Kinabuhi ug Ministeryo ni Jesus

Dugang Makatul-id nga Tambag

SAMTANG diha pa sa balay sa Capernaum, dihay laing butang gawas sa panaglalis sa mga apostoles kon kinsa ang labing dako ang gihisgotan. Kining hitaboa usab tingali nahitabo sa ilang pagpauli ngadto sa Capernaum, sa panahong wala diha si Jesus. Si apostol Juan mitaho: “Dihay tawo nga among nakita nga nagapagulag mga yawa pinaagi sa imong ngalan ug amo siyang gidid-an kay wala man siya magauban kanato.”

Matin-aw nga gihunahuna ni Juan ang mga apostoles ingong mao lamang ang bugtong pundok, nga may katungod sa titulong mga mag-aayo. Busa nagtuo siya nga dili angay maghimo ang tawo ug milagrong buhat tungod kay dili man siya kauban sa ilang pundok.

Apan, si Jesus mitambag: “Ayaw ninyo siya pagdid-i, kay walay bisan kinsa nga magahimog milagro pinaagi sa akong ngalan ang makasultig daotan batok kanako; kay ang dili batok kanato, dapig kanato. Kay ang bisan kinsa nga magahatag kaninyog bisan usa lang ka baso nga tubig aron ipainom kaninyo tungod kay nagadala kamo sa ngalan ni Kristo, ako magaingon kaninyo, dili gayod siya mawad-an sa iyang balos.”

Dili na kinahanglan nga kining tawhana magasunod mismo kang Jesus sa iyang kiliran. Wala pa matukod ang Kristohanong kongregasyon, busa ang iyang dili pag-uban sa ilang grupo wala magkahulogan nga siya gikan sa lahi nga pundok. Ang tawo sa tinuod dunay pagtuo sa ngalan ni Jesus ug busa milampos sa pagpagulag mga yawa. Naghimo siyag butang nga matandi sa gipamulong ni Jesus nga takos sa balos. Sa pagbuhat niini, si Jesus nagpakita, nga dili siya mawad-an sa iyang balos.

Apan komosta kon ang tawo napandol sa mga pulong ug mga buhat sa mga apostoles? Mahimong seryoso kini! Si Jesus miingon: “Ang bisan kinsa nga makapandol sa usa niining mga gagmay nga nagatuo, maayo pa unta hinoon alang kaniya nga higtan ang iyang liog ug galingan nga bato sama nianang ginabiyo sa asno ug moambak siya sa dagat.”

Si Jesus miingon nga kinahanglang wad-on sa iyang mga sumusunod diha sa ilang mga kinabuhi ang bisan unsa nga bililhon kanila sama sa kamot, tiil, o mata nga makahatag kanilag kapangdolan. Mas maayong mawad-an pa niining bililhong mga butang ug makasulod sa Gingharian sa Diyos kay sa paghawid niini ug malabog ngadto sa Gehenna (usa ka nagakalayong tapok sa basura duol sa Jerusalem), nga nagasimbolo sa walay kataposang kalaglagan.

Si Jesus mipasidaan usab: “Matngoni ninyo nga walay usa niining mga gagmay nga inyong pagatamayon; kay sultihan ko kamo nga ang ilang mga manulonda sa langit kanunayng nagasud-ong sa nawong sa akong Amahan nga anaa sa langit.” Dayon iyang giilustrar ang pagkabililhon niining “mga gagmay” pinaagi sa pagsugilon bahin sa usa ka tawo nga dunay 100 ka karnero apan nawad-an ug usa. Gibiyaan sa tawo ang 99 aron sa pagpangitag sa usa nga nawala, miingon si Jesus, ug dako ang kalipay dihang nakit-an niya kini kay sa 99. “Sa susama,” miingon si Jesus, “dili kabubut-on sa akong Amahan nga anaa sa langit nga mawala bisan usa niining mga gagmay.”

Tingali anaa sa iyang hunahuna ang panaglalis sa iyang mga apostoles, si Jesus miawhag: “Batoni ang asin diha sa sulod sa inyong kaugalingon, ug magdinaitay sa usa ug usa.” Ang walay sabor nga pagkaon mapalami pinaagi sa asin. Busa, ang mahulagwayong asin makapahimo sa mga pulong sa tawo nga mas masayong dawaton. Ang pagbaton ug asin makatabang sa pagpatunhay sa pakigdait.

Apan tungod sa pagkadili-hingpit sa tawo, may mga panahong seryosong mga panag-away ang motungha. Naghatag usab si Jesus ug mga giya sa pag-atiman niini. “Kon ang imong igsoon makasala,” si Jesus miingon, “adtoa siya ug tali kanimo ug kaniya lamang padaygi siya sa iyang sayop. Kon maminaw siya kanimo, nan, nakabig mo ang imong igsoon.” Kon dili siya maminaw, mitambag si Jesus, “pagdalag usa o duha ka tawo uban kanimo, aron pinaagi sa pagpamatuod sa duha o tulo ka saksi mamalig-on ang matag usa ka pulong.”

Diha na lamang ingong kataposang paagi, si Jesus miingon, dad-a kining butanga sa “kongregasyon,” sa ato pa, sa kasaligang mga magtatan-aw sa kongregasyon kinsa makahatag hudisyal nga desisyon. Kon dili mosunod ang makasasala sa ilang desisyon, si Jesus mitapos, “isipa siya ingong usa ka tawo sa mga nasod ug maniningil sa buhis.”

Dihang himoon kining desisyona, kinahanglan sundon pag-ayo sa mga magtatan-aw ang mga instruksiyon diha sa Pulong ni Jehova. Busa, dihang makita nilang sad-an ang usa ka tawo ug takos nga silotan, ang hukom ‘pagailhon nga binugkos sa langit.’ Ug dihang “pagaluagan dinhi sa yuta,” sa ato pa, nga nakita ang usa nga dili-sad-an, kini pagailhon nga “linuagan sa langit.” Niining hudisyal nga pagpakanaog ug desisyon, si Jesus miingon, “kay kon diin gani amg duha kon tulo magakatigom sa akong ngalan, anaa ako sa ilang taliwala.” Mateo 18:6-20; Marcos 9:38-50; Lucas 9:49, 50.

◆ Nganong dili na kinahanglan sa mga adlaw ni Jesus sa pag-uban kaniya?

◆ Unsa ka seryoso ang bahin sa pagpandol sa gagmay, ug sa unsang paagi giilustrar ni Jesus ang pagkabililhon niining mga gagmay?

◆ Unsay nakapukaw sa pagdasig ni Jesus sa mga apostoles sa pagbaton ug asin sa ilang kaugalingon?

◆ Unsay kahulogan sa ‘pagbugkos’ ug ‘paluagan’?