“Ang Diyos Gugma”
“Siya nga wala mahigugma wala makaila sa Diyos, tungod kay ang Diyos gugma.”—1 JUAN 4:8.
1-3. (a) Unsay giingon sa Bibliya bahin sa hiyas ni Jehova nga gugma, ug sa unsang paagi kanang mga pulonga maoy linain? (b) Nganong ang Bibliya nag-ingon nga “ang Diyos gugma”?
ANG tanang hiyas ni Jehova maoy dili-hitupngan, hingpit, ug makapadani. Apan ang labing dalayegon sa tanang hiyas ni Jehova mao ang gugma. Walay laing hiyas ang kusganong magdani kanato kang Jehova sama sa iyang gugma. Ikalipay, ang gugma mao usab ang nagpatigbabaw niyang hiyas. Nganong nahibalo kita niana?
2 Adunay gisulti ang Bibliya bahin sa gugma nga wala gayod isulti bahin sa ubang pangunang mga hiyas ni Jehova. Ang Kasulatan wala mag-ingon nga ang Diyos maoy gahom o nga ang Diyos maoy hustisya o bisan nga ang Diyos maoy kaalam. Iyang nabatonan kanang mga hiyasa ug siya ang labaw nga tinubdan nianang tulo ka hiyas. Apan, bahin sa gugma, adunay mas halawom nga butang nga gisulti sa 1 Juan 4:8: “Ang Diyos [maoy] gugma.” Oo, nahupngan gayod ug gugma si Jehova. Kini ang iyang kinaiyahan mismo. Sa malangkobong pagkasulti, mahimo kitang maghunahuna sa ingon niini: Ang gahom ni Jehova makapaarang niya sa paglihok. Ang iyang hustisya ug iyang kaalam magagiya sa paagi sa iyang paglihok. Apan, ang gugma ni Jehova magtukmod kaniya sa paglihok. Ug ang iyang gugma kanunayng gibanaag sa paagi sa iyang paggamit sa uban niyang mga hiyas.
3 Kanunayng giingon nga si Jehova mao ang personipikasyon sa gugma. Busa, kon buot natong makakat-on bahin sa gugma, kinahanglang makakat-on kita bahin kang Jehova. Nan, atong tukion ang pipila ka kinaiyahan sa dili-hitupngan nga gugma ni Jehova.
Ang Kinalabwang Buhat sa Gugma
4, 5. (a) Unsa ang kinalabwang buhat sa gugma sa tibuok kasaysayan? (b) Nganong ikasulti nato nga si Jehova ug ang iyang Anak gihiusa sa lig-on kaayong bugkos sa gugma nga naugmad sukad?
4 Si Jehova nagpakitag gugma sa daghang paagi, apan adunay usa ka paagi nga mopatigbabaw sa tanan. Unsa ba kana? Ang iyang pagpadala sa iyang Anak aron mag-antos ug mamatay alang kanato. Ikasulti nato sa tukma nga kini mao ang kinalabwang buhat sa gugma sa tibuok kasaysayan. Nganong makasulti kita niana?
5 Ang Bibliya nagtawag kang Jesus “ang panganay sa tanang kalalangan.” (Colosas 1:15) Hunahunaa ra—ang Anak ni Jehova naglungtad na sa wala pay pisikal nga uniberso. Nan, unsa ka dugay nag-uban ang Amahan ug Anak? Gibanabana sa pipila ka mga siyentipiko nga ang edad sa uniberso maoy 13 ka bilyong katuigan. Apan, bisan pag husto ang maong banabana, ang maong gidugayon dili pa katumbas sa gitas-on sa kinabuhi sa panganay nga Anak ni Jehova! Unsay iyang gibuhat nianang tanang panahon? Ang Anak malipayong nag-alagad ingong “batid nga magbubuhat” sa iyang Amahan. (Proverbio 8:30; Juan 1:3) Si Jehova ug ang iyang Anak nagkauban sa paglalang sa tanang ubang mga butang. Makapaukyab, malipayon gayong mga panahon ang ilang natagamtam! Nan, kinsa ba kanato ang makatugkad sa lig-ong pagbinatiay nga naglungtad latas nianang hataas kaayong panahon? Tin-aw, si Jehova nga Diyos ug ang iyang Anak gihiusa sa lig-on kaayong bugkos sa gugma nga naugmad sukad.
