Mga Pagtulon-an Gikan sa Kasulatan: Malakias 1:1–4:6.

Ang Matuod nga Ginoo Miabot sa Paghukom

“WALAY kapuslanan nga alagaron ang Diyos.” (Malakias 3:14) Ang maong pagduhaduha gipatugbaw sa kaugalingong katawhan sa Diyos sa dihang si Malakias nanagna sa ikalimang siglo W.K.P. Ngano? Tungod kay ang makapasubong kahimtang naglungtad sa Juda, ilabina taliwala sa mga saserdote. Ang mahakogong ganansiya mao ang ilang pangunang tumong. Diha sa direkta ug kusganong paagi, gibutyag ni Malakias kadtong nagpakaaron-ingnong relihiyosong mga pangulo ug nagpasidaan kanila nga ang matuod nga Diyos moabot sa paghukom.​—Malakias 1:6-8; 2:6-9; 3:1.

Ang panagna ni Malakias adunay katumanan sa atong adlaw. Busa, maayo nga atong tagdon ang mga pagtulon-an nga gitagana niini.

Pagpasipala sa Ngalan sa Diyos

Si Jehova nagalaom sa iyang katawhan nga ilang ihalad niya ang ilang labing maayo. Ang Diyos mao ang unang nagpakita sa iyang gugma ngadto sa iyang katawhan. Bisan pa niana, ang mga saserdote nagpasipala sa iyang ngalan pinaagig pagdawat gikan sa katawhan sa ilang mga halad sa buta, masakiton, ug piang nga mga hayop. Si Jehova walay kalipay sa nag-alagad-sa-kaugalingong mga saserdote o sa daot nga mga halad diha sa ilang mga kamot. Apan walay sapayan kon unsay ilang gihimo, ang kang Jehova “nga ngalan makalilisang taliwala sa mga nasod.”​—1:1-14.

Kadtong si kinsa maoy mga magtutudlo adunay bug-at nga responsabilidad. (Santiago 3:1) Ang mga saserdote “nagpahinabo sa daghan nga mapandol sa kasugoan.” Sa unsang paagi? Pinaagi sa pagkapakyas sa pagtudlo sa katawhan sa kasugoan sa Diyos, ug pinaagig pagpakita sa pagdapigdapig. Si Jehova adunay katarongang masuko kanila, “kay sa mga ngabil sa saserdote anaa unta ang kahibalo, ug ang kasugoan mao ang ginapangita sa katawhan gikan sa iyang baba.”​—2:1-9.

Dili ipakawaybili ni Jehova kadtong wala magpakitag pagtahod sa kahikayan sa kaminyoon. Sukwahi sa kasugoan sa Diyos, ang mga lalaki sa Juda mikuhag langyawng mga asawa. (Deuteronomio 7:3, 4) Sila milihok nga may pagkamaluibon sa mga asawa sa ilang pagkabatan-on pinaagi sa pagbulag kanila. Si Jehova “nagadumot sa panagbulag,” si Malakias nagpasidaan.​—2:10-17.

Ang Paghukom ug ang Pagputli

Dili tugotan ni Jehova nga magpadayon sa walay kataposan ang pagkadaotan. “Ang matuod nga Ginoo” moabot sa iyang templo, uban “ang mensahero sa tugon.” Iyang pagaputlion ug hinloan ang mga anak ni Levi. Si Jehova mahimong matulin nga saksi batok sa mga lumayan, sa mga mananapaw, niadtong kinsa nagapanumpa sa kabakakan, sa mga tikasan, ug sa mga malupigon.​—3:1-5.

Kadtong nagahawid sa ilang mga halad gikan kang Jehova nagpakubos sa ilang kaugalingon. Si Jehova dili mabalhinon. Kon ang mga masukihon nga katawhan mobalik kaniya, siya mobalik nga may kaluoy kanila. Sila nangawat sa Diyos pinaagi sa dili paghatag sa mga ikapulo ug sa mga amot. Apan kon sila magdala sa ilang mga ikapulo, si Jehova misaad sa panalangin “hangtod nga wala nay kawalad-on.” Ilang masinatian ang dili-mapakyas nga bunga niini.​—3:6-12.

Ang mga mata ni Jehova anaa sa iyang katawhan. Si Jehova adunay pakiglalis batok kanilang nanagsultig magahing mga pulong batok kaniya. Sa kasukwahi, siya nagpatalinghog gayod niadtong may kahadlok kaniya. “Ang basahon sa handumanan” igasulat alang “niadtong naghunahuna sa iyang ngalan.” Ang iyang katawhan makakita sa kalainan tali sa matarong ug sa daotan.​—3:13-18.

Ang Adlaw ni Jehova Taliabot!

Ang adlaw ni Jehova nagkahulogan sa bug-os nga kalaglagan sa mga daotan. Ang adlaw ni Jehova taliabot, ug ang daotan pagaut-oton sama sa tuod sa nagdilaab nga hudno. Sila maugdaw gayod, nga dili magbilin kanila ‘bisan gamot ni sanga.’ Apan alang kanilang may kahadlok sa ngalan ni Jehova, ilang matagamtam ang mga kaayohan sa “adlaw sa pagkamatarong.” Sa dili pa moabot kining makalilisang nga adlaw, si Jehova magapadala kang Elias nga propeta aron himoon ang buluhaton sa pagpasig-uli.​—4:1-6.

