“Hinaot nga ang Imong mga Kamot Dili Manghawoy”
“Hinaot nga ang imong mga kamot dili manghawoy. Si Jehova nga imong Diyos anaa sa imong kinataliwad-an. Ingong Usa nga gamhanan, siya magaluwas.”—SOFONIAS 3:16, 17.
1. Unsay giingon sa usa ka eskolar sa Bibliya mahitungod sa tagna ni Sofonias?
ANG tagna ni Sofonias misaylo sa una niining pagkatuman sa ikapito ug ikaunom nga mga siglo W.K.P. Sa iyang komentaryo bahin sa Sofonias, si Propesor C. F. Keil misulat: “Ang tagna ni Sofonias . . . wala lamang magsugod sa pagsangyaw sa unibersohanong paghukom batok sa tibuok kalibotan, nga gigikanan sa paghukom nga modangat batok sa Juda tungod sa iyang mga sala, ug batok sa kalibotan sa mga nasod tungod sa pagkamabatokon niini sa katawhan ni Jehova; apan gihisgotan niini sa katibuk-an ang dako ug makalilisang nga adlaw ni Jehova.”
2. Unsang mga kaamgiran ang naglungtad tali sa mga kahimtang sa adlaw ni Sofonias ug sa kahimtang sa sulod sa Kakristiyanohan karong adlawa?
2 Karong adlawa, ang hudisyal nga desisyon ni Jehova mao nga tigomon ang kanasoran alang sa kalaglagan nga labi pang dako kay sa adlaw ni Sofonias. (Sofonias 3:8) Kadtong kanasorang nangangkon nga Kristohanon maoy ilabinang salawayon sa panan-aw sa Diyos. Maingon nga grabeng gisilotan ang Jerusalem tungod sa iyang pagkadili-matinumanon kang Jehova, sa ingon ang Kakristiyanohan kinahanglang manubag sa Diyos tungod sa tampalasang binuhatan niini. Ang balaang mga paghukom nga gipahayag batok sa Juda ug Jerusalem sa adlaw ni Sofonias mapadapat nga labi pang kusganon nganha sa mga iglesya ug mga sekta sa Kakristiyanohan. Ilang gihugawan usab ang maputling pagsimba tungod sa ilang nagpakaulaw-sa-Diyos nga mga doktrina, nga daghan adunay paganong sinugdanan. Ilang gisakripisyo ang ilang minilyong mahimsog nga mga anak lalaki ibabaw sa modernong halaran sa gubat. Dugang pa, ang mga molupyo sa antitipikal nga Jerusalem nagsagol sa gitawag nga Kristiyanidad uban sa astrolohiya, espiritistikanhong mga buhat, ug makauulawng seksuwal nga imoralidad, nga makapahinumdom sa pagsimba kang Baal.—Sofonias 1:4, 5.
3. Unsay ikaingon mahitungod sa daghang sekular nga mga pangulo ug politikanhong mga kagamhanan karong adlawa, ug unsay gitagna ni Sofonias?
3 Daghan sa politikanhong mga pangulo sa Kakristiyanohan gusto nga mahimong inila diha sa simbahan. Apan sama sa “mga prinsipe” sa Juda, gipahimuslan sa ubay-ubay kanila ang katawhan nga samag “nagangulob nga mga liyon” ug manunukob nga “mga lobo.” (Sofonias 3:1-3) Ang politikanhong mga batabata nianang mga tawhana “nagapuno sa balay sa ilang mga agalon sa kapintasan ug panglimbong.” (Sofonias 1:9) Kaylap ang panghiphip ug kahiwian. Bahin sa politikanhong mga kagamhanan sa sulod ug sa gawas sa Kakristiyanohan, nagkadaghan kanila ang ‘nagpagawal’ batok sa katawhan ni Jehova sa mga panon, ang iyang mga Saksi, nga nagtratar kanila ingong tinamayng “sekta.” (Sofonias 2:8; Buhat 24:5, 14) Mahitungod nianang tanang politikanhong mga pangulo ug ilang mga sumusunod, si Sofonias mitagna: “Ang ilang salapi ug ang ilang bulawan dili makaluwas kanila sa adlaw sa kaligutgot ni Jehova; apan pagalamyon ang tibuok yuta sa kalayo sa iyang kasibot, tungod kay iyang himoon ang usa ka pagtibawas, ang usa nga makalilisang gayod, sa tanang molupyo sa yuta.”—Sofonias 1:18.
