Kon Unsay Kahulogan sa mga Takna ug mga Panahon ni Jehova Alang sa Atong Adlaw
“Ang matag kahoy nga wala mamungag maayong bunga pagaputlon ug igasalibay ngadto sa kalayo.”—MATEO 7:19.
ANG rekord sa kasaysayan nagpamatuod sa kamatuoran nga si Jehova makahimo sa pag-ilis sa “mga takna ug mga panahon, nagatangtang ug mga hari ug nagapatindog ug mga hari.” (Daniel 2:21) Sa nangaging mga siglo, kon mosibo sa iyang katuyoan, iyang gitangtang si Paraon, Nabucodonosor, Belsasar, Herodes Agripa I, ug uban pa. ‘Apan,’ tingali moingon ang uban, ‘kadtong mga hitaboa maoy karaan na kaayong kasaysayan. Unsay labot nila kanato?’ Sila may dakog kalabotan kanato tungod kay kini adunay dakong pagtulon-an. Ang atong makat-onan gikan niadtong mga hitaboa mao nga kon moabot na ang panahon ni Jehova alang niini, iyang taposon ang pagmando sa mga lider sa kalibotan. Ug kon iyang buhaton kini, iyang hatagag gahom ang magmamando nga iyang pinili.
2. Alang sa unsa nga miabot ang takna ni Jehova sa atong adlaw?
2 Sa atong adlaw, miabot na usab ang panahon ni Jehova sa “pagtangtang ug mga hari ug sa pagpatindog ug mga hari.” Apan sa dili pa “magpatindog” ug Hari nga iyang pinili, wagtangon una sa Diyos ang tanang mga magmamando niining kalibotana, maingon man ang bug-os nga sistema sa mga butang nga ilang gimandoan. Ngano? Tungod kay sila, sama kang Belsasar sa karaang Babilonya, “gitimbang ug nakitang nakulangan.” Ang kahimtang karon kaamgid sa gipamulong sa alagad sa Diyos nga si Daniel ngadto kang Belsasar: “Giihap sa Diyos ang mga adlaw sa imong gingharian ug gitapos kini.” (Daniel 5:26, 27) Busa, sa atong panahon, si Jehova “magadugmok sa mga hari sa adlaw sa iyang kasuko. Siya magpakanaog ug silot sa kanasoran.”—Salmo 110:5, 6.
“Nakitang Nakulangan”
3 Sa unsang mga paagi nga “nakitang nakulangan” ang mga magmamando may labot sa mga hitabo sa kalibotan? Sila sa dakong bahin ang mabasol sa nagakahitabo sa tawhanong pamilya sa atong panahon, usa ka panahon nga puno sa mga katalagman nga dili hitumbasan sa bisan unsa pang panahon. Pananglitan, sa 1914 lamang duolan sa ginatos ka milyong tawo ang nangamatay sa nagkalainlaing mga gubat! Karon, gihulga sa nukleyar nga hinagiban ang kaluwasan sa kinabuhi sa yuta. Karon mismong gutloa, libolibo sa nukleyar nga mga missile, nga may tripulanteng andam sa pagtiro, nagapunting sa mga lugar nga daghang populasyon.
3, 4. Mahitungod sa kalinaw, sa unsang paagi ang mga magmamando sa kalibotan “nakitang nakulangan” niining sigloha?
4 Mahitungod sa nukleyar nga gubat, ang magasing Science mitaho niining makuyawng obserbasyon: ‘Diha sa bisan unsang dakong pagbayloay sa nukleyar, may kalagmitang mapuo ang dakong bahin sa tanom ug mananap sa yuta. Lakip na ang pagkapuo sa katawhan.’ Ang opisyal sa kagamhanan sa Uropa miingon: “Dili maisip ang mga kapildihan pinaagi sa mga siyudad kondili pinaagi sa tibuok nga kontinente.” Ang presidente sa nasod sa Latin Amerika miingon bahin sa gastos sa depensa: “Ang katawhan naglawig sa gabok nga barko nga may kalagmitang malunod . . . Kon kini malunod, apil ug kalunod ang tanan nga anaa niini.” Ug ang mantalaang Hapones miingon: “Ang kalibotan daw nagkalayo gikan sa [kalinaw] kay sa bisan unsang panahon sa kasaysayan.”
