Si Jehova Takos sa Walay Kataposang Pagdayeg
“Sa tibuok adlaw pagahimayaon ko ikaw, ug pagadayegon ko ang imong ngalan sa panahong walay tino, bisan sa walay kataposan.”—SALMO 145:2.
1. Nganong daghang katarongan si David sa pagdayeg kang Jehova?
ANG maunongong alagad ni Jehova nga si David adunay daghang katarongan sa pagdayeg sa Diyos. Kining ilado kaayong hari sa karaang Israel nahibalo sa pagkadako ug pagkamaayo ni Jehova ug nakaamgo nga ang Iyang pagkahari maoy sa walay kataposan. Ang Labing Hataas takos sa pagdayeg tungod sa pagtagbaw sa tinguha sa tanang buhing butang ug sa pagpaabot sa kaluoy ngadto sa iyang matinumanong mga alagad.
2. (a) Sa unsang paagi gihan-ay ang Salmo 145? (b) Unsang mga pangutana ang atong pagatagdon?
2 Si David nagtanyag sa maong pagdayeg ngadto sa Diyos diha sa ika-145 nga Salmo. Ang matag bersikulo niining akrostiko nga salmo gisugdan sa nagsunodsunod nga letra sa Hebreohanong alpabeto, apan ang usa ka letra (nun) gikuha. Ang akrostiko nga pagkahan-ay tingali nagsilbing tabang sa pagmemorya. Ang Salmo 145 nagapasidungog kang Jehova, sama niining mga pulonga: “Sa tibuok adlaw pagahimayaon ko ikaw, ug pagadayegon ko ang imong ngalan sa panahong walay tino, bisan sa walay kataposan.” (Salmo 145:2) Apan sa unsang paagi kining salmoha nagaapektar kanato? Unsay mahimo niini alang sa atong relasyon uban sa Diyos? Aron masuta, atong konsiderahon una ang mga bersikulo 1 ngadto sa 10.
Ang Pagkadako ni Jehova Dili Matukib
3. Sama kang David, unsay nautang nato sa ‘atong Diyos nga Hari,’ ug ngano?
3 Si David maoy usa ka hari, apan siya miila sa pagkasoberano ni Jehova ibabaw kaniya, nga nagaingon: “Pagabayawon ko ikaw, O Diyos ko nga Hari, ug pagahimayaon ko ang imong ngalan sa panahong walay tino, bisan hangtod sa walay kataposan.” (Salmo 145:1) Uban sa samang pagtahod, ang mga Saksi ni Jehova nagatuboy sa ngalan sa Diyos ug nagadayeg kaniya sa tibuok yuta. Ang atong kinabuhi matugob samtang makig-ambit kita sa maong buluhaton. Sama kang David, kita nakautang ug pagkamasinundanon ug pagpasakop kang Jehova ingong ‘atong Diyos nga Hari.’ Ug nganong dili? Siya mao ang “Hari sa walay kataposan.” (Pinadayag 15:3) Dugang pa, ang Dakong David, si Jesu-Kristo, si kinsa nagmando na gikan sa langitnong Bukid sa Zion sukad sa 1914, nagtagana kanato ug maayo kaayong pananglitan sa pagpasakop kang Jehova, ang Hari nga Walay Kataposan.
4. Sa unsang paagi atong ‘mahimaya ang ngalan sa Diyos’?
4 Si David miingon nga iyang ‘himayaon ang ngalan sa Diyos.’ Sa unsang paagi posible kini sa usa ka yanong tawo lamang? Buweno, lakip sa ubang mga butang, ang paghimayag usa ka tawo nagkahulogang mosulti ug maayo bahin kaniya. Ang paghimaya sa ngalan sa Diyos nagpaila nga kita adunay malig-ong gugma alang kaniya ug sa iyang balaang ngalan, Jehova. Kita dili gayod moreklamo bahin sa Diyos, dili gayod siya pangitaan ug sayop, dili gayod magduhaduha sa iyang pagkamaayo. Diha lamang kon atong nahuptan ang maong tinamdan, nakahimog pagpahinungod kang Jehova, ug nagahupot sa integridad isip iyang bawtismadong Saksi nga kita makaingon uban kang David nga kita ‘magahimaya sa ngalan ni Jehova sa walay kataposan.’ Kon magpabilin kita diha sa gugma sa Diyos, atong madawat ang gasa sa kinabuhing dayon ug busa makahimaya kang Jehova sa walay kataposan.—Judas 20, 21.
