HADRAK

Usa ka yuta nga batok niini si Jehova nagbungat ug usa ka pahayag pinaagi sa iyang manalagna nga si Zacarias. Kining tagnaa, nga lagmit gipahayag niadtong 518 W.K.P., nagpakita nga ang Hadrak wala kahimut-i ni Jehova. Kini gihisgotan lakip sa daghang siyudad nga naglibot sa Israel, sama sa Damasco, Hamat, Tiro, Sidon, ug sa Filistehanong mga siyudad sa Askelon, Gaza, Ekron, ug Asdod.​—Zac 9:1-8.

Lagmit nga ang Hadrak maoy usa ka siyudad-estado nga nagmando sa tibuok dapit nga naglibot niini. Gituohan nga kini mao ang Hatarikka sa Asiryanhong mga inskripsiyon, nga giisip usab nga mao ang bungdo sa Tell Afis, mga 45 km (28 mi) sa HK sa Aleppo. Ang Asiryanhon nga si Haring Tiglat-pileser III nagtala sa Hatarikka nga lakip sa “19 ka distrito nga sakop sa Hamat.”​—Ancient Near Eastern Texts, giedit ni J. Pritchard, 1974, pp. 282, 283.