“Pagkakaplag ug Usa ka Perlas nga Bililhon Kaayo”

“Ang gingharian sa mga langit mao ang tumong nga ginapakigbisogan sa mga tawo, ug ginasakmit kini niadtong nagapakigbisog.”—MATEO 11:12.

1, 2. (a) Unsa ang talagsaong hiyas nga gilarawan ni Jesus diha sa usa sa iyang mga sambingay bahin sa Gingharian? (b) Unsay giingon ni Jesus diha sa sambingay sa perlas nga bililhon kaayo?

ADUNA bay usa ka butang nga gipabilhan nimo pag-ayo nga ihatag nimo ang tanan nimong gipanag-iya o isakripisyo ang tanan nimong nabatonan aron maangkon kana? Bisan tuod ang mga tawo moingon nga komitido sila sa ilang pagpangagpas sa usa ka tumong—salapi, dungog, gahom, o posisyon—talagsa ra nga ang usa ka tawo makakita ug usa ka butang nga mapuslanon kaayo nga andam niyang isakripisyo ang tanan tungod niana. Gihisgotan ni Jesus kining talagsaon apan dalayegon nga hiyas diha sa usa sa iyang daghang makapahinuklog nga mga sambingay bahin sa Gingharian sa Diyos.

² Kana maoy sambingay, o ilustrasyon, nga giasoy ni Jesus ngadto lamang sa iyang mga tinun-an, kanang subsob nga gitawag ingong sambingay sa perlas nga bililhon kaayo. Mao kiniy giingon ni Jesus: “Ang gingharian sa mga langit maoy sama sa usa ka nagapanaw nga magpapatigayon nga nangitag maayong mga perlas. Sa pagkakaplag ug usa ka perlas nga bililhon kaayo, siya milakaw ug nagbaligya dayon sa tanang butang nga iyang nabatonan ug nagpalit niini.” (Mateo 13:36, 45, 46) Unsay gusto ni Jesus nga makat-onan sa iyang mga mamiminaw niining ilustrasyona? Ug sa unsang paagi kita makabaton ug kaayohan gikan sa mga pulong ni Jesus?

Ang Pagkabililhon sa mga Perlas

3. Nganong ang maayong mga perlas bililhon kaayo sa karaang mga panahon?

³ Sukad pa sa karaang mga panahon, ang mga perlas gipabilhan ingong mga dayandayan. Ang usa ka reperensiya nag-ingon nga sumala sa Romanong eskolar nga si Pliny nga Magulang, ang mga perlas maoy “nag-una sa listahan sa tanang butang nga bililhon.” Dili sama sa bulawan, plata, o sa daghang mutya, ang mga perlas gipatungha sa buhing mga butang. Nahibaloan sa kadaghanan nga ang pipila ka matang sa mga takobo makahimo sa mga butang nga makapakatol—sama pananglitan sa gagmayng mga tipak sa bato—ingong nagsinawsinaw nga mga perlas pinaagi sa pagsigeg limin niini ug laway nga gitawag ug nacre. Sa karaang mga panahon, ang kinanindotang mga perlas kasagarang nakuha gikan sa Pulang Dagat, sa Gulpo sa Persia, ug sa Indian Ocean—layo sa nasod sa Israel. Sa walay duhaduha mao kini ang hinungdan nga si Jesus naghisgot ug “nagapanaw nga magpapatigayon nga nangitag maayong mga perlas.” Aron makakaplag ug bililhon kaayong mga perlas, gikinahanglan ang dakong paningkamot.

4. Unsa ang pangunang leksiyon sa sambingay ni Jesus bahin sa nagapanawng magpapatigayon?

⁴ Bisan tuod ang maayong mga perlas mahal na kaayo sukad pa kaniadto, dayag nga ang kantidad niini dili mao ang pangunang leksiyon sa sambingay ni Jesus. Niining maong sambingay, wala lamang gipakasama ni Jesus ang Gingharian sa Diyos sa usa ka perlas nga bililhon kaayo; iyang gipasiugda ang “usa ka magpapatigayon nga nangitag maayong mga perlas” ug sa iyang pagsanong sa dihang nakakaplag na siya ug maayong perlas. Dili sama sa usa ka ordinaryong tag-iyag tindahan, ang nagapanaw nga magpapatigayon o tigbaligya ug perlas, maoy batid sa maong negosyo, usa nga hait kaayog mga mata o makaila dayon sa katahom ug sa dili daling makita nga kinaiyahan sa usa ka talagsaong perlas. Makaila siya sa tinuod nga perlas sa dihang makita niya kini ug dili siya mailad sa barot o dili-tinuod nga perlas.

5, 6. (a) Unsay ilabinang takos tagdon bahin sa magpapatigayon sa sambingay ni Jesus? (b) Ang sambingay sa natagong bahandi nagpadayag ug unsa bahin sa nagapanawng magpapatigayon?

⁵ Aduna pay takos tagdon bahin niining maong magpapatigayon. Mahimong kalkulahon una sa usa ka ordinaryong magpapatigayon kon pilay iyang kitaon sa maong perlas aron matino niya kon pilay iyang ibayad niana aron makaganansiya. Basin hunahunaon usab niya kon aduna bay panginahanglan sa maong perlas aron dali ra kana niyang ikabaligya. Sa ato pa, interesado siyang makaganansiya dayon sa iyang gipuhonan, dili sa pagpanag-iya sa perlas. Apan lahi ang magpapatigayon sa sambingay ni Jesus. Ang iyang interes dili diha sa salapi nga iyang maganansiya. Gani, andam siyang mosakripisyo “sa tanang butang nga iyang nabatonan”—lagmit ang tanan niyang kabtangan ug mga propiedad—aron mabatonan ang iyang gipangita.

