ESTATERO

Usa ka plata nga sensilyo nga gibayad para sa buhis sa templo alang kang Jesus ug sa iyang apostol nga si Pedro. Katumbas kini sa upat ka drakma, nga katumbas usab sa mga upat ka adlaw nga suhol sa maong panahon. (Mat 17:​24, 27) Daghang eskolar nagtuo nga kini mao ang tetradrakma nga gigama didto sa Antioquia, Sirya, o didto sa Tiro. Ang tetradrakma sa Tiro, nga halos susama kadako sa tunga sa dolyar nga sensilyo sa Tinipong Bansa, adunay kinulit nga ulo sa diyos nga si Melkart diha sa atubangang bahin niini, ug sa likod nga bahin niini mao ang usa ka agila nga nagbatog diha sa timon sa barko, ug may inskripsiyon nga mabasang “Ang Tiro nga Balaan ug Dili Mabuntog.” Ang dagway ni Emperador Agusto makita diha sa tetradrakma sa Antioquia.