Kinabuhing Walay Kataposan sa Yuta—Paglaom ba sa mga Kristohanon?
“Pagapahiran [sa Diyos] ang tanang luha gikan sa ilang mga mata, ug ang kamatayon mawala na.”—PIN. 21:4.
1, 2. Nganong nahibalo kita nga daghang Hudiyo sa unang siglo ang nagtuo sa kinabuhing walay kataposan sa yuta?
USA ka dato ug ilado nga batan-ong lalaki ang miduol kang Jesus, miluhod sa iyang tiilan, ug nangutana: “Maayong Magtutudlo, unsay kinahanglan ko nga buhaton aron makapanunod sa kinabuhing walay kataposan?” (Mar. 10:17) Ang batan-ong lalaki nangutana kon unsay iyang buhaton aron makabaton ug kinabuhing walay kataposan—apan asa nga kinabuhi ang iyang gipasabot, sa langit o sa yuta? Sama sa atong gihisgotan sa miaging artikulo, mga gatosan ka tuig una pa niana ang Diyos naghatag sa mga Hudiyo ug paglaom sa pagkabanhaw ug sa kinabuhing walay kataposan sa yuta. Kana gihapon nga paglaom ang nabatonan sa daghang Hudiyo sa unang siglo.
2 Ang higala ni Jesus nga si Marta lagmit naghunahuna sa pagkabanhaw dinhi sa yuta sa dihang siya miingon bahin sa iyang namatayng igsoon: “Ako nahibalo nga mobangon siya diha sa pagkabanhaw sa kataposan nga adlaw.” (Juan 11:24) Tinuod, ang mga Saduseo nianang panahona wala magtuo sa pagkabanhaw. (Mar. 12:18) Hinunoa, diha sa iyang librong Judaism in the First Centuries of the Christian Era, si George Foot Moore miingon: “Ang mga sinulat . . . sa ikaduha o unang mga siglo una pa sa atong panahon nagpamatuod nga daghan ang nagtuo nga sa usa ka yugto sa panahon ang mga nangamatay kaniadto pagabanhawon sa yuta.” Ang lalaking dato nga miduol kang Jesus gustong makabaton ug kinabuhing dayon sa yuta.
3. Unsang mga pangutana ang pagatagdon niining artikuloha?
3 Karong adlawa, daghang relihiyon ug mga eskolar sa Bibliya ang nag-ingon nga si Jesus wala magtudlo sa paglaom nga kinabuhing walay kataposan sa yuta. Kadaghanan sa mga tawo nagtuo nga adunay kinabuhi luyo sa kamatayon didto sa espirituhanong dapit. Busa sa dihang mabasa sa mga tawo diha sa Kristohanon Gregong Kasulatan ang ekspresyong “kinabuhing walay kataposan,” daghan ang naghunahuna nga kini nagtumong gayod sa kinabuhi sa langit. Tinuod ba kana? Unsay gipasabot ni Jesus sa dihang siya naghisgot bahin sa kinabuhing walay kataposan? Unsay gituohan sa iyang mga tinun-an? Ang Kristohanon Gregong Kasulatan nagtudlo ba sa paglaom nga kinabuhing walay kataposan sa yuta?
Kinabuhing Walay Kataposan “sa Paglalang-Pag-usab”
4. Unsay mahitabo “sa paglalang-pag-usab”?
4 Ang Bibliya nagtudlo nga ang dinihogang mga Kristohanon pagabanhawon aron magmando sa yuta gikan sa langit. (Luc. 12:32; Pin. 5:9, 10; 14:1-3) Hinunoa, sa dihang si Jesus naghisgot mahitungod sa kinabuhing walay kataposan, dili lamang kanang grupoha ang kanunay niyang gitumong. Tagda kon unsay iyang gisulti sa iyang mga tinun-an human molakaw nga magul-anon ang dato nga batan-ong lalaki tungod sa pagdapit nga iyang biyaan ang tanan niyang kabtangan ug mahimong sumusunod ni Kristo. (Basaha ang Mateo 19:28, 29.) Giingnan ni Jesus ang iyang mga apostoles nga sila mahilakip niadtong magmando ingong mga hari ug maghuhukom sa “napulog-duha ka tribo sa Israel,” sa ato pa, sa tanang tawo nga dili bahin niadtong magamando sa langit. (1 Cor. 6:2) Siya naghisgot usab sa ganti nga mabatonan sa “matag usa” nga mosunod kaniya. Ang maong mga indibiduwal usab “makapanunod sa kinabuhing walay kataposan.” Kanang tanan mahitabo panahon “sa paglalang-pag-usab.”