5, 6. Unsa ang ekonomikanhong kahimtang sa kadaghanang kayutaan ug mga katawhan?
5 Apan, ang kanasoran padayong nagagasto ug dugang ug dugang diha sa mga armamento. Ang gastos karon misaka ug duolan sa usa ka trilyong dolyares (U.S.) sa usa ka tuig! Ang usa ka tuboran miingon nga ang kalibotan nakagastog mga 50 ka pilo nga salapi sa matag sundalo kay gigasto niini sa matag bata nga nagtungha. Tagda, usab, ang taho sa Hiniusang Kanasoran nga nagpakita nga labing menos 450 ka milyong tawo sa kalibotan ang gipanggutom ug ang ilang gidaghanon nagsaka. Laing taho nag-ingon nga “kada tuig 30 ngadto sa 40 ka milyong tawo ang himalatyon tungod sa kagutom” sa wala maugmad nga kanasoran. Kini, nag-ingon usab, nga duolan sa katunga niadtong himalatyon maoy mga bata nga ubos sa singko anyos.
6 Ang usa ka opisyal sa kagamhanan sa usa ka dakong nasod sa South Africa nag-ingon nga “40 porsiento sa mga trabahante nagpuyo sa bug-os nga kakabos.” Sa laing nasod didto, naapektohan ang 51 porsientong mga mamumuo tungod sa kakulangan sa trabaho sa kaulohang siyudad niini. Ang taho mitapos: “Ang kontinente sa 260 ka milyong katawhan midangat sa pinakagrabeng kapit-osan sa katunga nga siglo.” Dayon, matikdi kining tulo ka ulohan nga gikan sa nagkalainlaing mga nasod: “‘Makalilisang’ ang Proporsiyon sa Kawalad-on.” “Misaka ang Proporsiyon sa Kawalad-on.” “Kawalad-on Masakit nga Kasinatian.” Gikan ba kining mga tahoa sa dili ugmad nga kanasoran? Dili, gikan kini sa mga opisyales sa kagamhanan sa Canada, sa Tinipong Bansa, ug sa Pederal Republika sa Alemanya. Oo, bisan ang gitawag nga adunahang nasod nagkalisodlisod usab.
7. Unsang mga obserbasyon ang gipahayag bahin sa mga krimen ug kapintasan nga kaylap sa atong panahon?
7 Diha sa kadaghanang kayutaan kining mga problemaha mapadayag sa bul-og sa krimen, kapintasan, ug terorismo. Pananglitan, sa Tinipong Bansa ang Federal Centers for Disease Control miingon nga sa matag tuig kapin sa 50,000 ka Amerikano ang gipamatay ug naghikog! Busa, ang editoryal sa The New York Times miingon: “Dili na makontrolar kining mga butanga.” Laing editoryal miingon: “Kini maoy panahon sa internasyonal nga kagubot.” Busa, bisan pa sa kasiglohan sa paningkamot, kasinatian, ug teknolohikal nga kauswagan, ang mga lider sa kalibotan wala makahatag sa kadaghanan sa ilang katawhan sa ilang pangunang mga panginahanglan.