5. Ang tinguha sa paghimaya kang Jehova “sa tibuok adlaw” adunay unsang epekto kanato?
5 Kon tinuod natong gihigugma ang atong Maghahatag-ug-Kinabuhi, kita moduyog kang David sa pag-ingon: “Sa tibuok adlaw pagahimayaon ko ikaw, ug pagadayegon ko ang imong ngalan sa panahong walay tino, bisan sa walay kataposan.” (Salmo 145:2) Pagkalaay sa usa ka adlaw kon kita dili makahimaya sa Diyos! Hinaot nga kita dili kaayo puliki o mabalak-on kaayo sa materyal nga mga butang nga sa ingon kita mapakyas sa pagsulti ug maayo bahin sa atong langitnong Amahan o sa pag-ampo kaniya sa adlaw-adlaw. Si Jesus nagpaila nga kita kinahanglang mag-ampo kada adlaw sa dihang siya miingon diha sa sulondang pag-ampo: “Hatagi kami sa among kalan-on sa matag adlaw sumala sa gikinahanglan sa usa ka adlaw.” (Lucas 11:3) Daghan niadtong anaa sa bug-os panahon nagadayeg sa Diyos samtang sila nagapakigbahin sa Kristohanong ministeryo. Apan bisan unsa pay atong mga sirkumstansiya, ang atong kasingkasing angay mopalihok kanato sa pagdayeg sa Diyos sa usa ka paagi sa matag adlaw. Ug hunahunaa lang kana! Ingong dedikadong mga Saksi ni Jehova nga may paglaom sa kinabuhing dayon, kita adunay dakong palaabuton sa pagdayeg sa iyang ngalan sa walay kataposan.—Juan 17:3.
6. Nganong si Jehova ‘takos sa labing dako nga pagdayeg’?
6 Kita sa pagkamatuod adunay katarongan sa pagdayeg sa Diyos sa tibuok adlaw, kay si David midugang: “Dako si Jehova ug takos gayod nga pagadayegon, ug ang iyang pagkadako dili matukib.” (Salmo 145:3) Dako gayod si Jehova sa pagkaagi nga walay katumbas kaniya, ug ang iyang pagkasoberano bug-os. Ang Babilonyanhong haring Nabucodonosor miadmiter: “Walay makapugong sa kamot [sa Diyos] kun makasulti kaniya, ‘Unsay imong ginabuhat?’” (Daniel 4:34, 35) Si Jehova “pagakahadlokan ibabaw sa tanang mga diyos.” (Salmo 96:4) Dili ikahibulong nga siya “takos sa labing dako nga pagdayeg.” Gani, walay mga pulong sa pagdayeg nga hataas kaayo kon magabayaw kang Jehova! Siya takos sa walay-kinotuban, walay kataposang pagdayeg.
7. Unsay nagpamatuod nga ang sa Diyos nga “pagkadako dili matukib”?
7 Ang “pagkadako [ni Jehova] dili matukib.” Bisan unsa pa siya kadako sa lawas, ang iyang pagkadako nahasandig sa matang sa iyang pagka Diyos. Oo, ang mga butang nga iyang gilalang katingalahan kaayo alang kanato sa pagsabot, ug kita mismo maoy “katingalahan nga pagkabuhat.” (Salmo 139:14; Job 9:10; 37:5) Labot pa, pagkahalangdon sa paggawi ni Jehova nga Diyos! Siya matinumanong nagatuman sa iyang mga saad ug mahigugmaong nagapadayag sa iyang mga katuyoan. Bisan pa, dili gayod kita makadangat sa pagkahibalo sa tanang butang mahitungod sa Diyos. Latas sa panahong walay kataposan, kita motubo ra sa pagkahibalo mahitungod kaniya, sa iyang kalalangan, ug sa iyang mga katuyoan.—Roma 11:33-36.
