Imo Bang Gisunod ang “Labaw pa Gayod nga Paagi” sa Gugma?

“ANG Diyos gugma.” Kining mga pulonga ni apostol Juan nagpaila sa pangunang hiyas sa Diyos. (1 Juan 4:8) Tungod sa gugma sa Diyos alang sa katawhan, kita makaduol kaniya ug makabaton ug suod nga relasyon uban kaniya. Unsa pay laing paagi nga ang gugma sa Diyos makaapektar kanato? Dunay panultihon: “Ang atong pagkatawo maapektohan sa kon unsay atong gihigugma.” Tinuod kana. Apan, tinuod usab nga kita maapektohan sa kon kinsay atong gihigugma ug kon kinsay nahigugma kanato. Sanglit kita gilalang man sa larawan sa Diyos, kita adunay katakos sa pagbanaag sa iyang gugma diha sa atong kinabuhi. (Gen. 1:27) Busa, si apostol Juan misulat nga kita nahigugma sa Diyos “tungod kay siya unang nahigugma kanato.”—1 Juan 4:19.

Upat ka Pulong nga Naghubit sa Gugma

Si apostol Pablo nagtawag sa gugma nga “labaw pa gayod nga paagi.” (1 Cor. 12:31) Nganong gihubit man niya ang gugma nianang paagiha? Unsang matanga sa gugma ang gitumong ni Pablo? Aron atong masayran, atong susihon pag-ayo ang kahulogan sa pulong “gugma.”

Ang karaang mga Grego adunay upat ka pulong, nga gigamit sa lainlaing paagi, sa paghubit sa gugma: stor·geʹ, eʹros, phi·liʹa, ug a·gaʹpe. Sa upat, ang a·gaʹpe mao ang termino nga gigamit sa paghubit sa Diyos nga maoy “gugma.”a Mahitungod niining matanga sa gugma, si Propesor William Barclay diha sa iyang New Testament Words nag-ingon: “Ang agapē naglangkit sa hunahuna: kini dili lamang usa ka pagbati nga motungha diha sa atong kasingkasing; kini usa ka prinsipyo nga ato gayong sundon. Ang agapē naglangkit gayod sa kabubut-on.” Niini nga konteksto, ang a·gaʹpe maoy matang sa gugma nga gigamhan, o gigiyahan, sa prinsipyo, apan kini sagad inubanan sa kusganong pagbati. Maingon nga adunay maayo ug dili maayong mga prinsipyo, dayag nga ang mga Kristohanon angayng magiyahan sa maayong mga prinsipyo, nga gilatid mismo ni Jehova nga Diyos diha sa Bibliya. Kon atong itandi ang paghubit sa Bibliya sa a·gaʹpe ug ang ubang termino nga gigamit niana sa paghubit sa gugma, mas masabtan nato ang matang sa gugma nga angay natong ipakita.

Gugma Sulod sa Pamilya

Pagkamakalilipay nga mahimong bahin sa mahigugmaon, nahiusa nga pamilya! Ang stor·geʹ mao ang Gregong pulong nga sagad gigamit alang sa kinaiyanhong pagbati nga naglungtad sulod sa pamilya. Ang mga Kristohanon maningkamot sa pagpakitag gugma sa ilang pamilya. Si Pablo nagtagna nga sa kataposang mga adlaw, ang kadaghanan sa mga tawo “walay kinaiyanhong pagbati.”b—2 Tim. 3:1, 3.

Ikasubo nga kadaghanan sa mga tawo karon walay kinaiyanhong gugma para sa ilang pamilya. Nganong daghan kaayong mabdos ang nagpakuha? Nganong daghan kaayong pamilya ang wala magtagad sa ilang tigulang nga mga ginikanan? Nganong kusog ang pag-uswag sa diborsiyo? Tungod kana sa pagkawala sa kinaiyanhong pagbati.