8. Nagpamatuod sa unsa ang rekord sa kasaysayan?
8 Sa pagkatinuod, ang rekord sa kasaysayan, sa karaan ug sa moderno nagpamatuod nga ang tawo, sa iyang kaugalingon, wala makabaton sa mga kasulbaran. Ang politikal, ekonomikanhon, ug relihiyosong pagmando niining kalibotana dili gayod makapatunghag kalinaw, kasegurohan, kalipay, maayong panglawas, ug kinabuhi nga atong gitinguha ug gikinahanglan. Busa, kining kalibotana kinahanglang lalagon! Ug lalagon gayod kini kay mao kanay katuyoan ni Jehova. Maingon gayod kini sa gipamulong sa Bibliya: “Ang wasay gikataon na diha sa gamot sa mga kahoy; busa, ang tanang kahoy, nga wala mamungag maayong bunga pagaputlon ug igasalibay ngadto sa kalayo.”—Lucas 3:9.
Laing Katarongan sa Paghukom
9. Unsay paglantaw sa mga lider sa kalibotan bahin sa mga katuyoan ni Jehova?
9 Ang daotang bunga nga gipamunga niining kalibotana ug sa mga lider niini mao ang usa sa katarongan kon ngano si Jehova, tapos nakatimbang sa kalibotan, nakakaplag niining nakulangan, ug magalaglag niini. Apan adunay laing katarongan: Wala tagda sa mga lider sa kalibotan si Jehova—ang Maglalalang ug Soberano sa Uniberso—sa ilang mga kalihokan. Wala silay tinuod nga kaikag sa iyang katuyoan o sa mga takna o mga panahon. Maoy hinungdan nga ang Unang Corinto 2:8 tukmang nag-ingon bahin kanila: “Walay bisan usa sa mga punoan sa mga sistema sa mga butang karon ang nakasabot niining [balaang] kaalam.” Busa ang Salmo 146:3 nagtambag kanato: “Ayaw pag-ibutang ang inyong pagsalig sa mga prinsipe, ni sa mga anak sa tawo nga kaniya walay kaluwasan.”
10, 11. (a) Unsa ang kinahanglang buhaton niadtong nagatinguha sa pagkahibalo kang Jehova? (b) Sa unsang paagi nahibalo ang mga alagad sa Diyos sa mga butang nga wala mahibaloi sa uban?
10 Apan, ang Proverbio 3:5, 6 miawhag: “Sumalig ka kang Jehova sa bug-os mong kasingkasing ug ayaw pagsalig sa imong kaugalingong salabotan. Sa tanan nimong mga dalan ilha siya, ug siya magatul-id sa imong mga alagianan.” Ang mga tawo nga mohimo niini dili magpabilin nga walay paglaom niining kalibotana. Panalanginan sila ni Jehova pinaagi sa iyang espiritu aron sila makadangat sa pagkahibalo sa iyang mga katuyoan ug sa iyang mga takna ug mga panahon alang kanila. Sumala sa gipamulong sa Buhat 5:32, si Jehova mohatag sa iyang balaang espiritu “ngadto kanila nga nagasunod kaniya ingong magmamando.”
11 Busa ang mga alagad sa Diyos nahibalo sa mga butang nga wala mahibaloi sa mga magmamando niining kalibotana. Sila nahibalo sa mga katuyoan ni Jehova ug sa iyang mga panahon. Ang Unang Pedro 1:11 nag-ingon nga, sa nangagi, ang mga alagad sa Diyos “nagpadayon sa pagsusi kon unsang partikular nga panahon o unsang panahona ang gipasabot diha kanila sa espiritu.” Pinaagi sa balaang espiritu nga nagpadayag niini, si apostol Pablo nakaingon ngadto sa tinuod nga kaubang mga magsisimba: “Kamo nahibalo sa panahon.” (Roma 13:11) Sanglit ang mga alagad ni Jehova karon nagsunod kaniya ingong magmamando, ang balaang espiritu sa Diyos nagbutyag usab ngadto kanila kon unsa nang panahona kini sumala sa iyang panglantaw. Ang Amos 3:7 nag-ingon: “Ang Soberano Ginoong Jehova dili magbuhat sa bisan unsa gawas kon ang iyang tinago ipadayag niya sa iyang mga alagad nga mga manalagna.”