Dayega ang mga Buhat ni Jehova
8. (a) Sa unsang paagi ang “kaliwatan ngadto sa kaliwatan” nagadayeg sa mga buhat ni Jehova? (b) Kon atong tudloan ang atong mga anak bahin sa mga buhat ug mga lihok ni Jehova, unsay kalagmitan nilang paghunahuna bahin sa pagsimba kaniya? (c) Ingong malipayong “kaliwatan,” unsay nahimo sa dinihogang nahibilin?
8 Daghan kaayo ang ikasulti sa pagdayeg sa atong dili matukib dako nga Diyos nga tungod niana si David napukaw sa pag-ingon: “Ang mga kaliwatan ngadto sa kaliwatan magadayeg sa imong mga buhat, ug mahitungod sa imong gamhanang mga lihok sila magasugid.” (Salmo 145:4) Ang sunodsunod nga mga kaliwatan sa katawhan nagadayeg sa mga buhat ni Jehova ug gisubli pag-asoy ang iyang gamhanang mga buhat. Pagkadako nga pribilehiyo ang pag-asoy niining mga butanga ngadto sa mga tawo nga atong gidumalahan sa mga pagtuon sa Bibliya diha sa balay! Pananglitan, atong sultihan sila nga ang Diyos mao ang naglalang sa tanang mga butang. (Genesis 1:1–2:25; Pinadayag 4:11) Kita makahisgot mahitungod sa iyang gamhanang mga buhat sa panahong iyang giluwas ang mga Israelinhon gikan sa pagkaulipon sa Ehipto, gitabangan sila sa pagpildi sa Canaanhong mga kaaway, giluwas sila gikan sa pagkapuo sa karaang Persia, ug daghan pa. (Exodo 13:8-10; Maghuhukom 4:15; Ester 9:15-17) Ug dili ba kita mapukaw sa pagsulti sa atong mga anak bahin sa mga buhat ug sa mga lihok ni Jehova? Kon atong hatagan ang atong anak sa maong instruksiyon ug ilang makita kita nga malipayong nagaalagad sa Diyos, hayan ilang lantawon ang pagsimba kaniya ingong usa ka kalipay ug magdako uban sa ‘kalipay ni Jehova nga maoy ilang kusog.’ (Nehemias 8:10; Salmo 78:1-4) Gilangkoban ang dinihogang nahibilin sa usa ka malipayong “kaliwatan” sa mga Saksi ni Jehova nga nagadayeg sa mga buhat sa Diyos ngadto sa “dakong panon,” ang bahin sa kaliwatan nga magapuyo sa Paraiso sa yuta.—Pinadayag 7:9.
9. Samtang atong palandongon ang mga buhat ug gamhanang mga lihok sa Diyos, bahin sa unsa nga kita makatino?
9 Samtang atong ginapalandong ang mga buhat ug gamhanang mga lihok sa Diyos, labi pa kitang makombinsir nga si “Jehova dili motalikod sa iyang katawhan tungod sa iyang ngalan.” (1 Samuel 12:22; Salmo 94:14) Kon mag-atubang kita ug mga pagsulay, mga kalisod, ug paglutos, kita mahimong malinawon ug masaligon nga “ang kalinaw sa Diyos” magabantay sa atong mga kasingkasing ug salabotan. (Filipos 4:6, 7) Busa pagkatukma nga atong ipadayag ngadto sa uban ang atong mahigugmaon, mapanalipdanong langitnong Amahan!
10. Ang “katingalahang mga buhat” ni Jehova nag-apil sa unsa, ug sa unsang paagi kita makabenipisyo gikan sa pagpalandong kanila?
