Malipayon Diha sa Diyos sa Atong Kaluwasan
“Ako magmasadya diha kang Jehova; ako magmalipayon diha sa Diyos sa akong kaluwasan.”—HABACUC 3:18.
1. May kalabotan sa unsa ang panan-awon ni Daniel sa wala pa mapukan ang Babilonya sa 539 W.K.P.?
KAPIN sa usa ka dekada sa wala pa mapukan ang Babilonya sa 539 W.K.P., ang tigulang nga manalagnang Daniel nakakita ug kulbahinam nga panan-awon. Kini nagtagna sa mga hitabo sa kalibotan nga mosangpot ngadto gayod sa pangataposang gubat tali sa mga kaaway ni Jehova ug sa iyang tinudlong Hari, si Jesu-Kristo. Unsay pagsanong ni Daniel? Siya miingon: “Ako gikapoy ug . . . nahiugnok gumikan sa mga butang nga nakita.”—Daniel 8:27.
2. Unsang panagsangka ang nakita ni Daniel diha sa panan-awon, ug unsay imong pagbati bahin sa pagkaduol na niini?
2 Kita komosta? Kita nagkinabuhi nga layo na sa agos sa panahon! Unsay atong pagsanong kon kita makaamgo nga ang panagsangka nga nakita sa panan-awon ni Daniel—ang gubat sa Diyos sa Armagedon—duol na kaayo? Unsay atong pagsanong kon atong makita nga ang pagkadaotan nga giyagyag sa tagna ni Habacuc kaylap na kaayo nga ang kalaglagan sa mga kaaway sa Diyos dili-kalikayan? Lagmit, ang atong pagbati mahisama kang Habacuc, ingon sa gihubit sa ikatulong kapitulo sa iyang matagnaong basahon.
Si Habacuc Nag-ampo sa Kaluoy sa Diyos
3. Alang kang kinsa nag-ampo si Habacuc, ug sa unsang paagi ang iyang mga pulong nakaapektar kanato?
3 Ang Habacuc kapitulo 3 maoy usa ka pag-ampo. Sumala sa bersikulo 1, kini gipahayag pinaagig mga awit sa pagbakho, mga awit sa kaguol o kasubo. Ang pag-ampo sa manalagna gitanyag nga morag alang kini sa iyang kaugalingon. Apan, sa pagkatinuod, si Habacuc nagsulti alang sa piniling nasod sa Diyos. Karong adlawa, ang iyang pag-ampo dunay dakong kahulogan alang sa katawhan sa Diyos, kinsa nagapakigbahin sa buluhaton sa pagsangyaw sa Gingharian. Sa dihang kita magbasa sa Habacuc kapitulo 3 nga kini ang anaa sa hunahuna, ang mga pulong niini mopabati kanato ug kahadlok apan may kalipay usab. Ang pag-ampo, o awit sa pagbakho, ni Habacuc mohatag kanato ug lig-ong katarongan nga magmalipayon diha kang Jehova, ang Diyos sa atong kaluwasan.
