Mag-alagad Kang Jehova Sumala sa Iyang Hataas nga mga Sukdanan

 1. Unsay pagbati sa katawhan sa Jerusalem panahon ni Sofonias bahin sa mga sukdanan ni Jehova?

“SI Jehova dili magbuhat ug maayo, ug siya dili magbuhat ug daotan.” Kana ang hunahuna sa katawhan sa Jerusalem panahon ni Sofonias. Sila nangatarongan nga si Jehova wala magdahom nga mosunod silag tinong mga sukdanan. Miingon si Sofonias nga sila ‘nahisamag linugdang,’ ang linugdang sa gipondo nga bino. Iyang gipasabot nga ang katawhan gusto nga magkinabuhing hayahay, nga dili matugaw sa bisan unsang mensahe sa Diyos nga siya manghilabot sa ilang kahikayan. Apan giingnan sa Diyos ang maong mga Hudiyo nga iyang “susihon pag-ayo ang Jerusalem pinaagig mga lampara” ug ‘hatagag pagtagad’ kadtong wala magpakabana sa iyang mga sukdanan. Oo, si Jehova adunay mga sukdanan, ug siya interesado kon unsay panghunahuna sa iyang katawhan niana.—Sofonias 1:12.

 2. Sa dapit nga imong gipuy-an, unsa ang kasagarang tinamdan bahin sa pagkadunay mga sukdanan?

² Daghang tawo usab karon ang dili gustong mosunod ug mga sukdanan sa pagkinabuhi. Tingali makadungog ka nga moingon sila, “Buhata lang ang imong gustong buhaton!” Mangatarongan ang pipila, ‘Kon kulang kog kuwarta o dili nako matuman ang akong mga pangandoy, OK ra kon akong buhaton kon unsay angay kong buhaton aron usbon kana.’ Sila dili magtagad kon unsay hunahuna o pagbati sa Diyos o kon unsa tingaliy iyang gikinahanglan kanila. Komosta ka ba? Moangay ka ba nga ang Maglalalang nagbutang ug mga sukdanan alang kanimo?

3, 4. Nganong nagapasalamat ka nga adunay mga sukdanan?

³ Ang daghan nga dili moangay sa ideya nga kinahanglan silang mosunod sa mga sukdanan sa Diyos bahin sa pagkinabuhi, daling modawat sa mga sukdanan sa tawo sa nagkalainlaing bahin sa kinabuhi. Pananglitan, komosta ang bahin sa kalidad sa tubig? Ang kadaghanang gobyerno adunay mga sukdanan alang sa kalidad sa tubig nga gusto nilang mabatonan. Apan komosta kon ang mga sukdanan menos kaayo? Kana basin mahimong hinungdan sa diyariya ug sa ubang mga sakit nga dala sa tubig, nga mga bata ang ilabinang mataptan. Hinuon, lagmit gayong nakahatag kanimog kaayohan ang hataas nga mga sukdanan sa tubig nga ilimnon. “Kon walay mga sukdanan, kita daling makamatikod niana,” matod sa International Organization for Standardization. “Kita kasagarang dili makaamgo sa katuyoan sa mga sukdanan diha sa pagpauswag sa kalidad, pagkadili-peligroso, pagkakasaligan, pagkaepisyente ug pagkamailisan sa usa ka butang tungod kay parehog sukdanan—ug pagtagana sa maong kaayohan nga dili gastoso.”

⁴ Kon ikaw mouyon nga ang pagkadunay mga sukdanan diha sa nagkalainlaing mga bahin sa kinabuhi mahinungdanon, dili ba makataronganon nga atong dahomon nga ang Diyos adunay hataas nga mga sukdanan alang sa katawhang gitawag sa iyang ngalan?—Buhat 15:14.

