Ang Makapukawg-Kahadlok nga Adlaw ni Jehova Haduol Na
“Ang usa ka basahon sa handomanan gisulat sa atubangan niya alang niadtong may kahadlok kang Jehova ug alang niadtong nanagpalandong sa iyang ngalan.”—MALAKIAS 3:16.
1, 2. Bahin sa unsang makapukawg-kahadlok nga adlaw nga nagpasidaan si Malakias?
MAKAPUKAWG-KAHADLOK! Samtang mibanagbanag and adlaw niadtong Agosto 6, 1945, usa ka dakong siyudad ang kalit nga napayhag. Mga 80,000 ang nangamatay! Tinagpulo ka linibo ang nasamdan nga ikamatay! Nag-ulbo ang kalayo! Ang bomba nukleyar ang nagpahinabo niining dakong kalaglagan. Unsay lakat sa mga Saksi ni Jehova niadtong dakong katalagman? Dihay usa lamang ka Saksi sa Hiroshima—nga nakulong sa mapanalipdanong bungbong sa bilanggoan tungod sa iyang Kristohanong integridad. Ang bilanggoan nagun-ob, apan ang atong igsoon wala maunsa. Sama sa iyang giingon, siya gipagula sa bomba atomika gikan sa bilanggoan—tingali ang bugtong maayong butang nga nahimo sa bomba.
2 Bisag makahahadlok kadto nga pagbuto sa bomba, wala ra kadto sa kumingking kon itandi sa “dako ug makapukawg-kahadlok nga adlaw ni Jehova” nga anaa sa unahan. (Malakias 4:5) Aw, oo, dihay makapukawg-kahadlok nga mga adlaw sa nangagi, apan kining adlaw ni Jehova molabaw niadtong tanan.—Marcos 13:19.
3. Unsay kalainan ang mamatikdan tali sa “tanang unod” ug sa pamilya ni Noe nga miagak sa Lunop?
3 Sa mga adlaw ni Noe “ang tanang unod nagdunot sa ilang dalan sa ibabaw sa yuta,” ug ang Diyos miingon: “Ang yuta napuno sa kapintasan tungod kanila; ug ania karon pagalaglagon ko sila uban sa yuta.” (Genesis 6:12, 13) Ingon sa narekord sa Mateo 24:39, si Jesus nag-ingon nga ang mga tawo “wala magmatikod hangtod nga ang baha miabot ug mibanlas kanilang tanan.” Apan ang matinumanong si Noe, nga “usa ka magwawali sa pagkamatarong,” uban sa iyang mahinadlokon-sa-Diyos nga pamilya, naluwas sa Lunop.—2 Pedro 2:5.
4. Unsang pasidaang panig-ingnan ang gitagana sa Sodoma ug Gomora?
4 “Mao usab,” ang Judas 7 nag-asoy, “ang Sodoma ug Gomora ug ang mga siyudad palibot kanila, human nga sila . . . nakighilawas nga mapatuyangon ug nag-agap sa unod alang sa dili-kinaiyanhong gamit, gibutang atubangan kanato ingon nga usa ka pasidaang panig-ingnan pinaagig pagkahiagom sa hudisyal nga silot sa walay-kataposang kalayo.” Kadtong dili-diyosnong katawhan nalaglag tungod sa ilang makaluod nga estilo-sa-kinabuhi. Kinahanglang magbantay ang hilig-sa-seksong mga komunidad niining modernong kalibotan! Apan, matikdi nga ang mahinadlokon-sa-Diyos nga si Lot ug iyang mga anak nga babaye giluwas nga buhi sa maong katalagman, sa ingon ang mga magsisimba ni Jehova pagapanalipdan unya sa kusog-nagsingabot nga dakong kasakitan.—2 Pedro 2:6-9.
