Unsay Umaabot sa Kristiyanidad?
ANG kalibotan makombertir ba sa Kristiyanidad, o mawala ang Kristiyanidad? Ang Kristiyanidad nagpabilin bang putli ingon sa parola diha sa mangitngit nga kalibotan, o kini ba nasambogan na? Mga pangutana kini nga hinungdanon kanato hangtod karong adlawa.
Gipakita ni Jesus pinaagi sa paggamit ug usa ka yanong sambingay nga pagkahuman gayod niyag pugas sa mga binhi sa Kristiyanidad, ang usa ka kaaway, si Satanas, manghilabot. (Mateo 13:24, 25) Busa, dili lang kaugmaran sa katilingban ang nagpahinabo sa kausaban diha sa Kristiyanidad sa unang pipila ka siglo human sa pagministeryo ni Jesus. Kadto gipahinabo sa kaaway, si Satanas. Ang mga iglesya sa Kakristiyanohan karon nagpatunhay sa mga kasaypanan nga gihimo sa kanhing panahon mao nga kini nag-antos sa mga epekto niini.—2 Corinto 11:14, 15; Santiago 4:4.
Usa ka Malipotong Pagdaot sa Kristiyanidad
Gitagna ni Jesus nga tuison ang iyang mga pagtulon-an. Siya miingon: “Ang gingharian sa mga langit nahisama sa usa ka tawong nagpugas ug maayong binhi sa iyang uma. Samtang ang mga tawo natulog, ang iyang kaaway miabot ug gisapawan pagpugas ug mga bunglayon ang mga trigo, ug mibiya.” Katingad-anan, sa dihang gipahibalo sa mga ulipon ang daotang buhat ngadto sa tawong nagpugas ug gihangyo nilang ibton ang mga bunglayon, siya miingon: “Dili; aron walay purohan nga samtang ibton ang mga bunglayon, inyong maibot ang trigo uban niini. Pasagdi kining magdungan sa pagtubo hangtod sa ting-ani; ug sa panahon sa ting-ani sultihan ko ang mga mag-aani, Ibta pag-una ang mga bunglayon ug pamugkosa kini nga mga binangan aron kini sunogon, unya tigoma ang trigo ngadto sa akong balay-tipiganan.”—Mateo 13:24-30.
Sumala sa gipatin-aw ni Jesus mismo, ang tawo diha sa iyang sambingay nga nagpugas ug trigo sa uma naghawas kang Jesus, ug ang mga binhi nga iyang gipugas naghawas sa matuod nga mga Kristohanon. Ang kaaway nga nagpugas ug mga bunglayon taliwala sa trigo naghawas sa “Yawa.” Ang mga bunglayon naghawas sa malapason, apostatang mga tawo nga sa binakak nangangkon nga maoy mga alagad sa Diyos. (Mateo 13:36-42) Gihatag ni apostol Pablo ang dugang nga mga detalye kon unsay mahitabo. Matod niya: “Ako nahibalo nga sa akong pagbiya ang malupigong mga lobo mosulod sa inyong taliwala ug dili magtagad sa panon uban ang kalumo, ug gikan sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ngadto kanila.”—Buhat 20:29, 30.
Kristiyanidad Gidaot
Natuman ba ang gipasumbingay ni Jesus ug ang gitagna ni Pablo? Natuman gayod. Ang mga tawong ambisyoso mikontrolar sa kongregasyon nga gitukod ni Jesus ug gigamit kini alang sa ilang kaugalingong mga katuyoan. Gisultihan ni Jesus ang iyang mga sumusunod: ‘Kamo dili bahin sa kalibotan.’ (Juan 15:19) Bisan pa niana, ang mga tawong hakog ug gahom nakig-alyansa sa mga magmamando ug nagpormag suportado-sa-Estado nga mga iglesya nga nakabaton ug dako kaayong gahom ug katigayonan. Ang maong mga iglesya nagtudlo ug “tinuis nga mga butang.” Pananglitan, ilang gitudloan ang katawhan sa pagsimba sa Estado ug sa pagsakripisyo sa ilang kinabuhi alang niini pinaagi sa pagpakiggubat. Busa, ang giingong mga Kristohanon misalmot sa mga Krusada ug mipatayg mga tawo nga giisip nilang mga dili-magtutuo. Sila usab nakiggubat ug mipatay sa ilang kaugalingong “mga igsoon” sa samang relihiyon. Wala gayod nila tumana ang Kristohanong neyutralidad ug ang paghigugma sa silingan.—Mateo 22:37-39; Juan 15:19; 2 Corinto 10:3-5; 1 Juan 4:8, 11.
