Ang Pulong ni Jehova Buhi
Mga Pangunang Punto Gikan sa Basahon ni Malaquias
KAPIG 70 ka tuig na ang milabay human matukod pag-usab ang templo sa Jerusalem. Apan paglabay sa panahon, huyang na kaayo ang espirituwalidad sa mga Hudiyo. Bisan ang mga saserdote nahimong daotan. Kinsa kahay magbutyag sa ilang tinuod nga kahimtang ug maningkamot sa pagpasig-uli kanila sa Diyos? Ang maong tahas gihatag ni Jehova sa manalagnang si Malaquias.
Puwersado ang pagkasulat ni Malaquias sa kataposang basahon sa Hebreohanong Kasulatan nga naundan ug mga tagna nga inspirado sa Diyos. Ang pagtagad sa matagnaong pulong ni Malaquias makatabang kanato sa pagpangandam alang sa “dako ug makalilisang nga adlaw ni Jehova,” sa dihang taposon na ang presenteng daotang sistema sa mga butang.—Malaquias 4:5.
‘DAGHAN ANG NANGAPANDOL’ SA MGA SASERDOTE
Gipahayag ni Jehova ang iyang pagbati bahin sa Israel nga miingon: “Gihigugma ko kamo.” Apan gitamay sa mga saserdote ang ngalan sa Diyos. Sa unsang paagi? “Pinaagi sa paghalad ug mahugaw nga tinapay ibabaw sa [iyang] halaran” ug sa paghalad ug “hayop nga piang o masakiton.”—Malaquias 1:2, 6-8.
‘Daghan ang nangapandol sa balaod sa mga saserdote.’ Ang mga tawo ‘nagmaluibon sa usag usa.’ Ang pipila nangasawa ug mga dili Hudiyo. Ang uban nagluib sa “asawa sa [ilang] pagkabatan-on.”—Malaquias 2:8, 10, 11, 14-16.
Tubag sa mga Pangutana Bahin sa Kasulatan:
2:2—Sa unsang paagi ‘gitunglo ni Jehova ang mga panalangin’ sa malapasong mga saserdote? Gihimo kadto sa Diyos sa diwa nga ang panalangin nga gihangyo sa maong mga saserdote nahimo hinuong usa ka tunglo.
2:3—Unsay ipasabot nga ‘dapuwasan ug kinalibang’ ang mga nawong sa mga saserdote? Sumala sa Balaod, ang kinalibang sa ihalad nga hayop kinahanglang dad-on sa gawas sa kampo ug sunogon. (Levitico 16:27) Ang pagdapuwas ug kinalibang diha sa mga nawong sa mga saserdote nagpasabot nga gisalikway ni Jehova ang mga halad ug kadtong naghalad niini talamayon alang kaniya.
2:13—Kansang mga luha ang mitabon sa halaran ni Jehova? Mga luha kadto sa mga asawa nga nangadto sa sangtuwaryo sa templo ug nangaliyupo kang Jehova. Unsay hinungdan sa ilang kagul-anan? Ang ilang Hudiyong mga bana nakigdiborsiyo pinasukad sa supak-sa-balaod nga mga katarongan ug gibiyaan sila, lagmit aron makapangasawa ug mas bata nga mga langyaw.
Mga Leksiyon Alang Kanato:
1:10. Wala mahimuot si Jehova sa mga halad sa hakog nga mga saserdote, kinsa nagpabayad bisan sa yanong mga trabaho sama sa pagsirag mga pultahan o pagpasiga sa kalayo sa halaran. Pagkahinungdanon nga ang atong mga buhat sa pagsimba, lakip ang atong ginabuhat diha sa Kristohanong ministeryo, maoy tinukmod sa di-hakog nga gugma alang sa Diyos ug silingan, dili aron makapanapi!—Mateo 22:37-39; 2 Corinto 11:7.
1:14; 2:17. Dili itugot ni Jehova ang pagkasalingkapaw.
2:7-9. Kadtong adunay kaakohan sa pagtudlo diha sa kongregasyon angayng magtino nga ang ilang gitudlo nahiuyon sa Pulong sa Diyos, ang Balaang Kasulatan, ug sa gipasukad-sa-Bibliya nga mga basahon sa “matinumanong piniyalan.”—Lucas 12:42; Santiago 3:11.
2:10, 11. Gidahom ni Jehova nga isipong seryoso sa iyang mga magsisimba ang tambag nga magminyo “lamang diha sa Ginoo.”—1 Corinto 7:39.
2:15, 16. Angay gayong tamdon sa matuod nga mga magsisimba ang panaad sa kaminyoon uban sa asawa sa ilang pagkabatan-on.