5. Unsay atong makat-onan gikan sa mga paghukom nga gipahamtang diha sa Jerusalem?
5 Nan tagda ang pasidaang panig-ingnan nga gitagana sa dihang gigamit ni Jehova ang misulong nga kasundalohan sa paglaglag sa Jerusalem, ang maanindot nga siyudad nga kas-a gilantawng “ang kalipay sa tibuok nga yuta.” (Salmo 48:2) Kining mangilngig nga mga hitabo nahitabo, una niadtong 607 W.K.P. ug usab niadtong 70 K.P., tungod kay gitalikdan sa nag-angkong katawhan sa Diyos ang matuod nga pagsimba. Makalilipay, ang maunongong mga alagad ni Jehova naluwas. Ang katalagman niadtong 70 K.P. (gihulagway sa ubos) gihubit nga “usa ka kasakitan ingon nianang wala pa mahitabo sukad sa sinugdan sa kalalangan nga gilalang sa Diyos hangtod niana nga panahon.” Kini bug-os nga nagpapas sa apostatang Hudiyohanong sistema sa mga butang, ug dayag nianang bahina kini “dili na mahitabo pag-usab.” (Marcos 13:19) Apan bisan kining pagpahamtang sa diyosnong paghukom maoy usa ka landong lamang sa “dakong kasakitan” nga karon naghulga sa tibuok kalibotang sistema sa mga butang.—Pinadayag 7:14.
6. Nganong gitugotan ni Jehova ang mga katalagman?
6 Nganong tugotan sa Diyos ang grabeng mga katalagman, nga mopatay ug daghan kaayong kinabuhi? Sa mga kaso ni Noe, sa Sodoma ug Gomora, ug sa Jerusalem, si Jehova nagpahamtang ug paghukom diha niadtong nagdunot sa ilang dalan ibabaw sa yuta, naghugaw niining matahom nga planeta pinaagi sa literal nga polusyon ug pag-us-os sa moral, ug naghimong apostata, o nagsalikway, sa matuod nga pagsimba. Karong adlawa nagbarog kita sa ngilit sa usa ka pagpahamtang sa paghukom nga molamoy sa tibuok kalibotan.—2 Tesalonica 1:6-9.
“Sa Ulahing mga Adlaw”
7. (a) Bahin sa unsa nga ang karaan balaang mga paghukom matagnaon? (b) Unsang mahimayaong palaaboton ang anaa sa unahan?
7 Kadtong mga kalaglagan sa karaang mga panahon maoy matagnaon sa makapukawg-kahadlok nga dakong kasakitan nga gihubit sa 2 Pedro 3:3-13. Ang apostol miingon: “Kay hibaloi ninyo kini nga una, nga sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha.” Unya, nagpunting sa adlaw ni Noe, si Pedro nagsulat: “Ang kalibotan niadtong panahona nakaagom sa kalaglagan sa dihang gilunopan kini sa tubig. Apan pinaagi sa mao ra nga pulong ang mga langit ug ang yuta nga mao karon gikatagana alang sa kalayo ug gikagahin sa adlaw sa paghukom ug sa kalaglagan sa mga tawong dili-diyosnon.” Human nianang kinadak-an sa tanang kasakitan, ang dugay-nang-gipaabot nga pagmando sa Gingharian sa Mesiyas magdalag bag-ong mga bahin—“bag-ong mga langit ug usa ka bag-ong yuta . . . , ug niini nila magapuyo ang pagkamatarong.” Pagkamakapalipay nga palaaboton!
8. Sa unsang paagi ang mga hitabo sa kalibotan nagpaingon ngadto sa kinapungkayan?
8 Sa atong ika-20ng siglo, ang mga hitabo sa kalibotan nagpaingon ngadto sa kinapungkayan. Bisan tuod ang pagkalaglag sa Hiroshima dili mao ang adlaw sa panudya sa Diyos, kini mahimong lakip sa “makalilisang nga mga talan-awon” nga gitagna ni Jesus sa panahon sa kataposan. (Lucas 21:11) Kini nagpasugod ug nukleyar nga hulga nga nagbitay gihapon samag panganod sa bagyo ibabaw sa katawhan. Busa, usa ka ulohan sa balita sa The New York Times sa Nobyembre 29, 1993, mabasa: “Ang mga Pusil Tingalig Tayaon Na Apan ang Nukleyar nga mga Armas Sinaw Gihapon Kaayo.” Kasamtangan, ang mga gubat tali sa mga nasod, rasa, ug tribo nagpadayon sa pag-ani ug makalilisang nga bunga. Sa miaging mga gubat ang kinabag-an sa mga nangamatay maoy mga sundalo. Karong adlawa, 80 porsiento sa nangamatay sa gubat gikataho nga mga sibilyan, dugang pa sa minilyon nga nangalagiw sa ilang yutang natawhan ingong mga kagiw.
