Ang Adlaw nga ‘Nagdilaab Samag Hudno’
“Tan-awa! ang adlaw nagsingabot nga nagdilaab samag hudno.”—MALAKIAS 4:1.
1. Unsang mga pangutana ang mobangon may kalabotan sa Malakias 4:1?
SA PANAHON niining kataposang mga adlaw, malipayon kadtong kansang ngalan gipili ni Jehova aron isulat sa iyang basahon sa handomanan. Apan unsay mahitabo niadtong dili-takos alang nianang pribilehiyoa? Mga magmamando man sila o ordinaryo lamang nga mga tawo, unsay mahitabo kanila kon ilang trataron nga matinamayon ang mga magmamantala sa Gingharian sa Diyos ug ang mensahe nga ilang dala? Gihisgotan ni Malakias ang adlaw sa panudya. Sa kapitulo 4, bersikulo 1, atong mabasa: “‘Kay, tan-awa! ang adlaw nagsingabot nga nagdilaab samag hudno, ug ang tanang mga mapahitas-on ug ang tanang naghimo ug pagkadaotan mahisama gayod sa tuod. Ug ang adlaw nga nagsingabot magalamoy gayod kanila,’ si Jehova sa mga panon nagaingon, ‘aron dili kini magbilin kanila ug gamot o sanga.’”
2. Unsang tataw nga pagbatbat bahin sa paghukom ni Jehova ang gihatag ni Ezekiel?
2 Gitandi usab sa ubang mga propeta ang paghukom ni Jehova sa mga nasod sa mainit nga kalayo sa hudno. Pagkahaom ang pagkapadapat sa Ezekiel 22:19-22 sa paghukom sa Diyos sa mga sekta sa apostatang Kakristiyanohan! Kini mabasa: “Mao kini ang giingon sa Soberano Ginoong Jehova, ‘Tungod kay kamong tanan nahimong sama gayod sa yamukmok, busa ania ako nga magatigom kaninyo . . . Maingon sa pagtigom sa plata ug tumbaga ug puthaw ug tingga ug lata ngadto sa tunga sa hudno, aron bulhotan kana ug kalayo aron tunawon, sa ingon pagatigomon ko sila sa akong kasuko ug sa akong kapungot, ug akong pabulhotan ug pagatunawon kamong mga katawhan. Ug tigomon ko kamo ug pabulhotan kamo sa kalayo sa akong kayugot, ug mangatunaw gayod kamo sa tunga niana. Sama sa pagtunaw sa plata sa tunga sa hudno, mao usab kamong katawhan mangatunaw sa tunga niana; ug kamo kinahanglang makaila nga ako mismo, si Jehova, ang nagbubo sa akong kapungot kaninyo.’”
3, 4. (a) Unsang sinalingkapaw nga pangangkon ang gihimo sa klero? (b) Unsa ang mangil-ad nga rekord sa relihiyon?
3 Pagkapuwersado nga ilustrasyon! Ang klero nga midumili sa paggamit sa ngalan ni Jehova, gani gipasipalahan pa ang maong balaang ngalan, kinahanglang moatubang nianang maong adlaw sa paghusay. Sa pagkamapahitas-on, sila nangangkon nga sila ug ang ilang politikal nga mga kaalyado maoy motukod sa Gingharian sa Diyos sa yuta, o sa labing menos himoon ang yuta ingong takos nga dapit alang sa Gingharian.
