“Magpabilin Kamo sa Akong Pulong”
“Kon magpabilin kamo sa akong pulong, kamo tinuod gayod nga akong mga tinun-an.”—Juan 8:31.
1. (a) Sa dihang mibalik si Jesus sa langit, unsay iyang gibilin sa yuta? (b) Unsang mga pangutana ang atong konsiderahon?
SA DIHANG si Jesu-Kristo, ang Magtutukod sa Kristiyanidad, mibalik sa langit, wala siya magbilin dinhi sa yuta ug mga libro nga iyang sinulat, mga monyumento nga iyang gitukod, o mga bahandi nga iyang natigom. Apan, nagbilin siya ug mga tinun-an ug espesipikong mga kinahanglanon alang sa pagkatinun-an. Gani, diha sa Ebanghelyo ni Juan, atong makita nga gihisgotan ni Jesus ang tulo ka hinungdanong mga kinahanglanon nga angayng kab-oton ni bisan kinsa nga gustong mahimong iyang sumusunod. Unsa kining mga kinahanglanona? Unsay atong mahimo sa pagkab-ot niini? Ug sa unsang paagi maseguro nato nga kita sa personal mokuwalipikar ingong mga tinun-an ni Kristo karon?a
2. Unsa ang usa ka hinungdanong kinahanglanon alang sa pagkatinun-an, sumala sa girekord diha sa Ebanghelyo ni Juan?
2 Mga unom ka bulan una sa iyang kamatayon, si Jesus miadto sa Jerusalem ug nagsangyaw ngadto sa mga panon nga nagtigom didto aron sa pagsaulog sa usa ka semana nga Pista sa mga Balongbalong. Tungod niini, sa tungatunga sa pista, ‘daghan ang mituo kaniya.’ Si Jesus nagpadayon sa pagsangyaw, mao nga sa kataposang adlaw sa pista, sa makausa pa ‘daghan ang mituo kaniya.’ (Juan 7:10, 14, 31, 37; 8:30) Nianang panahona, gipunting ni Jesus ang iyang pagtagad sa bag-ong mga magtutuo ug nagpahayag ug hinungdanong kinahanglanon alang sa pagkatinun-an, sumala sa girekord ni apostol Juan: “Kon magpabilin kamo sa akong pulong, kamo tinuod gayod nga akong mga tinun-an.”—Juan 8:31.
3. Unsang hiyas ang gikinahanglan aron ang usa ‘magpabilin sa pulong ni Jesus’?
3 Nianang mga pulonga, wala magpasabot si Jesus nga ang bag-ong mga magtutuo nakulangan sa pagtuo. Hinunoa, iyang gipunting nga anaa sa ilang atubangan ang kahigayonan nga mahimong iyang matuod nga mga tinun-an—kon sila magpabilin sa iyang pulong, kon sila molahutay. Ilang gidawat ang iyang pulong, apan karon kinahanglang magpabilin sila niini. (Juan 4:34; Hebreohanon 3:14) Sa pagkatinuod, gilantaw ni Jesus ang pagkamalahutayon ingong hinungdanon kaayo nga hiyas alang sa iyang mga sumusunod nga sa iyang kataposang pakig-estorya sa iyang mga apostoles, nga narekord diha sa Ebanghelyo ni Juan, si Jesus kaduhang miawhag: “Magpadayon sa pagsunod kanako.” (Juan 21:19, 22) Daghang unang mga Kristohanon ang nagbuhat niana. (2 Juan 4) Unsay nakatabang kanila sa paglahutay?
4. Unsay nakatabang sa unang mga Kristohanon sa paglahutay?
4 Si apostol Juan, nga usa ka matinumanong tinun-an ni Kristo sulod sa mga pito ka dekada, nagpunting sa usa ka hinungdanong punto. Iyang gidayeg ang matinumanong mga Kristohanon nga nag-ingon: “Kamo kusgan man ug ang pulong sa Diyos nagpabilin diha kaninyo ug gidaog ninyo ang usa nga daotan.” Kadtong maong mga tinun-an ni Kristo milahutay, o nagpabilin sa pulong sa Diyos, tungod kay ang pulong sa Diyos nagpabilin kanila. Gipabilhan gayod nila kana. (1 Juan 2:14, 24) Mao usab karon, aron ‘makalahutay hangtod sa kataposan,’ kinahanglang tinoon nato nga ang pulong sa Diyos magpabilin dinhi kanato. (Mateo 24:13) Sa unsang paagi mahimo nato kana? Usa ka ilustrasyon nga giasoy ni Jesus ang naghatag sa tubag.