“Pagatagoan sa Adlaw sa Kasuko ni Jehova”
4. Unsay nagpakita nga aduna unyay mga maluwas sa dakong adlaw ni Jehova, apan unsay kinahanglan nilang buhaton?
4 Dili tanang molupyo sa Juda ang nalaglag sa ikapitong siglo W.K.P. Sa susama, aduna unyay mga maluwas sa dakong adlaw ni Jehova. Sa maong mga tawo nagpahayag si Jehova pinaagi sa iyang propetang si Sofonias: “Sa dili pa ang hukom magpatunghag bisan unsa, sa dili pa moagi ang adlaw ingon sa tahop, sa dili pa modangat kaninyo ang nagdilaab nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa si Jehova, kamong tanang maaghop sa yuta, kinsa nanagtuman sa Iyang kaugalingong hudisyal nga desisyon. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—Sofonias 2:2, 3.
5. Niining panahon sa kataposan, kinsa ang nauna sa pagpamati sa pasidaan ni Sofonias, ug sa unsang paagi gigamit sila ni Jehova?
5 Sa panahon sa kataposan niining kalibotana, ang unang namati sa matagnaong imbitasyon mao ang nahibilin sa espirituwal nga mga Israelinhon, ang dinihogang mga Kristohanon. (Roma 2:28, 29; 9:6; Galacia 6:16) Kay nangita sa pagkamatarong ug pagkamaaghop ug nagpakitag pagtahod alang sa hudisyal nga mga desisyon ni Jehova, sila naluwas gikan sa Dakong Babilonya, ang tibuok-kalibotang empiryo sa bakak nga relihiyon, ug napasig-uli ngadto sa balaang pag-uyon sa 1919. Sukad niadto, ug ilabina sukad 1922, kining matinumanong nahibilin sa kawalay-kahadlok nagmantala sa mga paghukom ni Jehova batok sa mga iglesya ug mga sekta sa Kakristiyanohan ug batok sa politikanhong mga nasod.
6. (a) Unsay gitagna ni Sofonias mahitungod sa matinumanong nahibilin? (b) Sa unsang paagi natuman ang maong tagna?
6 Bahin niining matinumanong nahibilin, si Sofonias mitagna: “Ako gayong ipabilin sa imong kataliwad-an ang usa ka katawhan nga mapainubsanon ug ubos, ug sila modangop gayod sa ngalan ni Jehova. Mahitungod sa mga nahibilin sa Israel, dili sila magbuhat sa pagkadili-matarong, ni magasultig bakak, ni mahikaplagan diha sa ilang mga baba ang malimbongon nga dila; kay sila mismo mangaon ug mohigda gayod nga tinuy-od, ug walay magapakurog kanila.” (Sofonias 3:12, 13) Kining dinihogang mga Kristohanon kanunayng nagbutang sa ngalan ni Jehova sa atubangan, apan ilabina sukad 1931, sa dihang ilang gidawat ang ngalang mga Saksi ni Jehova. (Isaias 43:10-12) Pinaagi sa pagpasiugda sa isyu sa pagkasoberano ni Jehova, ilang gipasidunggan ang balaang ngalan, ug kini napamatud-ang usa ka dangpanan alang kanila. (Proverbio 18:10) Sa kamadagayaon si Jehova nagpakaon kanila sa espirituwal, ug sila nagpuyong walay kahadlok sa espirituwal nga paraiso.—Sofonias 3:16, 17.
“Usa ka Ngalan ug Usa ka Pagdayeg Taliwala sa Tanang Katawhan”
7, 8. (a) Unsang dugang tagna ang natuman diha sa nahibilin sa espirituwal nga Israel? (b) Unsay naila sa minilyong tawo, ug unsay imong kaugalingong mga pagbati bahin niini?