4. Nganong nahadlok si Habacuc, ug kita makatino sa unsang pagpasundayag sa gahom sa Diyos?
4 Sama sa atong namatikdan sa duha ka nag-unang mga artikulo, ang mga kahimtang daotan gayod kaayo sa yuta sa Juda sa panahon ni Habacuc. Apan dili motugot ang Diyos nga magpadayon kining kahimtanga. Si Jehova molihok, ingon sa iyang gihimo sa nangagi. Dili ikatingala nga mituaw ang manalagna: “Oh Jehova, nadungog ko ang taho bahin kanimo. Ako nahadlok, Oh Jehova, sa imong kalihokan”! Unsay buot niyang ipasabot? ‘Ang taho bahin kang Jehova’ mao ang narekord nga kasaysayan sa gamhanang mga buhat sa Diyos, sama diha sa Pulang Dagat, sa kamingawan, ug sa Jerico. Kining mga lihoka nahibaloan gayod ni Habacuc, ug kini nakapahadlok kaniya tungod kay siya nahibalo nga si Jehova mogamit pag-usab sa iyang dakong gahom batok sa iyang mga kaaway. Sa dihang atong makita ang pagkadaotan sa katawhan karon, kita usab nahibalo nga si Jehova molihok ingon sa iyang gihimo sa karaang mga panahon. Kana ba makapahadlok kanato? Siyempre! Bisan pa niana, kita moampo sama kang Habacuc: “Oh buhia kini sa taliwala sa katuigan! Sa taliwala sa katuigan hinaot ipahibalo mo kini. Sa panahon sa kasamok, hinaot ikaw mahinumdom sa pagpakitag kaluoy.” (Habacuc 3:2) Sa tinudlong panahon sa Diyos, “sa taliwala sa katuigan,” hinaot nga iyang palihokon ang iyang milagrosong gahom. Ug nianang panahona, hinaot nga mahinumdom siya sa pagpakitag kaluoy ngadto niadtong nahigugma kaniya!
Si Jehova Nagmartsa!
5. Sa unsang paagi ang “Diyos miabot gikan sa Teman,” ug unsay gipaila niini labot sa Armagedon?
5 Unsay mahitabo sa dihang madunggan ni Jehova ang atong pag-ampog kaluoy? Atong makita ang tubag diha sa Habacuc 3:3, 4. Una, ang manalagna nag-ingon: “Ang Diyos miabot gikan sa Teman, ang Balaang Usa gikan sa Bukid sa Paran.” Balik sa panahon ni manalagnang Moises, ang Teman ug Paran maoy ruta sa Israel latas sa kamingawan paingon sa Canaan. Samtang ang dakong nasod sa Israel nagpadayon sa ilang panaw, si Jehova morag naglihok kanunay, ug walay makapahunong kaniya. Una pa mamatay si Moises, siya miingon: “Si Jehova—gikan sa Sinai siya miabot, ug mikidlap siya gikan sa Seir diha kanila. Siya misidlak gikan sa kabukiran sa Paran, ug uban kaniya mao ang balaang mga panon [sa mga manulonda].” (Deuteronomio 33:2) Sa dihang si Jehova molihok batok sa iyang mga kaaway sa Armagedon, mahitabo ang susamang pasundayag sa iyang dili mabuntog nga gahom.
6. Dugang pa sa himaya sa Diyos, unsay nakita sa mailahon nga mga Kristohanon?
6 Si Habacuc miingon usab: “Ang dignidad [ni Jehova] mitabon sa kalangitan; ug ang yuta napuno sa pagdayeg kaniya. Kon bahin sa iyang kasanag, kini sama gayod sa kahayag.” Pagkaanindot nga talan-awon! Tinuod, ang mga tawo dili makatan-aw kang Jehova nga Diyos ug mabuhi. (Exodo 33:20) Apan, bahin sa matinumanong mga alagad sa Diyos, ang mga mata sa ilang mga kasingkasing sulawan sa dihang sila magpalandong sa iyang kahamili. (Efeso 1:18) Ug ang mailahon nga mga Kristohanon makakita ug usa ka butang dugang pa sa himaya ni Jehova. Ang Habacuc 3:4 mihinapos: “Siya adunay duha ka bidlisiw nga nagagula gikan sa iyang kamot, ug didto gitagoan ang iyang kusog.” Oo, atong nakita nga si Jehova andam sa paglihok, nga gigamit ang iyang tuong kamot sa kusog ug gahom.
7. Ang madaogong pagmartsa sa Diyos nagkahulogan ug unsa alang niadtong moalsa batok kaniya?
7 Ang madaogong pagmartsa sa Diyos magkahulogag katalagman alang niadtong moalsa batok kaniya. Ang Habacuc 3:5 nag-ingon: “Ang kamatay nagauna kaniya, ug ang grabeng hilanat migula sa iyang mga tiil.” Sa dihang ang mga Israelinhon hapit nang moabot sa mga utlanan sa Yutang Saad sa 1473 W.K.P., daghan kanila mialsa, nga nakigbahin sa imoralidad ug idolatriya. Tungod niini, kapin sa 20,000 nangamatay sa kamatay nga gipadala sa Diyos. (Numeros 25:1-9) Sa haduol nga umaabot, sa dihang si Jehova momartsa ngadto “sa gubat sa dakong adlaw sa Diyos nga Labing-Gamhanan,” kadtong moalsa batok kaniya samang makaagom tungod sa ilang mga kasal-anan. Ang uban mamatay pa sa literal nga kamatay.—Pinadayag 16:14, 16.