⁶ Sa panglantaw sa kadaghanang magpapatigayon, ang gihimo sa maong tawo sa sambingay ni Jesus lagmit dili maalamon. Ang usa ka alisto nga negosyante dili maghunahuna nga mamuhonan sa usa ka negosyo nga walay segurong makaganansiya. Apan ang magpapatigayon sa sambingay ni Jesus adunay lahi nga sukdanan sa mga prinsipyo. Ang iyang balos, dili diha sa bisan unsang pinansiyal nga bentaha, kondili sa kalipay ug katagbawan nga bation tungod sa pagkaangkon ug usa ka butang nga bililhon kaayo. Giklaro kining puntoha diha sa susamang ilustrasyon nga gihatag ni Jesus. Siya miingon: “Ang gingharian sa mga langit maoy sama sa usa ka natago nga bahandi diha sa uma, nga nakaplagan sa usa ka tawo ug gitagoan; ug tungod sa iyang kalipay siya molakaw ug magbaligya sa tanang butang nga iyang nabatonan ug mopalit niana nga uma.” (Mateo 13:44) Oo, ang kalipay nga bation tungod sa pagkakaplag ug pagpanag-iya sa bahandi igo nang mopalihok sa maong tawo sa pagsakripisyo sa tanan niyang nabatonan. Aduna bay mga tawo nga sama niana karon? Aduna bay bahandi nga takos sa maong pagsakripisyo?

Kadtong Miapresyar sa Pagkabililhon sa Gingharian

7. Sa unsang paagi gipakita ni Jesus nga nasabtan gayod niya ang pagkabililhon sa Gingharian?

⁷ Sa pag-asoy sa iyang sambingay, si Jesus naghisgot bahin sa “gingharian sa mga langit.” Nasabtan gayod niya ang pagkabililhon sa Gingharian. Ang mga asoy sa Ebanghelyo naghatag ug puwersadong pamatuod nianang kamatuorana. Human sa iyang bawtismo sa 29 K.P., si Jesus “misugod sa pagwali ug nag-ingon: ‘Paghinulsol kamo, kay ang gingharian sa mga langit haduol na.’” Sulod sa tulo ka tuig ug tunga, siya nagtudlo sa mga panon sa katawhan bahin sa Gingharian. Gilukop niya ang tibuok nasod, nga “mipanaw gikan sa siyudad ug siyudad ug gikan sa balangay ug balangay, nga nagwali ug nagpahayag sa maayong balita sa gingharian sa Diyos.”—Mateo 4:17; Lucas 8:1.

8. Unsay gibuhat ni Jesus aron sa pagpasundayag kon unsa unyay buhaton sa Gingharian?

⁸ Pinaagi sa paghimog daghang milagro sa tibuok nasod—lakip na sa pag-ayo sa mga masakiton, pagpakaon sa gigutom, pagpalinaw sa panahon, bisan pagbanhaw sa mga patay—gipasundayag usab ni Jesus kon unsa unyay buhaton sa Gingharian sa Diyos. (Mateo 14:14-21; Marcos 4:37-39; Lucas 7:11-17) Sa kataposan, iyang gipamatud-an ang iyang pagkamaunongon sa Diyos ug sa Gingharian pinaagi sa paghalad sa iyang kinabuhi, nga namatay ingong usa ka martir diha sa estaka sa pagsakit. Maingon nga ang nagapanawng magpapatigayon kinabubut-ong naghatag sa tanan niyang nabatonan alang sa “perlas nga bililhon kaayo,” si Jesus nabuhi ug namatay alang sa Gingharian.—Juan 18:37.

9. Unsang talagsaong hiyas ang nakita taliwala sa unang mga tinun-an ni Jesus?

⁹ Dili lang kay gisentro ni Jesus ang iyang kinabuhi diha sa Gingharian kondili nagtigom usab siya ug gamayng grupo sa mga sumusunod. Kini sila maoy mga indibiduwal usab nga nakasabot pag-ayo sa pagkabililhon sa Gingharian. Lakip kanila si Andres, kinsa tinun-an ni Juan Bawtista sa sinugdan. Sa pagkadungog sa pamatuod ni Juan nga si Jesus mao “ang Kordero sa Diyos,” si Andres ug ang lain pang tinun-an ni Juan, lagmit usa sa mga anak ni Zebedeo nga ginganlan usab ug Juan, nadani dayon kang Jesus ug nahimong mga magtutuo. Apan dili kay kana ray nahitabo. Dihadiha, si Andres miadto sa iyang igsoon nga si Simon ug miingon kaniya: “Nakaplagan namo ang Mesiyas.” Wala madugay human niadto, si Simon (kinsa nailhan ingong Cefas, o Pedro) maingon man si Felipe ug ang iyang higala nga si Natanael miila usab kang Jesus ingong Mesiyas. Gani, si Natanael natukmod sa pag-ingon kang Jesus: “Ikaw mao ang Anak sa Diyos, ikaw mao ang Hari sa Israel.”—Juan 1:35-49.

Napalihok

10. Unsay sanong sa mga tinun-an sa dihang si Jesus miabot ug mitawag kanila wala madugay human sa iyang unang pagkahibalag kanila?