‘ANG MATUOD NGA GINOO MOABOT SA IYANG TEMPLO’
“Sa hinanali moabot sa Iyang templo ang matuod nga Ginoo [si Jehova nga Diyos]” uban sa “mensahero sa pakigsaad [si Jesu-Kristo].” Ang Diyos “moanha [sa iyang katawhan] aron sa paghukom” ug mahimong matulin nga saksi batok sa tanang matang sa mga mamumuhat ug daotan. Dugang pa, ang “usa ka basahon sa handomanan” gisulat alang niadtong nahadlok kang Jehova.—Malaquias 3:1, 3, 5, 16.
Ang adlaw “nga nagdilaab sama sa hudno” moabot ug molaglag sa tanang daotan. Sa dili pa moabot kanang adlawa, usa ka manalagna ang ipadala aron iyang “pabalikon ang kasingkasing sa mga amahan ngadto sa mga anak, ug ang kasingkasing sa mga anak ngadto sa mga amahan.”—Malaquias 4:1, 5, 6.
Tubag sa mga Pangutana Bahin sa Kasulatan:
3:1-3—Kanus-a miabot “ang matuod nga Ginoo” ug “ang mensahero sa pakigsaad” sa templo, ug kinsay gipadala una kanila? Pinaagig usa ka hawas, si Jehova miabot sa iyang templo ug gihinloan kana niadtong Nisan 10, 33 K.P. Kana ang okasyon sa dihang misulod si Jesus sa templo ug iyang gipalayas kadtong nagnegosyo didto. (Marcos 11:15) Kini maoy tulo ka tuig ug tunga human madihogi si Jesus ingong Umaabot-nga-Hari. Sa susama, tulo ka tuig ug tunga human sa iyang pagkaentrono ingong Hari didto sa langit, si Jesus miuban kang Jehova ngadto sa espirituwal nga templo ug ilang nakaplagan nga ang katawhan sa Diyos kinahanglang hinloan. Sa unang siglo, gipadala si Juan Bawtista aron sa pag-andam sa mga Hudiyo sa pag-abot ni Jesu-Kristo. Sa modernong mga panahon, gipadala nga abante ang usa ka mensahero aron pag-andam sa dalan alang sa pag-abot ni Jehova diha sa iyang espirituwal nga templo. Ingon ka sayo sa katuigan sa 1880, gisugdan sa usa ka grupo sa mga estudyante sa Bibliya ang usa ka buluhaton nga magtudlo sa sinserong mga tawo bahin sa sukaranang mga kamatuoran sa Bibliya.
3:10—Ang pagdala sa “tanan nga ikapulo” nagpasabot ba sa paghatag sa tanan natong nabatonan ngadto kang Jehova? Giwagtang na ang Balaod ni Moises pinasukad sa kamatayon ni Jesus, busa ang paghatag ug ikapulo dili na usa ka kinahanglanon sa pagsimba sa Diyos karon. Bisan pa niana, ang ikapulo adunay simbolikong kahulogan. (Efeso 2:15) Wala kini magpasabot sa paghatag sa tanan natong nabatonan. Bisan tuod ang ikapulo ipresentar matag tuig, atong ipresentar ang tanan natong nabatonan ngadto kang Jehova kas-a lang—dihang kita nagpahinungod sa atong kaugalingon ug nagpasimbolo niini pinaagig bawtismo sa tubig. Sukad nianang panahona padayon, iya na ni Jehova ang tanan natong nabatonan. Bisan pa niana, siya nagtugot kanato sa paghatag ug usa ka bahin sa atong nabatonan, ang simbolikong ikapulo, aron gamiton sa pag-alagad kaniya. Kini nagtumong sa paggamit sa bisan unsa nga ikatugot sa atong mga kahimtang ug gitukmod sa atong kasingkasing. Ang mga halad nga atong ipresentar kang Jehova naglakip sa panahon, kusog, ug kahinguhaan nga gamiton diha sa pagsangyaw sa Gingharian ug paghimog tinun-an. Nalakip usab ang pagtambong sa Kristohanong mga tigom, pagduaw sa mga masakiton ug tigulang nang mga isigkamagtutuo, ug pagdonar ug salapi sa pagpaluyo sa matuod nga pagsimba.
4:3—Sa unsang paagi ang mga magsisimba ni Jehova “magtamak gayod sa mga daotan”? Ang katawhan sa Diyos dinhi sa yuta dili literal nga ‘magtamak sa mga daotan,’ buot ingnon, makigbahin sa pagpatuman sa hukom alang kanila. Hinunoa, kini nagpasabot nga ang mga alagad ni Jehova sa yuta mohimo niana nga mahulagwayon pinaagi sa bug-os-kasingkasing nga pagpakigbahin sa selebrasyon sa kadaogan nga mosunod inigkatapos sa kalibotan ni Satanas.—Salmo 145:20; Pinadayag 20:1-3.