‘Nakadungog sa Pulong’
5. (a) Unsang lainlaing matang sa yuta ang gihisgotan ni Jesus diha sa usa sa iyang mga ilustrasyon? (b) Unsay gihawasan sa binhi ug sa yuta diha sa ilustrasyon ni Jesus?
5 Si Jesus nag-asoy ug ilustrasyon bahin sa usa ka magpupugas nga nagpugas ug binhi, ug kini narekord diha sa mga Ebanghelyo ni Mateo, Marcos, ug Lucas. (Mateo 13:1-9, 18-23; Marcos 4:1-9, 14-20; Lucas 8:4-8, 11-15) Samtang magbasa ka sa maong mga asoy, mamatikdan nimo nga ang pangunang bahin sa ilustrasyon mao nga ang samang matang sa binhi nahulog sa nagkalainlaing matang sa yuta, nga nagpatungha ug lainlaing mga resulta. Ang unang matang sa yuta bantok, ang ikaduha dili lawom, ug ang ikatulo gituboan ug daghang sampinit. Ang ikaupat nga matang, dili sama sa tulo, maoy “maayong yuta.” Sumala sa katin-awan nga gihatag ni Jesus, ang binhi mao ang mensahe sa Gingharian nga makaplagan diha sa Pulong sa Diyos, ug ang yuta naghawas sa mga tawo nga lainlain ug kahimtang sa kasingkasing. Bisan tuod ang mga tawo nga gihulagwayan sa lainlaing matang sa yuta magkapareho sa usa ka butang, kadtong gihulagwayan sa maayong yuta dunay hiyas nga nakapalahi kanila sa uban.
6. (a) Sa unsang paagi ang ikaupat nga matang sa yuta diha sa ilustrasyon ni Jesus lahi sa ubang tulo ka matang, ug unsay ipasabot niana? (b) Unsay hinungdanon sa paglahutay ingong mga tinun-an ni Kristo?
6 Ang asoy diha sa Lucas 8:12-15 nagpakita nga sa upat ka kahimtang, ang mga tawo ‘nakadungog sa pulong.’ Apan, kadtong dunay “maputli ug maayong kasingkasing” dili kay igo rang ‘nakadungog sa pulong.’ Sila “magpadayon sa paghupot niini ug magapamunga uban ang paglahutay.” Tungod kay ang maayong yuta humok ug lawom, ang mga gamot sa binhi matisok pag-ayo, ug ingong resulta, ang binhi mogitib ug mamunga. (Lucas 8:8) Sa susama, kadtong dunay maayong kasingkasing makasabot, magpabili, ug maghatag ug bug-os nga pagtagad sa pulong sa Diyos. (Roma 10:10; 2 Timoteo 2:7) Ang pulong sa Diyos magpabilin diha kanila. Busa, sila mamunga uban ang paglahutay. Sa ingon ang dulot, kinasingkasing nga pagpabili sa Pulong sa Diyos hinungdanon sa paglahutay ingong mga tinun-an ni Kristo. (1 Timoteo 4:15) Apan, sa unsang paagi kita makaugmad nianang kinasingkasing nga pagpabili sa Pulong sa Diyos?
Kahimtang sa Kasingkasing ug Makahuloganong Pagpamalandong
7. Unsang kalihokan ang nalambigit pag-ayo sa maayong kasingkasing?
7 Matikdi kon unsang kalihokan sa Bibliya ang balikbalik nga gilambigit sa maayong kasingkasing. “Ang kasingkasing sa matarong nagapamalandong aron sa pagtubag.” (Proverbio 15:28) “Hinaot nga ang mga pulong sa akong baba ug ang pagpamalandong sa akong kasingkasing mahimong kahimut-anan sa imong atubangan, Oh Jehova.” (Salmo 19:14) “Ang pagpamalandong sa akong kasingkasing maoy mga butang bahin sa pagsabot.”—Salmo 49:3.
8. (a) Sa dihang magbasa sa Bibliya, unsay atong likayan apan unsay atong buhaton? (b) Unsang mga benepisyo ang atong makuha gikan sa mainampoong pagpamalandong sa Pulong sa Diyos? (Ilakip ang kahon nga “Malig-on na Diha sa Kamatuoran.”)
