Pagtulon-an Gikan sa Kasulatan: Zacarias 1:1–14:21

Gipukaw ni Jehova ang Espiritu sa Iyang Katawhan

SA ULAHING bahin sa 538 W.K.P. o sa sayo sa 537 W.K.P., misugo ang Persianhong hari si Siro sa pagpabalik sa mga Hudiyo gikan sa Babilonya ngadto sa Jerusalem aron sa “pagtukod-pag-usab sa balay ni Jehova.” (Ezra 1:3) Sa pagka 520 W.K.P., hinunoa, ang templo wala gihapon matukod pag-usab. Busa, gibangon ni Jehova si propetang Zacarias sa pagtrabaho uban kang Haggeo sa pagpukaw sa espiritu sa mga tawo.

Ang dinasig nga mga pulong ni Zacarias nakahatag kadasig sa matinumanong mga Hudiyo pinaagi sa pagpakita nga gisuportahan sila ni Jehova ug magapalangin sa ilang trabaho. Kining basahon sa Bibliya makadasig usab kanato tungod kay nasudlan kinig Mesiyanikong mga tagna, ug ubang mga tagna nga nagakatuman sa atong panahon.a Kini naghatag usab kanato ug hamiling mga pagtulon-an.

Panalanginan ni Jehova ang Iyang Katawhan

Si Jehova nabalaka sa iyang katawhan. Human nga gidawat sa mga Hudiyo nga ang pagdisiplina sa Diyos kanila makataronganon, dunay tulo ka panan-awon si Zacarias nga nagpakita sa Iyang padayong kabalaka kanila. Diha sa una, siya nakakitag mga kabayo nga dunay mga magkakabayong manulonda. Ang usa ka manulonda nabalaka nga ang mga nasod nga naghatag sa mga Hudiyo ug katalagman “nagapabilin gihapon.” Diha sa ikaduha, mihukom si Jehova sa paghulog sa “upat ka sungay”​—ang kagamhananong mga gahom nga nagpatibulaag sa iyang katawhan. Ug ang ikatulong panan-awon klarong nagbatbat sa mahigugmaon, mapanalipdanong pagtagad ni Jehova sa Jerusalem.—1:1–2:13.

Walay makababag sa matinumanong mga alagad sa Diyos. Diha sa ikaupat nga panan-awon, si Satanas, ang dakong kabatok sa katawhan ni Jehova, gibadlong. (Itandi ang Pinadayag 12:10.) Diha sa ikalima, nahibaloan ni Zacarias nga ang katawhan sa Diyos motuman sa Iyang kabubut-on bisan pa sa samag bukid nga kababagan. Sa unsang paagi? “‘Dili pinaagi sa militaryong gahom, ni sa pagkakusgan, kondili pinaagi sa akong espiritu,’ nagaingnon si Jehova sa mga panon.”—3:1–4:14.

Ang nga alagad ni Jehova “nagadumot sa daotan.” (Salmo 97:10, 11) Diha sa ikaunom nga panan-awon, gipahayag ni Jehova ang tunglo diha sa mga mamumuhat ug daotan nga wala kasiloti. Ug diha sa ikapito, usa ka representasyon sa pagkadaotan gidala ngadto sa “yuta sa Shinar,” ang lugar sa bakak Babilonyanhong relihiyon. Pagkamaayong dapit kini alang niana! Ang daotan dili angay makita diha sa taliwala sa katawhan ni Jehova, kinsa nagadumot niana. Sunod nakita ni Zacarias ang upat ka karro​—espiritung mga panon sa manulonda nga gisugo sa pagpanalipod sa mga alagad sa Diyos sa yuta.​—5:1–​6:8.

Matagnaong mga Panan-awng-Daan

Ang katumanan sa matagnaong pulong ni Jehova kulbahinam ug makalig-on sa pagtuo. Pagkatinuod niini sa matagnaong panan-awng-daan ni Zacarias alang sa atong adlaw! Gigamit ang salapi ug bulawan nga giamot sa nabihag nga mga Hudiyo, siya gipahimog matahom nga purongpurong alang sa Hataas nga Saserdoteng si Josue. Dugang pa, “kadtong atua sa halayo [sa Babilonya] moabot ug magatukod sa templo ni Jehova,” sama nga daghan ang mibiya sa Dakong Babilonya aron sa pagtabang sa buluhaton sa templo human sa 1919. Ang pagtul-id sa sayop nga mga ideya bahin sa pagpuasa mitultol sa kahubitan sa umaabot malipayong kahimtang sa Jerusalem. Gitagna nga ‘napulo ka lalaki gikan sa tanang kanasoran’ makig-uban sa espirituwal nga mga Hudiyo diha sa matuod nga pagsimba. (Galacia 6:16; Pinadayag 7:4-10) “Suminggit sa kadaogan, O anak nga babaye sa Jerusalem,” nagaingon si Jehova. Ang iyang hari nagaanhi nga nagakabayo sa usa ka asno ug “magasulti mahitungod sa pakigdait sa mga nasod.”​—6:9–​9:11.

Ang Diyos ug ang mga Magbalantay

Ang mga magtatan-aw dunay mabug-at nga responsabilidad ug angay mag-alagad uban ang kadasig. Human misaad sa pagluwas sa iyang katawhan, gipahayag ni Jehova ang iyang kasuko batok sa dili-matinumanong mga magbalantay. Gipadunot sa “tulo ka magbalantay” ang panon hangtod sa punto nga gibungkag sa Diyos ang iyang pakigtugon uban sa iyang katawhan. Ang Jerusalem mahimong “mabug-at nga bato.” Ang si bisan kinsa nga moatake kaniya “makadawat ug grabeng mga samad.” Apan “ang mga pangulo sa Juda”—kadtong magtatan-aw sa taliwala sa piniling katawhan sa Diyos—“mahisama sa nagkalayong suga,” madasigon sa pagkatalagsaon.—9:12–12:14.