6. Sa dihang si Jesus nagpabawtismo, sa unsang paagi gipahayag ni Jehova ang iyang pagbati bahin sa Iyang Anak?
6 Bisan pa niana, gisugo ni Jehova ang iyang Anak sa yuta aron ipanganak ingong usa ka tawo. Sa pagbuhat niana, si Jehova nahikawan ug kapin sa katloan ka tuig nga suod nga pagpakig-uban sa iyang minahal nga Anak sa langit. Uban ang dakong kaikag, Siya nagsud-ong gikan sa langit samtang si Jesus nagtubo hangtod nahimong hingpit nga tawo. Sa mga edad 30, si Jesus nagpabawtismo. Niadtong higayona ang Amahan personal nga misulti gikan sa langit: “Kini mao ang akong Anak, ang hinigugma, nga akong giuyonan.” (Mateo 3:17) Sa pagkakita nga si Jesus matinumanong nagbuhat sa tanang natagna, sa tanang gisugo kaniya, ang iyang Amahan seguradong nahimuot!—Juan 5:36; 17:4.
7, 8. (a) Unsay giantos ni Jesus niadtong Nisan 14, 33 K.P., ug sa unsang paagi naapektohan ang iyang langitnong Amahan? (b) Nganong gitugot ni Jehova nga ang iyang Anak mag-antos ug mamatay?
7 Apan, unsay gibati ni Jehova niadtong Nisan 14, 33 K.P., samtang si Jesus giluiban ug unya gidakop sa nasukong panon sa mga tawo? Samtang si Jesus gibiaybiay, giluwaan, ug gisuntok? Samtang siya gibunalan ug ang unod sa iyang bukobuko nabitasbitas? Samtang siya gilansang, ang mga kamot ug mga tiil, ngadto sa haligi nga kahoy ug gipasagdang nagbitay didto samtang gibugalbugalan siya sa mga tawo? Unsay gibati sa Amahan samtang ang iyang hinigugmang Anak mituaw kaniya diha sa grabeng kasakitan? Unsay gibati ni Jehova samtang si Jesus namatay ug, sa unang higayon sukad sa sinugdanan sa tanang kalalangan, ang Iyang minahal nga Anak wala na maglungtad?—Mateo 26:14-16, 46, 47, 56, 59, 67; 27:26, 38-44, 46; Juan 19:1.
8 Sanglit si Jehova adunay mga pagbati, ang kasakit nga seguradong iyang gibati tungod sa pagkamatay sa iyang Anak dili gayod nato ikapahayag sa mga pulong. Ang butang ikapahayag mao ang motibo ni Jehova sa pagtugot nga kadto mahitabo. Nganong gipailalom sa Amahan ang iyang kaugalingon sa maong kasakit? Si Jehova nagpadayag ug kahibulongang butang alang kanato sa Juan 3:16—usa ka bersikulo sa Bibliya nga hinungdanon kaayo nga gitawag kinig gamitoyng Ebanghelyo. Nag-ingon kini: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” Busa ang motibo sa Diyos mao kini: gugma. Walay mas dakong gugma ang gipakita sukad.
Kon sa Unsang Paagi si Jehova Nagpasalig Kanato sa Iyang Gugma
9. Unsay buot ipatuo kanato ni Satanas bahin sa hunahuna ni Jehova kanato, apan unsay gipasalig ni Jehova kanato?
9 Ugaling lang, motungha ang usa ka hinungdanong pangutana: Ang Diyos ba nahigugma kanato sa personal? Ang pipila tingali mouyon nga ang Diyos nahigugma sa katawhan sa katibuk-an, sumala sa giingon sa Juan 3:16. Apan, sa pagkatinuod gibati nila, ‘Ang Diyos dili gayod makahigugma kanako isip indibiduwal.’ Ang tinuod mao nga si Satanas nga Yawa ikag nga magpatuo kanato nga si Jehova wala mahigugma o magpabili kanato. Sa laing bahin, bisan kon unsa tingali ka dili-hiligugmaon o kawalay-kapuslanan kita sa atong hunahuna, si Jehova nagpasalig kanato nga ang matag usa sa iyang matinumanong mga alagad maoy bililhon kaniya.
10, 11. Sa unsang paagi ang ilustrasyon ni Jesus bahin sa mga goryon nagpakita nga kita adunay bili sa panan-aw ni Jehova?