4 Ang apostatang Kakristiyanohan nakigkombuya sa politikal nga mga magmamando sa pagpakigbugno sa makalilisang nga mga gubat. Natala sa kasaysayan ang mga Krusada sa kapanahonan sa edad-medya, ang pinugos nga pagkombirtir panahon sa Inkwisisyong Espanyol, ang Katloan ka Tuig nga Gubat nga nagpukan sa dakong bahin sa Uropa niadtong ika-17ng siglo, ug ang Giyera Sibil sa Espanya sa katuigang 1930, nga gibugno aron himoong luwas ang posisyon sa Katolisismo sa Espanya. Ang kinadak-ang pag-ula sa dugo miabot pinaagi sa duha ka gubat sa kalibotan sa atong siglo, sa dihang ang mga Katoliko ug ang mga Protestante nakigbahin sa bukas-sa-tanan, walay-pili nga pagpamatay sa isigka-magtutuo ingon man niadtong membro sa ubang mga relihiyon. Dili pa dugay, dihay nahitabong mabunoong away tali sa mga Katoliko ug mga Protestante sa Irlandia, tali sa relihiyosong mga pundok sa India, ug tali sa relihiyosong mga pundok sa kanhing Yugoslavia. Ang mga panid sa kasaysayan sa relihiyon namansahan usab sa dugo tungod sa pagkamartir sa libolibong matinumanong mga saksi ni Jehova.—Pinadayag 6:9, 10.
5. Unsang paghukom ang naghulat sa bakak nga relihiyon?
5 Kita makaapresyar gayod sa hustisya sa nagsingabot nga paglaglag ni Jehova sa Dakong Babilonya, ang tibuok kalibotang empiryo sa bakak nga relihiyon, uban sa mga tigpaluyo niini. Kining paglaglag gihubit sa Pinadayag 18:21, 24: “Usa ka kusgang anghel mialsa ug usa ka bato nga samag usa ka dakong galingang-bato ug nagtambog niini ngadto sa dagat, nga nag-ingon: ‘Sa ingon sa usa ka kusog nga paglabog ang dakong siyudad nga Babilonya igatambog, ug siya dili na gayod makaplagan pag-usab. Oo, diha kaniya nakaplagan ang dugo sa mga propeta ug sa mga balaan ug sa tanan kanila nga gipamatay ibabaw sa yuta.’”
6. (a) Kinsay mahimong sama sa tuod, ug ngano? (b) Unsa ang pasalig alang niadtong nahadlok kang Jehova?
6 Sa tukmang panahon, ang tanang mga kaaway sa pagkamatarong, ug kadtong magpabilin kanila, “mahisama gayod sa tuod.” Ang adlaw ni Jehova magadilaab taliwala kanila sama sa usa ka hudno. “Dili kini magbilin kanila ug gamot o sanga.” Nianang maong adlaw sa paghusay, ang linghod nga kabataan, o mga sanga, pakiglabotan nga makataronganon sumala sa paghukom ni Jehova sa ilang mga gamot, ang ilang mga ginikanan, nga maoy nagmatuto niining kabataana. Ang daotang mga ginikanan wala nay mga anak nga mopatunhay sa ilang daotang mga dalan. Apan kadtong adunay pagtuo sa mga saad sa Gingharian sa Diyos dili matarog. Busa ang Hebreohanon 12:28, 29 nagtambag: “Magpadayon kita sa pagbaton ug dili-takos nga kalulot, nga pinaagi niini kita sa dalawaton makahatag sa Diyos ug sagradong pag-alagad uban ang diyosnong kahadlok ug kalisang. Kay ang atong Diyos maoy usa usab ka nagaut-ot nga kalayo.”
Mapintas ba nga Diyos si Jehova?
7. Sa unsang paagi ang gugma ni Jehova nalangkit sa iyang paghukom?
7 Kini ba nagpasabot nga si Jehova maoy usa ka mapintas, mapanimaslong Diyos? Dili gayod! Diha sa 1 Juan 4:8, ang apostol nagpahayag sa paninugdang nga kamatuoran: “Ang Diyos gugma.” Dayon, sa bersikulo 16 dugang niya kining gipasiugda, nga nag-ingon: “Ang Diyos gugma, ug siya nga nagapabilin diha sa gugma nagapabilin nga kahiusa sa Diyos ug ang Diyos nagapabilin nga kahiusa kaniya.” Maoy tungod sa iyang gugma sa katawhan nga si Jehova nagtinguha sa paghinlo niining yutaa sa tanang pagkadaotan. Ang atong mahigugmaon, maluloy-ong Diyos nagpahayag: “Ingon nga ako buhi, . . . ako walay kalipay sa kamatayon sa tawong daotan, apan nga motalikod ang daotan gikan sa iyang dalan ug mabuhi. Bumiya kamo, bumiya kamo gikan sa inyong daotan nga mga dalan, kay ngano man nga magpakamatay kamo?”—Ezekiel 33:11.