7 Ang dulot nga pagmahal sa nahibilin alang sa ngalan ni Jehova ug sa matarong nga mga prinsipyo sa iyang Pulong wala hikalimti. Ang sinserong mga tawo nakasabot sa kalainan tali sa panggawi sa nahibilin ug sa kahiwian ug kasalingkapaw sa politikanhon ug relihiyosong mga pangulo niining kalibotana. Si Jehova nagpanalangin sa “mga nahibilin sa [espirituwal] nga Israel.” Iyang gipasidunggan sila sa pribilehiyo nga magdala sa iyang ngalan, ug iyang gipahinabo nga makabaton silag maayong dungog taliwala sa mga katawhan sa yuta. Kini maoy sumala sa gitagna ni Sofonias: “‘Nianang panahona pasudlon ko kamo, bisan sa panahon sa akong pagtigom kaninyo sa tingob. Kay pagahimoon ko kamo nga usa ka ngalan ug usa ka pagdayeg taliwala sa tanang katawhan sa yuta, sa dihang akong tigomon pagbalik ang inyong mga binihag sa atubangan sa inyong mga mata,’ si Jehova nag-ingon.”—Sofonias 3:20.
8 Sukad 1935, sa literal minilyong katawhan ang nakaila nga ang panalangin ni Jehova anaa sa nahibilin. Malipayon silang nagsunod niining espirituwal nga mga Hudiyo, o mga Israelinhon, nga nag-ingon: “Kami mouban kaninyo, kay kami nakadungog nga ang Diyos nagauban kaninyo.” (Zacarias 8:23) Kining “ubang mga karnero” nakaila nga ang dinihogang nahibilin mao ‘ang matinumanon ug mabuot nga ulipon,’ nga gitudlo ni Kristo “ibabaw sa iyang tanang [yutan-ong] kabtangan.” Sa pagkamapasalamaton sila nagkaon sa espirituwal nga pagkaon nga giandam sa ulipon nga matang “sa hustong panahon.”—Juan 10:16; Mateo 24:45-47.
9. Unsang “pinulongan” ang nakat-onan sa pagsulti sa minilyong tawo, ug diha sa unsang dakong buluhaton nga ang ubang mga karnero nagaalagad “abaga sa abaga” uban sa dinihogang nahibilin?
9 Tapad sa nahibilin, kining minilyong ubang mga karnero nakakat-on sa pagkinabuhi ug pagsulti nga nahiuyon sa “putli nga pinulongan.”a Si Jehova mitagna pinaagi ni Sofonias: “Unya ulian ko ang mga katawhan sa putli nga pinulongan, aron silang tanan magatawag sa ngalan ni Jehova, aron sa pag-alagad kaniya abaga sa abaga.” (Sofonias 3:9) Oo, ang ubang mga karnero nagkahiusa sa pag-alagad kang Jehova “abaga sa abaga” uban sa dinihogang mga membro sa “gamayng panon” diha sa dinaliang buluhaton sa pagwali ‘niining maayong balita sa gingharian . . . alang sa usa ka pamatuod sa tanang nasod.’—Lucas 12:32; Mateo 24:14.
“Ang Adlaw ni Jehova Moabot”
10. Sa unsa nga kanunayng kombinsido ang dinihogang nahibilin, ug, ingong usa ka matang, sila maoy buhi pa unya sa pagkakita sa unsa?
10 Ang dinihogang nahibilin kanunayng nagbutang sa hunahuna sa dinasig nga pamulong ni apostol Pedro: “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kundili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol. Bisan pa niana ang adlaw ni Jehova moabot ingon sa usa ka kawatan.” (2 Pedro 3:9, 10) Ang mga membro sa matinumanong ulipon nga matang wala gayod maghambin ug mga pagduhaduha bahin sa pag-abot sa adlaw ni Jehova sa atong panahon. Ang maong dakong adlaw mosugod pinaagi sa pagpatuman sa mga paghukom sa Diyos batok sa Kakristiyanohan, ang antitipikal nga Jerusalem, ug sa ubang bahin sa Dakong Babilonya.—Sofonias 1:2-4; Pinadayag 17:1, 5; 19:1, 2.
