Mga Pagtulon-an Gikan sa Kasulatan: Sofonias 1:1–3:20
Pangitaa si Jehova ug Alagara Siya sa Bug-os Kasingkasing
MGA 50 anyos una laglaga sa mga Babilonyanhon ang apostatang Juda, mipahayag si Jehova pinaagi sa iyang propetang si Sofonias: “Sa walay pakyas akong tibawason ang tanan gikan sa nawong sa yuta.” (1:1, 2) Apan gipakita usab sa Diyos sa iyang katawhan ang dalan ngadto sa kaluwasan. (2:3; 3:9) Niining bahina, ang basahong Sofonias naundan sa bililhong mga pagtulon-an alang sa tanan nga karon nagaatubang sa “gubat sa dakong adlaw sa Diyos nga Makagagahom sa Tanan.”—Pinadayag 16:14.
Ang Adlaw ni Jehova Haduol Na
Tungod kay haduol na kaayo ang adlaw ni Jehova, kadtong nagpahilayo sa Diyos angay mobalik sa madali kaniya. Apil sa mga tawo nga “tibawason” mao “kadtong nagapanibog sa pagsunod kang Jehova.” Sila mitalikod ug wala na magmabalak-on sa kabubut-on sa Diyos. Pagkapeligroso! Angay kining tul-iron dayon.—Sofonias 1:3-11.
Ang materyal nga bahandi dili makataganag kasegurohan sa adlaw ni Jehova. Ang pipila nga nagaangkon nga nagaalagad kang Jehova nagakapuliki sa materyal nga mga pangagpas, nga nagapahimutang sa haruhay nga kahimtang. Apan pagkadakong paglimbong sa kaugalingon! Ang ilang materyal nga mga butang dili mohatag ug kasegurohan sa “maong adlaw.”—Sofonias
1:12-18.
Posible ang Kaluwasan
Aron pagatagoan sa adlaw ni Jehova, gikinahanglan dili lamang ang hapaw nga kahibalo sa Kasulatan. Ang “mga maaghop” nga “nagabuhat sa Iyang hudisyal nga hukom” gitambagan nga ‘pangitaa ninyo si Jehova, pangitaa ang pagkamatarong, pangitaa ang pagkamaaghop.’ Kadto lamang “mopadayon hangtod sa kataposan” ang mamaluwas.—Sofonias 2:1-3; Mateo 24:13.
Ang kanasoran nga nagadaugdaog sa katawhan ni Jehova karong adlawa makaagom sa kalaglagan. Sila makaagom sa samang kasinatian sa Moab, Ammon, Asirya, ug sa ubang nasod alirong sa Juda. Ang kalaglagan nagapaabot usab sa Dakong Babilonya. (Pinadayag 18:4-8) Nagadasig gayod kini kanato sa pagpadayon sa pagpahayag sa hukom sa Diyos!—Sofonias 2:4-15.
Katawhan nga Napasig-uli
Si Jehova karon nagaandam sa iyang katawhan alang sa kaluwasan. Gibiyaan mo na ba ang Babilonyanhong mga ideya ug nagsugod sa pagsulti sa “maputling pinulongan” sa bililhong kamatuoran sa Bibliya? Ikaw ba ‘nagtawag sa ngalan ni Jehova’ pinaagi sa pagpahinungod sa imong kaugalingon kaniya? Ikaw ba ‘nagadala sa usa ka gasa,’ nga mao, “ang bunga sa mga ngabil nga nagahimog katilingbanong pagpahayag sa iyang ngalan”? Aron maluwas, kinahanglang mag-alagad ka “abaga sa abaga” uban sa napahinungod nga katawhan ni Jehova.—Sofonias 3:1-10; Roma 10:13-15; Hebreohanon 13:15.
Alang sa kaluwasan, kinahanglang atong pangitaon si Jehova ug ituboy ang iyang balaang ngalan. Ang pagkamapahitas-on, pagkadili-matarong, ug kabakakan walay dapit taliwala sa iyang katawhan. (Efeso 4:25-32) Ang “mapainubsanon ug ubos” nga mga tawo pagaluwason sa dihang iyang balaanon ang iyang ngalan.—Sofonias 3:11-20.
Mga Pagtulon-an Gikan sa Kasulatan: Haggeo 1:1–2:23
ANG basahong Haggeo magdala nato sa 520 W.K.P., 17 anyos tapos mahibalik ang Hudiyong salin sa Jerusalem aron sa pagtukod pag-usab sa templo ni Jehova. (Haggeo 1:1) Kadto usa ka panahon aron ibutang sa matag usa ang iyang kasingkasing sa buluhaton sa Diyos. Bisan pa niana, nakita ni Jehova nga kinahanglang ipadala ang propetang si Haggeo sa pagpahinumdom sa Iyang katawhan sa ilang obligasyon. Aduna bay mga pagtulon-an niini alang kanato?