8. Sumala sa Habacuc 3:6, unsay hapit nang mahitabo sa mga kaaway sa Diyos?
8 Pamatia karon ang tin-awng paghubit sa manalagna bahin kang Jehova sa mga panon nga naglihok. Diha sa Habacuc 3:6, atong mabasa: “Siya [Jehova nga Diyos] mibarog, aron iyang uyogon ang yuta. Siya mitan-aw, ug dayon gipalukso ang mga nasod. Ug ang mga bukid nga walay kataposan nangatumpag; ang mga bungtod nga molungtad sa panahong walay tino nangalumpag. Ang mga paglakaw sa kanhing panahon iyaha.” Una, si Jehova ‘nagbarog,’ sama sa usa ka heneral nga nag-aninaw sa panggubatan. Ang iyang mga kaaway nangurog sa kahadlok. Ilang nakita kon kinsa ang ilang kaaway ug nahadlok, nanglukso sa kagubot. Si Jesus nagtagna sa panahon dihang ang “tanang tribo sa yuta magapukpok sa ilang kaugalingon sa pagminatay.” (Mateo 24:30) Ulahi na kaayo sa dihang makaamgo sila nga walay makabarog batok kang Jehova. Ang tawhanong mga organisasyon—bisan gani kadtong daw sama ka malungtaron sa “mga bukid nga walay kataposan” ug sa “mga bungtod nga molungtad sa panahong walay tino”—mangatumpag. Mahisama unya kini sa iya-sa-Diyos nga “mga paglakaw sa kanhing panahon,” sama sa iyang paglihok sa karaang mga panahon.
9, 10. Bahin sa unsa nga kita gipahinumdoman sa Habacuc 3:7-11?
9 Ang kang Jehova nga “kasuko miinit” batok sa iyang mga kaaway. Apan unsang mga hinagiban ang iyang gamiton sa iyang dakong gubat? Pamatia samtang gihubit kini sa manalagna, nga nag-ingon: “Ang imong pana gikuhaan ug putos. Ang mga panumpa sa mga tribo mao ang butang nga gisulti. Pinaagi sa mga suba imong gipikas ang yuta. Ang kabukiran nakakita kanimo; sila gisakitan sa hilabihan. Usa ka madalugdogong bagyo sa katubigan miagi. Ang halawom nga katubigan nagpagula sa iyang tingog. Ang iyang mga kamot gibayaw sa itaas. Ang adlaw—bulan—miurong, diha sa ilang puloy-anan sa kahitas-an. Sama sa kahayag ang imong mga pana nagapanaw. Ang pangidlap sa imong bangkaw nagsilbing kahayag.”—Habacuc 3:7-11.
10 Sa panahon ni Josue, gipaurong ni Jehova ang adlaw ug ang bulan sa talagsaong pagpasundayag sa gahom. (Josue 10:12-14) Ang tagna ni Habacuc nagpahinumdom kanato nga kining mao gihapong gahoma ang gamiton ni Jehova sa Armagedon. Sa 1513 W.K.P., gipasundayag ni Jehova ang iyang gahom ibabaw sa halawom nga katubigan sa yuta sa dihang iyang gigamit ang Pulang Dagat sa paglaglag sa kasundalohan ni Paraon. Kap-atan ka tuig sa ulahi, ang suba sa Jordan nga nagbaha wala makasanta sa madaogong pagmartsa sa Israel ngadto sa Yutang Saad. (Josue 3:15-17) Sa panahon sa babayeng manalagna nga si Debora, gibanlas sa kusog nga ulan ang mga karo sa kaaway sa Israel nga si Sisera. (Maghuhukom 5:21) Ang mao gihapong puwersa sa baha, kusog nga ulan, ug halawom nga katubigan magamit ni Jehova sa Armagedon. Ang dalugdog ug kilat anaa usab sa iyang kamot, sama sa usa ka bangkaw o udyong nga puno sa mga pana.