8 Sama niining mga magsusulat sa Bibliya, kita usab kinahanglang mamalandong nga mapabilhon ug mainampoon sa Pulong sa Diyos ug sa iyang kalihokan. Sa dihang magbasa sa Bibliya o sa binase-sa-Bibliya nga mga publikasyon, kita dili angayng molihok nga daw kita maoy giapura nga mga turista nga nagdalidali pag-adto sa lainlaing maanindot nga talan-awon, nga nanguhag daghang letrato apan wala gayod makatan-aw pag-ayo sa talan-awon. Hinunoa, sa dihang magtuon sa Bibliya, buot natong mogahin ug panahon sa paghunong ug pagtan-aw pag-ayo sa talan-awon, ingnon ta.b Samtang sa hilom mamalandong kita sa atong nabasa, ang pulong sa Diyos moimpluwensiya sa atong kasingkasing. Kini motandog sa atong mga pagbati ug mohulma sa atong panghunahuna. Mopalihok usab kini kanato sa pagpaambit sa atong pribadong mga hunahuna ngadto sa Diyos diha sa pag-ampo. Sa ingon, mas masuod kita kang Jehova, ug ang atong gugma alang sa Diyos magtukmod kanato sa pagpadayon sa pagsunod kang Jesus bisan ilalom sa malisod nga mga kahimtang. (Mateo 10:22) Klaro nga hinungdanon ang pagpalandong sa giingon sa Diyos aron kita makapabiling matinumanon hangtod sa kataposan.—Lucas 21:19.
9. Sa unsang paagi makaseguro kita nga ang atong kasingkasing magpabiling madinawaton sa pulong sa Diyos?
9 Ang ilustrasyon ni Jesus nagpakita usab nga dunay mga babag sa pagtubo sa binhi, ang pulong sa Diyos. Busa, aron makapabiling matinumanon nga mga tinun-an, kinahanglan natong (1) ilhon ang mga babag nga gihawasan sa dili-maayong mga kahimtang sa yuta nga gihisgotan sa ilustrasyon ug (2) mohimog mga lakang sa pagtul-id o paglikay niana. Nianang paagiha, maseguro nato nga ang atong kasingkasing magpabiling madinawaton sa binhi sa Gingharian ug magpadayon sa pagpamunga.
“Sa Daplin sa Dalan”—Kadtong Nalinga
10. Hubita ang unang matang sa yuta diha sa ilustrasyon ni Jesus, ug isaysay ang kahulogan niini.
10 Ang unang matang sa yuta nga nahulogan sa binhi maoy “sa daplin sa dalan,” diin ang binhi “nayatakyatakan.” (Lucas 8:5) Ang yuta sa daplin sa dalan nga motadlas sa kaumahan sa trigo mobantok tungod kay daghang mag-agiagi niana. (Marcos 2:23) Sa susama, kadtong nalinga sa mga kalihokan sa kalibotan dili na makaugmad ug bisan unsang kinasingkasing nga pagpabili sa pulong sa Diyos. Nadungog nila kini, apan napakyas sila sa pagpamalandong niini. Busa ang ilang kasingkasing nagpabiling dili masanongon. Sa dili pa nila maugmad ang gugma niana, “ang Yawa moabot ug kuhaon ang pulong gikan sa ilang mga kasingkasing aron nga sila dili managpanuo ug mamaluwas.” (Lucas 8:12) Mapugngan ba kini?
11. Sa unsang paagi mapugngan nato ang kahimtang sa atong kasingkasing nga mahisama sa bantok nga yuta?
11 Dako ang mahimo sa pagpugong sa kasingkasing aron dili kini mahisama sa dili-mabungahon nga yuta sa daplin sa dalan. Ang giyatakyatakan ug bantok nga yuta mohumok ug magmabungahon kon kini darohon ug dili na paagian. Sa susama, ang paggahin ug panahon alang sa pagtuon ug pagpamalandong sa Pulong sa Diyos maghimo sa kasingkasing nga sama sa maayo, mabungahon nga yuta. Ang sekreto mao ang dili pagkalinga sa adlaw-adlawng mga butang sa kinabuhi. (Lucas 12:13-15) Hinunoa, seguroa nga duna kay panahon sa pagpamalandong sa “mas hinungdanong mga butang” sa kinabuhi.—Filipos 1:9-11.
