Kapitulo Dose

Ang Kahulogan sa Imong Bawtismo

 1. Nganong ang bawtismo sa tubig makapaikag gayod sa matag usa kanato?

SA TUIG 29 K.P., si Jesus gibawtismohan, nga gituslob ni Juan Bawtista sa Suba sa Jordan. Si Jehova nagtan-aw ug nagpahayag ug pag-uyon. (Mateo 3:​16, 17) Sa ingon gipakita ni Jesus ang sumbanan nga sundon sa tanan niyang mga tinun-an. Tulo ug tunga ka tuig sa ulahi, si Jesus naghatag ning mga instruksiyon sa iyang mga tinun-an: “Ang tanang awtoridad gihatag na kanako sa langit ug sa yuta. Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu.” (Mateo 28:​18, 19) Ikaw ba gibawtismohan sumala sa gisugo dinhi ni Jesus? Kon wala, ikaw ba nagapangandam sa pagbuhat sa ingon?

 2. Maylabot sa bawtismo, unsang mga pangutanaha ang kinahanglang tubagon?

² Bawtismado ka man o dili pa, ang tin-awng pagsabot sa bawtismo hinungdanon alang sa tanang buot moalagad kang Jehova ug mopuyo sa iyang matarong bag-ong kalibotan. Ang mga pangutanang kinahanglang tubagon naglakip niini: Ang Kristohanong bawtismo karon sama ba ug kahulogan sa bawtismo ni Jesus? Unsay kahulogan nga mabawtismohan “sa ngalan sa Amahan ug sa Anak ug sa balaang espiritu”? Unsay nalangkit sa pagkinabuhi sumala sa kahulogan sa Kristohanong bawtismo sa tubig?

Mga Bawtismo nga Gihimo ni Juan

 3. Alang lamang kang kinsa ang bawtismo ni Juan?

³ Mga unom ka bulan sa wala pa bawtismohi si Jesus, si Juan Bawtista nagsangyaw sa kamingawan sa Judea nga nag-ingon: “Paghinulsol kamo, kay ang gingharian sa mga langit haduol na.” (Mateo 3:​1, 2) Ang mga tawo nakadungog sa gisulti ni Juan ug misunod niana. Sa dayag ilang gisugid ang ilang mga sala, naghinulsol, ug miadto kang Juan aron iyang bawtismohan sa Suba sa Jordan. Kadtong bawtismoha alang lamang sa mga Hudiyo.​—Lucas 1:13-16; Buhat 13:​23, 24.

 4. Nganong ang mga Hudiyo sa unang siglo kinahanglang maghinulsol dayon?

⁴ Ang maong mga Hudiyo kinahanglang maghinulsol dayon. Sa Bukid sa Sinai sa tuig 1513 W.K.P., ang ilang mga katigulangan nakigsabot ug usa ka nasodnong pakigsaad​—usa ka pormal, solemneng kasabotan—​uban kang Jehova nga Diyos. Apan tungod sa ilang dagkong kasal-anan, sila wala magkinabuhi sumala sa ilang mga kaakohan ilalom sa maong pakigsaad, mao nga sila gihukman pinaagi niini. Nameligro na ang ilang kahimtang sa mga adlaw ni Jesus. Haduol na niadto “ang dako ug makalilisang nga adlaw ni Jehova” nga gitagna ni Malaquias. Sa 70 K.P., kadtong ‘adlawa’ midangat sa dihang ang Romanong kasundalohan naglaglag sa Jerusalem, sa templo niini, ug sa kapin sa usa ka milyong Hudiyo. Si Juan Bawtista, nga masiboton sa putling pagsimba, gipadala nga abante sa wala pa ang maong kalaglagan, ‘aron sa pag-andam alang kang Jehova ug usa ka naandam nga katawhan.’ Sila kinahanglang maghinulsol sa ilang mga sala batok sa pakigsaad sa Moisesnong Kasugoan ug maandam sa pagdawat sa Anak sa Diyos, si Jesus, nga gipadala ni Jehova kanila.​—Malaquias 4:4-6; Lucas 1:17; Buhat 19:4.

