Sakripisyo ba ang Imong Pagpanghatag?

Usa ka Timbang nga Panglantaw sa mga Amot

TAPOS matudloig daghang butang ang mga tawo sa templo, si Jesus “milingkod nga makita ang mga panudlanan sa salapi ug gipaniiran ang panon sa mga tawo nga nanghulog ug kuwarta sa panudlanan.” (Marcos 12:41) Ang misunod mao ang iladong asoy sa diyot sa babayeng balo. Apan nganong milingkod didto si Jesus ug naniid sa mga tawong nanghatag sa ilang halad? Wala ba niya sultihi ang iyang mga tinun-an nga angay ganing dili nila pahibaloon ang ilang wala nga kamot sa gibuhat sa ilang tuo nga kamot kon sila naghimo sa ilang mga gasa sa kaluoy?​—Mateo 6:3.

Sayosayo niana, gisaway nga masakit ni Jesus ang relihiyosong mga pangulo tungod sa paggamit ug dili-mabinationg mga paagi sa “pagsubad sa mga babayeng balo.” Siya miingon nga kining mga relihiyona “magadawat ug labi pang bug-at nga silot.” (Marcos 12:40) Aron itudlo ang usa ka pagtulon-an, dayon iyang giliso ang iyang pagtagad ngadto sa gibuhat sa mga tawo didto sa mga panudlanan sa salapi. Karong adlawa, sa dihang daghan kaayo kitag madungog bahin sa dagko kaayong salapi nga nalangkit sa mga relihiyosong organisasyon, sayop nga paggamit nianang salapia, ug sa maluhong pagkinabuhi niadtong nagdumala, maayong mamati kita pag-ayo sa gipamulong ni Jesus.​—Palihog basaha ang Marcos 12:41-44.

Ang mga Panudlanan sa Salapi

Ang asoy nag-ingon nga si Jesus “milingkod nga makita ang mga panudlanan sa salapi.” Lagmit kadto didto sa Sawang sa Kababayen-an, diin ang ubay-ubayng panudlanan, o mga kahon, gibutang ubay sa mga bungbong aron ihulog sa mga tawo ang ilang mga halad. Ang Hudiyonhong tradisyon nagasulti kanatong 13 tanan kadtong mga kahona. Sa Hebreohanon sila gitawag mga trompeta, kay sila may gamayng lungag sa ibabaw nga ang porma mao ang kampana sa usa ka trompeta. Giingong ‘walay mosulod sa templo nga dili mohulog niana.’

Ang Pranses nga propesor si Edmond Stapfer, sa iyang librong Palestine in the Time of Christ (1885), mihatag ug detalyadong kabatbatan niining mga panudlanana sa salapi. Ang iyang asoy nagahatag kanatog diyutayng pagsabot sa relihiyosong kinabuhi sa mga tawo niadtong panahona, ilabina bahin sa ilang mga amot alang sa mga serbisyo sa templo.

“Ang matag panudlanan maoy alang sa usa ka lahing tumong, nga gipaila sa usa ka sinulat sa Hebreohanong pinulongan. Ang nahauna gisulatan sa: Bag-ong mga siklo; nga mao, mga siklo nga gigahin alang sa mga gastos sa maong tuig. Ang ikaduha: Daang mga siklo; nga mao, mga siklo nga gipahinungod sa gastos sa milabayng tuig. Ikatulo: Mga tukmo ug mga kuyabog sa salampati; ang kuwartang ibutang sa maong panudlanan mao ang prisyo nga ibayad niadtong kinahanglang mohalad ug duha ka tukmo o duha ka kuyabog sa salampati, ang usa ingong halad-nga-sinunog, ang lain ingong usa ka halad sa sala. Sa ibabaw sa ikaupat nga panudlanan nahisulat: Mga halad-nga-sinunog; kining kuwartaha mao ang bayad sa ubang mga halad-nga-sinunog. Ang ikalima may nahisulat: Kahoy, ug nasudlan sa mga gasa sa mga matinuohon aron ipalit ug kahoy alang sa halaran. Ang ikaunom: Insenso (kuwartang ipalit ug insenso). Ang ikapito: Alang sa sangtuwaryo (kuwarta alang sa dapit-pasig-ulian o mercy seat). Ang unom nahibiling panudlanan may nahisulat: Kinabubut-ong mga halad.”

