Kinabuhi ug Ministeryo ni Jesus

Ang Pagtawag Kang Mateo

TAPOS gilayon sa pag-ayo sa paralitiko, miadto si Jesus sa Capernaum paingon sa Dagat sa Galilea. Giadto na usab siya didto sa panon sa mga tawo, ug misugod siya sa pagpanudlo kanila. Samtang naglakaw siya, iyang nakita si Mateo, nga ginganlan usab ug Levi, nga naglingkod sa buhisanan. “Sunod kanako ug mahimong akong tinun-an,” nanapit si Jesus.

Malagmit, si Mateo sinati na sa mga pagtulon-an ni Jesus, sama kang Pedro, Andres, Santiago, ug Juan sa gitawag sila. Ug sama kanila, misunod dayon si Mateo sa pagdapit. Siya mitindog, gitalikdan ang iyang mga responsabilidad sa pagkamaniningil ug buhis, ug misunod kang Jesus.

Sa ulahi, tingali aron sa pagsaulog sa pagsanong sa iyang panawag, mihimog dakong salosalo si Mateo sa iyang balay. Gawas pa kang Jesus ug sa Iyang mga disipulo, ang mga kaubanan kanhi ni Mateo mitambong. Kining mga tawhana sa kinatibuk-an tinamay sa ilang kaubang mga Hudiyo tungod kay maningil silag mga buhis alang sa gidumtang Romanong mga awtoridad. Dugang pa, sila sagad manglimbong pinaagi sa pagpaningil ug sobra sa mga tawo kay sa regular nga balayranan nga buhis.

Nakakita kang Jesus diha sa salosalo uban niining mga tawhana, ang mga Pariseo nangutana sa iyang mga disipulo: “Nganong ang inyong magtutudlo mokaon man uban sa mga maniningil ug buhis ug sa mga makasasala?” Nakadungog sa pangutana, si Jesus mitubag: “Ang maayog lawas wala magkinahanglan ug mananambal, kondili ang mga masakiton. Nan, lumakaw kamo, ug tun-i kon unsay kahulogan niini, ‘Ang akong gikinahanglan mao ang kaluoy, ug dili ang halad.’ Kay ako mianhi dili sa pagtawag sa mga matarong, kondili sa mga makasasala.”

Hayan, gidapit ni Mateo kining mga maniningil ug buhis sa iyang balay aron nga sila makapaminaw kang Jesus ug makadawat ug espirituwal nga pagkaayo. Busa nakig-uban si Jesus kanila aron matabangan sila nga makabaton ug mahimsog nga relasyon sa Diyos. Wala sila biaybiaya ni Jesus, sama sa gihimo sa nagpakamatarong sa kaugalingon nga mga Pariseo. Hinunoa, naluoy siya ug, sa ingon, nahimong usa ka espirituwal nga mananambal alang kanila.

Busa ang pagpakitag kaluoy ni Jesus sa mga makasasala wala magpasabot nga iyang gipalabay ang ilang mga sala kondili usa kini ka pasundayag sa samang malumong pagbati nga iyang gipakita sa mga masakiton sa pisikal. Hinumdomi, pananglitan, sa iyang gihikap ang sanlahon tungod sa kaluoy, nga nag-ingon: “Buot ko. Magmahinlo ka.” Hinaot nga magpakita usab kita ug kaluoy pinaagi sa pagtabang sa mga tawo nga nanginahanglan, ilabina sa pagtabang kanila sa espirituwal nga paagi. Mateo 8:3; 9:9-13; Marcos 2:13-17; Lucas 5:27-32.

◆ Diin si Jesus sa iyang nakita si Mateo?

◆ Unsay trabaho ni Mateo, ug nganong gitamay kining mga tawhana sa mga Hudiyo?

◆ Unsay reklamo ang gihimo batok kang Jesus, ug unsay iyang gitubag?

◆ Nganong nakig-uban si Jesus sa mga makasasala?

[Bug-os panid nga Letrato 9]