“Sa Dakong Bato”—Kadtong Mahadlokon
12. Unsa ang tinuod nga rason nga malaya ang turok diha sa ikaduhang matang sa yuta nga gihisgotan sa ilustrasyon ni Jesus?
12 Sa dihang ang binhi mahulog sa ikaduhang matang sa yuta, dili kini basta magpabilin na lang sa ibabaw, sama sa unang kaso. Kini mogamot ug mogitib. Apan sa pagsubang sa adlaw, ang turok mapagba sa kainit sa adlaw ug malaya. Apan, matikdi kining hinungdanong detalye. Ang tinuod nga rason nga ang turok malaya dili mao ang kainit. Kon buot hunahunaon, ang tanom nga miturok sa maayong yuta naladlad usab sa adlaw, apan wala kini malaya—gani, kini milambo. Unsay kalainan? Kining maong turok nalaya, matod ni Jesus, “tungod kay dili lawom ang yuta” ug “tungod kay walay kaumog.” (Mateo 13:5, 6; Lucas 8:6) Ang usa ka “dakong bato,” nga nahimutang ilalom sa sapaw sa ibabawng-yuta, mopugong sa binhi sa pagpatidlom sa mga gamot niini sa giladmon diin kini makasuyop sa kaumog ug makagamot pag-ayo. Ang turok malaya tungod kay dili lawom ang yuta.
13. Unsang matanga sa mga tawo ang samag dili-lawom nga yuta, ug unsay mas lalom nga rason sa ilang reaksiyon?
13 Kining bahina sa ilustrasyon nagtumong sa mga tawo kinsa ‘modawat sa pulong uban ang kalipay’ ug masibotong mosunod kang Jesus “sulod sa usa ka panahon.” (Lucas 8:13) Sa dihang maladlad sa naglagiting nga adlaw sa “kasakitan o paglutos,” sila abton ug tumang kahadlok nga mawad-an sila sa ilang kalipay ug kusog ug mohunong sa pagsunod kang Kristo. (Mateo 13:21) Apan, ang mas lalom nga rason sa ilang kahadlok dili mao ang pagsupak. Kon buot hunahunaon, milyonmilyon sa mga tinun-an ni Kristo ang nakaantos sa lainlaing matang sa kasakitan, apan nagpabilin silang matinumanon. (2 Corinto 2:4; 7:5) Ang tinuod nga rason nga ang pipila abton ug kahadlok ug mobiya sa kamatuoran mao nga ang samag-bato nga kahimtang sa ilang kasingkasing mopugong kanila sa pagpalandong pag-ayo sa makapalig-on ug espirituwal nga mga butang. Busa, ang pagpabili nga ilang naugmad alang kang Jehova ug sa iyang pulong taphaw ug huyang kaayo nga dili sila makabarog sa pagsupak. Unsay mahimo sa usa aron dili mosangpot sa ingon niana?
14. Unsang mga lakang ang angayng himoon sa usa ka tawo sa pagpugong nga ang kahimtang sa iyang kasingkasing dili mahisama sa dili-lawom nga yuta?
14 Kinahanglang seguroon sa usa ka tawo nga ang iyang kasingkasing walay gihambin nga samag-bato nga mga babag, sama sa dulot-sa-bukog nga kayugot, nagpahiping kahakog, o susamang tig-a apan giluom nga mga pagbati. Kon anaa na ang maong babag, ang gahom gikan sa pulong sa Diyos makaluka niana. (Jeremias 23:29; Efeso 4:22; Hebreohanon 4:12) Human niana, ang mainampoong pagpamalandong ‘makapatisok pag-ayo sa pulong’ diha sa kasingkasing sa maong tawo. (Santiago 1:21) Kini magtagana ug kusog sa pagsagubang sa mga panahon sa kahigawad ug kaisog sa pagpabiling matinumanon bisan pa sa mga pagsulay.
“Taliwala sa mga Sampinit”—Kadtong Nabahin ang Kasingkasing
15. (a) Nganong ang ikatulong matang sa yuta nga gihisgotan ni Jesus ilabinang takos natong tagdon? (b) Sa ngadtongadto unsay mahitabo sa ikatulong matang sa yuta, ug ngano?
