Mahigugmaong Imbitasyon sa mga Gikapoy
“Umari kanako, kamong tanan nga nagabudlay ug nabug-atan, ug ako magapalagsik kaninyo.”—MATEO 11:28.
1. Unsa ang nakita ni Jesus sa Galilea sa iyang ikatulong pagpanaw sa pagsangyaw?
SA HAPIT nang magsugod ang tuig 32 K.P., si Jesus diha na sa iyang ikatulong panaw sa pagsangyaw sa distrito sa Galilea. Iyang gilibot ang tibuok nga mga siyudad ug kabaryohan, “nanudlo diha sa ilang mga sinagoga ug nagawali sa maayong balita sa gingharian ug nagaayo sa tanang matang sa balatian ug sa tanang matang sa kaluyahon.” Samtang siya naghimo niini, iyang nakita ang panon sa mga tawo, ug “mibati siya ug kaluoy kanila, tungod kay sila pinanitan ug nagkatibulaag samag mga karnero nga walay pastol.”—Mateo 9:35, 36.
2. Sa unsang paagi gitabangan ni Jesus ang mga tawo?
2 Apan, si Jesus naghimo ug labaw pa kay sa pagkaluoy lamang sa panon sa mga tawo. Human sa pagsugo sa iyang mga tinun-an sa pag-ampo sa “Agalon sa pag-ani,” si Jehova nga Diyos, iyang gipadala sila sa pagtabang sa mga tawo. (Mateo 9:38; 10:1) Unya iyang gitanyagan ang mga tawo sa iyang personal nga pagsalig sa dalan sa tinuod nga kahupayan ug paglipay. Iyang gipaabot kanila kining makapalipay nga imbitasyon: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag.”—Mateo 11:28, 29.
3. Nganong madanihon kaayo ang imbitasyon ni Jesus karon?
3 Karon kita nagkinabuhi sa panahon diin daghan ang mibating nabug-atan kaayo. (Roma 8:22; 2 Timoteo 3:1) Alang sa uban, ang pagpangita lamang ug pangabuhian nagakuha nag dako kaayong panahon ug kusog nga diyutay na lamang ang nahibilin kanila alang sa ilang pamilya, mga higala, o bisan unsa pang ubang butang. Daghan ang nabug-atan sa grabe nga sakit, mga balatian, sobrang kaguol, ug ubang pisikal ug emosyonal nga mga problema. Mibatig kalisod, ang uban naningkamot sa pagpangitag kahupayan pinaagi sa paglunod sa ilang kaugalingon sa pagpangitag-kalipayan, pagkaon, pag-inom, bisan pag-abuso sa droga. Siyempre, kini mobanlod lamang kanila sa sunodsunod nga kadaotan, nga mohatag kanila ug dugang mga problema ug mga kalisod. (Roma 8:6) Matin-aw, ang mahigugmaong imbitasyon ni Jesus madanihon kaayong pamation karon sama nga madanihon kini balik sa maong panahon.
4. Unsang mga pangutana ang angay natong palandongon aron makabenepisyo gikan sa mahigugmaong imbitasyon ni Jesus?
4 Apan, unsa pay naagoman sa mga tawo sa mga adlaw ni Jesus, mao nga sila daw “pinanitan ug nagkatibulaag,” nga nagtukmod kang Jesus sa pagkaluoy kanila? Unsang mga palas-anon ug mga luwan nga ilang kinahanglang pas-anon, ug sa unsang paagi ang imbitasyon ni Jesus makatabang kanila? Ang mga tubag niining mga pangutanaha labing makatabang kanato sa pagpahimulos sa mahigugmaong imbitasyon ni Jesus alang sa mga gikapoy.