10 Kinahanglang gahinan gayod natog panahon ang pagpamalandong sa kahalangdon ug ang mga buhat ni Jehova, kay si David midugang: “Mahitungod sa katahom sa himaya sa imong pagkahalangdon ug sa imong mga buhat nga kahibulongan magpalandong ako.” (Salmo 145:5) Ang pagkahalangdon sa Diyos makapukaw ug kahadlok ug nga walay sama. (Job 37:22; Salmo 148:13) Busa, gipalandong ni David ang katahom sa himaya sa pagkahalangdon ni Jehova. Gipalandong usab sa salmista ang bahin sa “kahibulongang mga buhat” ni Jehova. Apil niini ang pagpakanaog sa balaang hustisya sa paglaglag sa mga makasasala ug sa pagluwas sa mga diyosnon, sama sa panahon sa Lunop. (Genesis 7:20-24; 2 Pedro 2:9) Ang pagpalandong sa maong mga butang makapalig-on sa atong relasyon uban kang Jehova ug mopahimo kanato sa pagsugid sa uban bahin sa iyang himaya ug kahibulongang mga buhat. Sulod sa 40 ka adlaw diha sa kamingawan, napalig-on si Jesus batok sa pagsulay pinaagi sa pagpalandong sa mga butang nga gihatag sa bukas nga kalangitan nga maoy iyang pagatagdon. (Mateo 3:13–4:11) Siya human niadto nagpadayag sa uban bahin sa himaya ug kahibulongang mga buhat ni Jehova.
11. (a) Nganong mibatig kahadlok ang mga molupyo sa Jerico? (b) Uban sa unsang espiritu nga ang mga Saksi ni Jehova nagahisgot bahin sa “makahahadlok nga mga butang” ug sa iyang “pagkagamhanan”?
11 Kon mahisgot kita bahin sa himaya ug mga buhat sa Diyos, atong aghaton ang uban sa pagsulti bahin niini. Miingon si David: “Ug ang kagahom sa imong makalilisang nga mga buhat ilang pagahisgotan; ug ang imong pagkagamhanan, akong ipahayag.” (Salmo 145:6) Gihisgotan ni Rahab ang kahadlok nga gibati sa mga molupyo sa Jerico sa dihang ilang nadunggan kon giunsa pagluwas ni Jehova ang mga Israelinhon sa Pulang Dagat ug naghimo kanila nga madaogon batok sa duha ka mga haring Amorihanon. Dayag nga adunay daghang panagsulti bahin sa maong “makalilisang nga mga butang” sa Jerico. (Josue 2:9-11) Ug piho nga ang haduol nga “dakong kasakitan” makahahadlok unya kaayo. (Mateo 24:21) Apan ang mga butang nga makalilisang kaayo sa mga tawo nga nahimulag gikan sa Diyos nagadasig sa matarong ug mga kasingkasing sa “pagkahadlok kang Jehova,” usa ka maayo nga kahadlok kaniya. (Proverbio 1:7) Uban niining matinahurong espiritu, ang mga Saksi ni Jehova nagahisgot mahitungod sa mga kapadayagan sa gahom sa Diyos. Aw, ang dakong Kahibulongang-Magbubuhat mao ang pangunang ulohan sa panagkokabildo sa dinihogan ug sa ilang yutan-ong mga kauban! Ug bisan ang paglutos dili makapugong kanila gikan sa pagsulti sa uban bahin niining mga butanga ug sa “pagkagamhanan” ni Jehova.—Buhat 4:18-31; 5:29.