15 Ang ikatulong matang sa yuta, ang usa nga dunay mga sampinit, ilabinang takos natong tagdon tungod kay sa pipila ka paagi susama kini sa maayong yuta. Sama sa maayong yuta, ang binhi mogamot ug mogitib diha sa yuta nga daghag sampinit. Sa sinugdan, walay kalainan ang tubo sa bag-ong tanom diha niining duha ka matang sa yuta. Apan, sa paglabay sa panahon ang usa ka kahimtang maugmad nga sa ngadtongadto motuok sa tanom. Dili sama sa maayong yuta, kining yutaa tuboan ug daghang sampinit. Samtang ang bag-ong turok mogitib gikan niining yutaa, ang ‘mga sampinit nga motubo duyog niana’ makigtigi niana. Sa makadiyot ang duha ka tanom mag-ilog sa pagkaon, kainit sa adlaw, ug luna, apan sa ngadtongadto ang mga sampinit mas modaghan kay sa tanom ug ‘motuok niana.’—Lucas 8:7.
16. (a) Unsang mga tawhana ang naghawas sa yuta nga dunay mga sampinit? (b) Sumala sa tulo ka asoy sa Ebanghelyo, unsay gihawasan sa mga sampinit?—Tan-awa ang potnot.
16 Unsang matanga sa mga tawo ang kaamgid sa tunokon nga yuta? Si Jesus nag-ingon: “Mao kini sila ang nakadungog, apan, tungod kay nalinga sa mga kabalaka ug sa mga bahandi ug sa mga kalipayan niining kinabuhia, sila natuok sa bug-os ug walay gipadangat sa kabug-osan.” (Lucas 8:14) Maingon nga ang binhi sa magpupugas ug ang mga sampinit magdungan pagtubo diha sa yuta, ang pipila ka tawo usab modawat sa pulong sa Diyos ug sa “mga kalipayan sa kinabuhi” sa samang panahon. Ang kamatuoran sa pulong sa Diyos gipugas diha sa ilang kasingkasing, apan kini kinahanglang makigtigi sa ubang mga pangagpas nga moilog sa ilang pagtagad. Ang ilang mahulagwayong kasingkasing nabahin. (Lucas 9:57-62) Makapugong kini kanila sa paghatag ug igong panahon sa mainampoon ug makahuloganon nga pagpamalandong sa pulong sa Diyos. Wala nila dawata sa bug-os ang pulong sa Diyos ug busa nakulangan ug kinasingkasing nga pagpabili nga gikinahanglan aron makalahutay. Sa inanay, ang ilang espirituwal nga mga intereses nasapawan sa dili-espirituwal nga mga pangagpas sa gilapdon nga kini “bug-os nga natuok.”c Pagkamakapasubo nga kataposan alang niadtong dili bug-os nga nahigugma kang Jehova!—Mateo 6:24; 22:37.
17. Unsang mga kapilian ang atong kinahanglang himoon sa kinabuhi aron dili matuok sa mahulagwayong mga sampinit nga gihisgotan diha sa ilustrasyon ni Jesus?
17 Pinaagi sa pag-una sa espirituwal nga mga butang inay kay pagkabalaka sa materyal nga mga butang, atong malikayan nga matuok sa mga kasakit ug kalipayan niining kalibotana. (Mateo 6:31-33; Lucas 21:34-36) Kinahanglang dili magpabaya sa pagbasa sa Bibliya ug sa pagpamalandong sa atong nabasa. Makakaplag kita ug dugang panahon alang sa sinsero ug mainampoon nga pagpamalandong kon atong payanohon ang atong kinabuhi kutob sa mahimo. (1 Timoteo 6:6-8) Ang mga alagad sa Diyos nga nagbuhat niana—kinsa, ingnon ta, nag-ibot sa mga sampinit aron hatagan ug dugang sustansiya, kainit sa adlaw, ug luna ang tanom nga mamunga—nakasinati sa panalangin ni Jehova. Miingon si Sandra, nga nag-edad ug 26: “Sa dihang mamalandong ako sa akong mga panalangin diha sa kamatuoran, akong maamgohan nga ang kalibotan walay ikatanyag nga katumbas niana!”—Salmo 84:11.
18. Sa unsang paagi kita makapabilin diha sa pulong sa Diyos ug makalahutay ingong mga Kristohanon?
18 Nan, klaro nga kitang tanan, bata ug tigulang, magpabilin diha sa pulong sa Diyos ug molahutay ingong mga tinun-an ni Kristo basta ang pulong sa Diyos magpabilin kanato. Busa, seguroon nato nga ang yuta sa atong mahulagwayong kasingkasing dili gayod mogahi, mahimong dili lawom, o tuboan ug daghang dili-maayong mga tanom kondili magpabiling humok ug lawom. Nianang paagiha, mas bug-os kitang makasabot sa pulong sa Diyos ug “magapamunga uban ang paglahutay.”—Lucas 8:15.
