Isentro ang Imong Kasingkasing sa Espirituwal nga Bahandi

1, 2. (a) Unsa ang tulo ka espirituwal nga bahandi nga gihatag ni Jehova kanato? (b) Unsay atong konsiderahon niining artikuloha?

SI Jehova ang kinadatoan sa uniberso. (1 Cron. 29:11, 12) Ingong mahinatagong Amahan, dagaya niyang gihatagan ug espirituwal nga bahandi ang tanang nahibalo sa bili niana. Mapasalamaton kaayo ta nga gihatagan tag espirituwal nga bahandi ni Jehova, nga naglakip sa (1) Gingharian sa Diyos, (2) makaluwas ug kinabuhing ministeryo, ug (3) bililhong kamatuoran diha sa iyang Pulong! Pero kon dili ta magbantay, basig mawad-an tag apresasyon niana nga mga bahandi, ug sa diwa, ato ra nang malabay. Aron dili ni mawala kanato, kinahanglang kanunay nato ning gamiton ug apresyahon. Si Jesus miingon: “Kon hain ang inyong bahandi, atua usab didto ang inyong mga kasingkasing.”​—Luc. 12:34.

² Atong konsiderahon kon unsaon nato pag-ugmad ug pagmentinar sa atong gugma ug apresasyon sa Gingharian, ministeryo, ug sa kamatuoran. Samtang buhaton kana, palandonga kon sa unsang paagi mapalalom nimo ang imong gugma nianang espirituwal nga bahandi.

 3. Sa ilustrasyon ni Jesus, unsay andam buhaton sa negosyante aron mapalit ang bililhong perlas? (Tan-awa ang hulagway sa sinugdan sa artikulo.)

³ Basaha ang Mateo 13:45, 46. Si Jesus naghatag ug ilustrasyon bahin sa magpapatigayon, o negosyante, nga nangitag perlas. Latas sa katuigan, segurado nga ang negosyante nakapalit ug nakabaligya nag gatosan ka perlas. Pero, karon nakakita siyag perlas nga espesyal kaayo nga bisag ang pagkakita niana nakapalipay na niya. Ug aron mapalit kana, kinahanglan niyang ibaligya ang tanan niyang kabtangan. Mahunahuna ba nimo kon unsa ka bililhon para niya ang maong perlas?

 4. Kon gimahal nato ang Gingharian sa Diyos sama sa pagmahal sa negosyante sa perlas, unsay atong buhaton?

⁴ Unsay atong makat-onan? Ang kamatuoran sa Gingharian sa Diyos pareho nianang bililhong perlas. Kon gimahal nato kana sama sa pagmahal sa negosyante sa perlas, andam tang biyaan ang tanang butang aron mahimo ug magpabiling sakop sa Gingharian. (Basaha ang Marcos 10:28-30.) Tagda ang duha ka indibiduwal nga mihimo niana.

 5. Giunsa pagpakita ni Zaqueo nga andam gyod siyang magpasakop sa Gingharian sa Diyos?

⁵ Si Zaqueo maoy pangulong maniningil ug buhis, kinsa midato pinaagi sa pagpangilkil. (Luc. 19:1-9) Pero, dihang nadunggan nianang makasasalang tawo ang gisangyaw ni Jesus bahin sa Gingharian, nakita niya ang pagkabililhon sa iyang nadungog ug milihok dayon siya. Siya miingon: “Tan-awa! Ang katunga sa akong mga kabtangan, Ginoo, ipanghatag ko sa mga kabos, ug pasig-ulian ko ug upat ka pilo ang bisan unsa nga gipangilkil ko kang bisan kinsa.” Andam siyang iuli ang iyang bahandi nga gikan sa pagpanikas ug talikdan ang iyang kahakog sa materyal nga mga butang.

 6. Unsang mga kausaban ang gihimo ni Rose aron mahimong sakop sa Gingharian sa Diyos, ug nganong gihimo niya kana?

⁶ Pipila ka tuig ang milabay, dihang nadunggan sa usa ka babayeng tawgon natog Rose ang mensahe sa Gingharian, siya may karelasyong tomboy. Presidente sab siya sa organisasyon nga naglaban sa katungod sa mga homoseksuwal. Pero dihang nagtuon si Rose sa Bibliya, iyang nakita ang pagkabililhon sa kamatuoran bahin sa Gingharian sa Diyos. Ug iyang naamgohan nga kinahanglan siyang mohimog dakong kausaban. (1 Cor. 6:9, 10) Ang iyang kasingkasing nagpalihok niya sa pagresayn sa iyang posisyon ug sa pagtapos sa iyang relasyon sa tomboy. Pagka-2009, si Rose nabawtismohan, ug pagkasunod tuig, siya nagregular payunir. Ang iyang gugma kang Jehova ug sa Gingharian mas puwersado kay sa iyang tinguha sa unod.​—Mar. 12:29, 30.