11, 12. (a) Unsang laing bahin sa tagna ni Sofonias ang natuman diha sa nahibilin? (b) Sa unsang paagi ang dinihogang nahibilin namati sa awhag, “Hinaot nga ang imong mga kamot dili manghawoy”?
11 Ang matinumanong nahibilin nagkalipay nga giluwas sa 1919 gikan sa espirituwal nga pagkabinihag sa Dakong Babilonya, ang tibuok-kalibotang empiryo sa bakak nga relihiyon. Ilang nasinati ang pagkatuman sa tagna ni Sofonias: “Malipayong mosinggit, Oh anak nga babaye sa Sion! Magsadya ka, Oh Israel! Magkalipay ug magmaya uban sa bug-os nga kasingkasing, Oh anak nga babaye sa Jerusalem! Si Jehova nagkuha sa mga paghukom diha kanimo. Iyang gipapahawa ang imong kaaway. Ang hari sa Israel, si Jehova, anaa sa imong kinataliwad-an. Dili ka na mahadlok sa katalagman. Nianang adlawa kini igaingon sa Jerusalem: ‘Dili ka mahadlok, Oh Sion. Hinaot nga ang imong mga kamot dili manghawoy. Si Jehova nga imong Diyos anaa sa imong kinataliwad-an. Ingong Usa nga gamhanan, siya magaluwas.’”—Sofonias 3:14-17.
12 Tungod sa hugot nga pagtuo ug dagayang pamatuod nga si Jehova anaa sa ilang kinataliwad-an, ang dinihogang nahibilin sa kawalay-kahadlok nagpadayon sa unahan sa pagtuman sa ilang balaang buluhaton. Sila nagwali sa maayong balita sa Gingharian ug nagpahibalo sa mga paghukom ni Jehova batok sa Kakristiyanohan, sa nahibiling bahin sa Dakong Babilonya, ug sa tibuok tuman-kadaotang sistema sa mga butang ni Satanas. Bisan pa sa tanang kalisdanan, latas sa mga dekada sukad 1919, sila nagsugot sa balaang sugo: “Dili ka mahadlok, Oh Sion. Hinaot nga ang imong mga kamot dili manghawoy.” Sila nagmakugihon sa pag-apod-apod sa binilyong tract, mga magasin, mga libro, ug mga pulyeto nga nagapahayag sa Gingharian ni Jehova. Sila nahimong makapadasig-sa-pagtuo nga panig-ingnan alang sa ubang mga karnero si kinsa, sukad 1935, nanghugop ngadto sa ilang kiliran.
“Hinaot nga ang Imong mga Kamot Dili Manghawoy”
13, 14. (a) Nganong ang pipila ka Hudiyo misibog gikan sa pag-alagad kang Jehova, ug sa unsang paagi kini nadayag? (b) Dili maalamon nga atong buhaton ang unsa, ug sa unsang buluhaton nga kinahanglang dili nato itugot nga manghawoy ang atong mga kamot?
13 Samtang kita ‘nagpadayon sa paghulat’ sa dakong adlaw ni Jehova, sa unsang paagi kita makakuhag praktikal nga tabang gikan sa tagna ni Sofonias? Una, kinahanglang magbantay kita nga dili mahisama sa mga Hudiyo sa adlaw ni Sofonias nga misibog sa pagsunod kang Jehova tungod kay sila naghambin ug mga pagduhaduha mahitungod sa pagkaduol sa adlaw ni Jehova. Kadtong maong mga Hudiyo wala magpahayag sa dayag sa ilang mga pagduhaduha, apan gipadayag sa ilang binuhatan nga wala gayod sila magtuo nga duol na ang dakong adlaw ni Jehova. Ilang gihatagan ug bug-os nga pagtagad ang pagtigom ug katigayonan inay magpadayon sila sa paghulat kang Jehova.—Sofonias 1:12, 13; 3:8.