11. Unsay mahitabo sa dihang buhian ni Jehova ang iyang dakong gahom?
11 Sa pagkatinuod, makalilisang unya kaayo kini sa dihang buhian ni Jehova ang iyang dakong gahom. Ang mga pulong ni Habacuc nagsugyot nga ang gabii mahimong adlaw ug ang adlaw mas mohayag nga wala pa mahimo sukad sa adlaw. Kon kaha kining dinasig nga matagnaong kahubitan sa Armagedon literal o simboliko, usa ka butang ang tino—si Jehova modaog, nga wala gayoy kaaway ang makaikyas.
Kaluwasan Segurado Alang sa Katawhan sa Diyos!
12. Unsay himoon sa Diyos ngadto sa iyang mga kaaway, apan kinsa ang maluwas?
12 Ang manalagna nagpadayon sa paghubit sa mga lihok ni Jehova sa paglaglag sa Iyang mga kaaway. Sa Habacuc 3:12, atong mabasa: “Sa kasuko ikaw milatas sa yuta. Sa kasuko ikaw naggiok sa mga nasod.” Bisan pa niana, si Jehova dili magpaturagas ug laglag. Adunay mga tawong maluwas. “Ikaw migula alang sa kaluwasan sa imong katawhan, sa pagluwas sa imong usa nga dinihogan,” nag-ingon ang Habacuc 3:13. Oo, luwason ni Jehova ang iyang matinumanong dinihogang mga alagad. Ang kalaglagan sa Dakong Babilonya, ang tibuok-kalibotang imperyo sa bakak nga relihiyon, matapos na unya. Apan, karon, ang mga nasod naningkamot sa pagpapha sa putli nga pagsimba. Sa dili madugay, ang mga alagad ni Jehova atakehon sa mga puwersa ni Gog sa Magog. (Ezequiel 38:1–39:13; Pinadayag 17:1-5, 16-18) Molampos ba kanang sataniko nga pag-atake? Dili! Si Jehova nianang panahona masuk-anong magadugmok sa iyang mga kaaway, giokon sila samag lugas diha sa giokan. Apan iyang luwason kadtong nagsimba kaniya sa espiritu ug kamatuoran.—Juan 4:24.
13. Sa unsang paagi ang Habacuc 3:13 matuman?
13 Ang bug-os nga kalaglagan sa daotan gitagna niining mga pulonga: “Imong [Jehova] gidugmok ang pangulo gikan sa balay sa daotan. Gipadayag ang patukoranan, hangtod sa liog.” (Habacuc 3:13) Kining maong “balay” mao ang daotang sistema nga mitungha ilalom sa impluwensiya ni Satanas nga Yawa. Kini pagapusgayon. Ang “pangulo,” o batok-sa-Diyos nga mga lider, pagadugmokon. Ang tibuok nga tinukod pagagub-on, hangtod sa pundasyon niini. Dili na kini maglungtad. Pagkadakong kahupayan unya kana!
14-16. Sumala sa Habacuc 3:14, 15, unsay mahitabo sa katawhan ni Jehova ug sa ilang mga kaaway?
14 Sa Armagedon, kadtong mosulay sa paglaglag sa “usa nga dinihogan” ni Jehova magkaguliyang. Sumala sa Habacuc 3:14, 15, ang manalagna nakigsulti sa Diyos, nga nag-ingon: “Pinaagi sa kaugalingon niyang mga bangkaw gipalagbasan mo ang ulo sa iyang mga manggugubat sa dihang misulong sila samag bagyo sa pagpatibulaag kanako. Ang ilang dakong kangaya maoy sama niadtong buot molamoy sa usa nga sinakit diha sa tago nga dapit. Latas sa dagat ikaw mitaak pinaagi sa imong mga kabayo, latas sa tipun-og sa dakong katubigan.”
