KABALAKA, KAHINGAWA

Ubay-ubay nga Hebreohanong mga pulong ang adunay diwa nga kabalaka o kahingawa. Ang usa niini (tsa·rarʹ) nagkahulogang malukoban sa pisikal nga diwa ug busa gihubad nga ‘naputos,’ ‘natago,’ ug “hagip-ot.” (Ex 12:34; Pr 26:8; Isa 49:19) Sa mahulagwayon nga diwa kini nagkahulogang “mabalaka; anaa sa grabeng kapit-os.” (Gen 32:7; 1Sa 28:15) Ang laing pulong mao ang da·ʼaghʹ, nga gihubad nga “mabalaka; malisang”; kini kaamgid sa deʼa·ghahʹ, nga nagkahulogang “pagkamabalak-on.” (1Sa 9:5; Isa 57:11; Pr 12:25) Ang Gregong nombre nga meʹri·mna gihubad nga “kabalaka,” samtang ang kaamgid nga berbong me·ri·mnaʹo nagkahulogang “pagkabalaka.”​—Mat 13:22; Luc 12:22.

Ang kabalaka makadaot sa panglawas sa usa ka tawo. Kini mahimong mosangpot sa depresyon, nga makapawala sa kusog ug gana sa paglihok. Nag-ingon ang inspiradong proverbio: “Ang pagkamabalak-on diha sa kasingkasing sa usa ka tawo maoy magpatikuko niini.” (Pr 12:25) Mahimong molutaw ang seryosong pisikal nga mga simtoma tungod sa kabalaka. Matod sa libro nga How to Master Your Nerves: “Ang mga doktor nasayod kon sa unsang paagi ang kabalaka makaapektar sa mga pag-obra sa lawas. Kini makapataas (o makapaubos) sa presyon sa dugo; kini makapadaghan sa mga selula sa puting dugo; kini kalit nga makaapekto sa asukar sa dugo tungod sa paglihok sa adrenalin diha sa atay. Kini makapausab gani sa imong electrocardiogram [ECG]. Si Dr. Charles Mayo miingon: ‘Ang kabalaka makaapekto sa sirkulasyon, sa kasingkasing, sa mga glandula, sa tibuok sistema sa nerbiyos.’”​—Sinulat ni Dr. P. Steincrohn ug ni Dr. D. LaFia, 1970, p. 14.

Labi pang grabe mao ang espirituwal nga kadaot nga ipatungha sa dili-angay nga kabalaka. Gipakita ni Jesu-Kristo nga ang pagpabili sa “pulong sa Diyos” mahimong bug-os nga matuok sa kabalaka tungod sa mga suliran nga sagad maoy bahin sa kinabuhi sa presenteng sistema sa mga butang. Maingon nga ang mga sampinit makapugong sa nanurok nga mga binhi sa pagtubo ug sa pagpamunga, ang maong kabalaka makapugong usab sa espirituwal nga pagtubo ug sa pagpamunga alang sa pagdayeg sa Diyos. (Mat 13:22; Mar 4:​18, 19; Luc 8:​7, 11, 14) Tungod kay gitugotan kini nga mga kabalaka nga mogahom sa ilang kinabuhi, ug nagbalewala sa espirituwal nga mga intereses, daghan ang mahimong dili-inuyonan sa atubangan sa Anak sa Diyos sa iyang pagbalik diha sa himaya, nga mosangpot sa ilang walay-kataposang kapildihan.​—Luc 21:34-36.

Hustong mga Kabalaka o mga Kahingawa. Husto nga mabalaka bahin sa pagbuhat sa kon unsay makapahimuot kang Jehova nga Diyos aron mapahimuslan ang mga panalangin nga iyang gitagana alang sa iyang debotadong mga alagad. Ang usa nga sad-an sa grabeng kasaypanan angayng mobati sama sa gibati sa salmista: “Nabalaka ako tungod sa akong sala.” (Sal 38:18) Ang hustong kabalaka tungod sa sala motultol sa pagsugid, paghinulsol, ug pagtalikod sa sayop nga dalan, nga magpasig-uli sa usa ka maayong relasyon uban sa Labing Hataas.

Ang tanang Kristohanon angayng mabalaka, o angayng tinuod nga mahingawa, bahin sa espirituwal, pisikal, ug materyal nga kaayohan sa mga isigkamagtutuo. (1Co 12:25-27) Kini nga matang sa kabalaka makita diha sa sulat ni apostol Juan ngadto kang Gayo: “Hinigugma, ako nagaampo nga sa tanang butang ikaw unta magmauswagon ug makabaton ug maayong panglawas, ingon nga ang imong kalag nagmauswagon.” (3Ju 2) Gihisgotan ni apostol Pablo ang mahitungod sa iyang “kahingawa sa tanang kongregasyon.” (2Co 11:28) Siya matinguhaon kaayo nga ang tanan unta magpabiling matinumanong mga tinun-an sa Anak sa Diyos hangtod sa kataposan.