9. Sa unsang paagi ang mga lider sa relihiyon nagpasundayag nga nakighigala sa kalibotan?
9 Ang mga lider sa relihiyon sagad nagpakita, ug nagpadayon sa pagpakita, ug “pakighigala sa kalibotan” pinaagi sa aktibong pagpakiglangkit sa mga gubat ug sa madugoong mga rebolusyon. (Santiago 4:4) Ang uban nakigkonsabo sa hakog impluwensiyal nga mga tawo sa kalibotan sa negosyo samtang pinakyawng nagagama kinig mga armas ug nagpamaligya ug nagpakaylap sa paggamit ug mga droga. Pananglitan, sa pagtaho sa pagpatay sa usa ka lider sa sindikato sa Habagatang Amerika, ang The New York Times nag-ingon: “Nagtago sa iyang palakaw sa droga luyo sa mga pangangkon nga legal nga nakabaton ug bahandi sa negosyo ug ilado nga usa ka manghahatag, aduna siyay kaugalingong programa sa radyo ug kanunayng kauban sa mga paring Romano Katoliko.” Ang The Wall Street Journal nagtaho nga dugang sa pagdaot sa mga kinabuhi sa minilyon nga nangahimong mga giyanon sa droga, kini nga lider sa sindikato mismo nagsugo sa pagpatay sa mga linibo. Ang The Times sa London nag-ingon: “Ang mga mamumuno tigbayad kanunay ug espesyal nga Misa sa pagpasalamat . . . sa samang higayon nga ang misa sa paglubong sa mga biktima gihimo sa laing dapit.” Pagkahilabihan ka daotan!
10. Sa unsang paagi lantawon nato ang nagakalisod nga mga kahimtang sa kalibotan?
10 Kinsay nasayod sa kadaot nga ipahinabo pa sa gidasig-sa-demonyong mga tawo niining yutaa? Sama sa giingon sa 1 Juan 5:19, “ang tibuok kalibotan nahimutang diha sa gahom sa tuman-kadaotang usa,” si Satanas nga Yawa. Karong adlawa “alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:12) Makapalipay, hinunoa, ang Roma 10:13 nagpasalig kanato nga ang “tanang nanagtawag sa ngalan ni Jehova mamaluwas.”
Ang Diyos Haduol Nang Moabot sa Paghukom
11. Unsang mga kahimtang sa Israel ang nagpukaw sa tagna ni Malakias?
11 Kon bahin sa haduol nga umaabot sa katawhan, ang tagna ni Malakias nagpatin-aw kon unsa ang hapit nang mahitabo. Gitala ni Malakias ang hataas nga linya sa karaang Hebreohanong mga manalagna. Nasinati sa Israel ang pagkagun-ob sa Jerusalem niadtong 607 W.K.P. Apan 70 ka tuig sa ulahi si Jehova nagpakitag maluluy-on mahigugmaong-kalulot sa pagpasig-uli niadtong nasora ngadto sa yuta niini. Sulod sa usa ka gatos ka tuig, hinunoa, ang Israel sa makausa pa nahulog sa apostasiya ug pagkadaotan. Ang katawhan nagpasipala sa ngalan ni Jehova, nagsalikway sa iyang matarong nga kasugoan, ug naghugaw sa iyang templo pinaagi sa pagdalag buta, piang, ug masakitong mga hayop aron ihalad. Gibulagan nila ang mga asawa sa ilang pagkabatan-on aron sila makapangasawa ug langyawng mga babaye.—Malakias 1:6-8; 2:13-16.
12, 13. (a) Unsang pagputli ang gikinahanglan alang sa dinihogan saserdotehanong matang? (b) Sa unsang paagi ang dakong panon usab nakabatog kaayohan sa pagputli?