[Mga footnote]
a Niining artikuloha, atong tagdon ang una niining maong mga kinahanglanon. Ang duha pa hisgotan sa mosunod nga mga artikulo.
b Aron makapamalandong nga mainampoon sa usa ka bahin sa Bibliya nga imong nabasa, ikaw, pananglitan, makapangutana sa imong kaugalingon: ‘Kini ba nagpadayag ug usa o duha sa mga hiyas ni Jehova? Sa unsang paagi nalangkit kini sa tema sa Bibliya? Sa unsang paagi nako mapadapat kini sa akong kinabuhi o magamit kini sa pagtabang sa uban?’
c Sumala sa tulo ka asoy sa Ebanghelyo bahin sa sambingay ni Jesus, ang binhi natuok sa mga kasakit ug kalipayan niining kalibotana: “Ang mga kabalaka niining sistema sa mga butang,” “ang malimbongong gahom sa mga bahandi,” ug ang “mga kalipayan niining kinabuhia.”—Marcos 4:19; Mateo 13:22; Lucas 8:14; Jeremias 4:3, 4.
Unsay Imong mga Tubag?
• Nganong kinahanglan kitang ‘magpabilin sa pulong ni Jesus’?
• Sa unsang paagi katugotan nato ang pulong sa Diyos nga magpabilin sa atong kasingkasing?
• Unsang mga matang sa mga tawo ang gihawasan sa upat ka lainlaing matang sa yuta nga gihisgotan ni Jesus?
• Sa unsang paagi makakaplag kag panahon sa pagpalandong sa pulong sa Diyos?
[Kahon/Hulagway sa panid 10]
“Malig-on Na Diha Sa Kamatuoran”
DAGHANG dugay nang mga tinun-an ni Kristo ang nagpamatuod kada tuig nga sila “malig-on na diha sa kamatuoran.” (2 Pedro 1:12) Unsay nakatabang kanila sa paglahutay? Tagda ang pipila sa ilang mga komento.
“Akong taposon ang matag adlaw pinaagi sa pagbasa ug usa ka bahin sa Bibliya ug sa paglitok ug pag-ampo. Dayon akong hunahunaon kon unsay akong nabasa.”—Jean, nabawtismohan sa 1939.
“Ang pagpalandong nga si Jehova, nga usa ka hamili kaayo nga persona, nahigugma pag-ayo kanato nakahatag kanako ug pagbati sa kasegurohan ug kalig-on sa pagpabiling matinumanon.”—Patricia, nabawtismohan sa 1946.
“Pinaagi sa pagsunod sa maayong mga batasan sa pagtuon sa Bibliya ug pinaagi sa paghatag ug bug-os nga pagtagad sa ‘lawom nga mga butang sa Diyos,’ nakapadayon ako sa pag-alagad.”—1 Corinto 2:10; Anna, nabawtismohan sa 1939.
“Akong gibasa ang Bibliya ug ang atong binase-sa-Bibliya nga mga publikasyon sa tuyo nga susihon ang akong kasingkasing ug mga motibo.”—Zelda, nabawtismohan sa 1943.
“Ang akong kinamaayohang mga panahon maoy sa dihang makalakawlakaw ako ug makigsulti kang Jehova diha sa pag-ampo ug pahibal-on lamang siya kon unsa gayoy akong gibati.”—Ralph, nabawtismohan sa 1947.
“Sugdan nako ang adlaw pinaagi sa pagkonsiderar sa inadlaw nga teksto ug pagbasa sa usa ka bahin sa Bibliya. Naghatag kini kanako ug usa ka bag-ong butang nga palandongon sa tibuok adlaw.”—Marie, nabawtismohan sa 1935.
“Alang kanako, ang bersikulo-por-bersikulo nga mga panaghisgot sa basahon sa Bibliya makapalagsik gayod.”—Daniel, nabawtismohan sa 1946.
Kanus-a ka man maggahin ug panahon sa pagpalandong nga mainampoon sa pulong sa Diyos?—Daniel 6:10b; Marcos 1:35; Buhat 10:9.
[Hulagway sa panid 13]
Pinaagi sa pag-una sa espirituwal nga mga butang, kita “magapamunga uban ang paglahutay”