8. Sa unsang paagi gipasiugda ni Juan ang gugma, apan nagpakita usab sa iyang kaugalingon ingong Anak sa Dalugdog?
8 Mas subsob si Juan sa paghisgot sa a·gaʹpe, ang may prinsipyong gugma, kay sa ubang tulo ka magsusulat sa Ebanghelyo nga tingubon, apan diha sa Marcos 3:17, si Juan mismo gihubit ingong ‘Anak sa Dalugdog.’ Pinaagi sa pagkadinasig ni Jehova nga kining Anak sa Dalugdog nagsulat sa mahukmanong mga mensahe sa kataposang basahon sa Bibliya, ang Pinadayag, nga naghulagway kang Jehova ingong ang Diyos nga nagapahamtang ug hustisya. Kining basahona puno sa mahukmanong mga kapahayagan, sama sa “ang dakong pug-anan sa bino sa kasuko sa Diyos,” “ang pito ka panaksan sa kasuko sa Diyos,” ug “ang kasuko sa kapungot sa Diyos nga Labing-Gamhanan.”—Pinadayag 14:19; 16:1; 19:15.
9. Unsang mga ekspresyon ang gihimo ni Jesus bahin sa mga paghukom ni Jehova, ug sa unsang paagi nangatuman ang iyang mga tagna?
9 Ang atong Ginoong Jesu-Kristo, nga mao “ang larawan sa dili-makita nga Diyos,” maisogong nagpahayag sa mga paghukom ni Jehova samtang dinhi pa sa yuta. (Colosas 1:15) Pananglitan, adunay pito ka kaalaotan sa Mateo kapitulo 23 nga prangka niyang gipahayag batok sa relihiyosong mga salingkapaw sa iyang adlaw. Iyang gitapos kadtong matunglohon nga paghukom pinaagi niining mga pulonga: “Jerusalem, Jerusalem, ang magpapatay sa mga propeta ug magbabato niadtong mga gipadala kaniya,—pagkasubsob nga buot kong tigomon ang imong mga anak, sa paagi nga ang usa ka himungaan nagatigom sa iyang mga piso ilalom sa iyang mga pako! Apan dili kamo buot niini. Tan-awa! Ang inyong balay gibiyaan nganha kaninyo.” Katloan-ug-pito ka tuig sa ulahi, ang paghukom gipahinabo sa Romanong kasundalohan ubos ni Heneral Tito. Usa kadto ka makalilisang nga adlaw, matagnaon sa butang nga mahimong ang labing makapukawg-kahadlok nga adlaw sa tanang tawhanong kasinatian—ang adlaw ni Jehova, nga sa dili madugay moabot na.
“Ang Adlaw” Mosubang
10. Sa unsang paagi ang “adlaw sa pagkamatarong” magdalag kalipay sa katawhan sa Diyos?
10 Gipahibalo ni Jehova nga adunay mga makalabang-buhi sa iyang adlaw. Iya kining gihisgotan sa Malakias 4:2, nga nagaingon: “Kaninyo nga may kahadlok sa akong ngalan ang adlaw sa pagkamatarong mosubang, nga adunay kaluwasan sa iyang mga pako.” Kanang maong adlaw sa pagkamatarong walay lain kondili si Jesu-Kristo mismo. Siya mao ang espirituwal nga “kahayag sa kalibotan.” (Juan 8:12) Sa unsang paagi siya mosubang? Siya mosubang nga may pagkaayo sa iyang mga pako—una ang espirituwal nga pagkaayo, nga mahimo natong masinatian bisan karon, ug dayon, sa umaabot nga bag-ong kalibotan, ang pisikal nga pagkaayo sa katawhan sa tanang kanasoran. (Mateo 4:23; Pinadayag 22:1, 2) Sa mahulagwayon, ingon sa gisulti ni Malakias, ang mga nangaayo “mangadto ug mokahig sa yuta sama sa pinatambok nga mga nating baka” nga bag-o lang nakagawas gikan sa kuwadra. Pagkadakong kalipay usab ang maeksperyensiyahan sa mga binanhaw nga gipamangon nga may paglaom nga makabaton ug tawhanong kahingpitan!
