Nagkahiusa Ingong mga Igsoon

SULOD sa mga 1,500 ka tuig, si Jehova nga Diyos nakiglabot sa nasod sa Israel ingong iyang katawhan. Dayon, ‘giliso [ni Jehova] ang iyang pagtagad ngadto sa kanasoran aron magkuha gikan kanila ug usa ka katawhan alang sa iyang ngalan.’ (Buh. 15:14) Ang katawhan nga nagdala sa ngalan ni Jehova maoy iyang mga saksi, nga nagkahiusa sa hunahuna ug sa buhat bisag asa sila nagpuyo. Ang paghiusa ug katawhan nga nagdala sa ngalan sa Diyos maoy resulta sa buluhatong gisugo ni Jesus sa iyang mga sumusunod: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila sa ngalan sa Amahan ug sa Anak ug sa balaang espiritu. Tudloi ninyo sila sa pagtuman sa tanan nakong gisugo kaninyo.”​—Mat. 28:19, 20.

² Pinaagi sa pagdedikar sa imong kaugalingon kang Jehova ug sa pagpabawtismo, ikaw nahimong tinun-an ni Jesu-Kristo. Nahimo kang bahin sa nagkahiusa ug tibuok kalibotan nga panag-igsoonay sa mga Kristohanon nga wala magkabahinbahin bisan pag lainlain ug nasyonalidad, tribo, o kahimtang sa kinabuhi. (Sal. 133:1) Tungod niini, imong gihigugma ug gitahod ang imong Kristohanong mga igsoon sa kongregasyon. Tingali ang pipila kanila dili nimo gustong makauban kaniadto tungod sa ilang rasa o nasyonalidad o edukasyon. Kamo nahiusa tungod sa bugkos sa inigsoong gugma nga mas lig-on pa kay sa bisan unsang relasyon diha sa katilingban, relihiyon, o pamilya.​—Mar. 10:29, 30; Col. 3:14; 1 Ped. 1:22.

³ Kon ang uban malisdan sa pag-ibot sa nakagamot nga pagkamapihigon tungod sa rasa, kahimtang sa katilingban, politika, o uban pa, maayong hinumdoman nila ang Hudiyong mga Kristohanon sa unang siglo, kinsa naningkamot nga makalingkawas gikan sa pagkamapihigon sa mga Hudiyo batok sa tanang tawo nga lahig relihiyon. Dihang si Pedro gisugo nga moadto sa balay sa Romanong senturyon nga si Cornelio, mahigugmaong giandam ni Jehova si Pedro sa maong asaynment.​—Buh., kap. 10.

⁴ Diha sa usa ka panan-awon, si Pedro gisugo nga ihawon ug kaonon ang mga hayop nga giisip sa mga Hudiyo ingong hugaw sa seremonyal nga paagi. Dihang mibalibad si Pedro, usa ka tingog gikan sa langit ang miingon kaniya: “Ayaw nag tawgang hugaw ang mga butang nga gihinloan na sa Diyos.” (Buh. 10:15) Kinahanglang himoon kini sa Diyos aron maandam ang hunahuna ni Pedro sa asaynment nga hapit na niyang madawat, nga mao ang pagduaw sa usa ka tawong Hentil. Dihang gituman ni Pedro ang sugo ni Jehova, iyang gisultihan ang mga tawong nagtigom: “Nahibalo mo pag-ayo nga supak sa balaod alang sa usa ka Hudiyo nga makig-uban o moduol sa tawo nga laig rasa, apan gipakita sa Diyos kanako nga dili nako angayng tawgong hugaw si bisan kinsa. Mao nga dihang gipaadtoan ko, mianhi ko nga wala gayoy pagduhaduha.” (Buh. 10:28, 29) Human niadto, nakita ni Pedro ang ebidensiya nga gidawat ni Jehova si Cornelio ug ang iyang panimalay.

⁵ Si Saulo nga taga-Tarso, usa ka edukado kaayo nga Pariseo, kinahanglang magpaubos ug makig-uban sa mga tawo nga dili niya gustong makauban kaniadto. Kinahanglan pa gani siyang mosunod sa ilang mga instruksiyon. (Buh. 4:13; Gal. 1:13-20; Filip. 3:4-11) Maimadyin nato kon unsang mga kausaban sa panghunahuna ang gihimo ni Sergio Paulo, Dionisio, Damaris, Filemon, Onesimo, ug uban pa dihang ilang gidawat ang maayong balita ug nahimong mga tinun-an ni Jesu-Kristo.​—Buh. 13:6-12; 17:22, 33, 34; Filem. 8-20.

