LEKSIYON 15
Kinsa si Jesus?
Si Jesus ang usa sa pinakailadong tawo sa kasaysayan. Daghan ang nahibalo sa ngalan ni Jesus pero wala kaayo silay nahibaloan bahin niya, ug ang mga tawo lainlain ug ideya kon kinsa gyod si Jesus. Unsay giingon sa Bibliya bahin niya?
1. Kinsa si Jesus?
Si Jesus gamhanang espiritu nga nagpuyo sa langit. Siya ang pinakaunang gilalang ni Jehova nga Diyos. Tungod ana, siya gitawag nga “panganay sa tanang kalalangan.” (Colosas 1:15) Ang Bibliya nag-ingon nga si Jesus ang “bugtong nga Anak” sa Diyos, kay si Jesus lang ang direktang gilalang ni Jehova. (Juan 3:16) Si Jesus mitabang sa iyang Amahan, si Jehova, sa paglalang sa tanang ubang butang. (Basaha ang Proverbio 8:30.) Si Jesus nagpabiling suod kang Jehova. Siya maunongong nag-alagad ingong tigpamaba sa Diyos, nga nagpahayag sa Iyang mga mensahe ug instruksiyon. Maong gitawag siya nga “ang Pulong.”—Juan 1:14.
2. Nganong mianhi si Jesus sa yuta?
Mga 2,000 ka tuig kanhi, gigamit ni Jehova ang iyang balaang espiritu aron milagrosong ibalhin ang kinabuhi ni Jesus gikan sa langit ngadto sa tagoangkan sa batan-ong ulay nga si Maria. Niining paagiha, si Jesus nahimong tawo. (Basaha ang Lucas 1:34, 35.) Mianhi si Jesus sa yuta aron mahimong Mesiyas, o Kristo, ug aron luwason ang katawhan.a Ang tanang tagna sa Bibliya bahin sa Mesiyas natuman kaniya, ug nakatabang ni nga mahibalo ang mga tawo nga si Jesus “ang Kristo, ang Anak sa buhi nga Diyos.”—Mateo 16:16.
3. Asa si Jesus karon?
Dihang natapos ang kinabuhi ni Jesus sa yuta, siya gibanhaw ingong espiritu ug mibalik sa langit. Didto, “gibayaw siya sa Diyos ngadto sa mas taas nga posisyon.” (Filipos 2:9) Karon, si Jesus naay dakong awtoridad—si Jehova lang ang mas labaw niya.
TUN-IG DUGANG
Sayrag dugang kon kinsa gyod si Jesus ug kon nganong importante kaayo nga mokat-on ta bahin niya.
4. Si Jesus dili Labing Gamhanang Diyos
Ang Bibliya nagtudlo nga bisag gamhanang espiritu si Jesus didto sa langit, siya nagpasakop sa iyang Diyos ug Amahan, si Jehova. Nganong makaingon ta niana? I-play ang VIDEO aron imong masayran ang gitudlo sa Bibliya kon sa unsang paagi si Jesus lahi sa Diyos.
Ang mosunod nga mga teksto motabang natong masabtan ang relasyon ni Jehova ug Jesus. Basaha ang matag teksto, ug dayon hisgoti ang mosunod nga mga pangutana:
Basaha ang Lucas 1:30-32.
Sumala sa anghel, unsay relasyon ni Jesus ug Jehova nga Diyos, ang “Labing Hataas”?
Basaha ang Mateo 3:16, 17.
Sa bawtismo ni Jesus, unsay giingon sa tingog gikan sa langit?
Sa imong hunahuna, kang kinsa kaha tong tingog?
Basaha ang Juan 14:28.
Kinsa ang mas taas ug edad ug mas dakog awtoridad? Ang amahan o anak?
Unsay gipasabot ni Jesus dihang siya miingon nga Amahan niya si Jehova?
Basaha ang Juan 12:49.
Naghunahuna ba si Jesus nga siya ug ang iyang Amahan usa ra? Unsay imong hunahuna?
5. Kon unsay nagpamatuod nga si Jesus ang Mesiyas
Ang Bibliya daghag tagna nga motabang sa mga tawo nga mailhan ang Mesiyas—ang gipili sa Diyos nga moluwas sa katawhan. I-play ang VIDEO aron imong masayran ang pipila sa mga tagna nga natuman kang Jesus dihang dinhi siya sa yuta.
Basaha kini nga mga tagna sa Bibliya, ug dayon hisgoti ang mosunod nga mga pangutana:
Basaha ang Miqueas 5:2 aron imong masayran kon asa matawo ang Mesiyas.b
Natuman ba ni nga tagna dihang natawo si Jesus?—Mateo 2:1.
Basaha ang Salmo 34:20 ug Zacarias 12:10 aron imong masayran ang mga detalye nga gitagna bahin sa kamatayon sa Mesiyas.
Natuman ba ni nga mga tagna?—Juan 19:33-37.
Para nimo, gimaniobra kaha ni Jesus ang mga hitabo aron matuman ni nga mga tagna?
Unsay gipakita niini bahin kang Jesus?
6. Makabenepisyo ta sa pagkat-on bahin kang Jesus
Gipasiugda sa Bibliya ang kaimportante sa pagkat-on bahin kang Jesus ug sa iyang papel. Basaha ang Juan 14:6 ug 17:3, ug dayon hisgoti kini nga pangutana:
Nganong importante ang pagkat-on bahin kang Jesus?
Gibuksan ni Jesus ang dalan aron mahimo tang higala sa Diyos. Gitudlo niya ang kamatuoran bahin kang Jehova, ug pinaagi niya, makabaton tag kinabuhi nga walay kataposan
ANG UBAN MOINGON: “Ang mga Saksi ni Jehova dili motuo kang Jesus.”
Unsay imong itubag?
SUMARYO
Si Jesus gamhanang espiritu. Siya ang Anak sa Diyos ug ang Mesiyas.
Review
Nganong si Jesus gitawag nga “panganay sa tanang kalalangan”?
Sa wala pa moanhi si Jesus sa yuta, unsay iyang gihimo?
Giunsa nato pagkahibalo nga si Jesus ang Mesiyas?
SUSIHA
Susihag dugang ang papel ni Jesus ingong Mesiyas.
“Ang mga Tagna ba Bahin sa Mesiyas Nagpamatuod nga si Jesus ang Mesiyas?” (Web article)
Sayra kon gitudlo ba sa Bibliya nga ang Diyos nahimong amahan kang Jesus sa literal nga paagi, nga parehas nianang pagpatungha sa mga tawo ug anak.
Matikdi kon nganong ang Trinidad dili pagtulon-an sa Bibliya.
Basaha kon sa unsang paagi nausab ang kinabuhi sa usa ka babaye human niya susiha kon unsay giingon sa Bibliya bahin kang Jesus.
a Ang leksiyon 26 ug 27 maghisgot kon nganong kinahanglang luwason ang katawhan ug kon unsaon ta pagluwas ni Jesus.