Relihiyosong mga Tradisyon ug ang Bibliya

“INYONG gihimong walay pulos ang pulong sa Diyos tungod sa inyong tradisyon.” Kini mao ang mga pulong sa dili lain kondili ni Jesu-Kristo. (Marcos 7:13) Sama sa daghang tawo karong adlawa, ang mga Hudiyo sa adlaw ni Jeuss matinumanong mitapot sa komplikadong usmbanan sa mga pagtuo ug mga btasan. Ug sama sa daghang klerigo krong adlawa, ang ilang relihyosong mga pangulo nag-isip niining mga tradisyona ingong labi pang hinungdanon kay sa Bibliya.

Sa pag-ilustrar: Ang Pulong sa Diyos tinong nagsugo nga ang mga anak magapasidungog sa ilang mga ginikanan. (Exodo 20:12) Kini dayag nag-apil sa pagtabang sa mga ginikanan nga nahiagom sa kalisod sa salapi. Bisan pa niana, naugmad ang usa ka Hudiyonhong tradisyon nga mitaganag sayon nga paagi sa paglikay niining Biblikanhong katungdanan. Ang hakog nga tawo yanong magsaad nga ang iyang kaugalingong kabtangan sa ulahi ihatag sa templo, nga magagahin sa kabtangan pinaagi sa pagdeklarar nga kana “corban.” Kining pulonga nagkahulogang “usa ka gasa nga gipahinungod sa Diyos.” Bisan pag ang Hudiyong magsisimba lagmit may kagawasan sa paggamit sa maong corban sa iyang personal nga kaayohan, siya sa pagkabalaan dili makahatag niana ngadto sa iyang mga ginikanan.​—Marcos 7:9-12.

Bisan pa niana, kini ug ang ubang Hudiyonhong ‘balaang mga tradisyon,’ gihagit ni Jesus, nga miingon: “Kamong mga maot, si Isaias tukmang nagtagna mahitungod kaninyo, sa miingon siya, ‘Kining katawhana nagapasidungog kanako pinaagi sa ilang mga ngabil, apan ang ilang kasingkasing halayo kanako. Kawang nga sila nagapadayon sa pagsimba kanato, tungod kay sila nagatudlo sa mga sugo sa mga tawo ingong mga doktrina.’”​—Mateo 15:3-9.

Tungod sa giingon ni Jesus, ang usa ka Kristohanon makaisip ba gayod sa bisan unsang relihiyosong tradisyon nga sama sa Bibliya? Dili. Bisan unsa ka dakong pagbati o emosyon ang nalangkit sa usa ka batasan, ang kabalaka sa Kristohanon mao kon kaha kana nahiuyon sa Pulong sa Diyos o dili. Ingong pananglitan, tagda ang pila ka tradisyonal nga relihiyosong buhat nga gibatbat diha sa Katolikong librong Liturgy​—An Elementary Course, ni María A. Lombillo Clark, T.D. Unsay kahimtang niining mga tradisyona kon itandi sa ginaingon sa Bibliya?

[Kahon]

LITURHIYA

“Kami nagapaila sa among pagsimba sa Diyos pinaagi sa relihiyosong mga buhat.”

PULONG SA DIYOS

“Magagmay nga mga anak, magbantay kamo sa mga diyosdiyos.”​—1 Juan 5:21.

“Ang Diyos Espiritu, ug kadtong nagasimba kaniya kinahanglang magasimba sa espiritu ug kamatuoran.”​—Juan 4:24.

“Kami nagalakaw pinaagi sa pagtuo, dili pinaagi sa panan-aw.”​—2 Corinto 5:7.

“Ako mao si Jehova. Kana mao ang akong ngalan; ug ang akong himaya dili nako igahatag sa uban, ni ang akong pagdayeg sa kinulit nga mga larawan.”​—Isaias 42:8.

LITURHIYA

“Pagahimoon nato ang relihiyosong mga buhat ngadto sa Labing Balaang Birhen Maria, sa mga anghel, ug sa mga santos. Apan [kanang] relihiyosong mga buhat sa pagsimba . . . sa kataposan mahidangat sa Diyos, sa samang paagi nga mapasidunggan ang usa ka hari kon ang pasidungog igahatag ngadto sa iyang mga ministro”

PULONG SA DIYOS

“Dili ka magbuhat alang sa imong kaugalingon sa usa ka kinulit nga larawan o sa usa ka dagway nga sama sa bisan unsa nga anaa sa mga langit sa itaas o anaa sa yuta . . . Dili ka magayukbo kanila ni mahaylo sa pag-alagad kanila.”​—Exodo 20:4, 5.