Dayega si Jehova Tungod sa Iyang Pagkamaayo
12. Sa unsang paagi ang kaayo ni Jehova mopahimo kanatong “matugob sa kalipay”?
12 Ang Diyos takos sa pagdayeg dili lamang alang sa iyang pagkagamhanan kondili usab alang sa iyang pagkamaayo ug pagkamatarong. Busa si David miingon: “Sila nagabukal-bukal sa paghisgot sa kadagaya sa imong kaayo, ug tungod sa imong pagkamatarong sila misinggit sa kalipay.” (Salmo 145:7) Ang kaayo ni Jehova dako uyamot mao nga kita “nagabukal-bukal” sa malipayong mga ekspresyon mahitungod niana. Sa Hebreohanon, ang ideya maoy gikan sa tubig nga nagabugwak gikan sa usa ka tubod. Busa hinaot nga kita magbukal-bukal sa mapasalamatong pagdayeg sa Diyos, sama sa usa ka baha. (Proverbio 18:4) Sa ilang dakong espirituwal nga kadaot, ang Israel nakalimot sa kaayo ni Jehova. (Salmo 106:13-43) Apan hinunoa, pasagdi nga moawas ang atong kasingkasing sa pagkamapasalamaton nga sa ingon ang uban naghinulsol human nga ilang nakat-onan kon unsa ka maayo si Jehova sa iyang dedikadong mga Saksi.—Roma 2:4.
13. Ang mga kapadayagan sa balaang hustisya ug pagkamatarong adunay unsang epekto kanato?
13 Ang mga kapadayagan sa balaang hustisya ug pagkamatarong mopukaw usab kanato sa pagsinggit sa kalipay. Kon ingon niana ang atong bation, atong pangitaon ug una dili lamang ang Gingharian sa Diyos kondili ang iyang pagkamatarong usab. Kita gusto nga ang atong paggawi sa tanang panahon makahatag kadayeganan kang Jehova. Oo, kita mahimong regular nga mga magmamantala sa Gingharian nga adunay daghang buluhaton diha sa pag-alagad sa Diyos. Ang atong pagdayeg kang Jehova dili gayod malubong diha sa lubnganan sa kahilom.—Mateo 6:33; 1 Corinto 15:58; Hebreohanon 10:23.
Si Jehova Maluloy-on
14. Unsay nagpamatuod nga si “Jehova mapuanguron ug maluluy-on”?
14 Naghisgot ug dugang pagkadalayegon sa mga hiyas sa Diyos, si David miingon: “Si Jehova mapuanguron ug maluluy-on, mahinay sa kasuko ug dako sa mahigugmaong kalulot.” (Salmo 145:8) Ang Diyos mapuanguron sa pagkaagi nga siya maayo ug mahinatagon kaayo. (Mateo 19:17; Santiago 1:5) Siya nagahimog maayong mga butang bisan alang niadtong wala magaalagad kaniya. (Buhat 14:14-17) Si Jehova usab maluluy-on, mahangawaon, “nagahinumdom nga kita mga abog.” Siya dili motamay sa usa ka nadugmok nga kasingkasing o makiglabot kanato sumala sa atong mga kasal-anan kondili siya labi pang maluluy-on kay sa labing mahigugmaon tawhanong amahan. (Salmo 51:17; 103:10-14) Gani, diha sa labing dako nga pagpasundayag sa kaluoy, iyang gipadala ang iyang pinalanggang Anak aron mamatay alang kanato aron kita mapasig-uli sa Diyos ug tinuod nga makatilaw sa iyang pagkamapuanguron!—Roma 5:6-11.