10 Pananglitan, tagda ang mga pulong ni Jesus nga natala sa Mateo 10:29-31. Sa pag-ilustrar sa bili sa iyang mga tinun-an, si Jesus miingon: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.” Palandonga kon unsay kahulogan niadtong mga pulonga alang sa mga mamiminaw ni Jesus sa unang siglo.
11 Sa adlaw ni Jesus ang goryon mao ang labing baratong langgam nga gibaligya ingong pagkaon. Sa usa ka sensilyo nga gamayg bili, ang pumapalit makabaton ug duha ka goryon. Apan si Jesus sa ulahi miingon, sumala sa Lucas 12:6, 7, nga kon ang usa ka tawo mobayad ug duha ka sensilyo, siya makabaton, dili upat ka goryon, kondili lima. Ang pakaping langgam nahisamag wala nay bili. Tingali ang maong mga langgam walay bili sa panan-aw sa mga tawo, apan unsay hunahuna sa Maglalalang niana? Si Jesus miingon: “Walay usa kanila nga mahikalimtan atubangan sa Diyos.” Gikan sa maong kasayoran kita makasabot sa punto ni Jesus. Sanglit si Jehova nagpabili man sa usa ka buok nga goryon, pagkadako pa diayg bili ang usa ka tawo! Sumala sa giingon ni Jesus, si Jehova nahibalo sa tanang detalye bahin kanato. Ngani, ang mga buhok mismo sa atong ulo naihap na!
12. Nganong makapaneguro kita nga si Jesus matinud-anon sa dihang naghisgot siya nga ang mga buhok sa atong ulo naihap na?
12 Ang pipila ka tawo tingali magtuo nga si Jesus nagpasobrag sulti. Apan, hunahunaa ang bahin sa pagkabanhaw. Nailhan pag-ayo kita ni Jehova nga siya makalalang pag-usab kanato! Iyang gipabilhan pag-ayo kita nga siya makahinumdom sa tanang detalye, lakip sa atong komplikadong lagda sa henetika ug sa tanan natong panumdoman ug mga kasinatian sa kinabuhi. Ang pag-ihap sa atong mga buhok—nga ang aberids nga ulo sa tawo magpatubog mga 100,000—mahimong yano kaayong buhat kon itandi. Ang mga pulong ni Jesus nagpasalig kanato sa labing maayong paagi nga si Jehova may kahingawa kanato ingong mga indibiduwal!
13. Sa unsang paagi ang kaso ni Haring Jehosapat nagpakita nga si Jehova mangita ug maayo diha kanato bisan pag kita dili hingpit?
13 Ang Bibliya nagpadayag ug laing butang nga nagpasalig kanato bahin sa gugma ni Jehova. Siya mangita ug magpabili sa maayo diha kanato. Pananglitan, palandonga ang maayong Haring Jehosapat. Sa dihang ang hari nakahimog usa ka binuang nga buhat, ang manalagna ni Jehova miingon kaniya: “Tungod niini adunay kasuko batok kanimo gikan sa atubangan ni Jehova.” Makapahinuklog gayod nga hunahunaon! Apan ang mensahe ni Jehova wala matapos diha. Kadto nagpadayon: “Bisan pa, adunay maayong mga butang nga nakaplagan diha kanimo.” (2 Cronicas 19:1-3) Busa ang matarong nga kasuko ni Jehova wala makapugong kaniya sa pagmatikod sa “maayong mga butang” bahin kang Jehosapat. Dili ba makapalig-on ang pagkahibalo nga ang atong Diyos mangita ug maayo diha kanato bisan pag kita dili hingpit?
Usa ka Diyos nga “Andam sa Pagpasaylo”
14. Sa dihang kita makasala, unsang mabug-at nga mga pagbati ang ato tingaling masinati, apan sa unsang paagi kita makapahimulos sa kapasayloan ni Jehova?
14 Sa dihang kita makasala, basin makahunahuna kita nga kita dili takos nga mag-alagad kang Jehova tungod sa kahiubos, kaulaw, ug pagkasad-an nga tingali atong bation. Apan hinumdomi nga si Jehova “andam sa pagpasaylo.” (Salmo 86:5) Oo, kon maghinulsol kita sa atong mga sala ug manlimbasog nga dili kana masubli, makapahimulos kita sa kapasayloan ni Jehova. Tagda kon giunsa paghubit sa Bibliya kining kahibulongang kinaiyahan sa gugma ni Jehova.