Tin-aw, ang mga iglesyang sulod sa kasiglohan nagtawag sa ilang kaugalingon nga Kristohanon naghawas lang sa mini nga Kristiyanidad. Kini nagpatin-aw kon nganong, sumala sa gipahayag sa nag-unang mga artikulo, nagpadayon ang kiling sa pagkabahinbahin sa mga iglesya ngadto sa mga sekta, pagpakiglangkit sa mga iglesya sa politika, ug sa mga iglesya nga wala na magsunod sa mga balaod sa Diyos. Kanang daotang mga bunga maoy produkto, dili sa matuod nga Kristiyanidad, kondili sa mini nga Kristiyanidad, nga gipugas sa Yawa. Hain ba paingon kanang bakak nga relihiyon? Ingon sa gipakita ni Jesus sa iyang sambingay, kini dili lang mawala tungod kay wala nay suportar. Kini pagahukman ug pagalaglagon.
Matuod nga mga Kristohanon Nagsidlak Diha sa Kangitngit
Apan, una pa tigomon ug sunogon ang “mga bunglayon” sa mini nga Kristiyanidad, may lain pang mahitabo sumala sa sambingay ni Jesus. Sulod sa kasiglohan ang samag “mga bunglayon” nga mini nga mga Kristohanon milabong pag-ayo nga halos dili na makita ang samag “trigo” nga matuod nga Kristiyanidad. Apan gisaysay ni Jesus nga gibulag ang trigo gikan sa mga bunglayon sa panahon sa “ting-ani,” nga matod pa niya naghawas sa “kataposan sa sistema sa mga butang.” Siya miingon usab: “Niana nga panahon ang mga matarong mosidlak ingon nga kahayag sa adlaw.” (Mateo 13:39-43) Ang ebidensiya nagpakita nga kita nagkinabuhi na sa kataposan sa sistema sa mga butang sukad sa Gubat sa Kalibotan I, nga nahitabo kapig 90 ka tuig kanhi. (Mateo 24:3, 7-12) Natuman ba usab kining bahina sa matagnaong sambingay ni Jesus?
Ang matuod nga mga Kristohanon nabulag na gikan sa samag “mga bunglayon” nga Kakristiyanohan. Ang mga Saksi ni Jehova ‘nagsidlak ingon nga kahayag sa adlaw,’ nga nagtabang sa uban aron sila makaila sa matuod nga Diyos, si Jehova. Ang mga Saksi ni Jehova wala magdaot sa iyang mga sukdanan. Hinunoa, ang mga tawo nga mahimong mga Saksi kasagarang mohimog dagkong mga kausaban sa ilang estilo sa kinabuhi aron magmasinugtanon sa Kristohanong mga prinsipyo nga anaa sa Bibliya.
Ang mga Saksi ni Jehova wala magtanyag ug kalingawan sa panahon sa ilang mga tigom, apan sila nagtanyag ug libreng pagtudlo sa Bibliya. Sila nagtanyag usab sa mainitong gugma ug pagpakighigala, mga hiyas nga ilang nakat-onan gikan sa ilang pagtuon sa Kasulatan. Sila nagtuo nga bag-ohon sa Diyos ang yuta ngadto sa usa ka paraiso ug papuy-an kini sa mga maaghop sa yuta, nga mao ang iyang unang katuyoan. Apan kinahanglan unang hinloan ang kalibotan sa daotang impluwensiya sa bakak nga relihiyon nga nailhan diha sa Bibliya ingong Dakong Babilonya. Sumala sa tagna sa Bibliya, duol nang ipahinabo ni Jehova kanang dako kaayong kausaban.—Mateo 5:5; Pinadayag 18:9-10, 21.
Sa dihang ang masinugtanong mga tawo mahigawas na sa malimbongong mga tulumanon sa bakak nga relihiyon, ang matuod nga Kristohanong pagsimba maghiusa sa tanang tawo sa yuta. Pagkatalagsaon ang umaabot sa matuod nga Kristiyanidad nga gipugas ni Jesus! Ang Edenhong Paraiso mapasig-uli na diha sa malinawong yuta, diin dili na makapahinabog panagbangi ang makapabahing mga relihiyon!
[Hulagway sa panid 7]
“Ang iyang kaaway miabot ug gisapawan pagpugas ug mga bunglayon ang mga trigo.”—Mateo 13:25
[Mga hulagway sa panid 8, 9]
Ikaw mainitong gidapit sa pagtambong sa bisan haing Kingdom Hall sa mga Saksi ni Jehova, diin gitanyag ang libreng pagtudlo sa Bibliya
[Hulagway sa panid 9]
“Unya tigoma ang trigo ngadto sa akong balay-tipiganan.”—Mateo 13:30