 7. Unsaon nato pagmentinar ang atong gugma sa Gingharian?

⁷ Oo, daghan kanato ang nakahimog dagkong kausaban aron mahimong sakop sa Gingharian. (Roma 12:2) Bisan pa niana, wala pa matapos ang atong pagpakigbisog. Kinahanglan tang magmabinantayon batok sa bisan unsa nga makadani kanato, sama sa pagtinguha sa materyal nga mga butang ug sa imoral nga buhat. (Prov. 4:23; Mat. 5:27-29) Aron matabangan ta sa pagmentinar sa atong gugma sa Gingharian, si Jehova nagtagana natog dugang bililhong bahandi.

 8. (a) Nganong gipakasama ni apostol Pablo ang atong ministeryo sa “bahandi diha sa mga sudlanan nga kulonon”? (b) Giunsa pagpakita ni Pablo nga gipabilhan niya ang iyang ministeryo?

⁸ Hinumdomi nga si Jesus nagsugo nato sa pagwali ug pagtudlo sa maayong balita sa Gingharian. (Mat. 28:19, 20) Nakita ni apostol Pablo ang pagkabililhon sa ministeryo. Iyang gitawag ang ministeryo sa bag-ong pakigsaad ingong “bahandi diha sa mga sudlanan nga kulonon.” (2 Cor. 4:7; 1 Tim. 1:12) Bisag sama tag huyang nga yutang kulonon, ang mensahe nga atong gisangyaw maghatag ug kinabuhing walay kataposan​—kanato ug niadtong maminaw kanato. Kay nahibalo niini, si Pablo miingon: “Gihimo ko ang tanang butang tungod sa maayong balita, aron ako mahimong mag-aambit niini sa uban.” (1 Cor. 9:23) Oo, ang gugma ni Pablo sa ministeryo nagpalihok niya nga magmakugihon sa paghimog mga tinun-an. (Basaha ang Roma 1:14, 15; 2 Timoteo 4:2.) Kana nakatabang niya sa paglahutay sa grabeng paglutos. (1 Tes. 2:2) Unsaon nato pagpakita ang ingon niana nga gugma?

 9. Unsa ang pipila ka paagi nga mapakita nato ang atong apresasyon sa ministeryo?

⁹ Ang usa ka paagi nga gipakita ni Pablo ang apresasyon sa ministeryo mao ang pagkahimong alerto sa mga kahigayonan nga makasangyaw sa uban. Sama sa mga apostoles ug sa unang mga Kristohanon, kita nagsangyaw sa impormal, sa publiko, ug sa balay ug balay. (Buh. 5:42; 20:20) Kon itugot sa atong kahimtang, mangita tag paagi sa pagpauswag sa atong ministeryo, lagmit pinaagi sa pag-aplay ingong oksilyare o regular payunir. Puwede pod tang mokat-on ug laing pinulongan, mobalhin sa ubang dapit sa atong nasod, o mobalhin sa laing nasod.​—Buh. 16:9, 10.

10. Sa unsang paagi gipanalanginan si Irene sa iyang determinasyong isangyaw ang maayong balita?

¹⁰ Tagda ang panig-ingnan ni Irene, usa ka tagsaanong sister sa United States. Gusto kaayo niyang sangyawan ang nagsultig Russian sa ilang lugar. Pagsugod niya niadtong 1993, mga 20 lang ang magmamantala sa Russian nga grupo sa New York City. Sulod sa mga 20 ka tuig, nagkugi pag-ayo si Irene nianang teritoryoha. “Dili gihapon ko larino sa Russian,” matod ni Irene. Pero gipanalanginan ni Jehova ang iyang kadasig ug nianang sa uban. Karon, may unom na ka Russian nga kongregasyon sa New York City. Sa mga natun-an ni Irene, 15 na ang nabawtismohan. Ang pipila nag-alagad karon ingong mga Bethelite, payunir, ug ansiyano. Si Irene miingon, “Kon palandongon nako ang ubang tumong nga puwede unta nakong kab-oton, wala koy mahunahunaan nga makahatag nakog labaw nga kalipay.” Oo, gipabilhan gyod niya ang iyang ministeryo!