15. Unsa ka layo gikan kanato nga ipahilayo ni Jehova ang atong mga sala?
15 Ang salmistang si David migamit ug tin-awng mga pulong sa pagbatbat sa kapasayloan ni Jehova: “Ingon sa pagkalayo sa sidlakan gikan sa kasadpan, sa ingon nga pagkalayo Iyang gipahilayo gikan kanato ang atong mga kalapasan.” (Italiko amoa; Salmo 103:12, The Amplified Bible) Unsa ba ka layo ang sidlakan gikan sa kasadpan? Sa usa ka diwa, ang sidlakan mao kanunay ang kinalay-ang distansiya gikan sa kasadpan; ang duha ka dapit dili gayod magkatagbo. Usa ka eskolar nag-ingon nga kining mga pulonga nagpasabot nga “labing layo nga posible; labing layo nga atong mahunahuna.” Ang dinasig nga mga pulong ni David nagsulti kanato nga sa dihang si Jehova magpasaylo, iyang ipahilayo ang atong mga sala nga labing layo nga atong mahunahuna.
16. Sa dihang si Jehova magpasaylo sa atong mga sala, nganong makasalig kita nga siya mag-isip nga mahinlo na kita human niana?
16 Nakasulay ka ba sukad sa pagtangtang sa mansa gikan sa pughaw-ug-kolor nga besti? Bisan pa tingali sa imong dakong panlimbasog, madayag gihapon ang mansa. Matikdi kon giunsa paghubit ni Jehova ang iyang katakos sa pagpasaylo: “Bisan tuod ang inyong mga sala sanag-pula, kini papution sama sa niyebe; bisan tuod kini mapula sama sa lutong-pula nga panapton, kini mahimong sama sa balhibo sa karnero.” (Isaias 1:18) Ang pulong “sanag-pula” nagpasabot sa sulaw-pula nga kolor.a Ang “lutong-pula” maoy usa sa purpura nga mga kolor nga pangtina. Dili gayod nato matangtang ang mansa sa sala sa atong kaugalingong panlimbasog. Bisan pa niana, si Jehova makakuha sa mga sala nga samag sanag-pula ug lutong-pula ug mapaputi kana samag niyebe o wala-matina nga balhibo sa karnero. Busa sa dihang si Jehova magpasaylo sa atong mga sala, dili na kita mobati nga atong gidala ang mansa sa maong mga sala sa nahibilin natong kinabuhi.
17. Sa unsang diwa nga si Jehova naglabay sa atong mga sala sa iyang luyo?
17 Sa usa ka makapatandog-sa-balatian nga awit sa pagpasalamat nga gikomposo ni Ezequias human siya maluwas gikan sa usa ka makamatayng sakit, siya miingon kang Jehova: “Imong gisalibay sa imong luyo ang tanan nakong mga sala.” (Isaias 38:17) Si Jehova gihulagway dinhi ingong nagkuha sa mga sala sa mahinulsolong mamumuhat ug daotan ug naglabay niana sa Iyang luyo diin Siya dili na makakita niana ni makamatikod pa niana. Sumala sa usa ka reperensiyang basahon, ang ideya nga gipasabot mahimong ikapahayag: “Imong gihimo ang [akong mga sala] nga samag kana wala mahitabo.” Dili ba makapahupay kana?
18. Sa unsang paagi gipaila sa manalagnang si Miqueas nga sa dihang si Jehova magpasaylo, Iyang kuhaon ang atong mga sala hangtod sa hangtod?
18 Sa usa ka saad bahin sa pagpasig-uli, ang manalagnang si Miqueas nagpahayag sa iyang pagtuo nga si Jehova magpasaylo sa iyang mahinulsolong katawhan: “Kinsa ang usa ka Diyos nga sama kanimo, . . . nga nagapalabay lamang sa kalapasan sa nahibilin sa iyang panulondon? . . . Ug itambog mo sa kahiladman sa dagat ang tanan nilang kasal-anan.” (Miqueas 7:18, 19) Hunahunaa kon unsay ipasabot nianang mga pulonga alang sa katawhan nga nagkinabuhi sa mga panahon sa Bibliya. May purohan ba nga makuha pagbalik ang butang nga gitambog na “sa kahiladman sa dagat”? Ang mga pulong ni Miqueas sa ingon nagpasabot nga sa dihang si Jehova magpasaylo, iyang kuhaon ang atong mga sala hangtod sa hangtod.