 5. (a) Sa pag-abot ni Jesus aron magpabawtismo, nganong midumili si Juan? (b) Unsay gisimbolohan sa bawtismo ni Jesus?

⁵ Lakip sa mga miadto kang Juan aron magpabawtismo mao si Jesus. Apan ngano? Kay nasayod nga si Jesus walay sala nga ikasugid, si Juan miingon: “Ako ang kinahanglan nga imong bawtismohan, ug ikaw hinuon ang mianhi kanako?” Apan ang bawtismo ni Jesus magsimbolo sa lahing butang. Busa si Jesus mitubag: “Pasagdi lamang kini karong panahona, kay sa ingon nga paagi angay nga atong pagatumanon ang tanan nga matarong.” (Mateo 3:13-15) Kay si Jesus walay sala, ang iyang bawtismo wala magsimbolo sa kapasayloan sa sala; ni kinahanglan nga siya magpahinungod sa Diyos, kay siya membro man sa usa ka nasod nga napahinungod na kang Jehova. Hinunoa, ang iyang bawtismo sa nagpangedaron siyag 30 anyos linain gayod kaniya, ug kadto nagsimbolo sa pagtanyag sa iyang kaugalingon ngadto sa iyang langitnong Amahan sa pagbuhat sa Iyang dugang kabubut-on.

 6. Unsa ka ugdang ang pag-isip ni Jesus sa gipabuhat nga kabubut-on sa Diyos alang kaniya?

⁶ Ang kabubut-on sa Diyos alang kang Kristo Jesus naglakip sa kalihokan bahin sa Gingharian. (Lucas 8:1) Naglakip usab kadto sa paghalad sa iyang hingpit tawhanong kinabuhi ingon nga lukat ug ingon nga pasikaranan sa bag-ong pakigsaad. (Mateo 20:28; 26:26-​28; Hebreohanon 10:​5-​10) Ugdang kaayo ang panglantaw ni Jesus sa simbolo sa iyang bawtismo sa tubig. Wala niya tugoti nga malinga ang iyang pagtagad sa ubang mga butang. Hangtod sa kataposan sa iyang yutan-ong kinabuhi, nagmatinumanon siya sa pagbuhat sa kabubut-on sa Diyos, nga naghimo sa pagsangyaw sa Gingharian sa Diyos nga iyang pangunang buluhaton.​—Juan 4:34.

Bawtismo sa Tubig sa Kristohanong mga Tinun-an

 7. Sukad sa Pentekostes 33 K.P., unsay gisugo nga himoon sa mga Kristohanon bahin sa bawtismo?

⁷ Ang unang mga tinun-an ni Jesus gibawtismohan ni Juan sa tubig ug dayon gitultolan ngadto kang Jesus ingong umaabot nga mga membro sa Gingharian sa langit. (Juan 3:25-30) Ilalom sa pagtultol ni Jesus, ang maong mga tinun-an namawtismo usab, nga may samang kahulogan sa bawtismo ni Juan. (Juan 4:​1, 2) Bisan pa niana, sugod sa Pentekostes 33 K.P., nagsugod sila pagtuman sa sugo sa pagbawtismo “sa ngalan sa Amahan ug sa Anak ug sa balaang espiritu.” (Mateo 28:19) Makaplagan mo nga mapuslanon kaayo ang pagrepaso sa kahulogan niini.

 8. Unsay kahulogan nga mabawtismohan “sa ngalan sa Amahan”?

⁸ Unsay kahulogan nga mabawtismohan “sa ngalan sa Amahan”? Nagkahulogan kana sa pagdawat sa iyang ngalan, katungdanan, awtoridad, katuyoan, ug mga balaod. Tagda ang nalangkit niini. (1) Bahin sa iyang ngalan, ang Salmo 83:18 nag-ingon: “Ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” (2) Bahin sa iyang katungdanan, ang 2 Hari 19:15 nag-ingon: “Oh Jehova . . . , ikaw lamang ang matuod nga Diyos.” (3) Bahin sa iyang awtoridad, ang Pinadayag 4:11 nagsugilon kanato: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (4) Angay usab natong ilhon nga si Jehova ang Maghahatag-Kinabuhi, nga maoy iyang tuyo nga luwason kita gikan sa sala ug kamatayon: “Iya ni Jehova ang kaluwasan.” (Salmo 3:8; 36:9) (5) Angay natong dawaton nga si Jehova mao ang Supremong Maghahatag-Balaod: “Si Jehova mao ang atong Maghuhukom, si Jehova mao ang atong Maghahatag-lagda, si Jehova mao ang atong Hari.” (Isaias 33:22) Kay gihuptan niya kanang tanang katungdanan, kita giawhag: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.”​—Mateo 22:37.

