Tan-awa ang Maayong Resulta sa Imong Kahago
1. Unsay hinungdan nga kita mawad-ag kasibot sa ministeryo?
1 Ang tawo gidisenyo aron ‘makapahimulos pag-ayo sa iyang kahago.’ (Eccl. 2:24) Apan, kon dili nato makita ang maayong mga resulta sa atong ministeryo, kita mahimong maluya ug tungod niana mawad-an kitag kalipay ug kasibot. Unsay makatabang kanato aron mahuptan ang positibong tinamdan?
2. Nganong angay kitang mahimong realistiko bahin sa sanong sa mga tawo sa atong ministeryo?
2 Mahimong Realistiko: Hinumdomi nga bisag diyutay ray misanong, ang ministeryo ni Jesus malamposon gayod. (Juan 17:4) Sa sambingay ni Jesus bahin sa magpupugas, siya mitagna nga ang kasingkasing sa kadaghanan dili modawat sa samag-binhi nga mensahe sa Gingharian. (Mat. 13:3-8, 18-22) Bisan pa niana, daghan gihapon ang malampos kon kita magmakugihon.
3. Sa unsang paagi kita mahimong “magapamunga” bisag pipila ray mosanong sa atong pagsangyaw?
3 Kon sa Unsang Paagi Kita Mamungag Daghan: Sumala sa sambingay ni Jesus, kadtong modawat sa mensahe “magapamunga.” (Mat. 13:23) Human moturok ug mogulang na ang punoan sa trigo, kini mamungag bag-ong binhi, dili kay gagmayng mga punoan sa trigo. Busa ang bunga nga ipatungha sa malamposong mga Kristohanon, dili kay bag-ong mga tinun-an, apan mao ang sublisubling pagpugas ug mas daghang binhi pinaagi sa pagsangyaw bahin sa Gingharian. Kini moresulta sa daghang “maayo” nga makahatag natog katagbawan, mosanong man ang mga tawo o dili. Kita nagtabang sa pagbalaan sa ngalan ni Jehova. (Isa. 43:10-12; Mat. 6:9) Kita nagpahimulos sa pribilehiyo ingong mga isigkamagbubuhat sa Diyos. (1 Cor. 3:9) Ug ang maong “bunga sa mga ngabil” makapahimuot kang Jehova.—Heb. 13:15, 16.
4. Unsa tingali ang mga resulta sa atong ministeryo nga dili nato mahibaloan?
4 Dugang pa, ang atong paghago mahimong may mga resulta nga dili nato makita. Posibleng ang pipila nga nakadungog sa pagsangyaw ni Jesus nahimong iyang mga tinun-an pagkatapos lamang sa iyang yutan-ong ministeryo. Sa susama, ang binhi sa Gingharian nga atong ipugas mahimong sa ulahi lamang moturok ug motubo diha sa kasingkasing sa usa ka tawo, ug siya tingali makadangat sa kamatuoran nga dili nato mahibaloan. Sa pagkatinuod, ang atong ministeryo moresulta sa daghang kaayohan. Busa, hinaot nga kita “magpadayon sa pagpamungag daghan” ug magpamatuod nga kita mga tinun-an ni Jesus.—Juan 15:8.