¹⁰ Ang kahinam nga gibati ni Andres, Pedro, Juan, ug sa uban pa sa dihang ilang nakaplagan ang Mesiyas mahimong ikatandi sa kahinam nga gibati sa nagapanawng magpapatigayon sa dihang iyang nakaplagan ang perlas nga bililhon kaayo. Unsay gibuhat nila niadtong tungora? Ang mga Ebanghelyo diyutay rag giasoy kanato bahin sa ilang gibuhat human gayod sa ilang unang pagkahibalag kang Jesus. Dayag nga kadaghanan kanila namalik sa ilang naandang paagi sa pagkinabuhi. Apan mga unom ka bulan ngadto sa usa ka tuig sa ulahi, nahibalag na usab ni Jesus si Andres, Pedro, Juan, ug ang igsoon ni Juan nga si Santiago nga nangisda sa Dagat sa Galilea.a Sa pagkakita kanila, si Jesus miingon: “Sunod kamo kanako, ug himoon ko kamong mga mangingisda ug mga tawo.” Unsay ilang sanong? Bahin kang Pedro ug Andres, ang asoy ni Mateo nag-ingon: “Dihadiha gibiyaan ang mga pukot, sila misunod kaniya.” Mahitungod kang Santiago ug Juan, atong mabasa: “Dihadiha gibiyaan ang sakayan ug ang ilang amahan, sila misunod kaniya.” Ang asoy ni Lucas midugang nga ilang “gibiyaan ang tanan ug misunod kaniya.”—Mateo 4:18-22; Lucas 5:1-11.

11. Lagmit unsay hinungdan sa pagsanong dayon sa mga tinun-an sa pagdapit ni Jesus?

¹¹ Usa ba ka dinalidaling desisyon ang pagsanong dayon sa mga tinun-an? Dili! Bisan tuod sila namalik sa trabaho sa pamilya nga pagpangisda human sa ilang unang pakigtagbo kang Jesus, walay duhaduha nga ang ilang nakita ug nadungog nianang panahona natisok sa ilang kasingkasing ug hunahuna. Ang paglabay sa duolan sa usa ka tuig naghatag kanila ug taas nga panahon sa pagpamalandong nianang mga butanga. Karon panahon na nga modesisyon. Sila ba mahisama sa nagapanawng magpapatigayon kansang kasingkasing natandog pag-ayo sa pagkakaplag niya sa bililhong perlas nga, sumala sa paghubit ni Jesus niana, ‘siya milakaw ug dihadiha’ gibuhat ang angay niyang buhaton aron mapalit ang maong perlas? Oo. Ang ilang nakita ug nadungog nakatandog sa ilang kasingkasing. Ilang naila nga ang panahon sa paglihok miabot na. Busa, sumala sa gisulti kanato sa maong mga asoy, sa walay pag-ukon-ukon ilang gisakripisyo ang tanan ug nahimong mga sumusunod ni Jesus.

12, 13. (a) Sa unsang paagi misanong ang daghan nga nakadungog kang Jesus? (b) Unsay giingon ni Jesus bahin sa iyang matinumanong mga tinun-an, ug unsay gipasabot sa iyang mga pulong?

¹² Lahi gayod kining maong mga matinumanon sa uban nga gihisgotan sa ulahi diha sa mga asoy sa Ebanghelyo! Daghan ang giayo o gipakaon ni Jesus apan nagpadayon gihapon sa ilang adlaw-adlawng gimbuhaton. (Lucas 17:17, 18; Juan 6:26) Ang uban mibalibad pa gani sa dihang gidapit sila ni Jesus nga mahimong iyang mga sumusunod. (Lucas 9:59-62) Nga lahi kaayo niana, mahitungod sa mga matinumanon, si Jesus sa ulahi miingon: “Sukad sa mga adlaw ni Juan nga Bawtista hangtod karon ang gingharian sa mga langit mao ang tumong nga ginapakigbisogan sa mga tawo, ug ginasakmit kini niadtong nagapakigbisog.”—Mateo 11:12.

¹³ “Ginapakigbisogan” ug “nagapakigbisog”—unsay gipasabot niining maong mga termino? Maylabot sa Gregong berbo diin gikuha kining maong mga ekspresyon, ang Vine’s Expository Dictionary of Old and New Testament Words nag-ingon: “Ang berbo nagpasabot ug puwersadong paningkamot.” Ug mahitungod niining bersikuloha, ang eskolar sa Bibliya nga si Heinrich Meyer nag-ingon: “Niining paagiha gihubit ang maong madasigon, dili-mapugngang pagpaningkamot ug pagpanglimbasog nga makab-ot ang nagsingabot nga Mesiyanikong gingharian . . . Madasigon ug aktibo kaayo (dili na kalmado ug naghulat lamang) ang kaikag maylabot sa gingharian.” Sama sa nagapanawng magpapatigayon, kining pipila ka indibiduwal nakaila dayon kon unsay tinuod nga bililhon, ug sila kinabubut-ong nagsakripisyo sa tanan nilang nabatonan alang sa Gingharian.—Mateo 19:27, 28; Filipos 3:8.

Ang Uban Miduyog sa Pagpangita

14. Sa unsang paagi giandam ni Jesus ang mga apostoles alang sa buluhatong pagsangyaw sa Gingharian, ug unsay resulta?

¹⁴ Samtang nagpadayon si Jesus sa iyang ministeryo, iyang gibansay ug gitabangan ang uban nga mokab-ot sa maong Gingharian. Una, nagpili siya ug 12 gikan sa iyang mga tinun-an ug gitudlo sila ingong mga apostoles, o iyang mga pinadala. Gihatagan sila ni Jesus ug detalyadong mga instruksiyon kon sa unsang paagi himoon nila ang ilang ministeryo ug gipasidan-an usab sila bahin sa mga problema ug mga kalisdanan nga anaa sa unahan. (Mateo 10:1-42; Lucas 6:12-16) Sa misunod nga mga duha ka tuig, sila mikuyog kang Jesus sa iyang pagsangyaw sa tibuok nasod, nga nakatagamtam ug suod nga relasyon kaniya. Ilang nadungog ang iyang mga panultihon, nasaksihan ang iyang gamhanang mga buhat, ug nakita ang iyang personal nga panig-ingnan. (Mateo 13:16, 17) Sa walay duhaduha kining tanan nakatandog pag-ayo kanila, sa gilapdon nga sama sa nagapanawng magpapatigayon, sila masiboton ug bug-os-kasingkasing sa ilang pagpangagpas sa Gingharian.