11, 12. (a) Unsang sangpotanan ang nagahulat sa daotan? (b) Sa unsang paagi ang katawhan sa Diyos ‘magatamak sa mga daotan’?
11 Apan, komosta ang mga daotan? Sa Malakias 4:3, atong mabasa: “‘Inyong pagatamakan ang mga daotan, kay sila mangahimong abo sa ilalom sa mga lapalapa sa inyong mga tiil sa adlaw nga ako molihok,’ nagaingon si Jehova sa mga panon.” Samtang pagabantayan kadtong nahigugma kaniya, silhigan sa atong Manggugubat-nga-Diyos ang yuta sa daogdaogang mga kaaway, nga magapapha kanila. Si Satanas ug ang iyang mga demonyo mapugngan na unya.—Salmo 145:20; Pinadayag 20:1-3.
12 Ang katawhan sa Diyos dili makigbahin sa paglaglag sa daotan. Nan, sa unsang paagi nila ‘tamakan ang mga daotan’? Kini ilang himoon sa mahulagwayong paagi pinaagi sa pagpakig-ambit sa dakong selebrasyon sa kadaogan. Ang Exodo 15:1-21 naghubit sa maong selebrasyon. Misunod kini sa pagkalaglag ni Paraon ug sa iyang kasundalohan sa Pulang Dagat. Sa katumanan sa Isaias 25:3-9, ang pagkawagtang sa “mga daogdaogan” pagasundan ug kombira sa kadaogan nga naglangkit sa saad sa Diyos: “Sa pagkatinuod iyang pagalamyon ang kamatayon sa walay kataposan, ug ang Soberano Ginoong Jehova magapahid gayod sa mga luha sa tanang mga nawong. Ug ang kaulaw sa iyang katawhan pagakuhaon niya gikan sa tibuok yuta, kay si Jehova mismo ang nagsulti niini. Ug niadtong adlawa ang usa magaingon: ‘Tan-awa! Kini mao ang atong Diyos. . . . Mao kini si Jehova. Kita nanaglaom kaniya. Magmaya ug maglipay kita diha sa iyang kaluwasan.’” Niining maong kalipay, walay pagpanimalos o pagpasigarbo, apan kalipay sa pagkakita nga ang ngalan ni Jehova nabalaan ug ang yuta nahinloan alang sa malinawong puy-anan sa usa ka nahiusang katawhan.
Usa ka Dakong Edukasyonal nga Programa
13. Unsang edukasyon ang mahitabo diha sa “bag-ong yuta”?
13 Sa Malakias 4:4, ang mga Hudiyo gitambagan sa “paghinumdom . . . sa kasugoan ni Moises.” Busa karon kita kinahanglang mosunod “sa kasugoan sa Kristo,” sumala sa gihisgotan sa Galacia 6:2. Ang mga makalabang-buhi sa Armageddon sa walay duhaduha pagahatagan ug dugang mga instruksiyon pinasukad niini, ug tingali kini isulat diha sa “mga linukot nga basahon” sa Pinadayag 20:12 nga pagabuksan sa panahon sa pagkabanhaw. Pagkadakong adlaw unya kana samtang ang mga patay nga binanhaw pagatudloan sa pagsunod sa paagi-sa-kinabuhi sa “bag-ong yuta”!—Pinadayag 21:1.
14, 15. (a) Sa unsang paagi nailhan ang modernong-adlawng Elias? (b) Unsang responsabilidad ang ginatuman sa Elias nga matang?