14 Karon dili maoy panahon nga tugotang ang mga pagduhaduha makagamot diha sa atong mga kasingkasing. Dili gayod maalamon nga langanon diha sa atong mga kaisipan o mga kasingkasing ang pag-abot sa adlaw ni Jehova. (2 Pedro 3:1-4, 10) Kinahanglang atong likayan ang pagsibog gikan sa pagsunod kang Jehova o nga ‘manghawoy ang atong mga kamot’ sa iyang pag-alagad. Kini naglakip nga dili “magmataspokan” sa atong pagwali sa “maayong balita.”—Proverbio 10:4; Marcos 13:10.
Pagsagubang sa Kawalay-Pagtagad
15. Unsay makapahinabo nga ang atong kamot magtinaspokan diha sa pag-alagad kang Jehova, ug sa unsang paagi kining sulirana gitagna diha sa tagna ni Sofonias?
15 Ikaduha, kita kinahanglang magmaigmat batok sa makapaluyang mga epekto sa kawalay-pagtagad. Sa daghang nasod sa Kasadpan, ang pagkawalay-pagtagad bahin sa espirituwal nga mga butang mahimong usa ka hinungdan sa pagkaluya taliwala sa pipila ka magwawali sa maayong balita. Ang maong kawalay-pagtagad naglungtad sa adlaw ni Sofonias. Si Jehova nagpahayag pinaagi sa iyang propeta: “Akong hatagan ug pagtagad ang mga lalaki nga . . . nagaingon diha sa ilang kasingkasing, ‘Si Jehova dili mobuhat ug maayo, ug siya dili mobuhat ug daotan.’” (Sofonias 1:12) Sa pagsulat bahin sa maong kasulatan diha sa Cambridge Bible for Schools and Colleges, si A. B. Davidson mipahayag nga kini nagtumong sa mga tawo nga “nahiunlod ngadto sa dili-mabination nga kawalay-pagtagad o bisan sa pagkadili-matinuohon bahin sa bisan unsang pagsalga sa usa ka hataas nga gahom diha sa mga kahikayan sa katawhan.”
16. Unsang kahimtang sa hunahuna ang naglungtad taliwala sa daghang membro sa mga iglesya sa Kakristiyanohan, apan unsang pagdasig ang gihatag kanato ni Jehova?
16 Ang kawalay-pagtagad mao ang kaylap nga tinamdan karong adlawa sa daghang bahin sa yuta, ilabina diha sa mas bahandianong mga nasod. Bisan ang mga membro sa mga iglesya sa Kakristiyanohan yanong dili motuo nga si Jehova nga Diyos mosalga sa mga kahikayan sa tawo sa atong adlaw. Isalikway nila ang atong mga paningkamot nga ipaabot kanila ang maayong balita sa Gingharian pinaagi kaha sa maduhaduhaong pahiyom o sa pintok nga tubag nga “Dili ako interesado!” Ubos sa maong mga kahimtang, ang paglahutay diha sa buluhatong pagsangyaw mahimong usa ka dakong hagit. Motigi kini sa atong paglahutay. Apan pinaagi sa tagna ni Sofonias, si Jehova nagpalagsik sa iyang matinumanong katawhan, nga nag-ingon: “Hinaot nga ang imong mga kamot dili manghawoy. Si Jehova nga imong Diyos anaa sa imong kinataliwad-an. Ingong Usa nga gamhanan, siya magaluwas. Siya magmaya tungod kanimo uban sa pagsadya. Siya maghilom sa iyang gugma. Siya magmalipayon tungod kanimo uban sa malipayong mga singgit.”—Sofonias 3:16, 17.
17. Unsang maayong panig-ingnan ang kinahanglang sundon sa mga bag-ohan taliwala sa ubang mga karnero, ug sa unsang paagi?