 5. Sa unsang paagi gipasundayag ni Jehova pinaagi ni Amos ang kahinungdanon sa pagkab-ot sa Iyang mga sukdanan?

⁵ Sa dihang ikaw nagatukod ug balay, ang mga sukdanan hinungdanon. Kon dili tul-id ang usa ka bungbong, ang tibuok balay basin maghirig. O tungod sa mga kal-ang sa bungbong, ang balay basin dili mapuy-an. Kanay punto sa usa ka panan-awon ni Amos, nga nanagna sa ikasiyam ka siglo W.K.P., bahin sa kahimtang sa napulo-ka-tribong nasod sa Israel. Iyang nakita si Jehova nga nahimutang sa usa ka bungbong nga may “tunton sa iyang kamot.” Miingon ang Diyos: “Ania, ako magpahimutang ug usa ka tunton sa taliwala sa akong katawhang Israel. Dili na ako magpasaylo pa niini.” (Amos 7:7, 8) Ang usa ka tunton maoy bug-at nga butang nga nagbitay sa usa ka pisi; gigamit kini aron tinoon kon tul-id ba ang usa ka bungbong. Ang masambingayong bungbong nga sumala sa nakita ni Amos didto nagtindog si Jehova maoy “hinimo pinaagi sa usa ka tunton.” Ang maong bungbong nagbarog nga tul-id. Ugaling lang, sa panahon ni Amos ang mga Israelinhon dili na matul-id sa espirituwal nga diwa—nahisama silag naghirig nga bungbong nga kinahanglang gub-on sa dili pa malumpag.

 6. (a) Unsay usa ka pangunang punto diha sa mga sinulat sa 12 ka manalagna? (b) Unsay imong pasikaranan sa pag-ingon nga ang mga sukdanan sa Diyos maoy makataronganon?

⁶ Samtang imong tun-an ang mga basahon sa 12 ka manalagna, balikbalik nimong makaplagan kining puntoha: Hinungdanon gayod ang pagsunod sa mga sukdanan sa Diyos. Ang mga mensahe sa maong mga basahon dili pulos mga pagsaway sa katawhang wala makakab-ot sa hataas nga mga sukdanan sa Diyos. May mga higayon nga sa dihang siya nagsusi kanila, si Jehova mihukom nga ang iyang katawhan nakakab-ot gayod sa iyang mga sukdanan. Ang kamatuorang nakakab-ot gayod sila nagpamatuod nga ang iyang mga sukdanan maoy makataronganon; ang mga tawong dili hingpit nga sama kanato mahimong makakab-ot niana. Tagda ang usa ka pananglitan.

 7. Sa unsang paagi si Zacarias nagtabang kanato sa pagsabot nga ang dili-hingpit nga mga tawo makakab-ot sa mga sukdanan ni Jehova?

⁷ Human ikapahiluna sa namalik nga mga Hudiyo ang patukoranan sa templo, nahunong ang ilang trabaho sa pagtukod pag-usab. Busa ang Diyos nagpadala sa iyang mga manalagna nga si Haggeo ug Zacarias aron dasigon ang katawhan nga ipadayon ang proyekto. Sa usa ka panan-awon ngadto kang Zacarias, si Jehova naghubit kang Zorobabel, nga gobernador sa Juda, ingong may ‘tunton diha sa iyang kamot’ sa dihang iyang gibutang ang uloulo nga bato nga nagtapos sa trabaho sa templo. Ang templo natukod sumala sa mga sukdanan sa Diyos. (Zacarias 4:10) Apan tagda kining makapaikag nga detalye bahin sa natapos nga templo: “Kining pito mao ang mga mata ni Jehova. Kini nagalibotlibot sa tibuok yuta.” Nakita sa Diyos nga gipahimutang ni Zorobabel ang uloulo nga bato, ug sanglit siya makakita man sa tanang butang, Iyang nakita nga ang templong natukod pag-usab nakapasar sa Iyang pagsusi, nakakab-ot sa Iyang mga sukdanan! Ang punto mao nga bisan pag si Jehova adunay hataas nga mga sukdanan, ang mga tawo makakab-ot niana. Tungod sa pagdasig ni Haggeo ug Zacarias, si Zorobabel ug ang iyang katawhan nakakab-ot niana. Sama kang Zorobabel, ikaw makakab-ot usab sa mga gidahom sa Diyos. Pagkamakapadasig nga mahibalo kita niana!

8, 9. (a) Nganong angay nga si Jehova magbutang ug mga sukdanan alang sa mga tawo? (b) Nganong haom nga gibaod sa Diyos nga tumanon sa mga Israelinhon ang iyang mga sugo?