14 Kana maoy sumpay unya sa edukasyonal nga buluhaton nga gihisgotan ni Jehova, sumala sa natala sa Malakias 4:5: “Tan-awa! Ipadala ko kaninyo si Elias ang manalagna sa dili pa moabot ang dako ug makapukawg-kahadlok nga adlaw ni Jehova.” Kinsa kanang modernong Elias? Ingon sa gipakita sa Mateo 16:27, 28, sa paghisgot sa iyang “pag-abot diha sa iyang gingharian,” si Jesus nag-ingon: “Ang Anak sa tawo gikatinong moabot diha sa himaya sa iyang Amahan uban sa iyang mga anghel, ug unya bayaran niya ang matag usa sumala sa iyang panggawi.” Unom ka adlaw sa ulahi, sa ibabaw sa usa ka bukid uban ni Pedro, Santiago, ug Juan, “nausab ang iyang hitsura atubangan kanila, ug misidlak ang iyang nawong ingon sa adlaw, ug ang iyang panggawas nga mga bisti misilaw ingon sa kahayag.” Nag-inusara ba siya niining maong panan-awon? Wala, tungod kay “tan-awa! mipakita kanila si Moises ug si Elias, nga nakigkabildo kaniya.”—Mateo 17:2, 3.
15 Unsay gipasabot niini? Kini nagpunting kang Jesus ingong ang gitagnang Dakong Moises sa panahon sa iyang pag-abot alang sa paghukom. (Deuteronomio 18:18, 19; Buhat 3:19-23) Sa maong panahon makig-uban siya sa modernong Elias aron sa pagpalampos sa usa ka hinungdanong buluhaton, nga mao ang pagwali niining maayong balita sa Gingharian sa tibuok yuta una pa mohampak ang dako ug makapukawg-kahadlok nga adlaw ni Jehova. Sa paghubit sa buluhaton niining maong “Elias,” ang Malakias 4:6 nagpahayag: “Iyang pabalikon ang kasingkasing sa mga amahan ngadto sa mga anak lalaki, ug ang kasingkasing sa mga anak lalaki ngadto sa mga amahan; aron dili ako moanhi ug sa pagkatinuod hampakon ang yuta pinaagi sa pagpahamtang niini sa kalaglagan.” Busa si “Elias” gipaila ingong ang matinumanon ug maalamong ulipon nga matang sa dinihogang mga Kristohanon sa yuta, nga maoy gipiyalan sa Agalon, si Jesus, sa Iyang tanang kabtangan. Kini naglakip sa pagtagana sa panimalay sa pagtuo sa gikinahanglang espirituwal nga “pagkaon sa hustong panahon.”—Mateo 24:45, 46.
16. Unsang malipayong mga resulta ang napatungha sa buluhaton sa Elias nga matang?
16 Sa tibuok kalibotan karon, atong makita ang malipayong resulta nianang maong programa sa pagpakaon. Ang magasing Bantayanang Torre, nga ang gidaghanon sa pagpatik mokabat ug 16,100,000 matag isyu diha sa 120 ka pinulongan, nga 97 niini dungang gipatik, nagpabaha sa yuta uban niining “maayong balita sa gingharian.” (Mateo 24:14) Ang ubang publikasyon sa daghang pinulongan gigamit sa lainlaing bahin sa pagwali ug pagtudlo nga buluhaton sa mga Saksi ni Jehova. Ang Elias nga matang, ang matinumanon ug maalamong ulipon, igmat sa paghatag ug dagayang tagana alang sa tanang “mahunahunaon sa ilang espirituwal nga panginahanglan.” (Mateo 5:3) Dugang pa, kadtong midawat niining paglaom sa Gingharian ug milihok uyon niana nabugkos sa tibuok kalibotang panaghiusa. Naglakip kini sa dakong panon “gikan sa tanang kanasoran ug mga tribo ug katawhan ug mga dila.” (Pinadayag 7:9) Sa dihang matapos na kining buluhatona sa sukod nga gikinahanglan ni Jehova, nan ang kataposan moabot sa iyang dako ug makapukawg-kahadlok nga adlaw.