Lain Pang Katarongan
12, 13. Unsa ang laing malig-ong katarongan kon nganong nakita ni Jehova kining kalibotana ug ang mga lider niini nga nakulangan?
12 Moagak kini kanato sa lain pa gayong katarongan kon nganong nakita ni Jehova kining kalibotana ug ang mga lider niini nga nakulangan ug molaglag kanila. Hinumdomi ang gihimo ni Paraon, Belsasar, Herodes, ug ubang mga magmamando sa nangagi sa mga alagad ni Jehova. Sila mibatok, milutos, ug mipatay pa gani kanila. Kadtong maong mga magmamando may tulobagon sa Diyos tungod niadto.
13 Kaamgid usab kini sa atong panahon. Ang nagkalainlaing mga magmamando sa kalibotan misupak, milutos, ug nagpamatay pa gani sa makigdaitong mga alagad ni Jehova. Kining mga magmamandoa “nagasultig dagkong mga pulong batok sa Labing Hataas, ug . . . padayong nagasakit sa mga balaan sa Labing Gamhanan.” (Daniel 7:25; 11:36) Apan ang dinasig nga asoy sa Isaias 54:17 mipahayag: “Walay hinagiban nga gibuhat batok kanimo nga magmalamposon . . . Mao kini ang panulondon sa mga alagad ni Jehova.” Busa, ang tanang mga kaaway ipaubos, sama sa uban sa nangagi. Sa laing bahin, nagsaad si Jehova ug kaluwasan ug kauswagan sa iyang katawhan.
Haduol na ang Kataposang Panahon
14, 15. (a) Unsang yugtoa sa panahon nga kita nagakinabuhi, ug unsang mga pasidaan ang kinahanglan natong sundon? (b) Bisan pa sa mga paningkamot sa mga lider sa kalibotan unsa ang moabot sa madali?
14 Busa, unsa nang panahona kini sumala sa panglantaw sa Diyos? Panahon na kini sa kataposan niining kalibotana. Misalop na ang adlaw niini. Nagkakilumkilum na. Hapit nang moabot ang tingtugnaw diha niini. Ang tanang ebidensiya sa katumanan sa tagna sa Bibliya ug sa orasan ni Jehova nagpakita nga kita nagkinabuhi na sa “kataposang mga adlaw,” sa “konklusyon sa sistema sa mga butang.” (2 Timoteo 3:1-5) Busa kinahanglang atong patalinghogan ang pasidaan ni Jesus: “Padayon kamo sa pag-ampo nga ang inyong pagkalagiw dili mahitabo sa tingtugnaw.” (Mateo 24:20) Kon moabot ang gabii, o tingtugnaw niining kalibotana, ulahi na unya kaayo ang pagpangita sa kahimuot ni Jehova.
15 Ang panahon sa paglaglag niining mapasipalahon sa Diyos nga kalibotan moabot sa madali. Kon kini moabot, puwersadong tangtangon ni Jehova ang tanang mga magmamando sa kalibotan gikan sa pangatungdanan. Bisan unsa pa sila ka sinsero, ang ilang walay bunga ug walay paglaom nga mga plano matapos. Tinuod, mosulay sila sa paglipay sa ilang katawhan pinaagi sa kasabotan bahin sa mga hinagiban ug sa nagkalainlaing mga plano alang sa kalinaw ug kasegurohan, bisan pa sa ‘balaang mga tuig,’ apan ang martsa magapadayon hangtod sa kataposang paghusay diha sa gubat sa Diyos sa Armageddon.—Pinadayag 16:13-16.