⁸ Ingong Maglalalang, ang Diyos adunay katungod sa pagbutang ug mga sukdanan alang sa katawhan ug sa pagdahom nga atong sundon kana. (Pinadayag 4:11) Dili kinahanglang batbaton nga detalyado ni Jehova ang tanan, kay siya mihatag sa mga tawo ug tanlag aron mahimong usa ka bililhong giya. (Roma 2:14, 15) Gisugo sa Diyos ang unang mga tawo nga dili mokaon gikan sa “kahoy sa kahibalo sa maayo ug daotan,” nga naghawas sa katungod sa Diyos sa pagbutang ug mga sukdanan bahin sa maayo ug daotan. Nahibalo ka kon unsay nahitabo. (Genesis 2:17; 3:1-19) Nga gipasabot ang sayop nga pagpili ni Adan, si Oseas misulat: “[Ang mga Israelinhon], sama sa yutan-ong tawo, naglapas sa pakigsaad.” (Oseas 6:7) Busa gipakita ni Oseas nga ang mga Israelinhon tinuyong nakasala.

⁹ Unsa ba kadtong salaa? “Sila naglapas sa pakigsaad [sa Balaod].” (New International Version) Pinaagi sa pagluwas sa iyang katawhan gikan sa Ehipto, ang Diyos nahimong tag-iya nila ug tin-awng may katungod sa pagbutang ug mga sukdanan alang kanila. Ang mga Israelinhon midawat sa pakigsaad uban kang Jehova, busa sila miuyon nga mosunod sa maong mga sukdanan sa pagkinabuhi. (Exodo 24:3; Isaias 54:5) Bisan pa niana, daghan kanila ang napakyas sa pagtuman sa Balaod. Sila nahimong sad-an sa pag-ulag dugo, pagbuno, ug pagpakighilawas.—Oseas 6:8-10.

10. Sa unsang paagi gisulayan ni Jehova ang pagtabang niadtong napakyas sa pagkab-ot sa iyang mga sukdanan?

¹⁰ Si Jehova nagpadala ug mga manalagna sama ni Oseas aron tabangan ang Iyang nagpahinungod nga katawhan. Sa kataposan sa iyang matagnaong basahon, si Oseas mipahayag: “Kinsa ang maalamon, aron kining mga butanga iyang masabtan? Ang maayog pagsabot, aron iya kining mahibaloan? Kay ang mga dalan ni Jehova matul-id, ug ang mga matarong mao ang magalakaw diha niana; apan ang mga malapason mao ang mangapandol diha niana.” (Oseas 14:9) Sa sinugdan sa Oseas kapitulo 14, atong makaplagan nga gipasiugda sa manalagna ang panginahanglan sa pagbalik kang Jehova. Ang mga maalamon makasabot nga si Jehova nagpaila sa matarong nga mga dalan nga angayng pagalaktan sa iyang katawhan. Ingong nagpahinungod nga alagad sa Diyos, walay duhaduha nga ikaw sinserong nagtinguha sa pagpabiling matul-id, nga magalakaw diha sa mga dalan ni Jehova.

11. Nganong buot nimong sundon ang mga sugo sa Diyos?

¹¹ Gipunting usab sa Oseas 14:9 ang atong pagtagad ngadto sa mga kaayohan sa pagsubay sa matul-id nga dalan. Makadawat kitag mga panalangin ug mga kaayohan kon atong kab-oton ug sundon ang mga kinahanglanon sa Diyos. Ingong Maglalalang, siya nahibalo sa atong kinaiyahan. Ang iyang gidahom kanato maoy alang sa atong kaayohan. Sa pag-ilustrar sa relasyon tali kanato ug sa Diyos, kita makahunahuna bahin sa usa ka kotse ug sa magbubuhat niini. Ang magbubuhat nahibalo kon giunsa pagdisenyo ug pag-asembol ang kotse. Nahibalo siya nga kinahanglang regular nga ilisan ang aseite sa makina sa kotse. Unsay mahitabo kon dili tagdon ang maong lagda, kay tingali mangatarongan nga maayo ra man ang dagan sa kotse? Mas dili unta daling madaot ug mapalyar ang makina kon gisunod pa ang maong lagda. Kana matuod usab bahin sa mga tawo. Ang atong Maglalalang naghatag kanato ug mga sugo. Ang pagsunod niana maoy alang sa atong kaayohan. (Isaias 48:17, 18) Ang pagsabot nga kita makabaton ug kaayohan maghatag kanato ug dugang katarongan sa pagsunod sa iyang mga sukdanan sa pagkinabuhi, sa pagtuman sa iyang mga sugo.—Salmo 112:1.