15. Unsay giingon ni Jesus nga maoy tinuod nga katarongan sa pagmaya sa iyang mga sumusunod?

¹⁵ Gawas pa sa 12 ka apostoles, ‘gitudlo ni Jesus ang kapitoan nga uban pa ug gipadala sila nga tinagurha nga mag-una kaniya ngadto sa matag siyudad ug dapit nga iyang adtoan.’ Gisultihan usab niya sila bahin sa mga pagsulay ug mga kalisdanan nga anaa sa unahan ug gisugo sila nga sultian ang mga tawo: “Ang gingharian sa Diyos haduol na kaninyo.” (Lucas 10:1-12) Sa dihang ang 70 namalik, sila nalipay kaayo ug mitaho niini kang Jesus: “Ginoo, bisan ang mga demonyo nailalom kanamo pinaagi sa paggamit sa imong ngalan.” Apan tingali sa ilang katingala, miingon si Jesus nga sila makasinati ug mas dakong kalipay sa umaabot tungod sa ilang kasibot alang sa Gingharian. Giingnan niya sila: “Ayaw pagmaya tungod niini, nga ang mga espiritu nailalom kaninyo, apan pagmaya tungod kay ang inyong mga ngalan nahisulat na sa mga langit.”—Lucas 10:17, 20.

16, 17. (a) Unsay gisulti ni Jesus sa iyang matinumanong mga apostoles sa kataposang gabii nga siya kauban nila? (b) Unsang kalipay ug pasalig ang gihatag sa mga pulong ni Jesus ngadto sa mga apostoles?

¹⁶ Unya, sa kataposang gabii ni Jesus uban sa iyang mga apostoles, sa Nisan 14, 33 K.P., iyang gisugdan ang nailhan ingong Panihapon sa Ginoo ug gisugo sila nga handomon ang maong hitabo. Nianang gabhiona, giingnan ni Jesus ang 11 nga nagpabilin: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian, aron nga mangaon kamo ug manginom sa akong lamesa diha sa akong gingharian, ug magalingkod sa mga trono aron sa paghukom sa napulog-duha ka tribo sa Israel.”—Lucas 22:19, 20, 28-30.

¹⁷ Lagmit gayong natugob sa dakong kalipay ug katagbawan ang ilang kasingkasing sa dihang nadungog sa mga apostoles kanang mga pulonga ni Jesus! Sila gitanyagan sa kinatas-ang pasidungog ug pribilehiyo nga mabatonan ni bisan kinsang tawo. (Mateo 7:13, 14; 1 Pedro 2:9) Sama nianang nagapanawng magpapatigayon, dako ang ilang gisakripisyo aron mosunod kang Jesus sa pagpangagpas sa Gingharian. Karon sila gipasaligan nga ang ilang mga pagsakripisyo wala makawang.

18. Kinsa gawas sa 11 ka apostoles ang sa ngadtongadto makabaton ug kaayohan gikan sa Gingharian?

¹⁸ Ang mga apostoles nga kauban ni Jesus nianang gabhiona dili kay mao ray makabaton ug kaayohan gikan sa Gingharian. Kabubut-on ni Jehova nga ang katibuk-ang gidaghanon nga 144,000 pagadad-on ngadto sa pakigsaad sa Gingharian ingong kaubang mga magmamando ni Jesu-Kristo sa mahimayaong langitnong Gingharian. Dugang pa, nakita ni apostol Juan sa panan-awon ang “usa ka dakong panon, nga walay tawong makaihap, . . . nga nagbarog atubangan sa trono ug atubangan sa Kordero, . . . nga nag-ingon: ‘Ang kaluwasan utang namo sa atong Diyos, nga naglingkod sa trono, ug sa Kordero.’” Kini sila maoy yutan-ong mga sakop sa Gingharian.b—Pinadayag 7:9, 10; 14:1, 4.

19, 20. (a) Unsang kahigayonan ang bukas alang sa mga tawo sa tanang kanasoran? (b) Unsang pangutana ang pagahisgotan sa sunod nga artikulo?

¹⁹ Sa dayon nang saka ni Jesus sa langit, iyang gisugo ang iyang matinumanong mga sumusunod: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:19, 20) Busa, ang mga tawo gikan sa tanang kanasoran mahimong mga tinun-an ni Jesu-Kristo. Isentro usab nila ang ilang pagtagad nganha sa Gingharian—langitnon man o yutan-on ang ganti—sama sa gibuhat sa nagapanawng magpapatigayon maylabot sa maayong perlas.

²⁰ Ang mga pulong ni Jesus nagpaila nga ang buluhaton nga paghimog mga tinun-an magpadayon hangtod “sa kataposan sa sistema sa mga butang.” Busa sa atong adlaw, aduna pa bay mga tawo nga sama sa nagapanawng magpapatigayon, kinsa andam nga mohatag sa tanan nilang nabatonan sa pagpangagpas sa Gingharian sa Diyos? Kining pangutanaha pagahisgotan sa sunod nga artikulo.

[Mga footnote]

Pagpangagpas Karon sa “Perlas nga Bililhon Kaayo”

“Kining maayong balita sa gingharian igawali sa tibuok gipuy-ang yuta ingon nga pagpamatuod.”—MATEO 24:14.

1, 2. (a) Unsay hunahuna sa mga Hudiyo sa adlaw ni Jesus bahin sa Gingharian sa Diyos? (b) Unsay gibuhat ni Jesus sa paghatag ug hustong pagsabot sa Gingharian, ug uban sa unsang mga resulta?