Ang ngalan sa unang duha ka panudlanan nagtumong sa tunga sa siklo (duha ka drakma sa Gresyanhong salapi) nga buhis sa matag hamtong nga lalaki nga gibaod alang sa pagmentenar sa templo, sa mga serbisyong gihimo didto, ug sa matag-adlawng mga halad nga gihalad alang sa tibuok nasod. Ang maong buhis kadaghanan kolektahon sa lokal nga mga komunidad ug dayon dad-on sa templo.​—Mateo 17:24.

Ang katawhan gimandoan usab sa Kasugoan sa paghimog nagkalainlaing halad alang sa ilang kaugalingon. Ang pipila maoy alang sa mga salang nahimo, ang uban tungod sa seremonyal nga mga hinungdan, ug ang uban pa gayod tungod sa ilang pagkamahinalaron ug pagpasalamat. Ang mga kahong gimarkahag “Mga tukmo ug mga kuyabog sa salampati” ug “Mga halad-nga-sinunog” maoy alang sa maong mga katuyoan. “Nganha sa Trompeta III,” matud sa librong The Temple, Its Ministry and Services, “kadtong mga babaye nga kinahanglang magdalag mga tukmo alang sa halad-​nga-sinunog ug halad-sa-sala naghulog sa kuwartang katumbas niana, nga adlaw-adlawng gikuha ug gihalad ang katumbas nga gidaghanon sa mga tukmo.” Lagmit kini ang gibuhat sa mga ginikanan sa masusong si Jesus.​—Tan-awa ang Lucas 2:22-24; Levitico 12:6-8.

Unya diha ang mga halad alang sa kahoy ug insenso nga gigamit sa halaran ug ang boluntaryong mga halad. Makausa pa, sumala kang Propesor Stapfer, “kon may mohatag ug kuwarta alang sa kahoy o insenso, may gipihong labing gamayng kantidad, ug ang wala makaabot niini dili na ihalad. Kinahanglang ihatag labing menos ang prisyo sa usa ka hakop nga insenso, o duha ka troso sa kahoy nga ang gitas-on usa ka maniko ug may pagkadako.”

Unsay atong matun-an gikan niining tanan? Dayag nga ang mga Israelinhon daghag responsabilidad maylabot sa pagmentenar sa tabernakulo ug sa ulahi sa templo sa Jerusalem, ang sentro sa matuod nga pagsimba. Ngani, ang Kasugoan nagsugo nga “walay mausa ang moatubang kang Jehova nga walay dala.” (Deuteronomio 16:16) Apan unsa man ang ilang panglantaw sa maong mga obligasyon?

Nagkadaiyang mga Panglantaw

Ang talaan sa Bibliya nagapakitang ang mga tawo labing liberal ug manggihatagon sa panahon ni Moises ug ni David ug sa ulahi panahon sa paghari ni Jehoas ug Josias. (Exodo 36:3-7; 1 Cronicas 29:1-9; 2 Cronicas 24:4-14; 34:9, 10) Sila nalipay nga makabahin sa pagtukod sa balay ni Jehova ug pagmentenar niana ingon man sa pagpauswag sa matuod nga pagsimba. Ang ilang pagbati gipahayag pag-ayo sa mga pulong ni David sa miingon siya: “Ako nalipay sa dihang sila miingon kanako: ‘Mangadto kita sa balay ni Jehova.’”​—Salmo 122:1.

Ugaling, kining manggihatagong espiritu wala mabatoni sa tanan. Pananglitan, atong mabasa nga sa mga adlaw ni Malaquias, ang mga saserdote naghalad kang Jehova “sa daot, ug sa piang, ug sa masakiton.” Inay magkalipay sa ilang pribilehiyo sa pag-alagad, sila miingon: “Tan-awa! Pagkamakalaay!”​—Malaquias 1:13.