15. Nganong ikaingon nga si Jehova nga Diyos “mahinay sa kasuko” ug “dako sa mahigugmaong kalulot”?
15 Ang atong langitnong Amahan mahinay sa kasuko. Siya dili mobuhi ug binuta nga kasuko. Si Jehova usab maoy “dako sa mahigugmaong kalulot.” Dinhi ang Hebreohanong pulong nagpasabot sa kalulot nga nagagikan sa gugma ug motapot sa usa ka butang. Kini motapot hangtod nga ang katuyoan niini may labot nianang butanga matuman. Ang laing paghubad mao ang “maunongong gugma.” Lakip sa ubang mga butang, ang mahigugmaong kalulot sa Diyos, o maunongong gugma, ginapasundayag diha sa mga buhat sa pagluwas, pag-amping, pagpanalipod, kahupayan gikan sa mga kasamok, ug kapasayloan sa sala pinaagi sa lukat. (Salmo 6:4; 25:7; 31:16, 21; 40:11, 61:7; 119:88, 159; 143:12; Juan 3:16) Ang kamatuoran nga wala ipakanaog ni Jehova ang Armageddon human gilayon sa ‘gubat sa langit’ nakahimo sa kinabag-an nga makabaton ug kaluwasan, usa ka dakong ekspresyon sa mahigugmaong kalulot sa Diyos.—Pinadayag 12:7-12; 2 Pedro 3:15.
16. Sa unsang paagi si Jehova napamatud-ang “maayo sa tanan”?
16 Tungod sa kaluoy sa Diyos, mahimong ikaingon nga siya adunay dakong kasingkasing. Si David mideklarar: “Si Jehova maayo sa tanan, ug ang iyang kaluoy anaa sa ibabaw sa tanan niyang mga buhat.” (Salmo 145:9) Oo, ang Diyos maayo sa mga Israelinhon. Tungod niana, “siya nagapasubang sa iyang adlaw ibabaw sa mga daotan ug sa ibabaw sa mga maayo ug nagapadalag ulan ngadto sa mga matarong ug sa mga dili-matarong.” (Mateo 5:43-45) Sa Eden, si Jehova nagsaad ug usa ka “binhi” nga mahimong usa ka panalangin. Sa ulahi iyang gisultihan si Abraham: “Diha sa imong binhi pagapanalanginan ang tanang mga nasod.” (Genesis 3:15; 22:18) Ug ang kaayo sa Diyos dako gayod niining “panahon sa kataposan” nga ang si bisan kinsa mahimong ‘makaduol ug makainom sa tubig nga nagahatag ug kinabuhi nga walay bayad.’ (Daniel 12:4; Pinadayag 22:17) Si Jehova andam sa pagbuhat ug maayo ngadto sa tanang intelihenting mga linalang, ug ang iyang kaayo labi pang makapasuod kanato ngadto kaniya.
17. Sa unsang diwa nga ang kang Jehova nga ‘kaluoy anaa sa ibabaw sa iyang tanang mga buhat’?
17 Ang kang Jehova nga “kaluoy anaa sa ibabaw sa tanan niyang mga buhat” sa pagkaagi nga siya naghatag ug igong tagana alang sa mga tawo ug sa mga hayop. Siya mao “ang Usa nga naghatag pagkaon sa tanang unod.” (Salmo 136:25; 147:9) Ang Diyos dili magpasidungog sa mga sapian ug magayubit sa dinaogdaog, magabayaw sa mapahitas-on ug magatamay sa mapainubsanon, magatuboy sa buang ug ipaubos ang maalamon. Ang mga tawong makasasala mobuhat niini apan dili ang atong maluluy-on langitnong Amahan. (Salmo 102:17; Sofonias 3:11, 12; Ecclesiastes 10:5-7) Ug pagkadako sa kaluoy, kaayo, ug mahigugmaong kalulot sa Diyos sa paghimo sa kaluwasan nga posible pinaagi sa halad lukat sa iyang pinalanggang Anak!—1 Juan 4:9, 10.
Mga Maunongon Nagahimaya Kang Jehova
18. (a) Sa unsang paagi ang mga buhat sa Diyos “nagabayaw” kaniya? (b) Kanus-a nga kita angay mapukaw sa pagbayaw kang Jehova?
