Kinabuhi ug Ministeryo ni Jesus

Imposibleng Mahimong Disipulo

UNSA ka makalilisang nga talan-awon dihang miabot siya sa daplin sa baybayon! Duha ka mabangis kaayong mga tawo nga gikan sa sementeryo sa duol midalagan paingon kaniya. Sila giyawaan. Sanglit ang usa kanila tingali mas mabangis kay sa usa ug dugaydugay nang nag-antos sa pagkontrolar sa yawa, siya ang nahimong dugokan sa pagtagad.

Kining makaloluoyng tawo dugay na kaayong nagpuyo nga hubo diha sa mga lubong. Walay hunong, sa adlaw ug gabii, mosinggit siya ug bun-ogon niya ang iyang lawas pinaagig mga bato. Siya mabangis kaayo nga walay bisan kinsa ang makaagi niadtong dalana. Gisulayan na siya sa paggapos, apan igo lang niyang putolputolon ang mga talikala ug balibalion ang mga posas sa iyang tiil. Walay bisan kinsa nga arang makabuntog kaniya.

Dihang miduol ang tawo kang Jesus ug mihapa sa iyang tiil, gipasinggit siya sa mga demonyo nga nagkontrolar kaniya: “Unsay imong labot kanako, Jesus, Anak sa Labing Hataas nga Diyos? Gipanumpa ko ikaw sa Diyos sa dili pagsakit kanako.”

“Gumula ka sa tawo, ikaw, espiritu nga mahugaw,” balikbalik nga misulti si Jesus. Apan dayon nangutana si Jesus: “Kinsay imong ngalan?”

“Ang akong ngalan Panon, kay daghan man kami,” mao ang tubag. Malipay ang mga demonyo sa pagtan-aw sa mga pag-antos niadtong ilang masudlan, tingali malipay sa paghanib kanila sa tinalawan nga espiritu sa paggubot sa panon. Apan nakaatubang kang Jesus, mihangyo sila nga dili sila ipadala sa bung-aw. Atong nakita na usab ang dakong gahom ni Jesus sa pagdaog bisan sa mapintas nga mga demonyo. Nagpakita usab kini nga ang mga demonyo nahibalo nga ang pagtambog sa bung-aw uban sa ilang pangulo, si Satanas nga Yawa, mao ang silot sa Diyos kanila sa ulahi.

Dihay usa ka panon sa mga baboy nga duolan sa 2,000 ang nanag-ungad diha sa bakilid. Busa ang mga demonyo miingon: “Paadtoa kami nianang mga baboy ug pasudla kami nila.” Tingali ang mga demonyo nakabaton ug dili-kinaiyanhon, madagmalong kaulag sa pagsulod sa mga lawas sa unodnong linalang. Dihang gitugotan sila ni Jesus sa pagsulod sa mga baboy, ang tanang 2,000 kanila mihaguros padulhog sa pangpang ug nangalumos sila sa dagat.

Dihang nakita kini sa nag-atiman sa baboy, ila dayon kining gibalita sa siyudad ug sa kasikbit nga mga yuta. Nianang gutloa, midugok ang mga tawo sa pagtan-aw sa nahitabo. Dihang miabot sila, ania ang tawo nga gigulaan sa mga demonyo, nga nagsenina na ug maayo nag panimuot, nga naglingkod sa tiilan ni Jesus!

Ang mga saksi nga nakakita mitaho sa mga tawo kon sa unsang paagi giayo ang tawo. Ilang giasoy usab ang makalilisang nga gidangatan sa mga baboy. Sa pagkadungog niini, giabot ug dakong kahadlok ang mga tawo, ug mihangyo sila kang Jesus sa pagpahawa sa ilang kayutaan. Busa misugot siya ug misakay sa sakayan. Ang tawo nga giyawaan kanhi mihangyo kang Jesus nga tugotan siya sa pag-uban kaniya. Apan gisultihan siya ni Jesus: “Pauli na sa imong mga paryente, ug itaho kanila ang tanang mga butang nga nahimo ni Jehova kanimo ug sa iyang kaluoy kanimo.”

Sultihan kanunay ni Jesus kadtong iyang mapaayo sa dili pagsulti sa kang bisan kinsa, sanglit dili siya buot nga mohimog mga konklusyon ang mga tawo pinasukad sa pinasobrahang mga taho. Apan eksipsiyon kini tungod kay ang giyawaan kanhi makasangyaw na karon sa mga tawong walay higayon si Jesus sa pag-abot. Dugang pa, ang presensiya sa tawo mohatag pamatuod mahitungod sa gahom ni Jesus sa paghimog maayo, aron msumpo ang dili-maayong taho nga mokaylap tungod sa pagkamatay sa mga baboy.

Gisunod ang sugo ni Jesus, ang giyawaan kanhi milakaw. Siya misugod sa pagsangyaw sa tibuok Decapolis sa tanang mga butang nga nahimo kaniya ni Jesus, ug ang mga tawo natingala. Mateo 8:28-34; Marcos 5:1-20; Lucas 8:26-39; Pinadayag 20:1-3.

◆ Ngano man nga nahimong dugokan ang usa ka giyawaan dihang duha man ang presente?

◆ Unsay nagpakita nga nahibalo ang mga demonyo mahitungod sa umaabot nga pagtambog sa bung-aw?

◆ Nganong gustong mosulod ang mga demonyo sa mga tawo ug sa mga mananap?

◆ Nganong naghimog eksipsiyon si Jesus sa giyawaan kanhi, nga nagsugo kaniya sa pagsulti sa uban mahitungod sa Iyang gihimo alang kaniya?