Sa susama, sa panahon ni Jesus gipahimuslan sa pipila ang situwasyon sa pagpauswag sa ilang kaugalingong intereses. Pananglitan, ang daotag-dungog nga mga mag-iilis ug salapi sa templo dili lamang tua didto aron mangilis. Hinunoa, gipahimuslan nila ang kamatuorang Hebreohanong mga siklo lamang ang madawat nga mga halad, ug ang tanang may Romanhon o Gresyanhong kuwarta kinahanglang mag-ilis niana. Sumala kang Alfred Edersheim, usa ka awtoridad sa Hudiyonhong kasaysayan, “ang mga mag-iilis ug kuwarta gitugotan sa pagsingil sa salaping meah, o mga un-kuwarto sa denar [o denario, ang suhol sa mamumuo sa usa ka adlawng trabaho] sa matag tunga sa siklo.” Kon kini husto, dili lisod sabton nga nahimo gayod kadtong dakog-ganansiyang negosyo ug nganong nasuko sa labihan ang mga relihiyosong pangulo sa giabog ni Jesus ang mga mag-iilis sa kuwarta.

“Gikan sa Iyang Kapit-os”

Kining tanan nagapasiugda lamang sa ilustrasyon ni Jesus bahin sa gamayng amot sa kabos nga babayeng balo, nga walay duhaduha iyang gihulog sa usa sa mga kahong gimarkahag “Kinabubut-ong mga halad.” Ingong balo, siya wala obligaha sa paghatag sa buhis, ug kay kabos man, siya lagmit wala makaabot sa labing gamayng mga kinahanglanon alang sa mga halad-nga-sinunog o sa kahoy o mga halad nga insenso. Bisan pa niana, buot niyang may mahimo siya sa pagpakita sa iyang gugma kang Jehova. Dili niya buot mahigawas o magtugyan lang niana sa mga ‘makaabot niana.’ Si Jesus miingon: “Siya, gikan sa iyang kapit-os, naghulog sa tanang diha niya, ang iyang tibuok kabuhian.”​—Marcos 12:44.

Adunay daghang bililhong pagtulon-an nga atong makat-onan gikan niining asoya. Tingali, ang labing dako mao nga bisan tuod kitang tanan may pribilehiyo sa pagsuportar sa matuod nga pagsimba pinaagi sa atong materyal nga katigayonan, ang bililhon gayod sa panan-aw sa Diyos, dili mao ang atong paghatag sa butang hingapin na kanato, kondili ang atong paghatag sa butang bililhon alang kanato. Sa laing mga pulong, kita ba nagahatag sa butang nga bale wala ra kanato? O ang ato bang paghatag tinuod nga sakripisyo?

Pagpauswag sa Matuod nga Pagsimba Karong Adlawa

Karong adlawa, ang mga Saksi ni Jehova nagapauswag sa matuod nga pagsimba pinaagi sa madasigong pagsangyaw “niining maayong balita sa gingharian . . . sa tibuok gipuy-ang yuta.” (Mateo 24:14) Sa paglampos niining tibuok-yutang buluhaton gikinahanglan dili lamang ang dedikadong kahago, panahon, ug kusog kondili dakong gasto usab. Ang 1987 Yearbook of Jehovah’s Witnesses nagtaho nga “sa 1986, ang total nga $23,545,801.70 nagasto sa pinansiyal nga pagsuportar sa . . . 2,762 misyonaryo, 13,351 espesyal payunir, ug mga magtatan-aw ug ilang mga asawa alang sa 3,353 ka sirkito ug distrito sa kalibotan.” Kadto maoy gawas pa sa “dakong gastos sa pagpalit, pagtukod, ug pagremodel sa mga propiedad; sa pagsangkap sa mga pabrika ug mga opisina sa hedkuwarter ug sa 93 ka sanga sa Sosyedad; ug sa pagtagana sa materyal nga mga panginahanglan sa 8,920 ka boluntaryo nga nagaalagad sa mga pamilyang Bethel.”