12 Usa ka pagputling buluhaton ang gikinahanglan. Kini gihubit sa Malakias 3:1-4. Sama sa karaang Israel, ang modernong-adlaw nga mga Saksi ni Jehova nagkinahanglan nga mahinloan, busa ang pagputling buluhaton nga gihubit ni Malakias mahimong ikapadapat ngadto kanila. Samtang talitapos na ang unang gubat sa kalibotan, ang pipila sa mga Estudyante sa Bibliya, nga maoy pagtawag niadto sa mga Saksi, wala maghupot ug malig-ong neyutralidad sa mga kalihokan sa kalibotan. Sa 1918, gipadala ni Jehova ang Iyang “mensahero sa pakigtugon,” si Kristo Jesus, ngadto sa Iyang espirituwal nga kahikayan sa templo sa paghinlo sa gamayng grupo sa Iyang mga magsisimba gikan sa kalibotanong mga hugaw. Sa matagnaon, si Jehova nangutana: “Kinsa ang makapabilin sa adlaw sa pag-anhi [sa mensahero], ug kinsa unya ang makabarog kon siya magpakita na? Kay siya sama sa kalayo sa magtutunaw ug sama sa sabon sa maglalaba. Ug siya gayod molingkod ingon sa magtutunaw ug mag-uulay sa salapi ug putlion gayod ang mga anak ni Levi [dinihogan saserdotehanong grupo]; ug ulayon gayod niya sila ingon sa pag-ulay sa bulawan ug sa salapi, ug sila dayag nga mahimong katawhan alang kang Jehova nga managtanyag ug halad nga gasa diha sa pagkamatarong.” Ingong naulay nga katawhan, mao gayod kanay ilang gihimo!
13 Ang maong dinihogan saserdotehanong grupo aduna lamay gidaghanon nga 144,000. (Pinadayag 7:4-8; 14:1, 3) Apan, komosta ang ubang dedikadong mga Kristohanon karong adlawa? Karon nagtubo ngadto sa minilyon, kini nagporma sa “usa ka dakong panon” nga kinahanglang pagahinloan usab sa kalibotanong mga dalan, ‘nga naglaba sa ilang mga taas-nga-bisti ug nagpaputi niini sa dugo sa Kordero.’ (Pinadayag 7:9, 14) Busa, pinaagi sa pagpasundayag ug pagtuo diha sa halad lukat sa Kordero, si Kristo Jesus, sila makahimo sa paghupot ug usa ka mahinlong baroganan atubangan kang Jehova. Sila gisaaran nga makalabang-buhi sa tibuok dakong kasakitan, ang makapukawg-kahadlok nga adlaw ni Jehova.—Sofonias 2:2, 3.
14. Unsang mga pulong ang angayng patalinghogan sa katawhan sa Diyos karong adlawa samtang padayon nilang ugmaron ang bag-ong personalidad?
14 Duyog sa saserdotehanong nahibilin, kining dakong panon kinahanglang mamati sa dugang nga mga pulong sa Diyos: “Ako moanha kaninyo aron sa paghukom, ug ako mahimong matulin nga saksi batok sa mga diwatahan, ug batok sa mga mananapaw, ug batok sa mga managpanumpa sa bakak, ug batok sa mga nagapanikas sa suhol sa usa ka sinuholan, sa balo nga babaye ug sa ilo nga batang lalaki, ug batok sa nanagsalikway sa dumuloong, samtang sila walay kahadlok kanako . . . Kay ako si Jehova; ako walay pagkabalhin.” (Malakias 3:5, 6) Dili, ang mga sukdanan ni Jehova dili mausab, busa sa pagkahadlok kang Jehova, ang iyang katawhan karon kinahanglang magsalikway sa idolatriya sa tanang matang ug kinahanglang magmatinud-anon, ug magmanggihatagon samtang sila magpadayon sa pag-ugmad sa Kristohanong personalidad.—Colosas 3:9-14.
15. (a) Unsang maluluy-ong pagdapit ang gipaabot ni Jehova? (b) Sa unsang paagi kalikayan nato ang “pagpangawat” kang Jehova?