 9. Unsay kahulogan nga mabawtismohan “sa ngalan . . . sa Anak”?

⁹ Unsay kahulogan sa bawtismo “sa ngalan . . . sa Anak?” Nagkahulogan kana sa pag-ila sa ngalan, katungdanan, ug awtoridad ni Jesu-Kristo. Ang iyang ngalan, Jesus, nagkahulogang “si Jehova ang Kaluwasan.” Nagsukad ang iyang katungdanan sa kamatuoran nga siya mao ang bugtong Anak sa Diyos, ang una sa kalalangan sa Diyos. (Mateo 16:16; Colosas 1:​15, 16) Bahin niini nga Anak, ang Juan 3:16 nag-ingon kanato: “Gihigugma pag-ayo sa Diyos ang kalibotan [sa nagkinahanglag lukat nga katawhan] nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” Kay si Jesus namatay nga matinumanon, ang Diyos nagbanhaw kaniya gikan sa mga patay ug naghatag kaniyag dugang awtoridad. Matod ni apostol Pablo, ang Diyos “nagbayaw [kang Jesus] ngadto sa usa ka labaw nga katungdanan” sa uniberso, ikaduha lamang kang Jehova. Mao nga “sa ngalan ni Jesus moluhod ang tanang tuhod . . . ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.” (Filipos 2:9-11) Nagpasabot kana sa pagsunod sa mga sugo ni Jesus, nga gikan mismo kang Jehova.​—Juan 15:10.

10. Unsay kahulogan nga mabawtismohan “sa ngalan . . . sa balaang espiritu”?

¹⁰ Unsay kahulogan nga mabawtismohan “sa ngalan . . . sa balaang espiritu”? Nagkahulogan kana sa pag-ila sa papel ug kalihokan sa balaang espiritu. Ug unsa man ang balaang espiritu? Kini mao ang aktibong puwersa ni Jehova, nga pinaagi niana iyang ginatuman ang iyang mga katuyoan. Giingnan ni Jesus ang iyang mga sumusunod: “Hangyoon ko ang Amahan ug hatagan kamo niya ug laing magtatabang nga magauban kaninyo hangtod sa kahangtoran, ang espiritu sa kamatuoran.” (Juan 14:​16, 17) Makapaarang kini kanila sa pagbuhat sa unsa? Si Jesus dugang nag-ingon kanila: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buhat 1:8) Pinaagi sa balaang espiritu, si Jehova nagdasig usab sa pagsulat sa Bibliya: “Walay panagna bisan kanus-a nga midangat pinaagi sa kabubut-on sa tawo, hinunoa ang mga tawo nagsulti gikan sa Diyos samtang sila giagak sa balaang espiritu.” (2 Pedro 1:21) Busa atong ilhon ang papel sa balaang espiritu inigtuon nato sa Bibliya. Ang laing paagi sa atong pag-ila sa balaang espiritu maoy pinaagi sa paghangyo kang Jehova nga tabangan kita sa pagpasundayag sa mga “bunga sa espiritu,” nga mao ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”​—Galacia 5:​22, 23.

11. (a) Unsa ang tinuod nga kahulogan sa bawtismo sa atong adlaw? (b) Sa unsang paagi ang bawtismo nahisamag pagkamatay ug pagkabuhi?

