Kinabuhi ug Ministeryo ni Jesus

Ang mga Tinapay ug ang Igpapatubo

DAGKONG nga panon ang mihugop kang Jesus sa Dekapolis. Daghan ang nangabot gikan sa layo niining rehiyon nga gipuy-an ilabina sa mga Hentil aron manimati kaniya ug mamaayo sa ilang mga kaluyahon. Nagdala silag dagkong mga bukag, o alat, nga naandan nilang gamiton nga sudlag pagkaon sa dihang magapanaw agi sa mga lugar sa Hentil.

Ugaling, sa kataposan gitawag ni Jesus ang iyang mga tinun-an ug miingon: “Ako naluoy sa panon, tungod kay tulo na ka adlaw nga sila nagpabilin duol kanako ug sila walay makaon; ug kon papaulion ko sila nga wala makakaon, sila panguyapan sa dalan. Sa pagkamatuod, ang pipila kanila gikan pa sa halayo.”

“Asa man kita makakuhag mga tinapay dinhi sa awaaw nga arang makabusog niining mga tawhana?” nangutana ang mga tinun-an.

Si Jesus nangutana: “Pila ba ka buok ang inyong tinapay?”

“Pito,” sila mitubag, “ug pipila ka gagmayng isda.”

Si Jesus, nga nagsugo sa mga tawo sa paglingkod sa yuta, nagkuha sa mga tinapay ug sa mga isda, miampo sa Diyos, mipikaspikas kanila, ug mihatag niana ngadto sa iyang mga tinun-an. Sa baylo, ilang gidulotan ang katawhan, kinsa nangaon hangtod nabusog. Human niana, sa gihipos ang mga bilin, dihay pito ka bukag nga puno, bisan pag mga 4,000 ka lalaki, ingon man mga babaye ug mga bata, ang nakakaon!

Si Jesus nagpalakaw sa mga panon, misakay ug sakayan kauban sa iyang mga tinun-an, ug mitabok ngadto sa kasadpang baybayon sa Dagat sa Galilea. Didto ang mga Pariseo, nga sa maong panahon gikuyogan sa mga sakop sa relihiyosong sekta sa mga Saduseo, misulay sa pagtental kang Jesus pinaagi sa pagpangayo nga iyang ipasundayag ang usa ka ilhanan gikan sa langit.

Kay nakaamgo sa ilang paningkamot sa pagtental kaniya, si Jesus mitubag: “Inigkasawumsom kamo sa naandan magaingon, ‘Maayo ang panahon ugma, kay pula ang langit’; ug inigkabuntag, ‘Tugnaw, ulanon ang panahon karong adlawa, kay ang langit pula, apan nagadagtom.’ Makamao kamong mohubad sa dagway sa langit, apan kamo dili makahubad sa mga ilhanan sa kapanahonan.”

Niana sila gitawag ni Jesus nga daotan ug mananapawon ug gipasidan-an sila nga, sumala sa iyang gipamulong sayosayo ngadto sa mga Pariseo, walay ilhanan ang igahatag kanila gawas sa ilhanan ni Jonas. Sa pagbiya, siya ug ang iyang mga tinun-an misakay ug sakayan ug mipaingon sa Betsaida sa amihanan-silangang baybayon sa Dagat sa Galilea. Sa ilang pagpaingon didto nasayran sa mga tinun-an nga sila nakalimot pagdalag tinapay, nga usa ra ang tinapay sa ilang taliwala.

Kay nahinumdom sa iyang pakigtagbo sa mga Pariseo ug mga Saduseo nga mga tigpaluyo ni Herodes, si Jesus mitambag: “Bukha ninyo kanunay ang inyong mga mata, bantayi ninyo ang igpapatubo sa mga Pariseo ug ang igpapatubo ni Herodes.” Sanglit gituohan sa mga tinun-an nga si Jesus nagtumong sa ilang pagkalimot sa pagdalag tinapay, nga lagmit ang igpapatubo nagsugyot sa ilang mga hunahuna sa ideya sa tinapay, sila naglantugi bahin niadto. Sa pagmatikod nga sila wala makasabot, si Jesus miingon: “Nganong kamo maglantugi mahitungod sa inyong pagkawalay tinapay?”

Dili pa dugay, milagrosong gitagana ni Jesus ang tinapay alang sa linibong tawo, nga gihimo kining kataposang milagro sa tingali usa o duha ka adlaw nga nangagi. Sila nahibalo gayod nga siya dili mabalaka sa pagkawalay literal nga tinapay. “Wala ba kamo mahinumdom,” siya nagpahinumdom kanila, “sa dihang akong gipikaspikas ang lima ka tinapay alang sa lima ka libong lalaki, kon pila ka bukag nga puno sa mga tipik ang inyong nahipos?”

“Napulog-duha,” mitubag sila.

“Sa dihang akong gipikaspikas ang pito alang sa upat ka libong lalaki, pila ka bukag nga puno sa mga tipik ang inyong nahipos?”

“Pito,” mitubag sila.

“Wala ba kamo makasabot sa kahulogan?” si Jesus nangutana. “Naunsa ba nga kamo wala makasabot nga ako wala maghisgot mahitungod sa mga tinapay? Apan pagbantay kamo sa igpapatubo sa mga Pariseo ug sa mga Saduseo.”

Sa kataposan ang mga tinun-an nakasabot. Ang igpapatubo, usa ka substansiya nga makapaaslom ug makapatubo sa tinapay, maoy usa ka pulong nga kadaghanan gigamit sa pagpasabot sa pagkadunot. Busa karon ang mga tinun-an nakasabot nga si Jesus migamit ug simbolismo, nga siya nagpasidaan kanila nga magbantay batok “sa pagtulon-an sa mga Pariseo ug sa mga Saduseo,” nga ang maong pagtulon-an may makadaot nga epekto. Marcos 8:1-21; Mateo 15:32–16:12.

◆ Nganong ang mga tawo nagdalag dagkong mga bukag sa pagkaon?

◆ Sa pagbiya sa Dekapolis, diin mopaingon si Jesus nga sakay sa sakayan?

◆ Unsay wala hisabti sa mga tinun-an mahitungod sa gipahayag ni Jesus bahin sa igpapatubo?

◆ Unsay gipasabot ni Jesus sa “igpapatubo sa mga Pariseo ug sa mga Saduseo”?