11. Unsay maayong mga resulta tungod sa padayong pagsangyaw bisan pa sa paglutos?

¹¹ Kon atong gipabilhan ang atong ministeryo, masundog nato si Pablo nga padayong magsangyaw bisan pa sa pagsupak. (Buh. 14:19-22) Niadtong mga tuig sa 1930 ug sayong bahin sa 1940, grabeng gilutos ang atong mga igsoon sa United States. Pero, sama kang Pablo, sila nagpabiling lig-on ug nagpadayon sa pagsangyaw. Aron maprotektahan ang atong katungod, daghang kaso sa korte ang giatubang sa mga igsoon. Niadtong 1943, si Brader Nathan H. Knorr mikomento bahin sa usa ka kadaogan diha sa Korte Suprema sa Amerika: “Kita nagmadaogon kay kamo nakigbisog. Kon ang mga magmamantala miundang pa sa pagsangyaw, wala untay kaso sa Korte Suprema; pero tungod kay kamo, mga magmamantala ug mga igsoon sa tibuok kalibotan nagpadayon ug wala mohunong, kita nagmadaogon. Nahitabo ni nga kadaogan kay ang katawhan sa Ginoo mibarog nga malig-on.” Ang lig-ong pagbarog sa mga igsoon sa ubang nasod miresulta usab sa susamang kadaogan. Oo, ang atong gugma sa ministeryo makapildi sa paglutos.

12. Unsay imong paningkamotan maylabot sa imong ministeryo?

¹² Kon gilantaw nato ang ministeryo ingong bililhong bahandi gikan kang Jehova, dili lang ang pagkuwentag oras nga mareport ang atong hunahunaon. Hinunoa, maningkamot ta nga “bug-os magpamatuod sa maayong balita.” (Buh. 20:24; 2 Tim. 4:5) Pero unsa may atong itudlo sa uban? Konsideraha ang lain pang bahandi gikan sa Diyos.

13, 14. Unsa ang “tipiganan sa bahandi” nga gihisgotan ni Jesus sa Mateo 13:52, ug sa unsang paagi mapuno nato kini?

¹³ Ang ikatulong espirituwal nga bahandi mao ang atong natigom nga mga kamatuoran. Si Jehova mao ang Diyos sa kamatuoran. (2 Sam. 7:28; Sal. 31:5) Ingong mahinatagong Amahan, ihatag sa Diyos ang kamatuoran ngadto sa mga nahadlok kaniya. Sukad nga una natong nadunggan ang kamatuoran, kita may kahigayonan sa pagtigom ug mga kamatuoran gikan sa iyang Pulong, ang Bibliya, gikan sa atong mga publikasyon, ug gikan sa atong mga kombensiyon, asembliya, ug senemanang panagkatigom. Paglabay sa panahon, mabatonan nato ang gitawag ni Jesus nga “tipiganan” sa daan ug bag-o nga kamatuoran. (Basaha ang Mateo 13:52.) Tabangan ta ni Jehova sa pagtigom ug bililhon ug bag-ong kamatuoran diha sa atong “tipiganan sa bahandi” kon pangitaon nato kana sama sa natagong bahandi. (Basaha ang Proverbio 2:4-7.) Unsaon nato paghimo kana?

¹⁴ Kinahanglang maghimo tag maayong eskedyul sa personal nga pagtuon ug mag-research pag-ayo diha sa Pulong sa Diyos ug sa atong mga publikasyon. Makatabang ni nato sa pagdiskobreg “bag-o” nga kamatuoran, nga wala nato mahibaloi sa una. (Jos. 1:8, 9; Sal. 1:2, 3) Ang unang gula niining magasina, nga giimprenta niadtong Hulyo 1879 miingon: “Ang kamatuoran, sama sa gamayng bulak diha sa kasagbotan, nalibotan ug hapit matuok sa labong kaayong sagbot sa kabakakan. Kon gusto nimong makaplagan kini, kinahanglan kang magkugi. . . . Kon gusto nimong makabaton niini, kinahanglang magpaubos ka aron makuha kini. Ayawg katagbaw sa usa lang ka bulak sa kamatuoran. . . . Padayon sa pagtigom, pangita pag dugang.” Oo, kinahanglan tang maningkamot aron pun-on ug kamatuoran ang atong tipiganan sa bahandi.

15. Ngano tingaling matawag natong “daan” ang pipila ka kamatuoran, ug unsa ang pipila niana nga imong gipabilhan?

¹⁵ Atong nadiskobrehan ang pipila ka bililhong kamatuoran dihang una tang nakig-uban sa katawhan sa Diyos. Puwede kining matawag nga “daan,” kay ato ning nahibal-an ug naapresyar sukad sa pagsugod nato sa Kristohanong pagkinabuhi. Unsay nalakip niana nga mga kamatuoran? Atong nakat-onan nga si Jehova ang Maglalalang ug Maghahatag ug Kinabuhi, ug duna siyay katuyoan sa katawhan. Nakat-onan sab nato nga mahigugmaon niyang gitagana ang iyang Anak ingong halad lukat aron mahigawas ta sa sala ug kamatayon. Nakat-onan pod nato nga ang iyang Gingharian magtapos sa tanang pag-antos, ug may kahigayonan tang mabuhi sa walay kataposan nga malinawon ug malipayon ubos sa pagmando sa Gingharian.​—Juan 3:16; Pin. 4:11; 21:3, 4.