¹¹ Ang unang mga tawo nga nabawtismohan uyon sa mga instruksiyon ni Jesus mao ang mga Hudiyo ug Hudiyong mga kinabig, sugod sa 33 K.P. Wala madugay human niadto, ang pribilehiyo sa Kristohanong pagkatinun-an gipadangat ngadto sa mga Samarianhon. Dayon, sa 36 K.P., ang pagtawag gipadangat ngadto sa dili tinuli nga mga Hentil. Sa dili pa bawtismohan, ang mga Samarianhon ug mga Hentil kinahanglang mohimog personal nga pagpahinungod kang Jehova sa pag-alagad kaniya ingong mga tinun-an sa iyang Anak. Kini nagpadayon nga mao ang kahulogan sa Kristohanong bawtismo sa tubig hangtod karon. Ang bug-os nga pagtuslob sa tubig maoy haom nga simbolo niining personal nga pagpahinungod, kay ang bawtismo maoy usa ka simbolikong paglubong. Ang pagtuslob kanimo sa tubig panahon sa bawtismo naghawas sa pagkamatay sa imong kanhing paagi sa kinabuhi. Ang paghaw-as sa tubig nagsimbolo sa imong pagkabuhi aron sa pagbuhat sa kabubut-on sa Diyos. Kining “usa ka bawtismo” mapadapat sa tanang mahimong tinuod nga mga Kristohanon. Panahon sa bawtismo sila mahimong Kristohanong mga Saksi ni Jehova, nga ordinadong mga ministro sa Diyos.​—Efeso 4:5; 2 Corinto 6:​3, 4.

12. Unsay katumbas sa Kristohanong bawtismo sa tubig, ug sa unsang paagi?

¹² Ang maong bawtismo adunay dako, nagaluwas nga bili sa panan-aw sa Diyos. Pananglitan, human hisgoti ang pagtukod ni Noe sa arka, diin siya ug ang iyang pamilya naluwas latas sa Lunop, si apostol Pedro misulat: “Kana nga motumbas niini karon nagaluwas usab kaninyo, nga mao, ang bawtismo, (dili ang pagkuha sa kahugawan sa unod, kondili ang paghangyo sa Diyos alang sa usa ka maayong tanlag,) pinaagi sa pagkabanhaw ni Jesu-Kristo.” (1 Pedro 3:21) Ang arka maoy usa ka makitang pamatuod nga si Noe matinumanong nagbuhat sa gipabuhat kaniya sa Diyos. Human matapos ang pagbuhat sa arka, “ang kalibotan niadtong panahona nakaagom sa kalaglagan sa dihang kini gilunopan sa tubig.” (2 Pedro 3:6) Apan si Noe ug ang iyang pamilya, “walo ka kalag, ang giluwas latas sa tubig.”​—1 Pedro 3:20.

13. Gikan sa unsa nga naluwas ang usa ka Kristohanon pinaagi sa bawtismo sa tubig?

¹³ Karon, kadtong magpahinungod kang Jehova pinasukad sa pagtuo diha sa gibanhaw nga si Kristo bawtismohan isip simbolo sa maong pagpahinungod. Magpadayon sila sa pagbuhat sa kabubut-on sa Diyos alang sa atong adlaw ug maluwas gikan sa presenteng daotang kalibotan. (Galacia 1:​3, 4) Wala na sila magpadulong sa kalaglagan uban sa presenteng daotang sistema sa mga butang. Sila giluwas na gikan niini ug gihatagan sa Diyos ug maayong tanlag. Si apostol Juan nagpasalig sa mga alagad sa Diyos: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”​—1 Juan 2:17.

Pagtuman sa Atong mga Kaakohan

14. Nganong dili lamang pinaagi sa bawtismo magarantiyahan ang kaluwasan?

¹⁴ Sayop ang paghinapos nga pinaagi lamang sa bawtismo magarantiyahan na ang atong kaluwasan. Kini may bili lamang kon ang usa ka tawo tinuod nga nagpahinungod kang Jehova pinaagi kang Jesu-Kristo ug human niana magatuman sa kabubut-on sa Diyos, nga matinumanon hangtod sa kataposan. “Siya nga nakalahutay hangtod sa kataposan mao ang maluwas.”​—Mateo 24:13.