17 Usa ka kamatuoran sa modernong-adlawng kasaysayan sa katawhan ni Jehova nga ang nahibilin, maingon man ang mga tigulang taliwala sa ubang mga karnero, nakahimog hilabihan ka dakong buluhaton sa pagpanigom niining kataposang mga adlaw. Kining tanang matinumanong mga Kristohanon nagpakitag paglahutay latas sa mga dekada. Wala nila tugoti nga ang kawalay-pagtagad sa bahin sa kinabag-ang tawo sa Kakristiyanohan makapaluya kanila. Busa hinaot nga ang mga bag-ohan taliwala sa ubang mga karnero dili maluya tungod sa kawalay-pagtagad sa espirituwal nga mga butang nga kaylap kaayo karong adlawa diha sa daghang nasod. Hinaot nga dili nila itugot nga ang ilang ‘mga kamot manghawoy,’ o magtinaspokan. Hinaot nga ilang gamiton ang tanang higayon nga itanyag Ang Bantayanang Torre, Pagmata!, ug ubang maayong mga basahon nga ilabinang gilaraw aron tabangan ang samag-karnerong mga tawo nga mahibalo sa kamatuoran mahitungod sa adlaw ni Jehova ug sa mga panalangin nga mosunod.
Padayon sa Unahan Samtang Nagahulat sa Dakong Adlaw!
18, 19. (a) Unsang pagdasig sa paglahutay ang atong makaplagan sa Mateo 24:13 ug Isaias 35:3, 4? (b) Sa unsang paagi kita panalanginan kon kita nagkahiusang nagapadayon sa unahan diha sa pag-alagad kang Jehova?
18 Si Jesus miingon: “Siya nga nakalahutay hangtod sa kataposan mao ang maluwas.” (Mateo 24:13) Busa, wala ing “luyang mga kamot” o ‘nagkurog nga mga tuhod’ samtang kita nagpaabot sa dakong adlaw ni Jehova! (Isaias 35:3, 4) Ang tagna ni Sofonias mapasaligong nagpahayag mahitungod kang Jehova: “Ingong Usa nga gamhanan, siya magaluwas.” (Sofonias 3:17) Oo, luwason ni Jehova ang “dakong panon” latas sa kataposang ang-ang sa “dakong kasakitan,” inigmando niya sa iyang Anak nga dugmokon ang politikanhong mga nasod nga nagpadayon sa “pagpagawal” batok sa iyang katawhan.—Pinadayag 7:9, 14; Sofonias 2:10, 11; Salmo 2:7-9.
19 Samtang nagsingabot ang dakong adlaw ni Jehova, hinaot nga magpadayon kita sa unahan nga madasigon, nga magaalagad kaniya “abaga sa abaga”! (Sofonias 3:9) Sa pagbuhat niana, kita mismo ug daghang uban pa mahalinya sa “pagatagoan sa adlaw sa kasuko ni Jehova” ug makasaksi nga mabalaan ang iyang balaang ngalan.
[Footnote]
a Alang sa bug-os nga paghisgot sa “putli nga pinulongan,” tan-awa Ang Bantayanang Torre, Abril 1, 1991, mga panid 20-5, ug Mayo 1, 1991, mga panid 10-20.
Agig Pagsubli
◻ Sa unsang mga bahin nga ang relihiyosong kahimtang sulod sa Kakristiyanohan maoy katumbas sa iya sa adlaw ni Sofonias?
◻ Sa unsang paagi ang daghang politikanhong mga pangulo karong adlawa kaamgid sa sekular nga “mga prinsipe” sa panahon ni Sofonias?
◻ Unsang mga saad sa Sofonias ang natuman diha sa nahibilin?
◻ Unsay naila sa minilyong tawo?
◻ Nganong kinahanglang dili nato itugot nga ang atong mga kamot manghawoy diha sa pag-alagad kang Jehova?
[Mga hulagway sa panid 15]
Sama kang Sofonias, ang matinumanong nahibilin sa dinihogang mga Kristohanon sa pagkawalay-kahadlok nagmantala sa mga paghukom ni Jehova
[Mga hulagway sa panid 18]
Ang “ubang mga karnero” wala magtugot nga ang kawalay-pagtagad sa katawhan makapaluya kanila