16. Kinsay gihatagan ni Jehova sa pagmando sa kalibotan?
16 Dugang pa, hinumdomi nga dili lang kay “nagatangtang ug mga hari” si Jehova kondili siya “nagapatindog ug mga hari.” (Daniel 2:21) Ang langitnong mga kasundalohan nga gamiton ni Jehova sa pagpakanaog sa iyang mga paghukom sa Armageddon pangunahan sa usa ka Magmamando nga iyang ‘gipatindog’ alang sa tibuok yuta. Kanang usa mao ang iyang matinumanong Anak, si Jesu-Kristo, nga karon napahiluna na sa langitnong gahom ug himaya. Gitawag siya sa Pinadayag 19:16 nga “Hari sa mga hari ug Ginoo sa mga ginoo.” Ang Daniel 7:14 nag-ingon: “Ngadto kaniya gihatag ang pagmando ug himaya ug gingharian, aron ang katawhan, mga nasod ug pinulongan manag-alagad kaniya. Ang iyang pagmando mao ang pagmando nga walay kataposan nga dili umalagi, ug ang iyang gingharian mao kadtong dili mabungkag.”—Tan-awa usab ang Daniel 2:44.
17, 18. (a) Unsay gipahayag sa Pulong sa Diyos nga mahitabo niadtong dili moila kaniya ug sa iyang tinudlong Magmamando alang niining yutaa? (b) Kinsa pa ang nahibalo nga hamubo na lamang ang panahong nahibilin?
17 Sa yanong pinulongan ang matagnaong Pulong sa Diyos nagsulti kanato kon unsay mahitabo niadtong dili modawat kang Jehova ug sa iyang tinudlong Magmamando sa tibuok yuta. Kini nag-ingon: “Ug unya nakita ko ang usa ka manulonda nga nagtindog sa adlaw, ug siya misinggit sa makusog nga tingog ug gisinggitan ang tanang mga langgam nga nanaglupad sa kinatung-an sa kalangitan: ‘Umari kamo, tambong kamo sa dakong panihapon sa Diyos, sa pagkaon sa unod sa mga hari ug sa unod sa mga kapitan ug sa unod sa mga kusgan ug sa unod sa mga kabayo ug sa unod sa nagkabayo kanila, ug sa unod sa tanang tawong gawas ug sa ulipon ug sa diyutay ug sa mga dagko.’”—Pinadayag 19:17, 18.
18 Gibatbat sa Jeremias 25:33 kini niining paagiha: “Ug ang mga pinatay ni Jehova niadtong adlawa molukop gikan sa usa ka tumoy sa yuta ngadto sa laing tumoy sa yuta. Sila dili pagahilakan, ni pagahiposon o igalubong. Sila mahimong kinalibang sa ibabaw sa nawong sa yuta.” Oo, kataposan na kining panahon sa bug-os nga daotang sistema sa mga butang ni Satanas. Ug bisan siya nasayod niana! Ang Pinadayag 12:12 nag-ingon nga siya nasayod nga “hamubo nga lamang ang iyang panahon” nga nahabilin.
Pangitaa si Jehova Karon
19. Unsang kulba-hinam nga adlaw ug panahon ang magsugod tapos nga laglagon kining sistemaha?
19 Inigkatapos sa gabii, o tingtugnaw sa sistema ni Satanas, nan unsa? Nan panahon na unya kini ni Jehova sa pagpasulod sa masanagong bag-ong adlaw, usa ka kulba-hinam bag-ong panahon sa tingpamulak. Kini maoy panahon sa pagsugod sa pagmando ni Jehova sa matarong bag-ong sistema ilalom sa pagmando sa iyang langitnong Hari, si Kristo Jesus. Sa bag-ong sistema ang kapintasan, inhustisya, pag-antos, sakit, ug kamatayon mawala na. Ang katawhan igatuboy sa kahingpitan, nga may palaabutong kinabuhing walay kataposan. Unsa ka makadasig nga umaabot!—Salmo 37:10, 11, 29; Pinadayag 21:4.
20, 21. Sa unsang paagi gipangita sa daghang katawhan gikan sa tanang kanasoran si Jehova?