Kadtong “Nagabudlay ug Nabug-atan”
5. Nganong husto si apostol Mateo sa pagtaho niining hitaboa sa ministeryo ni Jesus?
5 Makaiikag nga si Mateo lamang ang mitaho niining hitaboa sa ministeryo ni Jesus. Sanglit usa ka maniningil ug buhis sa miagi, si Mateo, nga nailhan usab nga Levi, pamilyar sa usa ka partikular nga kabug-at nga gipas-an sa mga tawo. (Mateo 9:9; Marcos 2:14) Nag-ingon ang librong Daily Life in the Time of Jesus: “Ang mga buhis nga kinahanglang bayran [sa mga Hudiyo] ug salapi ug butang o serbisyo sobra kaayo ka bug-at, ug mas bug-at kini sa pagkaagi nga duha ka matang sa buhis ang ilang pagabayran, ang sibil nga mga buhis ug relihiyosong mga buhis; ug ang duha pulos mabug-at.”
6. (a) Unsa ang sistema sa pagbuhis nga gigamit sa panahon ni Jesus? (b) Nganong dili maayog dungog ang mga maniningil ug buhis? (c) Unsay gibati ni Pablo nga kinahanglang ipahinumdom ngadto sa iyang mga isigka-Kristohanon?
6 Ang dugang nga nagpabug-at niini mao ang sistema sa pagpamuhis sa maong panahon. Gihatag sa Romanhong mga opisyal ang katungod sa pagpangolektag buhis sa mga probinsiya ngadto sa mga tawong kinatas-an ug tanyag. Sila, sa baylo, nagpaempliyog mga tawo sa lokal nga mga komunidad sa pagdumala sa aktuwal nga buluhaton sa pagpanukot ug buhis. Ang tagsatagsa nga nalangkit sa patongpatong nga pagpaganansiya mibating may katarongan sa pagdugang sa ilang kaugalingong komisyon, o bahin. Pananglitan, si Lucas nag-asoy nga “dihay usa ka tawo nga gitawag sa ngalang Zaqueo; ug siya usa ka pangulong maniningil ug buhis, ug siya dato.” (Lucas 19:2) Ang “pangulong maniningil ug buhis” nga si Zaqueo ug kadtong ubos sa iyang pagdumala nangadato gikan sa kapit-os sa mga tawo. Ang pag-abuso ug korapsiyon nga gipahinabo sa maong sistema nagtukmod sa mga tawo sa pagklasipikar sa mga maniningil ug buhis uban sa mga makasasala ug mga bigaon, ug lagmit ingon niini ang kadaghanan kanila. (Mateo 9:10; 21:31, 32; Marcos 2:15; Lucas 7:34) Sanglit gibati sa mga tawo ang halos dili na madaog nga palas-anon, dili ikahibulong nga si apostol Pablo mibati sa panginahanglan sa pagpahinumdom sa iyang mga isigka-Kristohanon nga dili masilag sa Romanhong yugo kondili “ibayad ngadto sa tanan ang mga nahiangay kanila, kaniya nga nangayog buhis, ang buhis; kaniya nga nangayog tributo, ang tributo.”—Roma 13:7a; itandi ang Lucas 23:2.
7. Sa unsang paagi ang Romanhong mga balaod sa pagsilot nakadugang sa palas-anon sa mga tawo?
7 Gipahinumdoman usab ni Pablo ang mga Kristohanon sa paghatag ngadto “kaniya nga nangayog kahadlok, ang maong kahadlok; kaniya nga nangayog dungog, ang maong dungog.” (Roma 13:7b) Ang mga Romano ilado sa pagkamadagmalon ug sa mabug-at nilang mga balaod sa pagsilot. Kanunayng gigamit ang paglatigo, pagbunal, grabeng mga sentensiya sa pagkabilanggo, ug pagpatay aron magpabiling magpasakop ang mga tawo. (Lucas 23:32, 33; Buhat 22:24, 25) Bisan ang Hudiyohanong mga pangulo gihatagan ug awtoridad sa pagpahamtang sa maong silot kon angay sa ilang panan-aw. (Mateo 10:17; Buhat 5:40) Ang maong sistema dayag nga tuman ka malupigon, o gani mapiugon, alang kang bisan kinsa nga nagkinabuhi ilalom niana.