Dugang pa, ang Bibliya nag-ingon nga “ang kasingkasing labaw nga malimbongon kay sa bisan unsa pa.” (Jer. 17:9) Ang gugma alang sa pamilya naglangkit sa atong kasingkasing ug pagbati. Apan, makaiikag nga si Pablo naggamit sa a·gaʹpe sa paghubit sa gugma nga angayng ipakita sa bana ngadto sa iyang asawa. Gitandi ni Pablo kanang matanga sa gugma ngadto sa gugma nga gipakita ni Kristo sa kongregasyon. (Efe. 5:28, 29) Kini nga gugma gipasukad sa mga prinsipyo nga gilatid ni Jehova, ang Tagmugna sa kahikayan sa pamilya.

Ang tiunay nga gugma alang sa mga membro sa pamilya magtukmod kanato sa pagpakitag pagtagad sa atong tigulang nga mga ginikanan o magpalihok kanato sa pag-abaga sa atong responsibilidad alang sa atong mga anak. Kini magpalihok usab sa mga ginikanan sa paghatag sa ilang mga anak ug mahigugmaong disiplina kon gikinahanglan. Dugang pa, kini magpugong kanila sa paghimog mga desisyon nga gigamhan lamang sa emosyon, nga sagad moresulta sa sobrang pagkamatugoton nila sa ilang mga anak.—Efe. 6:1-4.

Romantikong Gugma ug mga Prinsipyo sa Bibliya

Ang pisikal nga gugma tali sa magtiayon maoy usa gayod ka gasa gikan sa Diyos. (Prov. 5:15-17) Apan, ang pulong eʹros, nga nagtumong sa romantikong gugma, wala gamita sa inspiradong mga magsusulat sa Bibliya. Nganong wala man? Pipila ka tuig kanhi, Ang Bantayanang Torre nagkomento: “Ang kalibotan karon daw naghimo sa samang kasaypanan nga nahimo sa karaang mga Grego. Sila nagsimba kang Eros ingong usa ka diyos, nagyukbo diha sa iyang halaran ug nagtanyag ug mga halad kaniya. . . . Apan gipakita sa kasaysayan nga ang pagsimba sa seksuwal nga gugma misangpot lamang sa kaulawan, pagpatuyang ug panagbulag. Tingali mao kanay hinungdan nga wala gamita sa mga magsusulat sa Bibliya kanang pulonga.” Aron dili kita malangkit sa mga relasyon nga gipasukad lamang sa kaibog, ang romantikong pagbati kinahanglang kontrolahon sa mga prinsipyo sa Bibliya. Busa pangutan-a ang imong kaugalingon, ‘Ang ako bang romantikong pagbati inubanag tinuod nga gugma?’

Panahon sa “pagbuswak sa pagkabatan-on” sa dihang kusganon kaayo ang seksuwal nga pagbati, ang mga batan-on nga nagsunod sa mga prinsipyo sa Bibliya magpabiling hinlo sa moral. (1 Cor. 7:36; Col. 3:5) Atong giisip ang kaminyoon ingong usa ka sagradong gasa gikan kang Jehova. Si Jesus miingon bahin sa mga magtiayon: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:6) Imbes magkauban lamang samtang aduna pay kaibog sa usag usa, atong giisip ang kaminyoon ingong dumalayon nga bugkos. Kon motungha ang mga problema, dili kana himoong rason sa panagbulag, kondili maningkamot pag-ayo nga ipasundayag ang diyosnong mga hiyas aron magmalipayon ang atong pamilya. Ang maong mga paningkamot mosangpot sa dumalayong kalipay.—Efe. 5:33; Heb. 13:4.