20 Apan, sa dili pa matapos kining sistemaha ug sa dili pa magsugod ang bag-ong sistema, adunay usa ka butang nga buhaton sa panahon ni Jehova nga hinungdanon alang sa mga maaghop sa yuta. Kini mao ang iyang panahon sa pagtigom niadtong buot makakat-on bahin kaniya, niadtong buot magpasakop sa iyang kabubut-on, ug nga moyukbo sa Hari nga iyang pinili. Sa pagbuhat niini, mailalom sila sa panalipod ni Jehova: “Ang ngalan ni Jehova maoy usa ka malig-ong torre. Ang matarong magadalagan nganha niana, ug hatagag kaluwasan.”—Proverbio 18:10.
21 Karon, gihimo kini sa daghang katawhan—sa pagkamatuod, milyonmilyon kanila. Sila nagagikan sa tanang nasod sa yuta. Kini sila gihubit diha sa Zacarias kapitulo 8, mga bersikulo 20 ug 21: “Mao kini ang giingon ni Jehova sa panon, ‘Mahitabo nga adunay moanhi nga mga katawhan ug mga pomuluyo sa daghang siyudad; ug ang mga pomuluyo sa usa ka siyudad moadto sa usa, ug magaingon: “Mangadto kita sa kinasingkasing sa pagpangayo sa kaluoy ni Jehova ug sa pagpangita kang Jehova sa mga panon.”’” Ang bersikulo 23 midugang: “Niadtong panahona [oo, sa atong panahon] nga ang napulo ka tawo gikan sa tanang mga pinulongan sa mga nasod mokupot, oo, sila mokupot sa sidsid sa usa ka tawo nga Hudiyo [dinihogang mga magdadayeg ni Jehova], nga magaingon: ‘Kami mouban kaninyo nga katawhan, kay kami nakadungog nga ang Diyos nagauban kaninyo.’”
22. Unsay atong kinahanglang pabilhan ug buhaton kon buot kitang makalabang-buhi sa adlaw sa kasuko ni Jehova?
22 Busa, simbaha si Jehova uban sa iyang katawhan ug umadto sa iyang dapit sa kasegurohan. Pakigbahin sa labing hinungdanong buluhaton nga ginahimo sa yuta karon—ang pagtigom ug pagbansay niadtong makalabang buhi sa Armageddon ug makabaton ug katingalahang palaabuton sa pagtikad ug paraiso sa yuta ug sa pagpuyo diha niana sa walay kataposan. Pabilhi kon unsa nang taknaa o panahona kini ug buhata ang giawhag sa Isaias 55:6: “Pangitaa si Jehova, kamo nga katawhan, samtang siya makaplagan pa. Sangpita ninyo siya samtang anaa pa siya sa duol.” Oo, “pangitaa ninyo si Jehova, kamong tanang mga maaghop sa yuta, nga nanagtuman sa Iyang tulomanon. Pangitaa ang pagkamatarong, pangitaa ang pagkamaaghop. Kay tingali kamo pagatagoan sa adlaw sa kasuko ni Jehova.”—Sofonias 2:3.
Pangutana Agig Repaso
◻ Sa unsang paagi ang mga magmamando sa kalibotan “nakitang nakulangan” sa mga mata sa Diyos?
◻ Nganong ang mga alagad ni Jehova nahibalo sa Iyang mga takna ug mga panahon samtang ang mga magmamando sa kalibotan wala?
◻ Nganong takos sa malaglagong paghukom sa Diyos ang mga magmamando sa kalibotan?
◻ Unsang taknaa ug panahona ang miabot sumala sa panghunahuna ni Jehova?
◻ Ngano ug sa unsang paagi mangita kita kang Jehova karon?
1. Unsay atong makat-onan gikan sa paagi sa pag-atubang ni Jehova sa mga magmamando sa nangagi?
[Hulagway sa panid 18]
Daghan karon nga nagapakitag pagtuo maluwas sa panahon sa kataposan niining kalibotana