15 Si Jehova nagpaabot sa pagdapit ngadto sa tanan nga mingtipas gikan sa iyang matarong nga mga dalan, nga nag-ingon: “Bumalik kamo kanako, ug ako mobalik nganha kaninyo.” Kon sila mangutana: “Sa unsang paagi kami mobalik?” siya motubag: “Kamo nagpangawat kanako.” Ug sa pagtubag sa dugang pangutana: “Sa unsang paagi kami nagpangawat kanimo?” si Jehova nag-ingon nga sila nagpangawat kaniya pinaagi sa dili pagdala sa ilang labing maayo ingong mga halad alang sa iyang pag-alagad sa templo. (Malakias 3:7, 8) Kay nahimong bahin sa katawhan ni Jehova, buot gayod natong mogahin sa kinamaayohang bahin sa atong mga kusog, mga katakos, ug materyal nga mga kabtangan alang sa pag-alagad kang Jehova. Sa ingon, imbes nga kawatan ang Diyos, kita ‘magpadayon sa pagpangita pag-una sa gingharian ug sa iyang pagkamatarong.’—Mateo 6:33.
16. Unsang pagdasig ang makaplagan nato sa Malakias 3:10-12?
16 Adunay dakong ganti alang sa tanang nagsalikway sa nagaalagad-sa-kaugalingon, materyalistikanhong mga paagi sa kalibotan, ingon sa gipakita sa Malakias 3:10-12: “‘Sulayi ninyo ako, palihog, niining bahina,’ nag-ingon si Jehova sa mga panon, ‘kon dili ba buksan ko kaninyo ang mga tamboanan sa mga langit ug buboan kamo sa panalangin sa pagkaagi nga wala na unyay dapit nga igong kabutangan sa pagdawat niini.’” Ngadto sa tanang mapabilhon, si Jehova nagsaad ug espirituwal nga kauswagan ug kadagaya. Siya midugang: “Ang tanang nasod magtawag kaninyo nga malipayon, kay kamo mismo mahimong yuta nga kahimut-anan.” Dili ba matuod kana taliwala sa minilyon sa mapasalamatong katawhan sa Diyos sa tibuok yuta karong adlawa?
Mga Maghuhupot sa Integridad Diha sa Basahon sa Kinabuhi
17-19. (a) Sa unsang paagi ang kagubot sa Rwanda nakaapektar sa atong mga igsoon didto? (b) Uban sa unsang pagtuo nagpadayon kining tanang matinumanon?
17 Niining puntoha, komentohan nato ang integridad sa atong mga igsoong lalaki ug babaye sa Rwanda. Sila kanunayng nagdala sa kinamaayohang espirituwal nga mga halad ngadto sa espirituwal nga balay sa pagsimba ni Jehova. Pananglitan, sa ilang “Balaang Pagtulon-an” Distritong Kombensiyon niadtong Disyembre 1993, ang ilang 2,080 ka magmamantala sa Gingharian miani ug kinatas-ang tumatambong nga 4,075. Dihay 230 ka bag-ong mga Saksi nga nabawtismohan, ug taliwala kanila, duolan sa 150 ang nagpatala sa pag-alagad nga oksilyare payunir sa nagsunod nga bulan.
18 Sa dihang ang etnikong pagdumot miulbo niadtong Abril 1994, labing menos 180 ka mga Saksi, lakip ang magtatan-aw sa siyudad sa Kigali, ang kaulohan, ug iyang tibuok banay, gipamatay. Ang unom ka maghuhubad sa sangang buhatan sa Watch Tower Society sa Kigali, nga ang upat kanila maoy Hutu ug ang duha maoy mga Tutsi, nagpadayon sa pagtrabaho sa daghang semana ubos sa grabeng mga paghulga, hangtod mikalagiw ang mga Tutsi, nga namatay lamang diha sa usa ka checkpoint. Sa kataposan, nagdala sa nahibilin sa ilang gamit nga kompiyuter, ang upat nga nahibilin mikalagiw ngadto sa Goma, sa Zaire, diin sila maunongong nagpadayon sa paghubad sa Ang Bantayanang Torre sa pinulongang Kinyarwanda.—Isaias 54:17.