‘Diin man gikan ang maong salapi?’ mao ang pangutanang kanunay isukna. Lahi sa mga iglesya sa Kakristiyanohan, ang mga Saksi ni Jehova dili mangolekta o magpadalag mga sobre nga mangayog mga donasyon. Hinunoa, ang mga kahon sa amot​—sama sa mga panudlanan sa kuwarta sa panahon sa Bibliya​—ginabutang sa ilang mga Kingdom Hall. Usahay, ang ubang kahon tingali ibutang alang sa gipihong mga katuyoan, sama sa pagtukod sa mga Kingdom Hall o Assembly Hall o pagtabang sa mga misyonaryo aron motambong sa mga kombensiyon sa ilang yutang-natawhan. Ang mga amot mahimong ipadalang direkta ngadto sa Watch Tower Society sa 25 Columbia Heights, Brooklyn, New York 11201, o ngadto sa sangang buhatan sa Sosyedad sa imong nasod, alang sa pagpauswag sa buluhaton sa pagsangyaw sa tibuok kalibotan.

Unsay imong pag-isip niining daghan ug lainlaing paagi sa paghimo sa mga amot? Ikaw ba, sama sa pipila sa adlaw ni Malaquias, nagaisip kanila nga makalaayng kabug-at, nga tingali nagaingon sa imong kasingkasing: “Tan-awa! Pagkamakalaay!”? O ikaw ba, sama sa “kabos nga babayeng balo,” nagaisip kanila ingong kahigayonan sa pagpakita sa imong kadasig ug kabalaka sa matuod nga pagsimba ug sa imong tinguha nga pasidunggan si Jehova pinaagi sa imong bililhong mga butang? Ayaw hikalimti ang nahiangay nga pangutana: Sakripisyo ba ang imong pagpanghatag?

“‘Sulayi ako, palihog, niining bahina,’ si Jehova sa mga panon nagaingon, ‘kon dili ko ba buksan alang kaninyo ang mga tamboanan sa mga langit ug igabubo ko kaninyo ang panalangin hangtod nga wala nay kawalad-on.’” (Malaquias 3:10) Ang espirituwal nga kadagaya ug ang tibuok-kalibotang kauswagan sa katawhan ni Jehova nagapamatuod nga si Jehova nagabuhat na niana. Hinaot kita magpadayon sa paghatag kang Jehova sa usa ka halad nga tinuod nga sakripisyo.

[Kahon sa panid 30]

KON GIUNSA SA UBAN PAG-AMOT ALANG SA BULUHATON SA GINGHARIAN

◻ MGA GASA: Ang boluntaryong mga donasyong kuwarta ikapadalang direkta ngadto sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o sa lokal nga sangang buhatan sa Sosyedad. Ang propiedad sama sa balay o yuta, ingon man alahas o ubang mahal nga butang, ikadonar usab. Ang mubong sulat nga nagaingong kini donasyon angay magauban niining mga amota.

◻ KAHIKAYAN SA KONDISYONAL NGA DONASYON: Ang kuwarta ikahatag sa Watch Tower Society nga huptan ingong gisalig o trust, nga may probisyon nga enkaso sa personal nga panginahanglan, kini ibalik sa nagdonar.

◻ INSURANCE O SEGURO: Ang Watch Tower Society mahimong nganlang benepisyaryo sa usa ka polisa sa seguro o sa plano sa pagretiro/pensiyon. Ang Sosyedad angay pahibaloon sa maong kahikayan.

◻ TRUSTS: Ang tinigom nga salapi sa bangko ikabutang nga gipiyal o in trust for sa Sosyedad. Kon himoon kini, palihog pahibaloa ang Sosyedad. Ang stocks, bonds, ug propiedad ikadonar usab ilalom sa maong kahikayan sa pagbenepisyo sa nagdonar panahon sa iyang pagkinabuhi. Kining metodoha nagawagtang sa gastos ug kadili-piho sa pagpanghimatuod sa testamento, samtang nagatino nga ang Sosyedad magadawat sa propiedad sa panahon sa pagkamatay.

◻ MGA TESTAMENTO: Ang propiedad o kuwarta mahimong ikahatag sa Watch Tower Society pinaagi sa testamentong legal nga pagkahimo. Ang usa ka kopya angay ipadala sa Sosyedad.

Alang sa dugang impormasyon ug tambag bahin niining butanga, pagsulat sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, o sa lokal nga sangang buhatan sa Sosyedad.