• Mapandol Ka ba Tungod Kang Jesus?
    Ang Bantayanang Torre (Tun-anan)—2021 | Mayo

    • (3) DAGHANG TRADISYON SA MGA HUDIYO ANG WALA SUNDA NI JESUS

      Daghan ang nagsalikway kang Jesus tungod kay gisalikway niya ang pipila nila ka tradisyon. Sa unsang paagi kining butanga nagpahinabo sab sa pipila sa pagsalikway kanato ug sa atong mensahe? (Tan-awa ang parapo 13)d

      13. Nganong daghan ang nagsalikway kang Jesus?

      13 Sa panahon ni Jesus, ang mga tinun-an ni Juan nga Tigbawtismo natingala kay ang mga tinun-an ni Jesus wala magpuasa. Gipatin-aw ni Jesus nga wala silay rason nga magpuasa samtang buhi pa siya. (Mat. 9:14-17) Bisan pa niana, ang mga Pariseo ug ang ubang magsusupak ni Jesus nagsaway kaniya kay wala niya sunda ang ilang mga kostumbre ug tradisyon. Nasuko sila dihang nag-ayo siyag mga masakiton panahon sa Igpapahulay. (Mar. 3:1-6; Juan 9:16) Mapasigarbohon silang miingon nga ilang gisunod ang Igpapahulay, pero dili ra sayop para nila ang pagnegosyo diha sa templo. Nasuko sila dihang gisaway sila ni Jesus tungod niini. (Mat. 21:12, 13, 15) Ug kadtong gisangyawan ni Jesus sa sinagoga sa Nasaret nangasuko dihang si Jesus migamit ug mga pananglitan gikan sa kasaysayan sa Israel aron ipakita kanila nga sila hakog ug walay pagtuo. (Luc. 4:16, 25-30) Kay wala buhata ni Jesus ang gidahom sa mga tawo, daghan ang nagsalikway kaniya.—Mat. 11:16-19.

      14. Nganong gisaway ni Jesus ang tawhanong mga tradisyon nga dili uyon sa Kasulatan?

      14 Unsay giingon sa Kasulatan? Si Jehova miingon pinaagi kang propetang Isaias: “Kini nga katawhan miduol kanako pinaagi lang sa ilang baba ug sila nagpasidungog kanako pinaagi sa ilang mga ngabil, apan ang ilang kasingkasing layo kanako; ug ang ilang kahadlok kanako base lang sa mga sugo sa mga tawo nga gitudlo kanila.” (Isa. 29:13) Husto si Jesus sa pagsaway sa tawhanong mga tradisyon nga dili uyon sa Kasulatan. Kadtong naghunahuna nga ang mga balaod ug tradisyon sa tawo mas importante kay sa Kasulatan nagsalikway kang Jehova ug sa iyang gipadala nga Mesiyas.

  • Mapandol Ka ba Tungod Kang Jesus?
    Ang Bantayanang Torre (Tun-anan)—2021 | Mayo

    • (4) SI JESUS WALA MAGHATAG UG DIHADIHANG SOLUSYON SA POLITIKAL NGA MGA PROBLEMA

      Daghan ang nagsalikway kang Jesus tungod kay wala siya moapil sa politika. Sa unsang paagi kining butanga nagpahinabo sab sa pipila sa pagsalikway kanato ug sa atong mensahe? (Tan-awa ang parapo 17)e

      17. Nganong daghan sa panahon ni Jesus ang nagsalikway kaniya?

      17 Ang pipila sa panahon ni Jesus gustog dihadihang kausaban sa gobyerno. Nagdahom sila nga ang Mesiyas magpahigawas kanila gikan sa madaogdaogong pagmando sa Roma. Pero sa dihang misulay sila sa paghimo kang Jesus nga hari, siya mibalibad. (Juan 6:14, 15) Ang uban—apil ang mga saserdote—nabalaka nga si Jesus magpahinabog kausaban sa gobyerno nga makapasuko sa mga Romano kinsa maoy naghatag ug gahom ug awtoridad sa maong mga lider sa relihiyon. Tungod niana, daghang Hudiyo ang nagsalikway kang Jesus.

      18. Unsang mga tagna sa Bibliya bahin sa Mesiyas ang gibalewala sa daghang Hudiyo?

      18 Unsay giingon sa Kasulatan? Bisag dunay daghang tagna nga ang Mesiyas mahimong madaogong Manggugubat, ang ubang tagna nagpakita nga kinahanglan una siyang mamatay para sa atong mga sala. (Isa. 53:9, 12) Busa nganong sayop man ang ilang gidahom bahin sa Mesiyas? Daghan sa panahon ni Jesus ang nagbalewala sa bisan unsang mga tagna nga wala magsaad ug dihadihang solusyon sa ilang mga problema.—Juan 6:26, 27.