Unaha ang Buluhaton ni Jehova
Ayaw gayod unaha ang materyal nga intereses kay sa espirituwal nga mga buluhaton. Ang mga Hudiyo nga namalik sa ilang yutang-natawhan may katarongang mabalaka bahin sa ekonomikanhong kadili-piho, sa mabatokong mga silingan, ug uban pa. Apan kana dili mao ang mga hinungdan sa ilang pagpasagad, tungod sa ilang maluhong pagkinabuhi. Tapos lamang sa pagpukaw nila ni Haggeo nga sila misugod sa pagtrabaho sa templo. Sa susama karong adlawa, kinahanglang atong ‘ibutang ang atong mga kasingkasing sa atong mga dalan’ ug tinoon nga ginapaluyohan nato ang buluhaton sa Diyos sa kinabug-osang mahimo.—Haggeo 1:2-15.
Si Jehova nagapanalangin sa panlimbasog niadtong nagabuhat sa iyang buluhaton sa bug-os kasingkasing. Gipanalanginan sa Diyos ang buluhaton ni Zerobabel ug sa ubang Hudiyo sa pagtapos sa templo, ug ang himaya niadto milabaw kay sa unang balay. Uban sa “usa ka dakong panon” nga nagasanong sa mensahe sa Gingharian karong adlawa, “ang tilinguhaong mga butang sa tanang nasod” nagaanha sa espirituwal nga templo ni Jehova, ug iyang ‘ginapuno ang iyang balay sa himaya.’—Haggeo 2:1-9; Pinadayag 7:9.
Tibuok-Kasingkasing nga Pag-alagad Gikinahanglan
Ang atong pagsimba bililhon lamang kon kita mahinlo, ang atong mga motibo maputli, ug kita nagaalagad kang Jehova uban sa hingpit nga kasingkasing. Ang pagpabaya sa balay sa Diyos naghimo sa mga Hudiyo nga dili mahinlo, apan gipanalanginan niya sila sa dihang nagsugod ang buluhaton sa templo. Busa, aron makatagamtam kita sa panalangin ni Jehova, kinahanglang tul-iron nato ang bisan unsang kinahanglag pagtagad ug ibutang ang atong kasingkasing diha sa iyang buluhaton. (Itandi ang Numeros 19:11-13.) Samtang magpaabot kita nga uyogon sa Diyos ang mga langit ug ang yuta, nga pukanon ang mga gingharian, atong sundon ang antitipikong Zerobabel, si Jesu-Kristo, ug makig-ambit nga bug-os kasingkasing sa buluhaton ni Jehova.—Haggeo 2:10-23.
[Kahon sa panid] 30]
MGA TEKSTO SA BIBLIYA GISUSI
o Sofonias 1:5—Si Malcam, nga lagmit mao usab si Milcom, Molech, o Moloch, mao ang pangunang bakak nga diyos sa mga Amonhanon. (1 Hari 11:5, 7) Ang pagsimba kang Molech nag-apil sa dulumtanang paghalad sa bata ug gitunglo sa Kasugoan.—Levitico 20:2-5; Buhat 7:42, 43.
o Sofonias 2:14—Sumala sa gitagna, ang natumbang mga haligi sa naawaaw nga Nineve ug sa ilang mga kaulohan nahimong mga dapit sa mga langgam ug mga mananap. Ang mga langgam ug lagmit ang hangin ‘miawit’ sa gibiyaang mga bentana. Ang mga pultahan ug bisan ang mga sulod sa palasyo nagun-ob.
o Sofonias 3:9—Ang usa ka komung pinulongan sa tawo dili mogarantiya sa panaghiusa, sumala sa gipakita sa mga gubat nga gibugno tali sa katawhan nga may samang pinulongan. Ang “maputling pinulongan” maoy Kasulatanhong kamatuoran, “ang hularanan sa maayong mga pulong.” (2 Timoteo 1:13) Kini molupig sa garbo, mohimaya sa Diyos, ug maghiusa sa tanan nga nagasulti niini.
o Haggeo 1:6—Sanglit ang mga Hudiyo nagpasagad sa templo ni Jehova, sila wala makabaton sa iyang panalangin. Busa, daghan ang ilang gipugas apan diyutay ra ang ilang nahipos nga pagkaon ug nakulangan sa pagkaon ug ilimnon sa pagtagana sa ilang mga panginahanglan. Ang ilang sinina kulang o dili dekalidad aron sila dili tugnawon, ug ang mga sinuholan daw nagbutang sa salapi sa puyo sa salapi nga punog mga bangag. Lahi niadtong mga Hudiyo, dili nato pasagdan ang balaang intereses.—Proverbio 10:22; Nehemias 10:39.
o Haggeo 2:9—Samtang “ang kanhing” templo, nga gitukod ni Solomon, mibarog sa 420 ka tuig, ang “ulahing balay” gigamit sa 584 ka tuig (515 W.K.P.-70 K.P.). Busa ang ikaduhang templo milungtad sa mas dugay. Mas daghang magsisimba ang nagpanon didto, sama sa Pentekostes 33 K.P., sa dihang ang mga Hudiyo ug mga proselita nagtigom didto gikan sa lapas pa sa Judea. Dugang pa, ang Mesiyas, si Jesu-Kristo, nanudlo diha sa “ulahing balay.” Kining mga hinungdana naghatag nianag labawng relihiyosong himaya.