8. Sa unsang paagi ang relihiyosong mga pangulo nagluwan ug palas-anon sa mga tawo?
8 Apan, mas grabe pa kay sa mga buhis ug sa mga balaod nga Romanhon mao ang palas-anong gisangon diha sa ordinaryong mga tawo sa relihiyosong pangulo sa maong adlaw. Sa pagkamatuod, mopatim-aw nga mao kini ang pangunang gikabalak-an ni Jesus sa dihang iyang gibatbat ang mga tawo nga “nagabudlay ug nabug-atan.” Si Jesus miingon nga imbes hatagan ang dinaogdaog nga mga tawo ug paglaom ug kahupayan, ang relihiyosong mga pangulo ‘nagabugkos ug bug-at nga mga luwan ug nagapatong niini diha sa mga abaga sa mga tawo, apan sila mismo dili buot motarog niini pinaagi sa ilang tudlo.’ (Mateo 23:4; Lucas 11:46) Dayag diha sa mga Ebanghelyo ang tin-aw nga paglarawan sa relihiyosong mga pangulo—ilabina sa mga eskriba ug mga Pariseo—ingong mapahitas-on, walay-kasingkasing, ug maot nga mga grupo. Gitamay nila ang ordinaryong mga tawo ingong ignorante ug mahugaw, ug gibiaybiay nila ang mga langyaw sa ilang taliwala. Usa ka komentaryo bahin sa ilang tinamdan nag-ingon: “Ang usa ka tawo nga sobrang magpakarga sa kabayo karong mga adlawa manubag sa balaod. Komosta ang usa ka tawo nga nagpapas-an ug 613 ka sugo sa ‘mga tawo sa yuta’ nga walay relihiyosong pagbansay; ug unya, kay walay bisan unsay gihimo aron tabangan sila, naghukom kanila ingon nga walay-diyos?” Siyempre, ang tinuod nga palas-anon maoy, dili ang Moisesnong Kasugoan, kondili ang hilabihan ka daghang tradisyon nga gipahamtang diha sa mga tawo.
Tinuod nga Hinungdan sa Kalisod
9. Sa unsang paagi ang mga kahimtang sa mga tawo sa panahon ni Jesus ikatandi sa panahon ni Haring Solomon?
9 Usahay ang materyal nga palas-anon sa mga tawo maoy usa usab nga mabug-at, mao nga dihay kaylap nga kakabos. Kinahanglang bayran sa mga Israelinhon ang makataronganong mga buhis nga gipahamtang sa Moisesnong Kasugoan. Unya sa panahon sa pagmando ni Solomon, gipangabaga sa mga tawo ang mahal kaayo nga mga proyekto sa nasod sama sa pagtukod sa templo ug ubang mga edipisyo. (1 Hari 7:1-8; 9:17-19) Bisan pa, ang Bibliya nag-asoy kanato nga ang mga tawo “nangaon ug nanginom ug nanagkalipay. . . . Ug ang Juda ug ang Israel nagpadayon sa pagpuyo diha sa kasegurohan, ang tagsatagsa ilalom sa iyang kaugalingong paras ug ilalom sa iyang kaugalingong kahoyng igos, gikan sa Dan ngadto sa Beer-sheba, sa tanang adlaw ni Solomon.” (1 Hari 4:20, 25) Unsay hinungdan sa kalainan?
10. Unsa ang hinungdan sa kahimtang sa Israel sa unang siglo?
10 Basta magpabilin ang nasod nga malig-on sa matuod nga pagsimba, ilang natagamtam ang pabor ni Jehova ug gipanalanginan ug kasegurohan ug kadagaya bisan pa sa mabug-at nga gastos sa nasod. Ugaling, si Jehova nagpasidaan nga kon sila “motalikod gikan sa pagsunod [kaniya] ug dili magbantay sa [iyang] kasugoan,” antoson nila ang grabeng mga kalisod. Sa pagkamatuod, “ang Israel mahimong usa ka sanglitanan ug talamayon taliwala sa tanang katawhan.” (1 Hari 9:6, 7) Mao gayod kanay nahitabo. Ang Israel nailalom sa langyaw nga pagmando, ug ang mahimayaon niadto nga gingharian nahimo na lamang nga usa ka kolonya sa langyawng empiryo. Pagkadako sa bili ang gibayad tungod sa pagpabaya sa ilang espirituwal nga mga obligasyon!