Gidumtan ni Jehova ang mga mini. Diha sa kongregasyon sa Diyos, ang bisan kinsa nga magpadayon sa ‘pagsultig kabakakan,’ ‘dunggabon,’ isalikway ingong mga apostata. “Ang duha ka bahin” sa yuta pagaputlon, samtang ang ikatulong bahin pagalunsayon pinaagig kalayo. Katugbang niini, ang kinabag-an niadtong nagaangkong mga Kristohahon​—kadtong iya sa Kakristiyanohan​—giputol ni Jehova. Gikan sa 1919 paunahan, gamayng pundok lamang sa matinumanon, dinihogang mga Kristohanon ang nagasangpit sa ngalan ni Jehova ug nagpasakop sa iyang paagi sa paglunsay.​—13:1-9.

Ang katawhan ni Jehova makasalig sa iyang panalipod. Sa dihang ang mga kaaway maningkamot sa paglaglag sa iyang matuod nga mga magsisimba, panalipdan sa Diyos ang iyang katawhan ug paphaon ang tanang panon ni Satanas. Ang pagpikas sa Bukid sa mga Olibo miresulta ug simbolikong walog diin ang mga dinihogan nakaeksperyensiya ug panalipod ilalom sa unibersohanong Gingharian ni Jehova ug sa Mesyanikong kagamhanan sa iyang Anak. Dunay kahayag sa matinumanong mga alagad sa Diyos ug kangitngit alang sa mga nasod. Ang katawhan kinahanglang mopili: Mosimba ba kang Jehova duyog sa iyang katawhan o mag-antos ba hinoon ug walay kataposang kalaglagan.​—14:1-21.

[Mga Footnote]

[Kahon sa panid 31]

MGA TEKSO SA BIBLIYA GITUKI

o 1:3—Bisan pa nga nakabalik ang mga Hudiyo gikan sa Babilonya sa 537 W.K.P., sila giawhag usab sa pagbalik sa Diyos diha sa bug-os kalag nga pagkamasinundanon ug pagsimba. Sila mohatag makitang pamatuod niini nga pagbalik pinaagi sa pakigbahin sa buluhaton sa pagtukod pag-usab hangtod nga matapos ang templo.

o 2:1-5—Tingali, gisukod sa batan-ong lalaki ang Jerusalem aron matukod ang padir sa pagpanalipod libot niana. Apan ang manulonda sa Diyos nagpakita nga ang pagtubo sa siyudad dili mapugngan sa usa ka padir. Walay tawo ang makapugong sa padayong pagtubo sa Jerusalem. Si Jehova ang panalipod niini, sama sa iyang pagpanalipod karon sa dinihogang nanghibilin kinsa mahimong bahin sa langitnon Bag-ong Jerusalem.—Pinadayag 21:2.

o 6:11-15—Ang pagpurongpurong sa Hataas nga Saserdoteng si Josue wala magpahimo kaniyang saserdote-hari, kay siya dili man iya sa harianong banay ni David. Hinunoa, kini naghimo kang Josue nga matagnaong larawan sa Mesiyas, diin ang tagna bahin sa “Sanga” bug-os nga matuman. (Zacarias 3:8; Jeremias 23:5) Si Josue mitabang sa pagtapos sa buluhaton sa pagtukod pag-usab sa templo sa Jerusalem. Ang langitnong Saserdote-Hari, si Jesu-Kristo, motapos sa buluhaton sa espirituwal nga templo.

o 11:4-11—Ang samag-karnerong mga tawo mao “ang panon alang sa ihawan” sa pagkaagi nga gipahimuslan sila sa kagamhananong mga magbalantay. Pinaagi sa usa ka sungkod nga gitawag “Makapahimuot” ug ang usa “Paghiusa,” milihok sa Zacarias samag magbalantay nga nagdalag sungkod aron sa paggiya sa panon ug baraas sa pagbugaw sa mga ihalas nga mga mananap. (Salmo 23:4) Siya naglandong kang Jesus, kinsa gipadala aron mahimong espirituwal nga magbalantay apan gisalikway sa mga Hudiyo. Sa dihang gibali ni Zacarias ang sungkod sa Makapahimuot, mihunong ang Diyos sa pakiglabot nga mahimut-anon sa mga Hudiyo, gibungkag ang iyang pakigtugon uban kanila. Ug sa dihang gibali ni Zacarias ang sungkod sa Paghiusa, ang pagkuha sa Diyos sa Balaod sa pakigtugon sa Israel nagbilin sa mga Hudiyo nga walay teokratikanhong bugkos sa paghiusa. Ang ilang relihiyosong pagkabahinbahin nahimong malaglagon kanila duyog sa pagkalaglag sa Jerusalem sa mga Romanhon sa 70 K.P.

o 12:11—“Ang pagbangotan sa Adradrimon” hayan nagpunting sa pagbalata sa kamatayon ni Haring Josias sa Juda. Tingali ang Adradrimon mao ang lugar sa walog sa Meggido, diin didto siya namatay diha sa gubat batok kang Paraon Necho. Gibangotan ang kamatayon ni Josias, si Jeremias nagbakho ug ang mga mag-aawit sa ilang mga pagbakho minghisgot mahitungod sa hari.​—2 Cronicas 35:20-25.

[Hulagway sa panid 31]

Sama sa gitagna ni Zacarias, ang mga tawo sa tanang mga nasod nagapakig-uban karon sa espirituwal nga Israel