ANG Gingharian sa Diyos maoy ulohan nga gikaikagan kaayo sa mga Hudiyo sa dihang mianhi si Jesus sa yuta. (Mateo 3:1, 2; 4:23-25; Juan 1:49) Apan sa sinugdan, kadaghanan kanila wala makasabot sa bug-os sa gilapdon sa pagmando ug gahom niini; ni nakasabot sila nga kini maoy usa ka langitnong kagamhanan. (Juan 3:1-5) Bisan ang uban nga nahimong mga sumusunod ni Jesus wala makasabot sa bug-os kon unsa ang Gingharian sa Diyos o kon unsay angay nilang buhaton aron madawat ang panalangin nga mahimong kauban nga mga magmamando ni Kristo.—Mateo 20:20-22; Lucas 19:11; Buhat 1:6.

² Sa paglabay sa panahon, si Jesus mapailobong nagtudlo sa iyang mga tinun-an ug daghang leksiyon, lakip na sa sambingay sa perlas nga bililhon kaayo nga gihisgotan sa nag-unang artikulo, nga nagpakita kanila sa kahinungdanon sa pagpanglimbasog sa pagpangagpas sa langitnong Gingharian. (Mateo 6:33; 13:45, 46; Lucas 13:23, 24) Lagmit natandog gayod ang ilang kasingkasing tungod kay sa wala madugay sila nahimong masiboton ug maisogong magmamantala sa maayong balita sa Gingharian ngadto sa kinalay-ang mga dapit sa yuta, nga niana ang basahon sa Mga Buhat daghan ug pamatuod.—Buhat 1:8; Colosas 1:23.

3. Mahitungod sa atong panahon, unsay giingon ni Jesus bahin sa Gingharian?

³ Komosta na man karon? Ang mga panalangin sa usa ka yutan-ong paraiso ilalom sa Gingharian gisangyaw ngadto sa milyonmilyon. Niining pangunang tagna bahin “sa kataposan sa sistema sa mga butang,” si Jesus espesipikong nag-ingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:3, 14; Marcos 13:10) Miingon usab siya nga kining dako kaayong buluhaton pagahimoon bisan pa sa dagkong mga babag ug mga hagit, paglutos pa gani. Bisan pa niana, gihatag niya kining maong pasalig: “Siya nga nakalahutay hangtod sa kataposan mao ang maluwas.” (Mateo 24:9-13) Kining tanan nagkinahanglan sa matang sa pagsakripisyo sa kaugalingon ug debosyon nga gipasundayag sa nagapanawng magpapatigayon sa sambingay ni Jesus. Aduna bay mga tawo karon nga nagpasundayag nianang maong pagtuo ug kasibot aron sa pagpangagpas sa Gingharian?

Ang Kalipay nga Bation sa Dihang Makaplagan ang Kamatuoran

4. Unsay epekto sa kamatuoran sa Gingharian nganha sa mga tawo karon?

⁴ Ang magpapatigayon sa sambingay ni Jesus nalipay pag-ayo sa dihang iyang nakaplagan ang iyang gituohan nga usa ka “perlas nga bililhon kaayo.” Ang maong kalipay nagtukmod kaniya sa paghimo sa tanan niyang maarangan aron mabatonan ang maong perlas. (Hebreohanon 12:1) Karon, ang kamatuoran bahin sa Diyos ug sa iyang Gingharian nakapadani ug nakapalihok usab sa mga tawo. Magpahinumdom kini kanato sa mga komento ni Brader A. H. Macmillan, kinsa misulat bahin sa iyang pagpangita mismo sa Diyos ug sa Iyang katuyoan alang sa katawhan, diha sa librong Faith on the March. Siya miingon: “Ang akong nakaplagan gipangita gihapon sa libolibong tawo kada tuig. Ug sila maoy mga tawo nga sama kanimo ug kanako, tungod kay sila naggikan sa tanang nasyonalidad, mga rasa, kahimtang sa kinabuhi ug sa tanang pangedaron. Ang kamatuoran dili mapihigon. Kini makadani sa tanang matang sa mga tawo.”

5. Unsang maayong mga resulta ang makita diha sa 2004 tuig sa pag-alagad nga taho?

⁵ Ang pagkatinuod nianang mga pulonga makita samtang kada tuig gatosan ka libong matinud-anog-kasingkasing nga mga tawo napalihok sa maayong balita sa Gingharian sa Diyos sa pagpahinungod sa ilang kinabuhi kang Jehova ug sa pagtuman sa iyang kabubut-on. Ang 2004 nga tuig sa pag-alagad, nga gikan sa Septiyembre 2003 hangtod sa Agosto 2004, apil usab niini. Nianang 12 ka bulan, 262,416 ka tawo ang publikong nagpasimbolo sa ilang pahinungod kang Jehova pinaagi sa pagpabawtismo sa tubig. Kini nahitabo sa 235 ka kayutaan, diin ang mga Saksi ni Jehova nagadumala ug 6,085,387 ka panagtuon sa Bibliya sa balay kada semana aron sa pagtabang sa mga tawo gikan sa tanang kahimtang sa kinabuhi ug gikan sa daghang nasod, mga tribo, ug mga pinulongan nga makabaton sa nagahatag-kinabuhi nga kamatuoran gikan sa Pulong sa Diyos.—Pinadayag 7:9.