11. Nganong mibati si Jesus nga ang katawhan “pinanitan ug nagkatibulaag samag mga karnero nga walay pastol”?
11 Kining tanan makatabang kanato sa pagsabot kon nganong gibati ni Jesus nga ang mga tawo nga iyang nakita “pinanitan ug nagkatibulaag.” Kini sila maoy mga Israelinhon, katawhan ni Jehova, diin ang kadaghanan naningkamot sa pagkinabuhi sumala sa kabalaoran sa Diyos ug sa pagpadayon sa ilang pagsimba sa usa ka paagi nga madawat. Bisan pa, sila gipahimuslan ug tinamakan dili lamang sa politikanhon ug komersiyal nga mga gahom kondili usab sa apostatang relihiyosong mga lider sa taliwala kanila. Sila “samag mga karnero nga walay pastol” tungod kay walay usa ang moatiman kanila o modepensa kanila. Sila nagkinahanglag tabang aron masagubang ang mapintas kaayo nga mga kamatuoran. Pagkatukma sa panahon ang mahigugmaon ug malumong imbitasyon ni Jesus!
Ang Pagdapit ni Jesus Karon
12. Unsang mga pag-ipit ang gibati sa mga alagad sa Diyos ug sa ubang sinserong mga tawo karon?
12 Sa daghang paagi ang mga butang kaamgid karon. Ang sinserong mga tawo nga naningkamot nga magmatinud-anon sa ilang panginabuhi nakakaplag nga ang mga kalisod ug mga ginapangayo sa dunot nga sistema sa mga butang lisod pas-anon. Bisan kadtong nagpahinungod na sa ilang mga kinabuhi kang Jehova apektado. Ang mga taho nagpakita nga ang pipila taliwala sa mga alagad ni Jehova nakakaplag nga misamot kalisod ang pagtuman sa tanan nilang mga responsibilidad, bisan pag gusto nila. Sila mibati nga nabug-atan, gikapoy, naugtas na. Ang pipila mibati pa gani nga usa ka kahupayan kon makahunong na unta sila sa pagkabalaka ug magpalayo sa mga mata sa mga tawo aron sila makapamalandong. Mibati ka ba nga ingon niana sukad? May nailhan ka ba nga suod nimo nga anaa nianang kahimtanga? Oo, ang makapalipay nga imbitasyon ni Jesus adunay dakong kahulogan alang kanato karon.
13. Nganong makatino kita nga makatabang si Jesus sa atong pagkakaplag ug kahupayan ug kahayahay?
13 Sa wala pa ihatag ni Jesus ang mahigugmaong imbitasyon, siya miingon: “Ang tanang butang gikatugyan na kanako sa akong Amahan, ug walay usa nga bug-os nakaila sa Anak gawas sa Amahan, ni si bisan kinsa bug-os nakaila sa Amahan gawas sa Anak ug kaniya kang kinsa buot sa Anak ipadayag siya.” (Mateo 11:27) Tungod niining suod nga relasyon ni Jesus ug sa iyang Amahan, kita gipasaligan nga pinaagi sa pagdawat sa imbitasyon ni Jesus ug mahimong iyang mga tinun-an, kita makasulod sa usa ka suod, personal nga relasyon uban kang Jehova, “ang Diyos sa tanang paghupay.” (2 Corinto 1:3; itandi ang Juan 14:6.) Dugang pa, sanglit ang ‘tanang mga butang gikatugyan na kaniya,’ si Jesu-Kristo lamang ang may gahom ug awtoridad sa pagpagaan sa atong mga palas-anon. Hain niini? Kadtong gipahamtang sa dunot nga politikal, komersiyal, ug relihiyosong sistema, maingon man sa palas-anon nga gipahamtang sa atong napanunod nga sala ug pagkadili-hingpit. Unsa ka makapadasig ug makapasalig nga hunahuna kana sukad pa sa sinugdanan!
