Kinabuhi ug Ministeryo ni Jesus

Usa ka Pagtulon-an sa Pagpasaylo

SI JESUS lagmit diha pa sa balay sa Capernaum kauban sa iyang mga disipulo. Gihisgotan niya uban kanila kon unsaon pagdumala ang mga kabingkilan tali sa mga igsoon, mao nga nangutana si Pedro: “Ginoo, ka pila ba diay ang akong igsoon makasala batok kanako ug siya akong pasayloon?” Sanglit ang Hudiyong relihiyosong mga magtutudlo nagsugyot nga itugot ang pagpasaylo hangtod sa katulo, lagmit giisip ni Pedro nga mahinatagon kaayo ang pagsugyot: “Hangtod ba sa kapito?”

Apan sayop ang bug-os nga ideya sa paghupot sa maong talaan. Gitul-id ni Jesus si Pedro: “Igaingon ko kanimo, dili, Hangtod sa kapito, kondili, Hangtod sa kapitoag-pito ka panahon.” Gipakita niyang angay walay ibutang nga limitasyon sa gidaghanon sa mga panahong pasayloon ni Pedro ang iyang igsoon.

Sa pagsilsil diha sa mga disipulo sa ilang obligasyon nga magpasaylo, si Jesus misugilon kanila sa usa ka ilustrasyon. Kini maoy bahin sa usa ka hari nga buot maghusay sa mga bayranan sa iyang mga ulipon. Gidala kaniya ang usa ka ulipon nga nakautang ug dako kaayo nga 60,000,000 ka denaryo (mga $50,000,000). Walay paagi nga siya makabayad. Busa, sumala sa gisaysay ni Jesus, gisugo sa hari nga siya ug ang iyang asawa ug ang iyang mga anak ibaligya ug pagabayran siya.

Niana ang ulipon mihapa sa mga tiil sa iyang agalon ug nagpakiluoy: “Angan-angana ako ug pagabayran ko ikaw sa tanan.”

Kay naluoy, ang agalon maluluy-ong nagpapas sa dako kaayong utang sa ulipon. Apan wala madugay sa pagbuhat niya niana, si Jesus nagpadayon, nga mipahawa ang maong ulipon ug nakahibalag sa masigkaulipon nga nakautang kaniyag 100 ka denaryo lamang (mga $90). Gikuptan sa tawo sa liog ang masigkaulipon ug gisugdan sa pagtuok, nga miingon: “Bayri ako sa imong utang.”

Apan ang masigkaulipon walay salapi. Busa siya mihapa sa tiilan sa ulipon nga iyang nautangan, nga nagpakiluoy: “Angan-angana ako ug pagabayran ko ikaw.” Lahi sa iyang agalon, ang ulipon dili maluluy-on, ug iyang gipabalhog sa bilanggoan ang iyang masigkaulipon.

Aw, nagpadayon si Jesus, ang ubang ulipon nga nakakita sa nahitabo miadto ug misugilon sa agalon. Siya, sa baylo, masuk-anong nagpatawag sa ulipon. “Daotan nga ulipon,” matud niya, “gipapas ko ang tanan nimong utang, sa nagpakiluoy ka kanako. Dili ba angay nga ikaw, sa baylo, maluoy sa imong masigkaulipon, maingon nga ako naluoy kanimo?” Kay napungot kaayo, gitugyan sa agalon ang dili-maluluy-ong ulipon ngadto sa mga magbalantay sa bilanggoan hangtod nga iyang mabayran ang tanan niyang utang.

Dayon mihinapos si Jesus: “Kana usab ang pagabuhaton sa akong langitnong Amahan kon dili ninyo pasayloon ang matag usa ang iyang igsoon gikan sa inyong mga kasingkasing.”

Pagkanindot nga pagtulon-an sa pagpasaylo! Kon itandi sa dakong utang sa sala nga gipasaylo kanato sa Diyos, bisan unsang sala nga tingali buhaton batok kanato sa usa ka Kristohanong igsoon gamay gayod. Dugang pa, gipasaylo kita ni Jehova nga Diyos sa libolibong panahon. Kasagaran, dili gani kita makaamgo sa atong mga sala batok kaniya. Busa, dili ba nato mapasaylo ang atong igsoon sa pila ka panahon, bisan pag kita may nahiangayng hinungdan sa pagreklamo? Hinumdomi, sumala sa gitudlo ni Jesus sa Wali sa Bukid, ang Diyos “magpasaylo kanato sa atong mga utang, sama nga gipasaylo usab nato ang mga nakautang kanato.” Mateo 18:21-35; 6:12; Colosas 3:13.

◆ Unsay nakadasig sa pangutana ni Pedro bahin sa pagpasaylo sa iyang igsoon, ug nganong tingali giisip niyang pagkamahinatagon ang iyang sugyot nga makapito?

◆ Sa unsang paagi ang sanong sa hari sa pakiluoy sa iyang ulipon lahi sa sanong sa ulipon ngadto sa pakiluoy sa masigkaulipon?

◆ Unsay atong makat-onan gikan sa ilustrasyon ni Jesus?