AB

Ang ngalan sa ika-5 nga lunar nga bulan sa sagradong kalendaryo sa mga Hudiyo human sa pagkadestiyero, apan ang ika-11 nga bulan sa sekular nga kalendaryo. Kini nga bulan katumbas sa bahin sa Hulyo ug bahin sa Agosto.

Dili matino ang kahulogan sa ngalang Ab. Sa Bibliya, kini wala hisgoting direkta sa ngalan niini, kondili ingong “ang ikalimang bulan” lamang. Apan, kining ngalana makaplagan diha sa Mishnah (Taʽanit 4:6) ug sa ubang Hudiyohanong mga sinulat human sa pagkadestiyero.

Ang Ab maoy bulan sa ting-init, ang panahon nga magsugod ang pagpangani sa ubas didto sa Israel.​—Tan-awa ang KALENDARYO.

Si Aaron namatay sa unang adlaw sa Ab didto sa Bukid sa Hor. (Num 33:38) Ang 2 Hari 25:8 nag-ingon nga sa ikapitong adlaw niining bulana si Nebuzaradan, ang alagad sa hari sa Babilonya, “misulod sa Jerusalem.” Apan, ang Jeremias 52:12 nag-asoy kanato nga sa ikanapulong adlaw niini nga bulan nga si Nebuzaradan “misulod sa Jerusalem.” Ang Soncino Books of the Bible nagkomento bahin niini, nga nag-ingon: “Ang kal-ang nga tulo ka adlaw mahimong isipon nga mao ang panahon sa pag-abot ni Nebuzaradan sa dapit ug sa pagsugod sa mga buluhaton.” (Giedit ni A. Cohen, London, 1949) Busa, mopatim-aw nga si Nebuzaradan miabot sa Jerusalem sa ikapito nga adlaw, mihimog pagsurbi gikan sa iyang kampo sa gawas sa mga paril sa siyudad, ug nagsugo sa pagguba sa mga kuta sa siyudad ug sa pag-agaw sa mga bahandi niini; sa kataposan, sa ikanapulong adlaw sa bulan, siya misulod sa siyudad ug sa balaang templo niini. Sumala kang Josephus (The Jewish War, VI, 250, 268 [iv, 5, 8]), ang templo ni Herodes gisunog sa mga Romano sa ikanapulong adlaw sa ikalimang bulan (70 K.P.), ug gipunting ni Josephus ang pagkapareho niini nga petsa sa dihang gisunog sa mga Babilonyanhon ang unang templo sa samang adlaw.

Sulod sa misunod nga 70-ka-tuig nga pagkadestiyero didto sa Babilonya, kining ikalima nga bulan maoy panahon sa mga pagpuasa ug mga pagbakho sa mga Hudiyo agig paghinumdom sa kalaglagan sa templo sa Jerusalem. (Zac 7:​3, 5; 8:19) Sa bulan usab sa Ab nga si Esdras mibalik ngadto sa napasig-uling Jerusalem aron tudloan ang mga Hudiyo sa Balaod ni Jehova.​—Esd 7:​8, 9, 25.