12. Sa unsang paagi ang paglakaw diha sa ngalan sa Diyos makapalig-on sa atong relasyon kaniya?

¹² Ang kinadak-ang ganti sa pagsunod sa mga sugo sa Diyos mao nga mas mapalig-on ang atong relasyon sa Diyos. Kon sundon nato ang iyang mga sukdanan sa pagkinabuhi ug masabtan nga kana maoy makataronganon ug makahatag ug kaayohan, molalom pa ang atong pagmahal sa Tagmugna niana. Gihulagway sa nindot nga paagi sa manalagnang si Miqueas ang maong lalom nga relasyon: “Ang tanang mga katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.” (Miqueas 4:5) Pagkabililhon ang atong pribilehiyo sa paglakaw diha sa ngalan ni Jehova, nga magatuboy sa iyang kadungganan ug magaila sa iyang awtoridad diha sa atong kinabuhi! Ingong sangpotanan, buot natong ipabanaag ang iyang mga hiyas. Sa tinagsatagsa, kita maningkamot sa pagpalig-on sa atong relasyon uban sa Diyos.—Salmo 9:10.

13. Nganong ang pagkahadlok sa ngalan sa Diyos dili daotan?

¹³ Kadtong nagasunod sa mga sukdanan sa Diyos sa pagkinabuhi ug nagalakaw diha sa ngalan sa Diyos giingon nga nahadlok sa ngalan sa Diyos. Dili kana daotang pagkahadlok. Gipasaligan ni Jehova ang maong mga tawo: “Kaninyo nga nahadlok sa akong ngalan ang adlaw sa pagkamatarong mosidlak gayod, nga may pagpang-ayo sa mga pako niini; ug kamo mogula ug magpanikad sa yuta sama sa mga nating baka nga pinatambok.” (Malaquias 4:2) Ingong katumanan sa maong tagna, “ang adlaw sa pagkamatarong” mao si Jesu-Kristo. (Pinadayag 1:16) Siya nagsidlak karon tungod sa espirituwal nga pagpang-ayo ug, sa gitakdang panahon, mosidlak tungod sa pisikal nga pagpang-ayo alang sa katawhan. Ang kalipay sa mga nangaayo gipanig-ingon sa pinatambok nga mga baka nga “mogula ug magpanikad sa yuta,” nga nahinam ug nalipay nga nahigawas. Wala ka ba makasinati sa maong dakong kagawasan?—Juan 8:32.

14, 15. Sa unsang mga paagi makabaton kag kaayohan sa pagsunod sa mga sukdanan ni Jehova?

¹⁴ Ang laing paagi nga makabaton kag kaayohan sa pagsunod sa mga sukdanan sa Diyos mao ang mas maayong relasyon uban sa mga isigkatawo. Gipahayag ni Habacuc ang lima ka kaalaotan—batok sa mga nangilog, kadtong nagtinguhag malimbongong tubo, kadtong nag-ulag dugo, kadtong naglaraw aron himoon ang seksuwal nga mga kahilayan, ug kadtong nagsimbag mga diyosdiyos. (Habacuc 2:6-19) Ang kamatuoran nga si Jehova nagpahayag sa maong mga kaalaotan tin-awng nagpakita nga siya nagbutang ug mga sukdanan bahin sa kon unsay angay natong paagi sa pagkinabuhi. Apan matikdi kining puntoha: Upat sa mga sala nga gihisgotan mao ang may kalabotan sa atong pagtagad sa atong isigkatawo. Kon ugmaron nato ang panghunahuna sa Diyos, kita dili magdaot sa atong mga silingan. Busa, mahimong mas maayo ang atong relasyon uban sa kadaghanan kanila kon atong sundon ang mga kinahanglanon sa Diyos.

¹⁵ Ang ikatulong paagi nga makabaton kitag kaayohan nalangkit sa kalipay sa pamilya. Ang katawhan karon sagad nag-isip nga ang panapos nga kasulbaran sa panagbangi sa magtiayon mao ang diborsiyo. Bisan pa niana, pinaagi sa baba sa manalagnang si Malaquias, si Jehova miingon: “Gidumtan ko ang pagdiborsiyo.” (Malaquias 2:16) Sa ulahi atong hisgotan nga mas detalyado ang Malaquias 2:16, apan niining puntoha matikdi gikan sa maong teksto nga ang Diyos maalamong nagbutang ug mga sukdanan aron tumanon sa mga membro sa pamilya; sa gidak-on nga ilang tumanon kana, ang pakigdait molungtad. (Efeso 5:28, 33; 6:1-4) Tinuod, kitang tanan dili hingpit, busa ang mga suliran motungha. Bisan pa niana, diha sa basahong Oseas, ang Usa “nga kaniya utang sa tanang kabanayan sa langit ug sa yuta ang ngalan niini” mihatag ug praktikal nga pagtulon-an nga nagpadayag kon unsaon pagsulbad bisan ang pipila ka bug-at nga mga suliran sa kaminyoon. Atong susihon usab kana sa ulahing kapitulo niining libroha. (Efeso 3:15) Atong susihon karon kon unsa pay laing nalangkit sa pagsunod sa mga sukdanan sa Diyos.