Gugma Taliwala sa mga Higala

Laay kaayo ang kinabuhi kon walay mga higala! Ang usa ka sanglitanan sa Bibliya nag-ingon: “Adunay higala nga mounong labaw pa kay sa usa ka igsoon.” (Prov. 18:24) Gusto ni Jehova nga makabaton kitag tinuod nga mga higala. Daghan ang nasayod bahin sa suod nga panaghigalaay ni David ug Jonatan. (1 Sam. 18:1) Ug ang Bibliya nag-ingon nga “gimahal” ni Jesus si apostol Juan. (Juan 20:2) Ang Gregong pulong alang sa “pagmahal” o “panaghigalaay” mao ang phi·liʹa. Walay daotan kon aduna kitay suod nga higala sa kongregasyon. Apan sa 2 Pedro 1:7, kita giawhag nga idugang ang gugma (a·gaʹpe) sa “inigsoong pagbati” (phi·la·del·phiʹa, kombinasyon sa phiʹlos, ang Gregong pulong alang sa “higala,” ug a·del·phosʹ, ang Gregong pulong alang sa “igsoon”). Aron magmalungtaron ang panaghigalaay, kinahanglan nga atong ipadapat kining tambaga. Maayong suknaon nato ang atong kaugalingon, ‘Ang ako bang pakighigalaay gipasukad sa mga prinsipyo sa Bibliya?’

Ang Pulong sa Diyos motabang kanato nga dili magmapihigon sa atong pagpakiglabot sa atong mga higala. Dili duha ang atong sukdanan: medyo matugoton sa atong mga higala, apan estrikto sa dili nato higala. Dugang pa, dili kita mag-ulog-ulog aron makabatog mga higala. Labing hinungdanon, ang pagpadapat sa mga prinsipyo sa Bibliya motabang kanato sa pagpili ug mga higala ug paglikay sa ‘daotang pakig-uban nga makadaot sa mapuslanong pamatasan.’—1 Cor. 15:33.

Usa ka Talagsaong Bugkos sa Gugma!

Talagsaon gayod ang bugkos nga naghiusa sa mga Kristohanon! Si apostol Pablo misulat: “Himoa nga walay pagkasalingkapaw ang inyong gugma. . . . Sa inigsoong gugma batoni ang malumong pagmahal alang sa usag usa.” (Roma 12:9, 10) Sa pagkatinuod, ang mga Kristohanon adunay ‘gugma (a·gaʹpe) nga walay pagkasalingkapaw.’ Kining gugmaha wala lamang magtumong sa pagbati nga motungha diha sa atong kasingkasing. Hinunoa, kini lig-ong gipasukad sa mga prinsipyo sa Bibliya. Apan, si Pablo naghisgot sa “inigsoong gugma” (phi·la·del·phiʹa) ug “malumong pagmahal” (phi·loʹstor·gos, kombinasyon sa phiʹlos ug stor·geʹ). Sumala sa usa ka eskolar, ang “inigsoong gugma” maoy “mabinationg gugma, nga nagpakitag kalulot, simpatiya, ug andam motabang.” Kon kini inubanag a·gaʹpe, kini makapasuod sa mga magsisimba ni Jehova ngadto sa usag usa. (1 Tes. 4:9, 10) Ang laing ekspresyon, nga gihubad ug “malumong pagmahal,” kas-a lang makita diha sa Bibliya ug nagtumong sa kasuod nga sama nianang sa pamilya.c

Ang bugkos nga naghiusa sa matuod nga mga Kristohanon maoy kombinasyon sa gugma sa pamilya ug pagmahal alang sa tinuod nga mga higala, ug ang maong mga relasyon gigamhan sa gugma nga gipasukad sa mga prinsipyo sa Bibliya. Ang Kristohanong kongregasyon dili usa ka sosyal klab o usa ka sekular nga organisasyon, kondili usa ka pamilya nga suod sa usag usa ug nahiusa sa pagsimba kang Jehova nga Diyos. Atong tawgon ang mga isigkamagtutuo nga brader ug sister kay giisip nato sila nga atong mga igsoon. Sila maoy atong mga igsoon sa pagtuo, kita nahigugma kanila ingong atong mga higala, ug kita kanunayng nagsunod sa mga prinsipyo sa Bibliya diha sa atong pagpakiglabot kanila. Hinaot nga kitang tanan magpadayon sa pagpalig-on sa bugkos sa gugma nga naghiusa ug nagpaila sa matuod nga Kristohanong kongregasyon.—Juan 13:35.

[Mga footnote]

[Blurb sa panid 12]

Unsay imong buhaton aron molig-on ang bugkos sa gugma nga naghiusa kanato?