14. Gikan sa unsang pagpangabudlay nga si Jesus makataganag kahayahay?
14 Si Jesus nagpadayon sa pag-ingon: “Umari kanako, kamong tanan nga nagabudlay ug nabug-atan, ug ako magapalagsik kaninyo.” (Mateo 11:28) Sa pagkamatuod si Jesus wala maghisgot batok sa mabug-at nga trabaho, kay kanunay niyang gitambagan ang iyang mga tinun-an nga magkugi sila sa ilang buluhaton. (Lucas 13:24) Apan ang “nagabudlay” (“nagahago,” Kingdom Interlinear) nagpasabot sa dugay ug makakapoy nga trabaho, nga sagad walay mapuslanon nga resulta. Ug ang “nabug-atan” may ideya nga nabug-atan nga labaw sa normal nga maarangan. Ang kalainan mahimong ipaamgid sa usa ka tawo nga nangalot ug natagong bahandi ug sa usa nga nangalot ug kanal sa kampo sa pinugos nga pagtrabaho. Parehas nga mabug-at nga trabaho ang gihimo nilang duha. Alang sa usa, ang trabaho gihimo nga maikagon, apan alang sa usa pa, kadto maoy usa ka walay kataposan makalaay nga trabaho. Ang kalainan mao ang katuyoan sa trabaho o ang kakulang niini.
15. (a) Unsang mga pangutana ang angay natong ipangutana sa atong kaugalingon kon bation nato nga nagpas-an kita ug mabug-at nga palas-anon sa atong mga abaga? (b) Unsay ikasulti bahin sa tuboran sa atong mga palas-anon?
15 Mibati ka ba nga ikaw ‘nabudlayan ug nabug-atan,’ nga hilabihan ra kaayo ka daghan ang gipangayo sa imong panahon ug kusog? Ang mga palas-anon ba nga imong gipas-an daw bug-at ra kaayo kanimo? Kon mao, mahimong makatabang ang pagpangutana sa imong kaugalingon, ‘Alang sa unsa ang akong gipangabudlayan? Unsang matanga sa luwan ang akong ginapas-an?’ Mahitungod niini, ang usa ka komentarista sa Bibliya nag-ingon kapin sa 80 ka tuig kanhi: “Kon atong palandongon ang mga palas-anon sa kinabuhi mahulog kini sa duha ka klase; mahimong matawag kini nato ingong ang pinahamtang sa kaugalingon ug ang dili-malikayan: kadtong tungod, ug kadtong dili tungod, sa atong kaugalingong mga aksiyon.” Unya siya midugang: “Daghan kanato ang makurat, human sa pagtukig maayo sa kaugalingon, sa pagkakaplag nga ang dakong bahin sa atong tanang mga palas-anon maoy pinahamtang sa kaugalingon.”
16. Unsang mga palas-anon nga sa pagkadili-maalamon mapahamtang nato sa atong kaugalingon?
16 Unsa ang pila sa mga palas-anon nga mahimong ikapahamtang nato sa atong kaugalingon? Kita nagkinabuhi karon sa usa ka materyalistiko, mahigugmaog-kalipay, ug imoral nga kalibotan. (2 Timoteo 3:1-5) Bisan ang dedikadong mga Kristohanon mailalom kanunay sa pag-ipit sa pagsunod sa mga uso ug mga estilo sa kinabuhi sa kalibotan. Si apostol Juan nagsulat bahin sa “tinguha sa unod ug sa tinguha sa mga mata ug sa mapagawalong pagpasundayag sa kahinguhaan sa kinabuhi sa usa.” (1 Juan 2:16) Kita daling maapektohan niining gamhanang mga impluwensiya. Nahibaloan na nga ang uban andam magpaputos sa utang aron matagamtam ang mas daghang kalibotanong mga kalipayan o aron mahuptan ang usa ka estilo sa kinabuhi. Unya ilang makita nga kinahanglan silang mogugol ug dakong panahon sa trabaho, o mokuhag daghang trabaho, aron may kuwarta nga ibayad sa ilang mga utang.