‘Ang Malumong Pagkamabination sa Atong Diyos’
19, 20. (a) Unsay kahulogan sa Hebreohanong berbo nga gihubad “magpakita ug kaluoy” o “magbaton ug kaluoy”? (b) Sa unsang paagi gigamit sa Bibliya ang mga pagbati sa usa ka inahan alang sa iyang masuso aron matudloan kita bahin sa pagkamabination ni Jehova?
19 Ang pagkamabination maoy laing kinaiyahan sa gugma ni Jehova. Unsay pagkamabination? Sa Bibliya, suod ang relasyon sa pagkamabination ug sa kaluoy. Ang ubay-ubayng Hebreohanon ug Grego nga mga pulong nagpadayag sa kahulogan sa pagkamabination. Pananglitan, ang Hebreohanong berbo nga ra·chamʹ makadaghang gihubad nga “magpakita ug kaluoy” o “magbaton ug kaluoy.” Kining Hebreohanong termino, nga gipadapat ni Jehova sa iyang kaugalingon, nalanggikit sa pulong alang sa “tagoangkan” ug mabatbat ingong “inahanong pagkamabination.”
20 Ang Bibliya nagagamit sa mga pagbati sa usa ka inahan alang sa iyang masuso aron matudloan kita bahin sa pagkamabination ni Jehova. Ang Isaias 49:15 nag-ingon: “Malimot ba ang usa ka babaye sa iyang masuso nga sa ingon dili siya magpakitag pagkamabination [ra·chamʹ] sa anak sa iyang tagoangkan? Oo, siya tingali makalimot, apan ako dili malimot kanimo.” (The Amplified Bible) Lisod ang paghanduraw nga ang usa ka inahan malimot sa pagpakaon ug pag-atiman sa iyang nagasuso nga anak. Kon buot sabton, ang usa ka masuso walay arang mahimo; sa adlaw ug gabii ang masuso nagkinahanglan sa pagtagad sa inahan niini. Hinuon, ikasubo nga ang pagpasagad sa inahan dili kay wala igdungog, ilabina niining “makuyaw nga mga panahon.” (2 Timoteo 3:1, 3) “Apan,” si Jehova nagpahayag, “ako dili malimot kanimo.” Ang malumong pagkamabination nga nabatonan ni Jehova alang sa iyang mga alagad labi pang kusganon kay sa labing malumo nga kinaiyanhong pagbati nga atong mahunahunaan—ang pagkamabination nga kasagarang bation sa usa ka inahan alang sa iyang anak nga masuso.
21, 22. Unsay nasinati sa mga Israelinhon sa karaang Ehipto, ug unsay sanong ni Jehova sa ilang mga pagtuaw?
21 Sa unsang paagi si Jehova, samag mahigugmaong inahan, magpakitag pagkamabination? Kining hiyasa tin-awng makita sa paagi sa iyang pagtagad sa Israel sa kakaraanan. Pagkatapos sa ika-16 nga siglo W.K.P., ang milyonmilyong Israelinhon naulipon sa Ehipto, diin sila grabeng gidaogdaog. (Exodo 1:11, 14) Sa ilang kasakitan, ang mga Israelinhon mituaw kang Jehova. Unsay sanong sa mabinationg Diyos?
22 Natandog ang kasingkasing ni Jehova. Siya miingon: “Nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw . . . ako nahibalo pag-ayo sa mga kasakit nga ilang giantos.” (Exodo 3:7) Imposible nga si Jehova makakita sa mga pag-antos sa iyang katawhan o makadungog sa ilang mga pagtuaw ug unya dili mobati alang kanila. Si Jehova maoy Diyos nga may empatiya. Ug ang empatiya—ang katakos nga mobati sa kasakit sa uban—suod nga nalangkit sa pagkamabination. Apan, si Jehova wala lamang mobati alang sa iyang katawhan; siya natandog mao nga milihok alang sa ilang kaayohan. Ang Isaias 63:9 nag-ingon: ‘Sa iyang gugma ug sa iyang pagkamabination siya naglukat kanila.’ Pinaagi sa “kamot nga kusgan,” siya nagluwas sa mga Israelinhon gikan sa Ehipto. (Deuteronomio 4:34) Human niadto, iyang gihatagan silag pagkaon sa milagrosong paagi ug gihatod sila ngadto sa ilang kaugalingon nga mabungahong yuta.