16. Unsay angay natong buhaton dihang makadawat tag kausaban sa pagsabot?

¹⁶ Matag karon ug unya, may kausaban tingali sa atong pagsabot sa tagna o sa pipila ka teksto sa Bibliya. Dihang ihatag ang bag-ong katin-awan, kinahanglan nato kanang tun-an pag-ayo ug pamalandongon. (Buh. 17:11; 1 Tim. 4:15) Kinahanglang masabtan nato ang pangunang kausaban, ingon man ang gagmayng kalainan sa daan ug sa bag-ong pagsabot. Pinaagi niini, madugang nato ang bag-ong kamatuoran diha sa atong tipiganan. Nganong importante kana?

17, 18. Sa unsang paagi matabangan ta sa balaang espiritu?

¹⁷ Si Jesus miingon nga ipahinumdom kanato sa espiritu sa Diyos ang atong nakat-onan. (Juan 14:25, 26) Sa unsang paagi makatabang kini kanato samtang itudlo nato ang maayong balita diha sa publiko? Tagda ang eksperyensiya sa brader nga si Peter. Niadtong 1970, siya 19 anyos ug bag-o pang nag-alagad sa Bethel sa Britain. Samtang namalaybalay, nakasangyaw siyag usa ka bangason nga edarang lalaki. Si Peter nangutana sa lalaki kon gusto ba niyang masabtan ang Bibliya. Ang lalaki medyo nakuratan ug miingon nga balay ni sa Hudiyong mga rabbi. Aron sulayan si Peter, ang rabbi nangutana, “Unya Dong, sa unsang pinulongan gisulat ang basahon sa Daniel?” Si Peter mitubag, “Naay bahin ana nga gisulat sa Aramaiko.” “Ang rabbi,” nahinumdom si Peter, “nasorpresa nga kabalo ko sa tubag​—pero mas nasorpresa ko! Nganong nahibalo ko niana? Pag-uli nako, akong gitan-aw ang Bantayanang Torre ug Pagmata! sa miaging mga bulan, ug nakakita kog artikulo nga naghisgot nga ang Daniel gisulat sa Aramaiko.” (Dan. 2:4; footnote sa NWT, 2013 nga Edisyon.) Oo, ang balaang espiritu makapahinumdom nato sa ato nang mga nabasa ug natago sa atong tipiganan.​—Luc. 12:11, 12; 21:13-15.

¹⁸ Kon atong gipabilhan ang kaalam gikan kang Jehova, palihokon ta sa atong kasingkasing nga pun-on ang atong tipiganan ug mga kamatuoran​—bag-o ug daan. Samtang magkadako ang atong gugma ug apresasyon sa kaalam ni Jehova, mahimo tang mas kuwalipikadong mga magtutudlo sa publiko.

19. Nganong angay natong bantayan ang atong espirituwal nga bahandi?

¹⁹ Si Satanas ug ang iyang kalibotan kanunayng naningkamot sa pagpaluya o pagdaot sa atong apresasyon sa espirituwal nga bahandi nga ato nang nahisgotan. Posible tang madala sa iyang mga taktika. Mahimong mahaylo ta sa dakog suweldong trabaho, luho nga pagkinabuhi, o sa pagpasundayag sa atong mga bahandi. Si apostol Juan nagpasidaan kanato nga kining kalibotana ug ang mga tinguha niini mahanaw ra. (1 Juan 2:15-17) Busa, kinahanglan tang maningkamot nga maprotektahan ang atong gugma ug apresasyon sa espirituwal nga bahandi.

20. Unsay determinado nimong buhaton aron mabantayan ang imong espirituwal nga bahandi?

²⁰ Magmaandam nga biyaan ang bisan unsa nga mosapaw sa imong gugma sa Gingharian. Padayon sa pagsangyaw nga madasigon, ug ayaw wad-a ang imong apresasyon sa nagaluwas ug kinabuhing ministeryo. Paningkamot sa pagpangitag mga kamatuoran gikan sa Diyos. Samtang gibuhat nimo kana, nagatigom kag ‘bahandi sa mga langit, nga dili duolon sa kawatan ni ut-oton sa tangkob. Kay kon hain ang imong bahandi, atua usab didto ang imong kasingkasing.’​—Luc. 12:33, 34.