17. Unsang kahimtang ang mahimong magpasamot sa kabug-at sa pagpas-an sa luwan, ug sa unsang paagi kini masulbad?
17 Samtang mangatarongan ang usa ka tawo nga dili daotan ang magbaton ug pipila ka butang nga nabatonan sa uban o himoon ang pipila ka butang nga ginahimo sa uban, hinungdanong palandongon kon nagdugang ba siyag kabug-at sa iyang luwan nga wala kinahanglana. (1 Corinto 10:23) Sanglit limitado lamang ang madala sa usa ka tawo, kinahanglang adunay usa ka butang nga kuhaon aron makadala pag lain nga luwan. Sa masubsob, ang mga butang nga kinahanglanon sa atong espirituwal nga kaayohan—personal nga pagtuon sa Bibliya, pagtambong sa mga miting, ug pag-alagad sa kanataran—ang una nga ginakuha. Ang resulta mao ang pagkawala sa espirituwal nga kusog, diin, sa baylo, makadugang sa kabug-at sa pagpas-an sa luwan. Si Jesu-Kristo nagpasidaan batok sa maong kapeligrohan sa dihang siya miingon: “Tagda ang inyong kaugalingon nga ang inyong mga kasingkasing dili gayod mabug-atan sa pagpalabig kaon ug pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat nganha kaninyo ingon nga usa ka lit-ag.” (Lucas 21:34, 35; Hebreohanon 12:1) Lisod mailhan ang usa ka lit-ag ug makaikyas niini kon ang usa nabug-atan ug gikapoy.
Kahupayan ug Kahayahay
18. Unsay gitanyag ni Jesus niadtong moduol kaniya?
18 Busa, sa mahigugmaon si Jesus nagtanyag ug solusyon: “Umari kanako, . . . ug ako magapalagsik kaninyo.” (Mateo 11:28) Ang mga pulong “magapalagsik” dinhi ug “kahayahay” sa bersikulo 29 nagagikan sa Gregong mga pulong nga katugbang sa pulong nga gigamit sa Septuagint nga bersiyon sa paghubad sa Hebreohanong pulong alang sa “igpapahulay” o “pagbantay-sa-igpapahulay.” (Exodo 16:23) Busa, si Jesus wala magsaad nga kadtong moduol kaniya wala nay trabaho, apan siya nagsaad nga palagsikon niya sila aron andam sila sa trabaho nga kinahanglan nilang himoon sumala sa katuyoan sa Diyos.
19. Sa unsang paagi ang usa ‘moduol kang Jesus’?
19 Apan, sa unsang paagi ang usa ‘moduol kang Jesus’? Ngadto sa iyang mga tinun-an, si Jesus miingon: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka ug sa mapinadayonon mosunod kanako.” (Mateo 16:24) Busa, ang pagduol kang Jesus nagkahulogang magpasakop sa kabubut-on sa usa nianang sa kabubut-on sa Diyos ug ni Kristo, dawaton ang pila ka luwan sa responsibilidad, himoon kini nga mapinadayonon. Mabug-at ba kaayo kining tanan? Dako ba kaayo ang bili niini? Atong konsiderahon kon unsa ang giingon ni Jesus human nga gihatag niya ang mahigugmaong imbitasyon ngadto sa mga gikapoy.
Makahinumdom Ka Ba?
◻ Sa unsang mga paagi ang katawhan sa panahon ni Jesus nabug-atan?
◻ Unsa ang matuod nga hinungdan sa kalisod sa katawhan?
◻ Sa unsang paagi atong susihon ang atong kaugalingon kon mobati kita nga nabug-atan na kaayo?
◻ Unsang mga palas-anon nga sa pagkadili-maalamon mapahamtang nato sa atong kaugalingon?
◻ Sa unsang paagi madawat nato ang kahayahay nga gisaad ni Jesus?
[Hulagway sa panid 15]
Unsa ang pila ka mga palas-anon nga basin atong ipapas-an sa atong kaugalingon?
[Picture Credit Line sa panid 15]
Kortesiya sa Ministri sa Turismo sa Bahamas