15 Sa dihang si Habacuc miingon “ang mga manggugubat . . . misulong samag bagyo sa pagpatibulaag kanako,” ang manalagna naghisgot alang sa dinihogang mga alagad ni Jehova. Samag mga tulisan nga nag-atang, luksohan sa mga nasod ang mga magsisimba ni Jehova aron sa paglaglag kanila. Kini nga mga kaaway sa Diyos ug sa iyang katawhan ‘malipay ug dako,’ nga masaligon nga molampos. Ang matinumanong mga Kristohanon luya nga tan-awon, sama sa “usa nga sinakit.” Apan sa dihang sugdan sa batok-sa-Diyos nga mga puwersa ang ilang pag-atake, himoon ni Jehova nga ang ilang mga hinagiban mobali batok kanila. Ilang gamiton ang ilang mga armas, o “mga bangkaw,” batok sa ilang kaugalingong mga manggugubat.
16 Apan daghan pa ang anaa sa kapunawpunawan. Gamiton ni Jehova ang labaw-tawhanon nga espirituhanong mga puwersa sa pagbug-os sa paglaglag sa iyang mga kaaway. Pinaagi sa “mga kabayo” sa iyang langitnong kasundalohan ilalom ni Jesu-Kristo, siya mosulong nga madaogon latas “sa dagat” ug “sa tipun-og sa dakong katubigan,” sa ato pa, ang nagbul-og nga masa sa kaawayng katawhan. (Pinadayag 19:11-21) Unya ang daotan pagakuhaon gikan sa yuta. Pagkagamhanang pasundayag sa balaang gahom ug hustisya!
Ang Adlaw ni Jehova Nagkaduol!
17. (a) Nganong makasalig kita nga matuman ang mga pulong ni Habacuc? (b) Sa unsang paagi kita mahisama kang Habacuc samtang kita naghulat sa dakong adlaw ni Jehova?
17 Kita makatino nga ang mga pulong ni Habacuc matuman sa dili madugay. Kini dili maglangan. Unsay imong pagsanong niining pagkahibalong-daan? Hinumdomi nga si Habacuc nagsulat ilalom sa pagdasig sa Diyos. Si Jehova molihok, ug magkaguliyang unya ang yuta sa dihang kana mahitabo. Dili ikahibulong nga ang manalagna misulat: “Nakabati ako, ug ang akong tiyan naukay; ang akong mga ngabil nangurog tungod sa tingog; ang pagkadunot misulod sa akong kabukogan; ug sa akong kahimtang ako nasamok, aron sa hilom ako maghulat sa adlaw sa kasakit, sa iyang pag-adto sa katawhan, aron iyang sulngon sila.” (Habacuc 3:16) Si Habacuc nasamok pag-ayo—siyempre. Apan natarog ba ang iyang pagtuo? Wala gayod! Siya andam sa paghulat nga hilom sa dakong adlaw ni Jehova. (2 Pedro 3:11, 12) Dili ba mao usab kanay atong tinamdan? Mao gayod! Kita adunay bug-os nga pagtuo nga matuman ang tagna ni Habacuc. Apan, hangtod nga wala pa kini matuman, kita mapailobong maghulat.
18. Bisan pag si Habacuc nagdahom nga moabot ang mga kalisod, unsay iyang tinamdan?
18 Ang gubat kanunayng mohatag ug kalisod, bisan sa mga makadaog sa ulahi. Tingali adunay kakulang sa pagkaon. Ang kabtangan tingali mangawala. Ang mga sukdanan sa pagkinabuhi moubos. Kon kana mahitabo kanato, unsay atong pagsanong? Si Habacuc adunay talagsaong tinamdan, kay siya miingon: “Bisan pag ang kahoyng igos dili mamulak, ug dili mamunga ang mga paras; ang buhat sa kahoyng olibo makawang, ug ang kaumahan walay maani nga pagkaon; ang panon sa karnero mahimulag sa toril, ug walay panon sa baka diha sa mga alad; apan, alang kanako, ako magmasadya diha kang Jehova; ako magmalipayon diha sa Diyos sa akong kaluwasan.” (Habacuc 3:17, 18) Si Habacuc realistikanhong nagdahom ug mga kalisod, tingali kagutom. Bisan pa niana, wala gayod mawala ang iyang kalipay diha kang Jehova, nga kaniya nagagikan ang iyang kaluwasan.