17. Kanus-a magsugod ang makapukawg-kahadlok nga adlaw ni Jehova?
17 Kanus-a ba gayod kanang makapukawg-kahadlok nga adlaw kalit nga magsugod? Si apostol Pablo nagtubag: “Ang adlaw ni Jehova moabot nga sama gayod sa usa ka kawatan diha sa kagabhion. Sa diha nga sila magaingon [tingali sa usa ka talagsaong paagi]: ‘Kalinaw ug kasegurohan!’ niana ang kalit nga kalaglagan modangat dihadiha kanila ingon sa pag-ul-ol sa kasakit sa usa ka babayeng mabdos; ug sila dili gayod makaikyas.”—1 Tesalonica 5:2, 3.
18, 19. (a) Sa unsang paagi ang “kalinaw ug kasegurohan” iahayag? (b) Kanus-a makakaplag ug kahupayan ang katawhan ni Jehova?
18 Kinsa kining “sila” niining tagnaa? Sila mao ang politikal nga mga lider nga nangangkong makatukod ug usa ka nahiusang bag-ong kahikayan gikan sa nagkabahinbahin nga mga elemento niining mapintas nga kalibotan. Ang ilang gipasibantog nga bunga, ang Liga sa Kanasoran ug ang Hiniusang Kanasoran, napakyas sa pagtukod niini. Ingon sa gitagna sa manalagna ni Jehova, bisan karon sila “nagaingon, ‘Adunay pakigdait! Adunay pakigdait!’ sa dihang walay pakigdait.”—Jeremias 6:14; 8:11; 14:13-16.
19 Kasamtangan, pagalahutayon sa katawhan ni Jehova ang mga pagpit-os ug mga paglutos niining walay-diyos nga kalibotan. Apan sa dili madugay, sumala sa giingon sa 2 Tesalonica 1:7, 8, sila makakitag kahupayan “inigpadayag sa Ginoong Jesus gikan sa langit uban sa iyang gamhanang mga anghel sa nagadilaab nga kalayo, sa dihang siya magapanimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus.”
20. (a) Unsay gipanagna ni Sofonias ug Habacuc bahin sa adlaw nga ‘nagdilaab samag hudno’? (b) Unsang tambag ug pagdasig ang gihatag niining mga tagnaa?
20 Unsa na ka duol kana? Daghan kanato ang naghulat sa dugayng panahon. Kasamtangan, dakong gidaghanon sa mga maaghop nga makalabang-buhi ang nagatubag sa panawagan nga makaplagan sa Sofonias 2:2, 3: “Pangitaa si Jehova . . . Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” Dayon, ang Sofonias 3:8 naundan sa tambag: “‘Busa paghulat kamo kanako,’ nagaingon si Jehova, ‘hangtod sa adlaw nga ako motindog alang sa tukbonon, kay ang akong hudisyal nga paghukom mao ang pagtigom sa mga nasod, aron pagatigomon ko ang mga gingharian, aron ibubo ko sa ibabaw nila ang akong kayugot, ang tanan nakong nagdilaab nga kasuko; kay ang tibuok yuta pagalamyon pinaagi sa kalayo sa akong pangabugho.’” Ang kataposan haduol na! Si Jehova nasayod sa maong adlaw ug takna ug dili mag-usab sa iyang orasan. Pasagdi nga kita molahutay nga mapailobon. “Kay ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan kini malangan, paabuta kini; kay kini moabot gayod. Kini dili magalangan.” (Habacuc 2:3) Ang makapukawg-kahadlok nga adlaw ni Jehova kusog nga nagkahiduol. Hinumdomi, kanang adlawa dili maglangan!
Agig Repaso:
◻ Unsay mahitabo sa mga magmamando ug sa ordinaryong mga tawo sa makapukawg-kahadlok nga adlaw ni Jehova?
◻ Unsang matanga sa Diyos si Jehova?
◻ Usang matanga sa edukasyon ang gihubit alang sa katawhan sa Diyos?
◻ Sa unsang paagi kita gitambagan sa mga manalagna sa Diyos tungod sa pagkaduol sa kataposan?
[Hulagway sa panid 21]
Panahon sa Inkwisisyong Espanyol daghan ang napugos sa pagkakombirtir ngadto sa Katolisismo
[Credit Line]
The Complete Encyclopedia of Illustration/J. G. Heck