6. Unsay hinungdan sa padayong pag-uswag latas sa katuigan?

⁶ Unsay nagpaposible niining tanan? Sa walay duhaduha gidani ni Jehova kining hustong nakiling nga mga tawo ngadto kaniya. (Juan 6:65; Buhat 13:48) Apan, dili pakamenoson ang dili-mahakogong espiritu ug masibotong mga paningkamot niadtong naggamit sa ilang kaugalingon sa pagpangagpas sa Gingharian. Sa edad nga 79 anyos, si Brader Macmillan misulat: “Sukad sa panahon nga una nakong nahibaloan ang mga butang nga gisaad ngadto sa masakiton ug himalatyon nga katawhan ang akong paglaom sa gipadayag nianang maong mensahe sa Bibliya wala gayod mahanaw. Nianang tungora determinado ako nga makakat-on pa bahin sa kon unsay ginatudlo sa Bibliya aron makatabang ako sa uban nga sama kanako nga gustong mahibalo bahin sa Labing Gamhanan nga Diyos, si Jehova, ug sa iyang maayong mga katuyoan ngadto sa katawhan.”

7. Unsang kasinatian ang naglarawan sa kalipay ug kadasig niadtong nakakaplag sa kamatuoran sa Bibliya?

⁷ Kanang maong kadasig makita usab diha sa mga alagad ni Jehova karon. Tagda, pananglitan, si Daniela nga taga-Vienna, Austria. Siya miingon: “Sukad sa akong pagkabata, ang Diyos maoy akong kinasuorang higala. Gusto gayod nakong mahibalo sa iyang ngalan tungod kay alang kanako ang titulo nga ‘Diyos’ dili gayod magpaila nga siya usa ka persona. Apan kinahanglang maghulat ako hangtod ako nag-edad ug 17 anyos, sa dihang ang mga Saksi ni Jehova miduaw sa among balay. Ilang gisaysay ang tanan nga gusto nakong mahibaloan bahin sa Diyos. Sa kataposan, akong nakaplagan ang kamatuoran, ug nindot kaayo kadto! Nalipay kaayo ko nga ako misugod sa pagsangyaw ngadto sa tanan.” Tungod sa iyang kadasig, sa wala madugay gibugalbugalan siya sa iyang mga eskolmet. “Apan, alang kanako sama ra nga akong nakita ang katumanan sa tagna sa Bibliya,” nagpadayon si Daniela, “tungod kay akong nakat-onan nga si Jesus miingon nga ang iyang mga sumusunod pagadumtan ug pagalutoson tungod sa iyang ngalan. Nalipay ug nahingangha kaayo ko.” Sa wala madugay, si Daniela nagpahinungod sa iyang kinabuhi kang Jehova, nabawtismohan, ug nagtinguha nga mahimong misyonaryo. Human siya maminyo, si Daniela, uban sa iyang bana nga si Helmut, misugod pagsangyaw ngadto sa mga Aprikano, Filipino, Insek, ug mga taga-India nga nagpuyo sa Vienna. Si Daniela ug Helmut nag-alagad karon ingong mga misyonaryo sa habagatang-kasadpan sa Aprika.

Wala Sila Mohunong

8. Unsa ang usa ka magantihong paagi diin daghan ang nagpasundayag sa ilang gugma alang sa Diyos ug pagkamaunongon ngadto sa iyang Gingharian?

⁸ Sa pagkatinuod, ang misyonaryong pag-alagad maoy usa sa mga paagi diin ang katawhan ni Jehova karon nagpasundayag sa ilang gugma alang sa Diyos ug pagkamaunongon ngadto sa iyang Gingharian. Sama sa magpapatigayon sa sambingay ni Jesus, kadtong misulod niining maong pag-alagad andam nga mobiyahe ngadto sa halayong mga lugar alang sa Gingharian. Siyempre, kining maong mga misyonaryo wala mobiyahe aron makaplagan ang maayong balita sa Gingharian; sila nagdala niini ngadto sa mga tawo nga nagpuyo sa hilit nga mga dapit sa yuta, nga nagtudlo ug nagtabang kanila nga mahimong mga tinun-an ni Jesu-Kristo. (Mateo 28:19, 20) Diha sa daghang nasod, kinahanglang antoson nila ang grabeng kalisdanan. Apan ang ilang paglahutay dakog balos.

9, 10. Unsang makapahinam nga mga eksperyensiya ang natagamtam sa mga misyonaryo diha sa halayong mga dapit sama sa Republika sa Sentral Aprika?

⁹ Tagda, pananglitan, ang Republika sa Sentral Aprika, diin sa miaging tuig ang nanambong sa Memoryal sa kamatayon ni Kristo maoy 16,184, mga pito ka pilo sa gidaghanon sa mga magmamantala sa Gingharian nianang yutaa. Tungod kay daghang dapit nianang nasora walay koryente, ang mga tawo kasagarang maghimo sa ilang adlaw-adlaw nga gimbuhaton diha sa gawas ilalom sa landong sa kahoy. Busa natural lamang nga himoon usab sa mga misyonaryo ang ilang buluhaton sa samang paagi—magdumala ug mga panagtuon sa Bibliya diha sa gawas ilalom sa landong sa kahoy. Dili lang kay mas hayag ug mas bugnaw sa gawas kondili aduna pay laing bentaha. Ang mga tawo adunay dulot nga pagpabili sa Bibliya, ug ang paghisgot ug relihiyosong mga ulohan sama ka ordinaryo sa paghisgot bahin sa mga esport o sa kahimtang sa panahon diha sa ubang mga kultura. Subsob nga ang lumalabay makamatikod kon unsay nagakahitabo ug basta moduyog na lang sa pagtuon.

¹⁰ Busa, sa dihang ang usa ka misyonaryo nagdumala ug panagtuon sa Bibliya diha sa gawas, usa ka batan-ong lalaki nga nagpuyo tabok sa karsada miduol ug miingon nga sanglit wala man siya duawa, ang misyonaryo kinahanglang moadto sa iyang balay ug tun-an usab siya bahin sa Bibliya. Siyempre, misugot dayon ang misyonaryo, ug ang batan-ong lalaki kusog nga nag-uswag. Nianang nasora, subsob nga pahunongon sa mga polis ang mga Saksi diha sa dalan, dili aron tunolan sila ug subpina o aron multahan sila, kondili aron mangayo sa kinaulahiang mga gula sa mga magasing Bantayanang Torre ug Pagmata! o pasalamatan sila tungod sa usa ka artikulo nga giganahan nila.