19. Unsang mga kalisod ang giantos sa daghang Kristohanon, apan unsay atong matino kon atong unahon si Jehova diha sa atong mga kinabuhi?
19 Karon, bisan una pa sa gubat ni Jehova batok sa daotan, daghan ang nag-antos sa grabeng kalisod. Si Jesus nagtagna nga ang mga gubat, kagutom, mga linog, ug mga kamatay mahimong bahin sa ‘ilhanan sa iyang pagkaanaa’ diha sa harianong gahom. (Mateo 24:3-14; Lucas 21:10, 11) Daghan sa atong mga isigkamagtutuo nagpuyo sa kayutaan nga gihampak pag-ayo sa katumanan sa mga pulong ni Jesus, ug sila nag-antos ug grabeng mga kalisod tungod niini. Ang ubang mga Kristohanon tingali susamang maapektohan sa umaabot. Alang sa daghan pang uban kanato, posible nga ang ‘kahoyng igos dili mamulak’ sa dili pa moabot ang kataposan. Apan, kita nahibalo kon nganong kining mga butanga nagakahitabo, ug kana naghatag kanato ug kalig-on. Dugang pa, kita adunay tabang. Si Jesus nagsaad: “Nan, padayong pangitaa nga una ang gingharian ug ang iyang [Diyos] pagkamatarong, ug kining tanang ubang mga butang idugang kaninyo.” (Mateo 6:33) Kana wala magpasalig ug haruhay nga kinabuhi, apan kini nagpasalig kanato nga kon atong unahon si Jehova sa atong mga kinabuhi, kita iyang bantayan.—Salmo 37:25.
20. Bisan pa sa lumalabay nga mga kalisod, determinado kita sa paghimog unsa?
20 Bisag unsa pang lumalabay nga mga kalisod nga atong atubangon, dili kita mawad-an ug pagtuo sa makaluwas nga gahom ni Jehova. Daghan sa atong mga igsoong lalaki ug babaye sa Aprika, Sidlakang Uropa, ug ubang mga dapit nag-atubang ug grabeng mga kalisod, apan sila nagpadayon nga ‘nagmalipayon diha kang Jehova.’ Hinaot nga kita, sama kanila, dili gayod mohunong sa pagkalipay. Hinumdomi nga ang Soberanong Ginoong Jehova mao ang atong Tuboran sa “kalig-on.” (Habacuc 3:19) Siya dili gayod mopakyas kanato. Ang Armagedon seguradong moabot, ug ang gisaad sa Diyos nga bag-ong kalibotan tino nga mosunod. (2 Pedro 3:13) Dayon “ang yuta mapuno sa kahibalo sa himaya ni Jehova maingon nga ang katubigan nagatabon sa dagat.” (Habacuc 2:14) Hangtod moabot kanang maanindot kaayong panahon, atong sundon ang maayong panig-ingnan ni Habacuc. Kita kanunay nga ‘magmasadya diha kang Jehova ug magmalipayon sa Diyos sa atong kaluwasan.’
Nahinumdom Ka Ba?
• Sa unsang paagi ang pag-ampo ni Habacuc nakaapektar kanato?
• Nganong si Jehova nagmartsa?
• Unsay giingon sa tagna ni Habacuc bahin sa kaluwasan?
• Uban sa unsang tinamdan nga kita angayng maghulat sa dakong adlaw ni Jehova?
[Hulagway sa panid 23]
Nahibalo ka ba kon unsang mga puwersa ang gamiton sa Diyos batok sa daotan diha sa Armagedon?