“Ako si Juan . . . mihapa sa pagsimba sa atubangan sa tiilan sa manulonda . . . Apan ako giingnan niya: ‘Pagbantay! Ayaw kana buhata! . . . Simbaha ang Diyos.’”​—Pinadayag 22:8, 9.

“Adunay usa ka Diyos, ug usa ka tigpataliwala sa Diyos ug sa mga tawo, usa ka tawo, si Kristo Jesus.”​—1 Timoteo 2:5

LITURHIYA

“Ang Krucsipiho bililhon kaayo diha sa altar; kon wala kana ang Balaang Misa dili masaulod. Gikinahanglan usab ang tulo ka mantel sa altar, duha ka kandelabra, ug ang mga papan sa sakramento.”

PULONG SA DIYOS

“Ang Diyos nga nagbuhat sa kalibotan ug sa tanan nga butang niini, tungod ka, maingon nga kini Siya mao, Ginoo sa langit ug sa yuta, wala magapuyo sa mga templo nga binuhat sa kamot.”​—Buhat 17:24.

“Gitutok namo ang among mga mata, dili sa mga butang makita, kondili sa mga butang dili makita.”​—2 Corinto 4:18.

LITURHIYA

“Nobyembre 1 . . . ang selebrasyon sa Adlaw sa mga Santos. Kini mao ang Balaang Adlaw sa tanang kalag nga malipayong nagapuyo sa langit, ug may adlaw ra nga maato.”

PULONG SA DIYOS

“Ang mga patay dili magadayeg kang Jah, ni si bisan kinsa nga moadto sa kahilom.”​—Salmo 115:17.

“Ang mga patay walay kahibalo.”​—Ecclesiastes 9:5, Revised Standard Version Common Bible.

“Ang tanang kalag nga dili magpatalinghog nianang manalagnaa pagalaglagon.”​—Buhat 3:23, Douay Version.

LITURHIYA

“Sa pagtabang niining maong mga kalag [ang Iglesya] nagtukod sa ‘Paghandom sa matinuohon nga nangamatay’ sa Nobyembre. Niining adlawa ang mga pari nagasaulog sa Misa katulo ka beses sa paghupay sa mga kasakit bulahang mga kalag sa purgatoryo ug pagpadali sa pagsulod nila sa langit.”

“Sa kataposang analisis, ang Katolikong doktrina bahin sa purgatoryo gipasukad sa tradisyon, dili sa Sagrada Eskritura.”​—New Catholic Encyclopedia, Tomo 11, panid 1034.

PULONG SA DIYOS

“Walay buhat, ni pangatarongan, ni kaalam, ni kahibalo, diha sa impiyerno, diin ikaw moadto.”​—Ecclesiastes 9:10, Douay Version.

“Ayaw ibutang ang imong pagsalig diha sa [tawo;] . . . siya mobalik sa iyang yuta: nianang adlawa ang tanan niyang hunahuna mahanaw.”​—Salmo 145:2-4, Douay Version.

Napahigawas sa Makadaot nga mga Tradisyon

Busa, daghang popular relihiyosong mga tradisyon dili makapahimuot sa Diyos ug sa ingon makadaot. Hinuon, makaiikag nga si apostol Pablo misulat: “Karon ako nagadayeg kaninyo tungod sa tanang butang . . . kamo nagapangupot sa hugot sa mga tradisyon sumala sa akong gipasa kaninyo.” (1 Corinto 11:2) Hinuon, ang maong mga tradisyon maayo, mapuslanong mga batasan nga gipasukad sa Pulong sa Diyos​—dili waykahulogan, ginamag-tawong mga rituwal. Gipulihan nila ang “dili-mabungahong matang sa kagawian nga nadawat pinaagi sa tradisyon” nga gisunod sa daghan sa unang siglo una mahimong mga Kristohanon.​—1 Pedro 1:18.