15. (a) Unsay kabubut-on sa Diyos karon alang sa bawtismadong mga Kristohanon? (b) Unsa gayod ka hinungdanon ang Kristohanong pagkatinun-an sa atong mga kinabuhi?

¹⁵ Ang kabubut-on sa Diyos kang Jesus naglakip sa kon unsaon niya paggamit ang iyang kinabuhi ingong usa ka tawo. Kadto pagapatyon ingon nga usa ka halad. Sa atong bahin, ang atong lawas kinahanglang ipresentar ngadto sa Diyos, ug kinahanglang kita magkinabuhi ug usa ka nagasakripisyo-sa-kaugalingong kinabuhi pinaagi sa pagbuhat sa kabubut-on sa Diyos. (Roma 12:​1, 2) Dili gayod kita makaingon nga kita nagabuhat sa kabubut-on sa Diyos kon bisan sa panagsa lamang kita tinuyong mogawi nga sama sa kalibotan alirong nato o kon atong isentro ang atong kinabuhi sa hinakog nga mga pangagpas, nga maghatag lamag taphaw nga pag-alagad sa Diyos. (1 Pedro 4:1-3; 1 Juan 2:​15, 16) Sa dihang ang usa ka Hudiyo nangutana kon unsay iyang buhaton aron makabatog kinabuhing dayon, giila ni Jesus ang kahinungdanon sa pagkinabuhi nga hinlo sa moral. Apan unya iyang gipunting ang mas hinungdanong butang: ang panginahanglan nga mahimong usa ka Kristohanong tinun-an, usa ka sumusunod ni Jesus. Kinahanglang mao kana ang pangunang butang sa kinabuhi. Kini dili mahimong ikaduha lamang sa materyal nga mga pangagpas.​—Mateo 19:16-21.

16. (a) Unsang kaakohan ang anaa sa tanang Kristohanon bahin sa Gingharian? (b) Sumala sa gipakita sa mga panid 116 ug 117, unsa ang pipila ka epektibong paagi sa pagbuhat sa buluhaton sa Gingharian? (c) Ang atong bug-os kasingkasing nga pagpakigbahin sa pagsangyawng buluhaton magpamatuod sa unsa?

¹⁶ Kinahanglang ipasiugda pag-usab nga ang kabubut-on sa Diyos alang kang Jesus naglakip sa hinungdanong kalihokan bahin sa Gingharian sa Diyos. Si Jesus gidihogan nga mahimong Hari. Apan sa dinhi pa sa yuta, naghatag usab siyag mainitong pagpamatuod bahin sa Gingharian. Kita adunay samang buluhatong pagsangyaw nga buhaton, ug ania kanato ang tanang rason sa pagbuhat niana sa bug-os kasingkasing. Sa pagbuhat sa ingon, ikapakita nato ang atong pagpasalamat sa pagkasoberano ni Jehova ug atong gugma sa mga isigkatawo. (Mateo 22:36-40) Atong ikapakita usab nga kita nahiusa uban sa atong mga isigkamagsisimba sa tibuok kalibotan, nga silang tanan maoy mga magwawali sa Gingharian. Sa tingob, diha sa tibuok kalibotang panaghiusa, kita modasdas ngadto sa tumong sa walay kataposang kinabuhi diha sa yutan-ong dominyo sa maong Gingharian.

Repasong Panaghisgot

• Unsang mga kasamahan ug mga kalainan ang anaa tali sa bawtismo ni Jesus ug sa bawtismo sa tubig karon?

• Unsay kahulogan nga mabawtismohan “sa ngalan sa Amahan ug sa Anak ug sa balaang espiritu”?

• Unsay nalangkit sa pagtuman sa mga kaakohan sa Kristohanong bawtismo sa tubig?

[Mga hulagway sa panid 116, 117]

PIPILA KA PAAGI SA PAGWALI SA GINGHARIAN

Diha sa mga pultahan

Ngadto sa mga paryente

Sa mga kauban sa trabaho

Ngadto sa mga eskolmet

Diha sa kadalanan

Pinaagi sa pagbalikduaw sa mga interesado

Diha sa mga pagtuon sa Bibliya sa balay