LEKSIYON 51
Unsay Imong Himoon Aron Malipay si Jehova sa Imong Sinultihan?
Dihang gilalang ta ni Jehova, gihatagan ta niyag nindot nga regalo—ang katakos sa pagsulti. Importante ba niya kon unsaon nato paggamit kana nga regalo? Oo! (Basaha ang Santiago 1:26.) Busa unsaon nato paggamit ang atong katakos sa pagsulti sa paagi nga makapalipay kang Jehova?
1. Unsaon nato paggamit ang regalo ni Jehova sa maayong paagi?
Ang Bibliya nag-ingon nga “padayon [tang] magdinasigay ug maglig-onay.” (1 Tesalonica 5:11) Naa ba kay mahunahunaan nga nanginahanglag pagdasig? Unsay puwede nimong himoon sa paghupay kanila? Pasaligi sila nga importante sila kanimo. Tingali imo silang sultihan kon unsay imong naapresyar kanila. Naa ba kay mahunahunaang teksto nga makapadasig sa uban? Naay daghang teksto nga imong kapilian. Hinumdomi pod nga dili lang ang imong isulti ang importante kondili ang imong paagi pod sa pagsulti niana. Busa paningkamot kanunay nga mosulti sa buotan ug lumo nga paagi.—Proverbio 15:1.
2. Unsa nga sinultihan ang angay natong likayan?
Ang Bibliya nag-ingon: “Ang mga pulong nga mogawas sa inyong baba kinahanglang dili ngil-ad.” (Basaha ang Efeso 4:29.) Nagpasabot ni nga likayan nato ang dili maayong sinultihan o ang pagsultig makapasakit nga mga pulong. Angay pod natong likayan ang makadaot nga pagpanabi ug pagbutangbutang.—Basaha ang Proverbio 16:28.
3. Unsay makatabang aron makapadasig ang atong sinultihan?
Sagad, ang atong ginasulti magpakita kon unsa gyoy naa sa atong kasingkasing o hunahuna. (Lucas 6:45) Busa kinahanglan natong bansayon ang atong kaugalingon nga magpokus sa positibong mga butang—mga butang nga matarong, putli, hiligugmaon, ug dalayegon. (Filipos 4:8) Aron makapokus ta niining mga butanga, kinahanglan nga maalamon ta sa pagpilig kalingawan ug mga higala. (Proverbio 13:20) Makatabang pod kon maghunahuna ta ayha mosulti. Konsideraha kon unsay epekto sa imong isulti ngadto sa uban. Ang Bibliya nag-ingon: “Ang mga pulong nga wala hunahunaa samag dunggab sa espada, apan ang dila sa maalamon makaayo.”—Proverbio 12:18.
TUN-IG DUGANG
Sayra kon unsaon pagsulti nga makapalipay kang Jehova ug makapadasig sa uban.
4. Kontrolaha ang imong sinultihan
Usahay, makasulti tag mga butang nga atong mahayan. (Santiago 3:2) Basaha ang Galacia 5:22, 23, ug dayon hisgoti kini nga mga pangutana:
Asa ani nga mga hiyas ang imong iampo nga makatabang nimo sa pagkontrol sa imong sinultihan? Sa unsang paagi kini nga mga hiyas makatabang nimo?
Basaha ang 1 Corinto 15:33, ug dayon hisgoti kini nga pangutana:
Unsay epekto sa imong gipili nga mga higala ug kalingawan diha sa imong sinultihan?
Unsa kahay makaimpluwensiya sa imong sinultihan?
Basaha ang Ecclesiastes 3:1, 7, ug dayon hisgoti kini nga pangutana:
Kanus-a nga maalamong maghilom o maghulat sa mas maayong panahon nga mosulti?
5. Pagsultig positibong mga butang bahin sa uban
Unsay atong himoon aron dili ta makapanginsulto o makasultig dili maayo? I-play ang VIDEO, ug dayon hisgoti ang mosunod nga mga pangutana:
Sa video, nganong gustong bag-ohon sa brader ang iyang sinultihan?
Unsay iyang gihimo aron magbag-o?
Basaha ang Ecclesiastes 7:16, ug dayon hisgoti kini nga pangutana:
Unsay angay natong hinumdoman dihang matental ta sa pagsultig negatibo bahin sa uban?
Basaha ang Ecclesiastes 7:21, 22, ug dayon hisgoti kini nga pangutana:
Sa unsang paagi makatabang ni nga teksto nga dili ka masuko o mahiubos dihang naay mosultig negatibo bahin nimo?
6. Angayng buotan ta dihang makig-estorya sa atong pamilya
Gusto ni Jehova nga buotan ta ug mahigugmaon dihang makig-estorya sa atong pamilya. I-play ang VIDEO, ug dayon hisgoti ang mosunod nga pangutana:
Unsay makatabang nimo nga mahimong buotan dihang makig-estorya ka sa imong pamilya?
Basaha ang Efeso 4:31, 32, ug dayon hisgoti kini nga pangutana:
Unsa nga sinultihan ang makapalig-on sa pamilya?
Gisulti ni Jehova ang iyang pagbati sa iyang Anak, si Jesus. Basaha ang Mateo 17:5, ug dayon hisgoti kini nga pangutana:
Unsaon nimo pagsundog si Jehova dihang makig-estorya ka sa imong pamilya?
Pangitag kahigayonan nga makasulti kag apresasyon sa uban
ANG UBAN MOINGON: “Isulti nako ang akong gustong isulti. Wala koy labot kon dili ganahan ang uban sa akong isulti.”
Mouyon ba ka ana? Nganong kanay imong tubag?
SUMARYO
Ang atong ginasulti dakog epekto sa uban. Kinahanglan natong hunahunaon pag-ayo kon unsay atong isulti, kon kanus-a nato ni isulti, ug kon unsaon nato ni pagsulti.
Review
Sa unsang mga paagi magamit nimo ang katakos sa pagsulti sa pagtabang sa uban?
Unsa nga sinultihan ang gusto nimong likayan?
Unsay makatabang nato aron kanunayng buotan ug makapalig-on ang atong sinultihan?
SUSIHA
Unsay makatabang aron positibo ang atong sinultihan?
Sayra kon unsay makatabang aron malikayan nimo ang dili maayong sinultihan.
Sayra kon unsay himoon aron malikayan nimo ang makadaot nga pagpanabi.
Sayra kon giunsa pagtabang ni Jehova ang usa ka lalaki nga naglisod ug hunong sa pagpamalikas.