Kinabuhi ug Ministeryo ni Jesus

Gihatag ni Jesus ang Usa ka Leksiyon sa Pagpaubos

TAPOS ayoha ang usa ka batang gidemonyohan sa rehiyon haduol sa Cesarea ni Filipo, buot ni Jesus nga mopauli sa Capernaum. Bisan pa niana, buot niyang makauban ang iyang mga disipulo nga silasila ra sa panaw aron siya makapaandam nila alang sa iyang kamatayon ug sa ilang mga responsabilidad human niana. “Ang Anak sa tawo igatugyan ngadto sa mga kamot sa mga tawo,” iyang gisaysay kanila, “ug siya ilang pagapatyon, apan, bisan pag patyon, siya mobangon tapos sa tulo ka adlaw.”

Bisan pag gihisgotan kining sayosayo ni Jesus, ug nakit-an sa tulo ka apostol ang transpigurasyon o pagkabalhin sa panagway nga sa maong panahon gihisgotan ang iyang “paglakaw,” ang iyang mga sumusunod wala gihapon makasabot niana. Bisan tuod walay usa kanila ang misulay sa paglimod nga siya pagapatyon, sama sa gihimong sayosayo ni Pedro, sila nahadlok nga dugang mangutana kaniya bahin niana.

Sa kataposan sila nakaabot sa Capernaum, nga nahimong usa ka matang sa dapit paulian sa panahon sa ministeryo ni Jesus. Kini usab ang lungsod ni Pedro ug sa ubay-ubay pang apostol. Didto, ang mga tawong tigsingil sa buhis sa templo miduol kang Pedro. Tingali misulay nga ilangkit si Jesus sa usa ka paglapas sa dinawat nga batasan, sila nangutana: “Wala ba magbayad sa duha ka drakma buhis [sa templo] ang inyong magtutudlo?”

“Oo, nagbayad,” mitubag si Pedro.

Si Jesus, nga tingali nakaabot sa balay sa taudtaod, nasayod kon unsay nahitabo. Busa sa wala pa kana hisgoti ni Pedro, si Jesus nangutana: “Unsa may imong hunahuna, Simon? Gikan kang kinsa man ang mga hari sa yuta magadawat sa mga bayranan o buhis? Gikan ba sa ilang mga anak o gikan sa mga estranghero?”

“Gikan sa mga estranghero,” mitubag si Pedro.

“Nan, ang mga anak nahigawas diay unta sa buhis,” matud ni Jesus. Sanglit ang Amahan ni Jesus mao ang Hari sa uniberso, ang Usa nga pagasimbahon sa templo, dili gayod legal nga kinahanglanon nga ang Anak sa Diyos mobayad sa buhis sa templo. “Apan aron kita dili makapandol kanila,” si Jesus miingon, “umadto ka sa dagat, pag-itsag pasol, ug bitara ang unang isda nga mapaslan ug, inigbingat mo sa baba niana, makaplagan mo ang usa ka estatero [upat ka drakma] nga kuwarta. Kuhaa kini ug ibayad kini kanila alang kanako ug kanimo.”

Sa dihang ang mga disipulo nagkatigom tapos sila makauli sa Capernaum, tingali didto sa balay ni Pedro, sila nangutana: “Kinsa man gayod ang labing dako sa gingharian sa mga langit?” Si Jesus nasayod kon unsay nakatukmod sa ilang pangutana, kay nasayod kon unsay nagkahitabo sa ilang taliwala samtang sila nagsunod kaniya sa ilang pagpauli gikan sa Cesarea ni Filipo. Busa siya nangutana: “Unsa bay inyong gilalisan samtang didto sa dalan?” Kay naulaw, ang mga disipulo nagpabiling hilom, kay sila naglalis kon kinsa ang labaw kanila.

Tapos sa halos tulo ka tuig sa pagpanudlo ni Jesus, daw dili ba katuohan nga ang mga disipulo maglalis sa ingon? Aw, kini nagapadayag sa kusog nga impluwensiya sa tawhanong pagkadili-hingpit, ingon man sa relihiyosong kagikan. Ang Hudiyonhong relihiyon nga niana namatuto ang mga disipulo nagpasiugda sa posisyon o ranggo sa tanang pakiglabot. Dugang pa, tingali si Pedro, tungod sa saad ni Jesus nga magadawat sa pila ka “mga yawi” sa Gingharian, mibating labaw. Si Santiago ug si Juan tingalig nagbaton sa susamang mga ideya tungod kay gipaboran sa pagkasaksi sa pagkabalhin sa panagway ni Jesus.

Bisan kon unsa man ang kahimtang, gipasundayag ni Jesus ang makapatandog nga demonstrasyon sa paningkamot nga tul-iron ang ilang mga tinamdan. Iyang gitawag ang usa ka bata, gipatindog kana sa ilang tunga, gigakos kini, ug miingon: “Gawas kon kamo mangausab ug mahimong sama sa mga bata, kamo dili gayod makasulod sa gingharian sa mga langit. Busa, si bisan kinsa nga magpaubos sa iyang kaugalingon sama niining gamay nga bata mao ang labing dako sa gingharian sa mga langit; ug si bisan kinsa ang magadawat sa maong bata pinasukad sa akong ngalan magadawat usab kanako.”

Pagkakahibulongang paagi sa pagtul-id sa iyang mga disipulo! Si Jesus wala masuko kanila ug magtawag kanilang mapahitas-on, hakog, o ambisyoso. Wala, kondili iyang giilustrar ang iyang makatudlo nga pagtulon-an pinaagi sa paggamit sa gagmayng mga bata, kinsa sa kinaiyanhon makasaranganon, walay ambisyon, ug sa katibuk-an wala maghunahunag ranggo sa ilang taliwala. Sa ingon gipakita ni Jesus nga ang iyang mga disipulo kinahanglang mag-ugmad niining samang mga hiyas nga nagatimaan sa mapaubsanong mga bata. Sumala sa gihinapos ni Jesus: “Siya nga nagagawi nga sama sa usa nga ubos sa inyong taliwala mao ang labaw.” Mateo 17:22-27; 18:1-5; Marcos 9:30-37; Lucas 9:43-48.

◆ Sa pagpauli sa Capernaum, unsang pagtulon-an ang gisubli ni Jesus, ug giunsa kadto pagdawat?

◆ Nganong si Jesus dili obligado sa pagbayad sa buhis sa templo, apan nganong iyang gibayran kadto?

◆ Unsa tingali ang nakaabag sa panaglalis sa mga disipulo, ug giunsa sila sa pagtul-id ni Jesus?