16. Sa unsang paagi ang Amos 5:15 nalangkit sa mga sukdanan sa Diyos?

¹⁶ Ang unang tawo, si Adan, dili maalamong mipili bahin sa kon kansang mga sukdanan sa maayo ug sa daotan ang labing maayo. Mopili ba kita nga mas maalamon? Si Amos nagtambag kanato nga mahimong masiboton sa pagpili, nga miawhag: “Dumti ang daotan, ug higugmaa ang maayo.” (Amos 5:15) Si William Rainey Harper, ang anhing propesor sa mga pinulongan ug mga literaturang Semitiko sa University of Chicago, miingon bahin niining bersikuloha: “Ang sukdanan bahin sa maayo ug daotan, diha sa hunahuna [ni Amos], mao ang pagsunod sa kabubut-on ni Yahweh.” Kini maoy pangunang ideya nga atong makat-onan gikan sa 12 ka manalagna. Andam ba kitang modawat sa mga sukdanan ni Jehova bahin sa maayo ug daotan? Kanang hataas nga mga sukdanan gipadayag kanato diha sa Bibliya ug gipatin-aw sa hamtong, eksperyensiyado nga mga Kristohanon nga maoy naglangkob sa “matinumanon ug maalamong ulipon.”—Mateo 24:45-47.

17, 18. (a) Nganong hinungdanon ang pagdumot sa daotan? (b) Iilustrar kon sa unsang paagi kita makaugmad ug dakong pagdumot sa daotan.

¹⁷ Ang atong pagdumot sa daotan motabang kanato sa paglikay sa mga butang nga dili makapahimuot sa Diyos. Pananglitan, ang usa ka lalaki mahimong nahibalo sa kapeligrohan sa pornograpiya diha sa Internet ug mosulay sa paglikay pagtan-aw niana. Bisan pa niana, unsay pagbati sa ‘sulod nga pagkatawo’ bahin sa unod sa pornograpikong mga Web site? (Efeso 3:16) Pinaagi sa pagpadapat sa tambag sa Diyos nga anaa sa Amos 5:15, mas sayon siyang makaugmad sa pagdumot sa daotan. Busa siya mahimong magmadaogon sa iyang pagpakigbisog sa paglikay sa mga butang nga dili makapahimuot sa Diyos.

¹⁸ Tagda ang laing pananglitan. Mahanduraw mo ba nga ikaw nagayukbo atubangan sa mga diyosdiyos sa pagsimbag sekso? Dili ba mangil-ad bisan ang paghunahuna niana? Bisan pa niana, si Oseas naghisgot nga ang mga katigulangan sa mga Israelinhon naghimog imoralidad atubangan ni Baal sa Peor. (Numeros 25:1-3; Oseas 9:10) Lagmit, gihisgotan ni Oseas ang maong hitabo tungod kay ang pagsimba kang Baal maoy usa ka dakong sala sa napulo-ka-tribo nga gingharian sa Israel. (2 Hari 17:16-18; Oseas 2:8, 13) Ato lang mahanduraw ang mangil-ad nga esena: Ang mga Israelinhon nagluhod atubangan sa mga idolo panahon sa seksuwal nga mga rituwal. Ang atong pagkahibalo nga kana gidumtan sa Diyos makatabang sa matag usa kanato sa pagpakigbugno batok sa mga lit-ag nga gibutang ni Satanas pinaagi sa Internet. Karong adlawa, daghan ang nagaidolo sa maanyag nga mga babaye ug ambongang mga lalaki nga nalangkit sa popular nga kalingawan. Hinuon, pagkalahi niadtong nakakat-on gikan sa mga pasidaan sa mga manalagna bahin sa pagsimbag mga idolo!