19 Kanunayng giuna niining kagiw nga mga Saksi, bisag naglisod kaayo, ang pagpangayog espirituwal nga pagkaon kay sa materyal nga mga tagana. Sa dakong pagsakripisyo, ang mahigugmaong mga igsoon gikan sa ubay-ubayng kayutaan nakaarang sa paghatod sa mga suplay ngadto kanila. Pinaagi sa pagpanulti ug sa ilang kahapsay ubos sa malisod nga kahimtang, kini nga mga kagiw nakahatag ug kahibulongang pamatuod. Sila sa pagkatinuod nagpadayon sa pagdala sa ilang kinamaayohan alang sa pagsimba kang Jehova. Ilang gipasundayag ang pagtuo ingon sa gipahayag ni Pablo sa Roma 14:8: “Kon kita nagakinabuhi, kita nagakinabuhi alang kang Jehova, ug ingon man kon kita mamatay, kita mamatay alang kang Jehova. Busa kon kita nagakinabuhi ug ingon man kon kita mamatay, kita iya ni Jehova.”
20, 21. (a) Kinsang mga ngalan ang wala mahisulat diha sa basahon sa handomanan ni Jehova? (b) Kinsang mga ngalan ang makita sa basahon, ug ngano?
20 Si Jehova naghupot ug talaan sa tanang nag-alagad kaniya sa pagkamaunongon. Ang tagna ni Malakias nagpadayon: “Nianang panahona kadtong may kahadlok kang Jehova nanagsulti ang usa ug usa, kada usa ngadto sa iyang kauban, ug si Jehova nagpadayon sa pagpamati ug nagpatalinghog. Ug ang usa ka basahon sa handomanan gisulat sa atubangan niya alang niadtong may kahadlok kang Jehova ug alang niadtong nanagpalandong sa iyang ngalan.”—Malakias 3:16.
21 Pagkahinungdanon karong adlawa nga atong ipakita ang diyosnong kahadlok sa pagpasidungog sa ngalan ni Jehova! Sa pagbuhat sa ingon, dili kita mag-antos sa grabeng paghukom, sama niadtong sa kamadayegon nagpaluyo niining mga sistema sa kalibotan. Ang Pinadayag 17:8 nag-asoy nga ang “ilang ngalan wala mahisulat diha sa basahong-linukot sa kinabuhi.” Makataronganon, ang pangunang ngalan nga nasulat diha sa basahon sa kinabuhi ni Jehova mao kanang iya sa Pangulong Ahente sa kinabuhi, ang kaugalingong Anak sa Diyos, si Jesu-Kristo. Ang Mateo 12:21 nag-ingon: “Sa pagkatinuod, diha sa iyang ngalan ang kanasoran magalaom.” Ang halad lukat ni Jesus nagagarantiya ug kinabuhing walay kataposan alang sa tanang magpakitag pagtuo niana. Pagkadakong pribilehiyo nga ang atong kaugalingong mga ngalan idugang sa ngalan ni Jesus diha niana nga linukot!
22. Unsang kalainan ang madayag sa dihang ipahamtang na ni Jehova ang paghukom?
22 Komosta ang mga alagad sa Diyos sa panahon sa paghukom? Si Jehova nagtubag diha sa Malakias 3:17, 18: “Ako magpakitag kaluoy kanila, sama sa usa ka tawo nga nagpakitag kaluoy sa iyang anak nga nag-alagad kaniya. Ug kamo usab sa dayag makakita sa kalainan tali sa matarong ug sa daotan, tali sa usa nga nag-alagad sa Diyos ug sa usa nga wala mag-alagad kaniya.” Ang pagbahin matin-aw alang sa tanan: ang daotan, lainon alang sa walay kataposang pagkaputol, ug ang matarong, pagauyonan alang sa kinabuhing walay kataposan diha sa dominyo sa Gingharian. (Mateo 25:31-46) Sa ingon usa ka dakong panon sa karnerohong mga tawo ang maluwas sa dako ug makapukawg-kahadlok nga adlaw ni Jehova.
Nahinumdom Ka Ba?
◻ Unsang mga paghukom ang gipahamtang ni Jehova sa mga panahon sa Bibliya?
◻ Sa unsang paagi ang mga kahimtang karong adlawa katumbas sa karaang mga panahon?
◻ Unsang pagputli ang nagakahitabo sa katumanan sa tagna ni Malakias?
◻ Kinsang mga ngalan ang gisulat diha sa basahon sa handomanan sa Diyos?