Susama karong adlawa, ang tawong mahadlokon sa Diyos kinahanglang magsusi ug magsalikway sa bisan unsang tradisyon nga mapamatud-ang dili kasulatanhon. Sa pagkamatuod, ang relasyon sa usa sa Diyos labi pang bililhon kay sa bisan unsang ginamag-tawong mga dagway sa pagsimba! Hinuon, dili sayon ang pagsalikway sa dili-kasulatanhong mga tradisyon. Kadaghanan kinahanglan kinig pagpasibo sa dugay-nang-natukod nga mga kagawian. Pananglitan, usa ka batan-ong lalaki sa Colombia nahunob sa relihiyosong tradisyon. Sukad sa pagkabata siya may mainitong tinguha nga mahimong Katolikong pari. Kadaghanan siya ‘magmisamisa’ uban sa iyang mga igsoong babaye, nga magadawat pag “mga pangompisal” gikan kanila. Katuigan sa ulahi siya nakasulod sa tunghaan una makasulod sa seminaryo, nga sa kataposan misulod sa usa ka Katolikong unibersidad. Didto, ang relihiyosong mga tradisyon nakadulot nga lalom pa sa iyang kasingkasing.

Usa ka adlaw, usa sa mga Saksi ni Jehova miduaw sa iyang balay. Bisan pag halos dili tugotan sa iyang mga ginikanan nga ang Saksi makasulti, ang diyutay nga nasulti nakadulot sa maong mahunahunaon-sa-relihiyon nga batan-on. Sa ulahi gihikay niya ang pagtuon sa tago sa Bibliya uban niadtong Saksi. “Ang tiunay kong tinguha,” siya nahinumdom, “mao ang pagkahibalo sa Bibliya gikan sa laing punto de vista nga walay pag-usab sa akong relihiyon. Dako ang akong tinguha nga moalagad sa Diyos ingong pari, nga mosulay sa pagpahinabog kausaban diha sa mga kasingkasing sa mga tawo. Tapos sa pagtuon sa Bibliya sa usa ka bulan, mitungha ang panagbingkil sa akong kahiladman, kay ang mga tradisyon ug ang mga rituwal sa akong relihiyon nakigbisog batok sa maputling mga sukdanan sa Kasulatan.”

Gipugos siya sa iyang pamilya sa paghunong sa pagtuon sa Bibliya, ug sa kataposan napugos siya sa pagpahawa sa balay. Bisan pa niana, siya miingon: “Tapos sa duha ka bulan nga pagtuon sa Bibliya, ako nakombinsir nga ako sayop kaayo, ug ako mibiya sa unibersidad ug sa akong trabaho ingong magtutudlo sa usa ka relihiyosong kolehiyo ug gideboto ang akong kaugalingon sa pagsangyaw sa balay-balay. Karon nausab ang akong kinabuhi ug ang akong mga batasan usab. Ilabinang gibati ko ang kalipay niadtong dili-hikalimtang adlaw nga gisimbolohan ko ang akong pahinungod kang Jehova pinaagig bawtismo.” Kining batan-ong lalaki karon nagaalagad sa bug-os panahon aron tabangan ang uban sa pagpahigawas sa ilang kaugalingon gikan sa mga tradisyon nga makapakaulaw sa Diyos.

Kon ikaw mainitong debotado sa relihiyosong tradisyon, basin makaplagan mong kinahanglang himoon ang pila ka kausaban. Hinumdomi pag-usab kon unsay kas-a giingon ni Jesus ngadto sa Samarianhong babaye sa atabay. Siya ug ang iyang katawhan may karaan nang batasan sa pagsimba sa Diyos sa Bukid Gerizim. Bisan pa niana, gipakita ni Jesus kaniya nga kadto way-pulos nga tradisyon, nga miingon: “Tuohi ako, babaye, Ang takna nagasingabot sa diha nga dili niining bukira o sa Jerusalem nga kamo magasimba sa Amahan. . . . Ang matuod nga mga magsisimba magasimba sa Amahan sa espiritu ug sa kamatuoran, kay, sa pagkamatuod, ang Amahan nagapangita sa maong mga tawo sa pagsimba kaniya.”​—Juan 4:19-23.

Ikaw ba usa nga “nga gipanguta sa Amahan”? Ikaw ba may mainitong tinguha sa pagsimba sa Diyos sa kamatuoran? Nan ang pasidaan ni apostol Pablo sa Colosas 2:8 labing haom: “Pagbantay nga walay magalimbong kaninyo pinaagi sa iyang mga pagpinilosopo, pinaagi sa kawang nga mga handurawan nga gikan sa tradisyon sa tawo.” (The Holy Bible, Ronald A. Knox) Sunda, hinunoa, ang mga pagtulon-an sa matuod nga Kristiyanidad, nga mahimong moagak kanimo ngadto sa kinabuhing walay kataposan!​—Juan 17:3.