4:4—Nganong angay natong ‘hinumdoman ang balaod ni Moises’? Kana nga Balaod dili mapadapat sa mga Kristohanon, apan kini nagsilbing ‘landong sa maayong mga butang nga moabot.’ (Hebreohanon 10:1) Busa, ang pagsusi sa Balaod ni Moises makatabang kanato sa pagsabot kon sa unsang paagi natuman ang nasulat nga mga butang. (Lucas 24:44, 45) Gawas pa, ang Balaod naundan ug “mga hulad sa mga butang sa mga langit.” Hinungdanon ang pagtuon niana kon buot natong masayran ang Kristohanong mga pagtulon-an ug panggawi.—Hebreohanon 9:23.
4:5, 6—Kinsay gihawasan ni “Elias nga manalagna”? Gitagna nga si “Elias” mohimog buluhaton sa pagpasig-uli, nga mao ang pag-andam sa kasingkasing sa katawhan. Sa unang siglo K.P., giila ni Jesu-Kristo si Juan Bawtista nga mao “si Elias.” (Mateo 11:12-14; Marcos 9:11-13) Ang modernong-adlaw nga katugbang ni Elias ipadala “sa dili pa moabot ang dako ug makalilisang nga adlaw ni Jehova.” Si Elias karon walay lain kondili “ang matinumanon ug maalamong ulipon.” (Mateo 24:45) Kini nga matang sa dinihogang mga Kristohanon makugihong nagbuhat sa espirituwal nga pagpasig-uli.
Mga Leksiyon Alang Kanato:
3:10. Kon dili nato ihatag kang Jehova ang atong kinamaayohan, dili usab niya kita panalanginan.
3:14, 15. Tungod sa daotang panig-ingnan sa mga saserdote, ang mga Hudiyo misugod sa paglantaw sa pag-alagad sa Diyos ingong dili hinungdanon. Kadtong may responsableng mga kaakohan diha sa Kristohanong kongregasyon kinahanglang maayog panig-ingnan.—1 Pedro 5:1-3.
3:16. Si Jehova naghupot kanunay ug talaan niadtong may kahadlok ug nagmatinumanon kaniya. Iyang hinumdoman ug luwason sila sa dihang taposon na niya ang daotang kalibotan ni Satanas. Busa, magmadeterminado gayod kita sa paghupot sa atong integridad sa Diyos.—Job 27:5.
4:1. Sa adlaw nga kita manubag kang Jehova, ang “sanga” ug “gamot” adunay samang sangpotanan—ang mga bata hukman sumala sa hukom nga ipahamtang sa ilang mga ginikanan. Dako gayod ang kaakohan sa mga ginikanan sa ilang menor-de-edad nga mga anak! Ang Kristohanong mga ginikanan kinahanglang maningkamot pag-ayo nga maangkon ang pag-uyon sa Diyos ug makahupot ug maayong baroganan uban kaniya.—1 Corinto 7:14.
“Kahadloki ang Matuod nga Diyos”
Kinsay maluwas sa “dako ug makalilisang nga adlaw ni Jehova”? (Malaquias 4:5) Si Jehova nag-ingon: “Kaninyo nga nahadlok sa akong ngalan ang adlaw sa pagkamatarong mosidlak gayod, nga may pagpang-ayo sa mga pako niini; ug kamo mogula ug magpanikad sa yuta sama sa mga nating baka nga pinatambok.”—Malaquias 4:2.
“Ang adlaw sa pagkamatarong,” si Jesu-Kristo, modan-ag niadtong masimbahong nahadlok sa ngalan sa Diyos, ug ilang maangkon ang pabor ni Jehova. (Juan 8:12) Alang kanila, aduna usay “pagpang-ayo sa mga pako niini”—espirituwal nga pagpang-ayo karon ug bug-os nga pagpang-ayo sa pisikal, mental, ug emosyonal didto sa bag-ong kalibotan sa Diyos. (Pinadayag 22:1, 2) Sila mahisamag “mga nating baka nga pinatambok” nga nanaglumpat tungod sa tumang kalipay. Tungod sa maong mga panalangin nga anaa sa atong unahan, patalinghogan nato ang tambag ni Haring Solomon: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.”—Ecclesiastes 12:13.
[Hulagway sa panid 26]
Ang manalagnang si Malaquias maoy usa ka masiboton ug debotado nga alagad sa Diyos
[Hulagway sa panid 29]
Ang atong itudlo kinahanglang nahiuyon sa Bibliya
[Hulagway sa panid 29]
Ang mga alagad ni Jehova nagtamod sa ilang pakigsaad sa kaminyoon