11. Bisan pa sa mga pagsulay, unsay pagbati sa dugay nang mga misyonaryo bahin sa ilang pag-alagad?

¹¹ Daghan niadtong misulod sa misyonaryong pag-alagad 40 o 50 ka tuig kanhi matinumanon gihapong nag-alagad sa kanataran. Pagkamaayong panig-ingnan sa pagtuo ug paglahutay alang kanatong tanan! Sulod sa milabayng 42 ka tuig, usa ka magtiayon ang nag-alagad ingong mga misyonaryo diha sa tulo ka lainlaing mga nasod. Ang bana miingon: “Dihay mga kalisdanan. Pananglitan, nakigbisog kami sa malarya sulod sa 35 ka tuig. Bisan pa niana wala namo basoli ang among desisyon nga mahimong mga misyonaryo.” Midugang ang iyang asawa: “Dunay daghan kaayong butang nga angay sa pasalamat. Ang ministeryo sa kanataran makalilipay kaayo, ug dali rang makasugod ug mga panagtuon sa Bibliya. Sa dihang makita nimo ang mga ginatun-an sa Bibliya nga manambong sa mga tigom ug maghimamatay, sama kanag panagtapok sa pamilya.”

Ilang ‘Giisip ang Tanang Butang nga Kapildihan’

12. Sa unsang paagi ipahayag ang tinuod nga pag-apresyar sa bili sa Gingharian?

¹² Sa dihang ang nagapanawng magpapatigayon nakakaplag ug perlas nga bililhon kaayo, “siya milakaw ug nagbaligya dayon sa tanang butang nga iyang nabatonan ug nagpalit niini.” (Mateo 13:46) Kining pagkaandam sa pagsakripisyo sa kon unsay giisip tingali nga bililhon maoy kinaiya niadtong tinuod nga nag-apresyar sa bili sa Gingharian. Ingong usa nga makig-ambit uban kang Kristo sa himaya sa Gingharian, si apostol Pablo miingon: “Sa pagkatinuod giisip ko usab ang tanang butang nga kapildihan tungod sa pagkalabaw ug bili sa kahibalo ni Kristo Jesus nga akong Ginoo. Tungod kaniya nadawat ko ang kapildihan sa tanang butang ug giisip kini nga mga basura, aron akong maangkon si Kristo.”—Filipos 3:8.

13. Sa unsang paagi ang usa ka tawo didto sa Czech Republic nagpasundayag sa iyang gugma alang sa Gingharian?

¹³ Sa samang paagi, daghan karon ang andam nga mohimog dagkong kausaban sa ilang kinabuhi aron maangkon ang mga panalangin sa Gingharian. Pananglitan, sa Oktubre 2003, ang 60-anyos nga prinsipal sa eskuylahan sa Czech Republic nakadawat sa giya sa pagtuon sa Bibliya nga Kahibalo nga Motultol sa Kinabuhing Walay Kataposan. Human kana mabasa, gikontak dayon niya ang mga Saksi ni Jehova sa iyang dapit aron magtuon sa Bibliya. Maayo ang iyang pag-uswag sa espirituwal ug sa wala madugay misugod siya sa pagtambong sa tanang tigom. Apan, komosta ang iyang mga plano nga molansar sa pagkamayor ug sa ulahi moapil sa piniliay alang sa pagkasenador? Mipili siya ug laing karera—ingong magmamantala sa Gingharian. Siya miingon, “Nakapahimutang ako ug daghang literatura sa Bibliya ngadto sa akong mga estudyante.” Iyang gipasimbolohan ang iyang pahinungod kang Jehova pinaagi sa pagpabawtismo sa tubig panahon sa usa ka kombensiyon sa Hulyo 2004.

14. (a) Ang maayong balita sa Gingharian nagtukmod sa milyonmilyon sa pagbuhat sa unsa? (b) Unsang makapahinuklog nga mga pangutana ang angayng isukna sa matag usa kanato sa iyang kaugalingon?

¹⁴ Milyonmilyon pa sa tibuok kalibotan ang misanong sa maayong balita sa Gingharian sa samang paagi. Sila migula gikan sa daotang kalibotan, naghukas sa ilang daang personalidad, mibiya sa ilang kanhing mga kauban, ug nagsakripisyo sa ilang kalibotanong mga pangagpas. (Juan 15:19; Efeso 4:22-24; Santiago 4:4; 1 Juan 2:15-17) Nganong gihimo man nila kining tanan? Tungod kay ilang gipabilhan ang mga panalangin sa Gingharian sa Diyos labaw kay sa bisan unsa nga itanyag niining sistemaha sa mga butang. Mao ba usab kanay imong pagbati sa maayong balita sa Gingharian? Natukmod ka ba niini sa paghimog kinahanglanong mga kausaban aron ang imong estilo sa kinabuhi, mga prinsipyo, ug mga tumong mahiuyon sa mga kinahanglanon ni Jehova? Ang pagbuhat niana moresulta sa dagayang mga panalangin alang kanimo, karon ug sa umaabot.