19. Unsay imong makat-onan gikan sa mga gibuhat ni Jonas didto sa tiyan sa usa ka dakong isda?

¹⁹ Samtang maningkamot ka sa pagtuboy sa hataas nga mga sukdanan sa Diyos taliwala sa mga tentasyon ug mga kalisdanan, mahimong mobati ka usahay ug kawalay-katakos o dili mahibalo kon unsay buhaton. Kon luya ang imong pangutok o emosyonal nga katakos, sa unsang paagi masagubang nimong malamposon ang lisod nga kahimtang? (Proverbio 24:10) Buweno, aduna kitay makat-onan gikan kang Jonas, kinsa atong nailhan ingong dili-hingpit nga tawo nga may mga kahuyangan. Hinumdomi kon unsay iyang gibuhat sulod sa tiyan sa usa ka dakong isda. Siya miampo kang Jehova. Matikdi ang unod sa iyang pag-ampo.

20. Sa unsang paagi masangkapan nimo ang imong kaugalingon aron makahimo ka sa gibuhat ni Jonas?

²⁰ Sa dihang si Jonas miampo sa Diyos “gikan sa tiyan sa Sheol,” migamit siyag daghang pulong ug prase nga iyang sinati, ang mga pulong sa mga salmo. (Jonas 2:2) Siya naguol kaayo ug nangaliyupo kang Jehova alang sa kaluoy, apan ang mga pulong ni David nalitok sa mga ngabil ni Jonas. Pananglitan, itandi ang mga pulong sa Jonas 2:3, 5 sa mga pulong sa Salmo 69:1, 2.a Dili ba tin-aw nga si Jonas sinati kaayo sa mga salmo ni David nga mahimong nabatonan niadto sa manalagna? Ang mga pulong sa inspiradong mga salmo misugwak sa iyang hunahuna. Nabatonan ni Jonas ang inspiradong pulong sa Diyos ‘sa iyang kahiladmang mga bahin.’ (Salmo 40:8) Kon moatubang kag kahimtang nga makapaguol kaayo, makahinumdom ka ba ug pipila ka haom nga mga pulong sa Diyos? Ang imong mas dakong kahibalo bahin sa Pulong sa Diyos karon lagmit kaayong makatabang gayod sa umaabot samtang moatubang kag mga desisyon ug magsulbad ug mga suliran nga nahiuyon sa mga sukdanan sa Diyos.

21. Unsay kinahanglan nimong ugmaron aron makasunod sa mga sukdanan sa Diyos?

²¹ Siyempre, ang pagbutang lamang sa Pulong sa Diyos diha sa imong panumdoman dili igo aron makasunod ka sa mga sukdanan ni Jehova. Ang manalagnang si Miqueas mihatag ug dugang pagsabot kon unsay imong gikinahanglan aron ipadapat ang Pulong sa Diyos: “Ang tawo nga may praktikal nga kaalam mahadlok sa imong ngalan.” (Miqueas 6:9) Aron mahimong usa ka tawo nga may praktikal nga kaalam, usa nga makapadapat sa iyang nahibaloan diha sa iyang kinabuhi mismo, kinahanglan nimong ugmaron ang pagkahadlok sa ngalan sa Diyos.

22, 23. (a) Nganong si Jehova nagpadala kang Haggeo ngadto sa namalik nga mga Hudiyo? (b) Unsay imong katarongan sa pagsalig nga ikaw makatuman sa mga sukdanan sa Diyos?

²² Sa unsang paagi makakat-on ka sa pagkahadlok sa ngalan sa Diyos? Buweno, konsultaha ang manalagnang si Haggeo pagkahuman sa pagkadestiyero. Sa iyang mubo kaayong basahon, nga 38 lamang ka bersikulo, iyang gigamit ang ngalan ni Jehova ug 35 ka higayon! Sa gisugo ni Jehova si Haggeo sa pagpanagna, niadtong 520 W.K.P., milabay na ang 16 anyos ug gamay pa ang nahimo sa pagtukod pag-usab sa templo sa Jerusalem. Nawad-ag kadasig ang katawhan sa Diyos tungod sa pagsupak sa ilang mga kaaway. (Esdras 4:4, 5) Nangatarongan ang katawhan nga ang panahon sa pagtukod pag-usab sa templo wala pa moabot. Si Jehova nagpahimangno kanila: “Tagda sa inyong kasingkasing ang inyong mga dalan. . . . Tukora ang balay, aron ako mahimuot niana ug ako pagahimayaon.”—Haggeo 1:2-8.