⁶ Seguradong ang gugma sa mga igsoon sa kongregasyon nakatabang nimo nga masuod kang Jehova ug sa iyang organisasyon. Imong nakita ang gugma nga maoy tin-awng ilhanan sa tinuod nga mga tinun-an ni Jesu-Kristo, sumala sa iyang giingon: “Hatagan mo nakog bag-ong sugo, nga kamo maghigugmaay; sama sa akong paghigugma kaninyo, kamo usab maghigugmaay. Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:34, 35) Ug mas naapresyar nimo si Jehova ug ang iyang organisasyon dihang imong nakita nga ang gugma diha sa kongregasyon repleksiyon lang sa gugma sa tibuok kalibotang panag-igsoonay. Nakita nimo nga natuman ang tagna sa Bibliya bahin sa pagtigom sa mga tawo sa kataposang mga adlaw sa pagsimba kang Jehova uban ang kalinaw ug panaghiusa.​—Miq. 4:1-5.

⁷ Kay daghan ang hinungdan sa pagkabahinbahin karon, kinsay maghunahuna nga posibleng mahiusa ang mga tawo “gikan sa tanang kanasoran ug tribo ug katawhan ug pinulongan”? (Pin. 7:9) Hunahunaa ang mga kalainan tali sa mga tawong nagkinabuhi sa panahon sa modernong teknolohiya ug niadtong nagsunod gihapon sa kostumbre sa mga tribo sa karaang panahon. Tagda sab ang panagbangi sa relihiyon tali sa mga tawong samag rasa ug nasyonalidad. Samtang nagkagrabe ang nasyonalismo, mas nagkabahinbahin ang mga tawo tungod sa politika. Ug kon imo pa gyong konsiderahon ang lainlaing kahimtang sa ekonomiya ug ang uban pang hinungdan sa pagkabahinbahin, ang paghiusa sa katawhan gikan sa tanang kanasoran, pinulongan, ug grupo diha sa lig-ong bugkos sa gugma ug kalinaw maoy usa ka milagro nga ang Diyos nga Labing Gamhanan ray makahimo.​—Zac. 4:6.

⁸ Pero kana nga panaghiusa tinuod gayod, ug dihang nahimo kang dedikado, bawtismadong Saksi ni Jehova, nahimo kang bahin niana nga panaghiusa. Kay nakapahimulos ka sa maong panaghiusa, duna kay responsibilidad nga motabang sa pagmentinar niana. Mahimo kini pinaagi sa pagsunod sa giingon ni apostol Pablo sa Galacia 6:10: “Kon naa tay kahigayonan, buhaton nato ang maayo ngadto sa tanan, apan ilabina sa atong mga igsoon sa pagtuo.” Gisunod sab nato kini nga tambag: “Likayi ang hilig nga makig-away o ang pagpakaimportante sa kaugalingon, apan magpaubos mo ug isipa ang uban nga labaw kay kaninyo, nga magtan-aw dili lang sa kaugalingong kaayohan, kondili sa kaayohan sab sa uban.” (Filip. 2:3, 4) Kon bansayon nato ang atong kaugalingon nga lantawon ang atong mga igsoon sumala sa paglantaw ni Jehova kanila ug dili sumala sa ilang panggawas nga panagway, padayon tang makabaton ug malinawon ug malipayong relasyon uban kanila.​—Efe. 4:23, 24.

⁹ Sumala sa giilustrar ni apostol Pablo, ang kongregasyon wala magkabahinbahin, hinuon ang tanang sakop niini dunay samang pagtagad alang sa usag usa. (1 Cor. 12:14-26) Tingali layo kaayo ta sa ubang igsoon sa tibuok kalibotan, pero wala ni magpasabot nga wala tay pagtagad sa ilang kaayohan. Kon ang pipila sa atong mga igsoon ginalutos, maguol ta pag-ayo. Kon ang uban nanginahanglag materyal nga tabang o biktima sa kalamidad o gubat o sibil nga panag-away, mangita tag mga paagi nga makahatag ug espirituwal ug materyal nga tabang.​—2 Cor. 1:8-11.