Ang Pag-ani Nakaabot sa Kinatayuktokan Niini

15. Unsay gitagna nga buhaton sa katawhan sa Diyos sa kataposang mga adlaw?

¹⁵ Ang salmista misulat: “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar.” Kadtong nagtanyag sa ilang kaugalingon naglakip sa “pundok sa mga batan-on nga sama gayod sa mga yamog” ug sa “dakong panon” sa “kababayen-an nga nagapahayag sa maayong balita.” (Salmo 68:11; 110:3) Unsay resulta sa pagkamakugihon ug pagsakripisyo sa kaugalingon sa katawhan ni Jehova—mga lalaki ug babaye, mga bata ug tigulang— niining kataposang mga adlaw?

16. Paghatag ug pananglitan kon sa unsang paagi ang mga alagad sa Diyos naningkamot sa pagtabang sa uban nga makakat-on bahin sa Gingharian.

¹⁶ Usa ka payunir, o bug-os-panahong magmamantala sa Gingharian, sa India naghunahuna kon sa unsang paagi ang kapin sa duha ka milyong bungol nga mga tawo nianang nasora matabangan sa pagkakat-on bahin sa Gingharian. (Isaias 35:5) Mihukom siya sa pagpalista diha sa usa ka institusyon sa Bangalore aron makakat-on sa pagsulti pinaagig senyas. Didto nakapakig-ambit siya sa paglaom sa Gingharian uban sa daghang bungol, ug naporma ang mga grupo sa pagtuon sa Bibliya. Sulod sa pipila ka semana, kapin sa usa ka dosenang mga tawo ang misugod sa pagtambong sa mga tigom sa Kingdom Hall. Sa ulahi, diha sa usa ka salosalo sa kasal, ang maong payunir nakahimamat ug usa ka batan-ong bungol nga lalaki nga taga-Calcutta nga daghag pangutana ug nagpakitag dulot nga kaikag nga mahibalo ug dugang pa bahin kang Jehova. Apan, dihay problema. Ang batan-ong lalaki gidahom nga mopauli sa Calcutta, mga 1,600 kilometros ang gilay-on, aron moeskuyla sa kolehiyo, ug walay Saksi didto nga makamaong mosulti pinaagig senyas. Uban sa dakong paningkamot, iyang gikombinsir ang iyang amahan nga tugotan siya sa pag-eskuyla sa Bangalore aron makapadayon siya sa iyang pagtuon sa Bibliya. Maayo ang iyang espirituwal nga pag-uswag, ug human sa mga usa ka tuig, iyang gipahinungod ang iyang kinabuhi kang Jehova. Siya, sa baylo, nagdumalag pagtuon sa Bibliya uban sa daghang bungol, lakip na sa usa ka higala sa bata pa siya. Ang sangang buhatan sa India naghikay karon nga ang mga payunir makakat-on pagsulti pinaagig senyas aron matabangan ang mga bungol.

17. Iasoy kon unsay imong nakita nga ilabinang makapadasig diha sa 2004 tuig sa pag-alagad nga taho sa mga panid 19 hangtod sa 22.

¹⁷ Sa mga panid 19 hangtod sa 22 niining magasina, imong makita ang tibuok-kalibotang taho sa pagsangyaw sa kanataran sa mga Saksi ni Jehova sa 2004 nga tuig sa pag-alagad. Gahinig panahon ang pagsusi niana, ug tan-awa mismo ang pamatuod nga ang katawhan ni Jehova sa tibuok yuta naghatag ug dakong pagtagad sa pagpangita karon sa “perlas nga bililhon kaayo.”

“Magpadayon sa Pagpangita Pag-una sa Gingharian”

18. Unsang impormasyon ang wala iapil ni Jesus sa sambingay sa nagapanawng magpapatigayon, ug nganong wala man niya kana iapil?

¹⁸ Kon hunahunaon nato pag-usab ang sambingay ni Jesus sa nagapanawng magpapatigayon, atong mamatikdan nga walay gisulti si Jesus bahin sa kon sa unsang paagi mentinahon sa magpapatigayon ang iyang panginabuhi human niya mabaligya ang tanan niyang nabatonan. Realistikanhon nga mangutana ang uban: ‘Sa unsang paagi ang magpapatigayon makapangitag pagkaon, besti, ug puy-anan karon nga wala na siyay gisaligan? Unsay kapuslanan nianang bililhong perlas kaniya?’ Kana maoy makataronganong mga pangutana gikan sa unodnong panglantaw. Apan dili ba gidasig man ni Jesus ang iyang mga tinun-an: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo”? (Mateo 6:31-33) Ang pangunang punto sa sambingay mao ang panginahanglan nga ipasundayag ang tibuok-kasingkasing nga debosyon ngadto sa Diyos ug kasibot alang sa Gingharian. Adunay bay leksiyon nga atong makuha gikan niini?

19. Unsang pangunang leksiyon ang atong makat-onan gikan sa sambingay ni Jesus sa perlas nga bililhon kaayo?

¹⁹ Kita man bag-o pang nakakat-on bahin sa maanindot nga maayong balita o ginapangagpas nato ang Gingharian ug gisultian ang uban bahin sa mga panalangin niini sulod sa daghang dekada, kinahanglang magpadayon kita sa pagsentro sa atong interes ug pagtagad nganha sa Gingharian. Ania kita sa malisod nga mga panahon, apan kita adunay lig-ong mga katarongan sa pagtuo nga ang atong ginatinguha maoy tinuod ug walay ikatandi—sama sa perlas nga nakaplagan sa magpapatigayon. Ang mga hitabo sa kalibotan ug ang natuman nga mga tagna sa Bibliya nagtagana ug makapakombinsir nga pamatuod nga kita nagkinabuhi sa “kataposan sa sistema sa mga butang.” (Mateo 24:3) Hinaot kita, sama sa nagapanawng magpapatigayon, magpasundayag ug bug-os-kasingkasing nga kasibot alang sa Gingharian sa Diyos ug magmaya diha sa pribilehiyo nga magmantala sa maayong balita.—Salmo 9:1, 2.