²³ Si Gobernador Zorobabel, ang Hataas nga Saserdoteng si Josue, ug “ang tanang nahibilin sa katawhan namati sa tingog ni Jehova nga ilang Diyos, . . . ug ang katawhan nahadlok tungod kang Jehova.” Tungod kay ang katawhan nahadlok kang Jehova, ang Diyos misanong: “Ako nagauban kaninyo.” Pagkatalagsaong pasalig! Sa tabang sa espiritu sa Diyos, ang katawhan “miadto ug mibuhat sa buluhaton sa balay ni Jehova.” (Haggeo 1:12-14) Ang angay nga kahadlok nga dili makapahimuot sa Diyos maoy nagpalihok sa hadlokang katawhan aron sila molihok bisan pa sa pagsupak.

24, 25. Nga gamiton ang espesipikong mga pananglitan, iilustrar kon sa unsang paagi ikapadapat nimo ang mga prinsipyo nga gipadayag niining kapituloha.

²⁴ Komosta ka? Kon nakaamgo ka kon unsa ang mga sukdanan sa Diyos diha sa kahimtang nga imong giatubang, makabaton ka bag kaisog nga gikinahanglan sa pagkahadlok kang Jehova imbes sa mga tawo? Tingali ikaw maoy batan-ong babaye, ug diha sa trabahoan adunay usa ka lalaki nga walay diyosnong mga prinsipyo nga sama sa imoha. Bisan pa niana, siya maluloton ug matinagdanon. May teksto ba nga mosantop sa imong alimpatakan nga magpahinumdom kanimo bahin sa mga sukdanan ni Jehova ug sa mga kapeligrohan sa dili pagpanumbaling niana? Pananglitan, unsa na man ang Oseas 4:11? “Ang pakighilawas ug ang bino ug ang tam-is nga bino mao ang magakuha sa maayong motibo.” Nga naghunahuna sa maong teksto, ang imong pagkahadlok sa Diyos magdasig ba kanimo sa pagsunod sa iyang sukdanan ug sa pagbalibad kon ang maong lalaki magadapit kanimo alang sa usa ka sosyal nga okasyon? Kon siya mosugod sa pagpakitag interes kanimo, ang kahadlok nga dili makapahimuot sa imong mahigugmaong Diyos makatabang kanimo sa ‘pagkalagiw’ gikan kaniya.—Genesis 39:12; Jeremias 17:9.

²⁵ Atong balikan paghisgot karon ang pananglitan sa usa ka lalaki nga naningkamot sa pagsukol sa tentasyon sa pornograpiya sa Internet. Mahinumdom ba siya sa mga pulong sa Salmo 119:37, nga maoy usa ka matang sa pag-ampo? “Ilikay ang akong mga mata gikan sa pagtan-aw sa butang nga walay-pulos.” Ug iya bang repasohon sa iyang hunahuna ang mga pulong ni Jesus diha sa Wali sa Bukid? “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:28) Ang pagbaton ug kahadlok kang Jehova ug ang tinguha nga mosunod sa iyang mga sukdanan angayng magdasig sa usa ka Kristohanon sa pagtalikod sa bisan unsa nga mahimong modaldal sa pagkadaotan. Sa dihang tentalon ka sa paghunahuna ug paglihok nga supak sa mga sukdanan sa Diyos, paningkamoti nga maugmad ang dugang kahadlok sa Diyos. Ug hinumdomi ang gisulti ni Jehova kanimo pinaagi ni Haggeo: “Ako nagauban kaninyo.”

26. Unsa pay atong pagahisgotan?

²⁶ Oo, ikaw makaalagad kang Jehova sumala sa iyang hataas nga mga sukdanan ug makabatog kaayohan sa paghimo niana. Samtang magpadayon ka sa pagsusi sa 12 ka matagnaong mga basahon, ang mga sukdanan sa Diyos, o kon unsay iyang gikinahanglan gikan sa matag usa kanato, mahimong mas tin-aw pa. Ang sunod nga seksiyon niining libroha maghisgot ug tulo ka dagkong ulohan diin si Jehova nagbutang ug dalayegong mga sukdanan: atong panggawi, atong mga pagpakiglabot sa uban, ug atong pamilyahanong kinabuhi.