo. Paghilom atubangan niya, tibuok nga yuta!” (Habacuc 2:20) Tino nga ang templo sa Jerusalem ang anaa sa hunahuna sa manalagna. Apan, kita karon nakapribilehiyo sa pagsimba diha sa mas maayong kahikayan sa espirituwal nga templo, diin ang atong Ginoong Jesu-Kristo gitudlo ingong Hataas nga Saserdote. Dinhi, sa yutan-ong sawang sa maong templo, kita nagtigom, nag-alagad, ug nag-ampo, nga naghatag kang Jehova sa pasidungog nga angay sa iyang mahimayaong ngalan. Ug pagkadako sa atong kalipay sa paghatag ug kinasingkasing nga pagsimba ngadto sa atong mahigugmaong langitnong Amahan!

Nahinumdom Ka Ba?

• Unsay imong hunahuna sa mga pulong ni Jehova: “Kini dili malangan”?

• Unsa ang presenteng-adlawng kahulogan sa mga kaalaotan nga gipahayag pinaagi kang Habacuc?

• Nganong kinahanglang magpadayon kita sa pagpalanog sa pasidaan ni Jehova?

• Diha sa unsang sawang sa templo nga kita nakapribilehiyo sa pag-alagad?

[Mga hulagway sa panid 15]

Sama kang Habacuc, ang presenteng-adlaw nga mga alagad sa Diyos nahibalo nga si Jehova dili maglangan

[Mga hulagway sa panid 18]

Ikaw ba nagpabili sa pribilehiyo sa pagsimba kang Jehova diha sa sawang sa iyang espirituwal nga templo?

[Picture Credit Line sa panid 16]

U.S. Army photo