Mga pagtulon-an karong adlawa: Kon bahin sa pagsimba, si Jehova nanginahanglan nga ihalad sa iyang katawhan ang ilang labing maayo. (Itandi ang Mateo 22:37, 38.) Ang mga magtutudlo sa Pulong sa Diyos adunay responsabilidad nga motudlog maayo ug pangunahan ang uban sa matuod nga pagsimba. Atong angayng hinumdoman nga ang mga mata sa Diyos sa hustisya anaa sa ibabaw kanilang napakyas sa pagpakitag hustong pagtahod sa kaminyoon ug niadtong kinsa nagabuhat sa pagkadaotan. Hinaot kita magpasakop nga mapainubsanon sa mga paagi sa pagputli ug paghinlo sa matuod nga Diyos samtang akong gikahinaman ang pagpaabot “sa taliabot nga dako ug makalilisang nga adlaw ni Jehova”!

[Kahon sa panid 30]

MGA TEKSTO SA BIBLIYA GISUSI

o 1:10—Ang hakog, gutom-sa-kuwartang mga saserdote nag-alagad sa personal nga ganansiya. Sila nangayog bayad sa labing sayon nga serbisyo sa templo, sama sa pagsira sa mga pultahan ug pagdagkot sa mga kalayo sa halaran. Dili ikatingala nga si Jehova ‘wala mahimuot sa mga halad sa ilang mga kamot’!

o 1:13—Ang nawad-an sa pagtuong mga saserdote naglantaw sa mga halad ingong kapoy nga mga seremonyas, usa ka palas-anon. Sila nangusmo, o nagtamay, sa sagradong mga butang ni Jehova. Dili gayod nato angayng tugotang “ang mga nating baka sa atong mga ngabil” igahalad ingong pormalidad lamang!—Oseas 14:2; Hebreohanon 13:15.

o 2:13—Daghang Hudiyong mga bana nga nakigbulag sa mga asawa sa ilang pagkabatan-on, tingali aron makapangasawag usab sa mga batan-on paganong mga babaye. Ang halaran ni Jehova napuno sa mga luha​—dayag mga luha niadtong gibiyaang mga asawa nga nangadto sa sangtuwaryo aron ipatugbaw ang ilang mga kaguol atubangan sa Diyos.​—Malakias 2:11, 14, 16.

o 3:1—“Ang matuod nga Ginoo” mao si Jehova nga Diyos, ug “ang mensahero sa tugon” mao si Jesu-Kristo. Ang unang katumanan sa panagna nahitabo sa gihinloan ni Jesus ang templo. (Marcos 11:15-17) Kini maoy tulo ug tunga ka tuig human nga gidihogan siya ingong Tinudlong-Hari. Sa susama, tulo ug tunga ka tuig human si Jesus maentrono ingong Hari niadtong tinghunlak sa 1914, siya miuban kang Jehova sa espirituwal nga templo ug nakaplagan nga ang katawhan sa Diyos nanginahanglan sa pagputli ug paghinlo.

o 3:2,3—Ang karaang paagi sa pagputli nagkinahanglag panahon. Busa, ang magpuputli kanunayng “molingkod,” magpaabot hangtod nga ang likidong metal moaninag sama sa gipasinaw pag-ayong salamin nga makita ang iyang larawan diha niana. Sa susama, si Jehova padayong nagputli sa iyang katawhan karong adlawa, nga naghawan sa dili-hinlo nga mga pagtulon-an ug mga tulomanon. Kini mitabang nila aron ipaaninag nga bug-os ang iyang larawan.​—Efeso 5:1.

o 4:2—Kini mao ang kahubitan sa umalabot nga mga panalangin nga matagamtam niadtong kinsa adunay kahadlok sa ngalan sa Diyos. Sila adunay paglaom nga iladlad ang ilang kaugalingon sa kasanag sa pabor sa Diyos sa dihang ang pisikal, mental, ug emosyonal nga mga kasakitan nga mihampak sa tawhanong pamilya pagahanawon na.​—Pinadayag 21:3, 4.

o 4:5—Ang propetang Elias nabuhi mga 500 nga katuigan ang milabay sa wala pa ihatag kining tagnaa. Sa unang siglo K.P., gipaila ni Jesu-Kristo nga si Juan Bautista mao ang gitagnang katumbas ni Elias. (Mateo 11:12-14; Marcos 9:11-13) Bisan pa niana, si “Elias” maoy mag-uuna sa “adlaw ni Jehova,” nga nagpaila sa dugang katumanan niining panahona sa “presensiya” ni Kristo.—2 Tesalonica 2:1, 2.

[Hulagway sa panid 31]

Panahon sa iyang ministeryo sa yuta, gihinloan ni Jesus ang templo. Sa 1918 miuban siya kang Jehova ngadto sa iyang espirituwal nga templo sa paghinlo sa katawhan sa Diyos