¹⁰ Kitang tanan angayng mag-ampo para sa atong mga igsoon kada adlaw. Ang uban nag-atubang ug tentasyon sa pagbuhat ug daotan. Duna poy nakasinatig mga pag-antos nga lagmit daghan ang nakahibalo. Ang uban sab gisupak sa ilang mga kauban sa trabaho ug sa ilang pamilya nga lahig relihiyon, ug lagmit daghan ang wala mahibalo niana. (Mat. 10:35, 36; 1 Tes. 2:14) Apektado ta niana kay apil ta sa tibuok kalibotang panag-igsoonay. (1 Ped. 5:9) Kauban nato ang kugihang mga alagad ni Jehova nga nanguna sa buluhatong pagsangyaw ug sa mga kongregasyon. Kauban sab nato kadtong dunay responsibilidad sa pagdumala sa tibuok kalibotang buluhaton. Silang tanan nagkinahanglan sa atong mga pag-ampo, nga pinaagi niini atong gipakita ang atong gugma ug tinuod nga interes kanila, bisan pa tingalig wala tay laing mahimo sa pagtabang kanila.​—Efe. 1:16; 1 Tes. 1:2, 3; 5:25.

¹¹ Tungod sa kagubot sa kalibotan niining kataposang mga adlaw, ang katawhan ni Jehova kinahanglang andam nga motabang sa usag usa. Usahay tungod sa mga kalamidad, sama sa linog ug baha, kinahanglang organisahon ang mga kahikayan sa lainlaing dapit aron makapadalag daghang hinabang. Ang mga Kristohanon sa unang siglo nagpakitag maayong panig-ingnan kanato. Agig pagsunod sa tambag ni Jesus, ang mga tinun-an sa Antioquia nalipay sa pagpadalag materyal nga hinabang para sa mga igsoon sa Judea. (Buh. 11:27-30; 20:35) Sa ulahi, gidasig ni apostol Pablo ang mga taga-Corinto nga suportahan ang pagpanghatag ug hinabang nga gihimo sa hapsay nga paagi. (2 Cor. 9:1-15) Sa modernong panahon, dihang ang atong mga igsoon makaagom ug mga katalagman ug manginahanglag materyal nga hinabang, ang organisasyon ug ang mga igsoon motabang dayon.

¹² Ang atong nagkahiusa ug tibuok kalibotan nga panag-igsoonay giorganisar sa pagbuhat sa kabubut-on ni Jehova. Niining panahona, kabubut-on niya nga ang maayong balita sa Gingharian isangyaw sa tibuok yuta sa pagpamatuod ngadto sa tanang kanasoran. (Mat. 24:14) Samtang ginabuhat nato kini nga buluhaton, kabubut-on ni Jehova nga mogawi ta uyon sa iyang taas nga mga sukdanan sa moralidad. (1 Ped. 1:14-16) Kinahanglang andam tang magpasakop sa usag usa ug magkugi sa pagpakaylap sa maayong balita. (Efe. 5:21) Sukad masukad, karon na ang panahon nga unahon nato ang Gingharian sa Diyos imbes ang atong kaugalingong interes. (Mat. 6:33) Ang paghinumdom niini samtang nagkahiusa ta sa pagpakaylap sa maayong balita maghatag natog kalipay ug katagbawan karon ug walay kataposang panalangin sa umaabot.

¹³ Ingong mga Saksi ni Jehova, kita talagsaon, nga gilain gikan sa kalibotan ingong hinlong katawhan nga madasigong nag-alagad sa Diyos. (Tito 2:14) Ang atong pagsimba kang Jehova maoy nakapalahi nato. Gawas nga nagkahiusa ta sa pag-alagad uban sa atong mga igsoon sa tibuok yuta, kita sab nagsulti sa usa ka pinulongan sa kamatuoran ug nagkinabuhi uyon sa atong gisulti nga kamatuoran. Gitagna kana ni Jehova pinaagi sa iyang propetang si Sofonias: “Tudloan nako ang mga katawhan sa putling pinulongan, aron silang tanan mahimong motawag sa ngalan ni Jehova ug magkahiusa sa pag-alagad kaniya.”​—Sof. 3:9.

¹⁴ Dayon gigamit ni Jehova si Sofonias sa pagtagna bahin sa tibuok kalibotang panag-igsoonay nga natuman na karon: “Ang mga nahibilin sa Israel dili magbuhat ug pagkadili-matarong; sila dili mamakak o mogamit sa ilang dila sa pagpanglimbong; sila mangaon ug manghigda, ug wala nay makapahadlok nila.” (Sof. 3:13) Kay nakasabot na ta sa kamatuoran nga naa sa Bibliya ug nagbag-o na ta sa atong hunahuna ug nagkinabuhi na uyon sa mga sukdanan ni Jehova, kita nagkahiusa sa pag-alagad. Atong nahimo ang butang nga daw imposible alang sa tawo. Oo, talagsaon gyod ta nga katawhan, ang katawhan sa Diyos, nga nagpasidungog kaniya sa tibuok yuta.​—Miq. 2:12.