Ang Kasulatan naghisgot bahin sa pagkahimong “mabalak-on sa mga butang sa Ginoo,” sa ato pa, naghunahuna sa tanang butang nga magpalambo sa intereses sa Anak sa Diyos. Kay walay mga kaakohan ug mga alatimanon alang sa kapikas ug sa mga anak, ang dili-minyo nga mga Kristohanon, kon itandi sa mga minyo, dili ra kaayo mabalak-on sa “mga butang sa kalibotan” ug busa makahatag ug mas dakong pagtagad sa “mga butang sa Ginoo.”​—1Co 7:32-35.

Si apostol Pablo misulat nga ang Kristohanong mga bana ug mga asawa “mabalak-on sa mga butang sa kalibotan,” mao nga sila adunay mga kabaldahan nga wala masinatii sa dili-minyong mga Kristohanon. Kon bahin sa dili minyo, kon unsay igo na alang sa pag-atiman sa kaugalingon ug sa panimalay ug sa mga kinahanglanon sa kinabuhi​—pagkaon, besti, balay​—tingali gamay ra gayod kaayo kon itandi sa gikinahanglan sa usa ka pamilya. Tungod sa suod nga relasyon sa bana ug asawa, silang duha angayng magmabalak-on o mahingawa sa pagpahimuot sa usag usa sa pagtagana nianang makaamot sa pisikal, mental, emosyonal, ug espirituwal nga kaayohan sa tibuok pamilya. Bisan pag walay mga sakit, mga emerhensiya, mga limitasyon, o mga kabilinggan sa lawas, ang mga minyo nga adunay mga anak kinahanglang mogugol ug mas dakong panahon alang sa “mga butang sa kalibotan,” sa ato pa, sa dili espirituwal nga mga kalihokan may kalabotan sa tawhanong kinabuhi, kay sa sagad gugolon sa dili-minyong mga Kristohanon.

Bisan pa niana, ang kalibotanong mga kabalaka dili gayod tugotan nga magpatigbabaw. Gipatin-aw kini ni Jesu-Kristo ngadto kang Marta nga igsoon ni Lazaro. Kay nabalaka sa pag-abiabi sa iyang dinapit, wala na siya makahigayon sa pagpamati kang Jesus. Si Maria, sa laing bahin, nakahimo sa pagpili sa “maayong bahin,” ang pagdawat sa espirituwal nga pagkaon gikan sa Anak sa Diyos.​—Luc 10:38-42.

Paglikay sa Dili-Angay nga Kabalaka. Ang bug-os nga pagsalig sa mahigugmaong kahingawa ni Jehova alang sa kaayohan sa iyang mga alagad makatabang sa usa nga dili magpadaog sa wala kinahanglana nga kabalaka. (Jer 17:​7, 8) Gihimo ni Jesu-Kristo ang samang obserbasyon diha sa iyang Wali sa Bukid. Gitapos niya ang iyang tambag bahin sa kabalaka pinaagi sa mga pulong: “Ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka. Igo na sa matag adlaw ang iyang kaugalingong pagkadaotan.” (Mat 6:​25-34) Alang sa usa ka Kristohanon, igo na ang mga suliran sa matag adlaw ug dili na kinahanglang dugangan pa ug kabalaka bahin sa kon unsay mahitabo sa sunod nga adlaw, nga tingali dili gani mahitabo.

Bisan pa kon ang usa ka Kristohanon dad-on sa atubangan sa mga awtoridad aron sukitsukiton sa mga panahon sa paglutos, ang iyang pagsalig sa tabang sa Diyos makapahigawas kaniya gikan sa kabalaka. Pinaagi sa Iyang espiritu, si Jehova magpalig-on kaniya niining masulayon nga kahimtang ug magpaarang kaniya sa paghatag ug maayong pamatuod.​—Mat 10:18-20; Luc 12:​11, 12.

Sa dihang ang usa ka Kristohanon atakehon sa bisan unsang butang nga makapabalaka kaniya, nga maghatag kaniya ug kahigwaos ug kahadlok, siya angayng mosangpit sa iyang langitnong Amahan diha sa pag-ampo. Busa siya makahimo sa ‘pagtugyan sa iyang kabalaka ngadto kang Jehova,’ nga magmasaligon nga siya patalinghogan sa Usa nga nahingawa kaniya. (1Pe 5:7) Tungod niana iyang mabatonan ang kalinaw diha sa kahiladman, ang kalinaw sa Diyos, nga magabantay sa kasingkasing ug sa mga gahom sa pangisip. Sa iyang kahiladman, diha sa iyang kasingkasing, ang Kristohanon mahigawas sa kahigwaos, sa kahadlok nga adunay daotang mahitabo, ug sa kakuyaw, ug ang hunahuna dili matugaw tungod sa mga kabaldahan ug mga kalibog gumikan sa kabalaka.​—Flp 4:​6, 7.