18 Ang Diyos takos sa pagdayeg gikan sa tanang dapit. Sama sa pagkapahayag niana ni David: “Ang tanan mong mga buhat nagabayaw kanimo, O Jehova, ug ang imong mga maunongon managhimaya kanimo.” (Salmo 145:10) Ang mga buhat sa Diyos sa kalalangan “nagabayaw” kaniya, sama nga ang usa ka maayong pagkatukod nga balay nagahatag kadungganan sa magtutukod sa ingon ang matahom nga plorera nagahatag kadungganan sa batid nga mag-uumol niini. (Itandi ang Hebreohanon 3:4; Isaias 29:16; 64:8.) Kahibulongan kaayo ang kalalangan ni Jehova nga sa ingon sila nakapukaw sa mga manulonda ug sa mga tawo sa pagdayeg kaniya. Ang mga anak nga manulonda sa Diyos malipayong misinggit sa pagdayeg sa panahong iyang gitukod ang kalibotan. (Job 38:4-7) Si David miingon nga ‘ang langit nagapahayag sa himaya sa diyos ug ang hawan nagapadayag sa buhat sa iyang mga kamot.’ (Salmo 19:1-6) Hayan atong himayaon si Jehova kon kita makakitag agila nga naglupad-lupad sa ibabaw sa kalangitan o sa usa nga naglukso-lukso sa lunhaw nga bakilid. (Job 39:26; Awit ni Solomon 2:17) Ang pagdayeg tukma kon kita mangani sa abot sa tanom o mangaon uban sa mga higala. (Salmo 72:16; Proverbio 15:17) Ang atong katingalahang pagkadesinyong mga lawas moaghat usab kanato sa pagpahayag ug mga mapasalamatong pagdayeg sa Diyos.—Salmo 139:14-16.
19. Kinsa ang “mga maunongon,” ug unsay ilang ginabuhat?
19 Karong adlawa, ang dinihogan sa espiritu nga “mga maunongon” ni Jehova sa yuta nagahimaya kaniya. Sila nagadayeg kaniya ug nagapangandoy nga makakita nga matuman ang iyang kabubut-on dinhi sa yuta maingon man usab sa langit. (Mateo 6:9, 10) Samtang ginasugid sa mga dinihogan ngadto sa uban ang katingalahang mga buhat sa Diyos, misanong ang nagakadaghan pang dakong panon. Uban sa mga maunongong dinihogan, sila nag-alagad nga madasigon ingong mga magmamantala sa Gingharian. Ang pagkamapasalamaton ba nagpalihok kanimo sa regular nga pakig-ambit niining buluhatona alang sa kadayegan sa Diyos?
20. (a) Sa unsang paagi ang ngalan ni Jehova mabalaan? (b) Mahitungod sa Salmo 145, unsang mga pangutana ang nagpabilin aron pagahisgotan?
20 Ingong mga Saksi ni Jehova, kita sama ni David sa paghatag sa Diyos ug pagdayeg. Alang kanato ang pagbalaan sa balaang ngalan ni Jehova ug ang pagdayeg niini mao ang labing hinungdanon. Sanglit ang balaang ngalan mapabalaan man pinaagi sa Gingharian sa Diyos, kining pagtulon-an sa Bibliya mahitungod sa Gingharian mao ang pangunang bahin sa maayong balita nga atong ginamantala. Ang Salmo 145 nagahatag ba ug espirituwal nga kadan-agan niining bahina? Unsay ipadayag sa atong panaghisgot sa nahibilin sa salmo? Unsang ubang mga paagi nga nagpamatuod nga si Jehova takos sa walay kataposang pagdayeg?
Unsay Imong mga Komento?
◻ Sa unsang paagi makahimaya kita sa ngalan ni Jehova?
◻ Unsa ang ubang dalayegong mga buhat sa Diyos?
◻ Sa unsang paagi kita molihok kon kita nagapabili sa pagkamaayo ni Jehova?
◻ Ang kaluoy sa Diyos gipakita sa unsang mga paagi?
[Hulagway sa panid 12]
Sultihan mo ba ang imong mga anak bahin sa gamhanang mga buhat ni Jehova, sama sa diyosnong mga ginikanan sa karaang Israel?
[Hulagway sa panid 15]
Sama nga usa ka kadungganan ang maayong pagkatukod nga balay sa magtutukod niini, sa ingon ang kalalangan ni Jehova nagahatag Kaniya ug pagdayeg