23. (a) Sa unsang paagi ang mga pulong sa salmista nagpasalig kanato nga si Jehova mabalak-on kaayo sa matag usa kanato? (b) Sa unsang mga paagi nagtabang si Jehova kanato?
23 Si Jehova wala magpakitag pagkamabination sa iyang katawhan ingong usa ka grupo lamang. Mabalak-on kaayo ang atong mahigugmaong Diyos sa matag usa kanato. Nahibalo kaayo siya sa bisan unsang pag-antos nga ato tingaling masinati. Ang salmista miingon: “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang. Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Salmo 34:15, 18) Sa unsang paagi si Jehova nagtabang sa matag usa kanato? Dili kuhaon ni Jehova ang hinungdan sa atong pag-antos. Apan mohimo siyag dagayang mga tagana alang niadtong motuaw alang sa iyang tabang. Ang iyang Pulong mohatag ug praktikal nga tambag nga makatabang pag-ayo. Diha sa kongregasyon, gitagana ni Jehova ang may-katakos sa espirituwal nga mga magtatan-aw, kinsa naningkamot nga ipabanaag ang iyang pagkamabination diha sa pagtabang sa uban. (Santiago 5:14, 15) Ingong “Tigpatalinghog sa pag-ampo,” si Jehova mohatag ug “balaang espiritu niadtong nagapangayo kaniya.” (Salmo 65:2; Lucas 11:13) Kanang tanang tagana maoy mga pasundayag sa ‘malumong pagkamabination sa atong Diyos.’—Lucas 1:78.
24. Sa unsang paagi mabaslan mo ang gugma ni Jehova?
24 Dili ba makapalipay nga pamalandongon ang gugma sa atong langitnong Amahan? Sa nag-unang artikulo, gipahinumdoman kita nga si Jehova nagpadayag sa iyang gahom, hustisya, ug kaalam sa mahigugmaong mga paagi alang sa atong kaayohan. Ug niining artikuloha, atong nakita nga si Jehova direktang nagpahayag sa iyang gugma alang sa katawhan—ug alang sa matag usa kanato—sa talagsaong mga paagi. Karon, matag usa kanato angayng mangutana, ‘Sa unsang paagi mabaslan ko ang gugma ni Jehova?’ Hinaot baslan mo kana pinaagi sa paghigugma kaniya uban sa bug-os mong kasingkasing, hunahuna, kalag, ug kusog. (Marcos 12:29, 30) Hinaot ang imong pagkinabuhi kada adlaw mopabanaag sa kinasingkasing nimong tinguha nga masuod pa kang Jehova. Ug hinaot si Jehova, ang Diyos nga maoy gugma, masuod pa kanimo—hangtod sa kahangtoran!—Santiago 4:8.
[Footnote]
a Usa ka eskolar nag-ingon nga ang sanag-pula “maoy kolor nga dili molubad. Bisan ang yamog o ulan o paglaba o dugayng paggamit niana dili makatangtang niana.”
Nahinumdom Ka Ba?
• Sa unsang paagi nahibalo kita nga gugma ang nagpatigbabawng hiyas ni Jehova?
• Nganong ikasulti nga ang pagpadala ni Jehova sa iyang Anak aron mag-antos ug mamatay alang kanato mao ang kinalabwang buhat sa gugma nga gihimo sukad?
• Sa unsang paagi si Jehova nagpasalig kanato nga siya nahigugma sa matag usa kanato?
• Sa unsang tin-awng mga paagi nga ang Bibliya nagbatbat sa kapasayloan ni Jehova?
[Hulagway sa panid 15]
“Gihatag sa Diyos . . . ang iyang bugtong nga Anak”
[Hulagway sa panid 16, 17]
“Kamo labaw pag bili kay sa daghang goryon”
[Credit Line]
© J. Heidecker/VIREO
[Hulagway sa panid 18]
Ang mga pagbati sa usa ka inahan alang sa iyang masuso may ikatudlo kanato bahin sa pagkamabination ni Jehova