5. Unsay kahulogan “sa paglalang-pag-usab”?
5 Unsay gipasabot ni Jesus “sa paglalang-pag-usab”? Ang maong termino gihubad nga “bag-ong kalibotan” diha sa The Bible—An American Translation. Kana gihubad nga “sa dihang himoong bag-o ang tanan” sa The Jerusalem Bible ug “ang pagbag-o sa tanang butang” sa The Holy Bible—New International Version. Sanglit wala na ipatin-aw ni Jesus ang kahulogan niana, dayag nga siya nagtumong sa dugay nang gituohan sa mga Hudiyo. Kinahanglang mahitabo ang paglalang-pag-usab sa kahimtang sa yuta, aron ang mga butang mahisama niadtong sa tanaman sa Eden sa dihang wala pa makasala si Adan ug Eva. Ang paglalang-pag-usab maoy magtuman sa saad sa Diyos sa ‘paglalang ug bag-ong mga langit ug usa ka bag-ong yuta.’—Isa. 65:17.
6. Unsay gitudlo sa ilustrasyon sa mga karnero ug kanding bahin sa paglaom nga kinabuhing walay kataposan?
6 Si Jesus naghisgot pag-usab sa kinabuhing walay kataposan diha sa iyang gipamulong bahin sa konklusyon sa sistema sa mga butang. (Mat. 24:1-3) “Inig-abot sa Anak sa tawo diha sa iyang himaya, ug ang tanang manulonda uban kaniya,” siya miingon, “nan siya molingkod sa iyang mahimayaong trono. Ug ang tanang kanasoran pagatigomon sa iyang atubangan, ug iyang pagalainon ang katawhan gikan sa usag usa, ingon sa usa ka magbalantay nga magalain sa mga karnero gikan sa mga kanding.” Kadtong pagahukman “mamahawa ngadto sa walay kataposang kalaglagan, apan ang mga matarong ngadto sa kinabuhing walay kataposan.” “Ang mga matarong” nga makadawat ug kinabuhing walay kataposan mao kadtong maunongong nagpaluyo sa dinihogan-sa-espiritu nga “mga igsoon” ni Kristo. (Mat. 25:31-34, 40, 41, 45, 46) Sanglit ang mga dinihogan gipili man nga magmando sa langitnong Gingharian, “ang mga matarong” mao ang yutan-ong sakop niana nga Gingharian. Ang Bibliya nagtagna: “[Ang Hari ni Jehova adunay] mga sakop gikan sa usa ka dagat ngadto sa laing dagat ug gikan sa Suba hangtod sa mga kinatumyan sa yuta.” (Sal. 72:8) Ang maong mga sakop makatagamtam ug kinabuhing dayon sa yuta.
Unsay Giingon sa Ebanghelyo ni Juan?
7, 8. Unsa ang duha ka paglaom nga gihisgotan ni Jesus kang Nicodemo?
7 Diha sa nasulat sa mga Ebanghelyo ni Mateo, Marcos, ug Lucas, si Jesus migamit sa terminong “kinabuhing walay kataposan” sa nahisgotan nang mga okasyon. Ang Ebanghelyo ni Juan 17 ka beses nga nagkutlo sa mga pulong ni Jesus bahin sa kinabuhing walay kataposan. Atong susihon ang pipila niana aron atong makita kon unsay giingon ni Jesus mahitungod sa paglaom nga kinabuhing walay kataposan sa yuta.
8 Sumala ni Juan, si Jesus unang naghisgot bahin sa kinabuhing walay kataposan ngadto sa usa ka Pariseo nga ginganlag Nicodemo. Siya miingon kang Nicodemo: “Gawas kon ang usa ipanganak gikan sa tubig ug sa espiritu, siya dili makasulod sa gingharian sa Diyos.” Kadtong mosulod sa Gingharian sa mga langit kinahanglang “ipanganak pag-usab.” (Juan 3:3-5) Apan dili kay kana ra ang gisulti ni Jesus. Sunod siya naghisgot sa paglaom nga bukas alang sa tanan. (Basaha ang Juan 3:16.) Si Jesus nagtumong sa paglaom nga kinabuhing walay kataposan sa langit alang sa iyang dinihogang mga sumusunod ug sa yuta alang sa uban.
9. Unsa nga paglaom ang gihisgotan ni Jesus sa Samarianhong babaye?
9 Human sa iyang pagpakigsulti kang Nicodemo sa Jerusalem, si Jesus mipaingon sa amihanan ngadto sa Galilea. Sa iyang panaw, siya nakahibalag ug usa ka babaye didto sa tuboran ni Jacob duol sa siyudad sa Sikar sa Samaria. Siya miingon sa babaye: “Bisan kinsa nga magainom sa tubig nga akong igahatag kaniya dili na gayod pagauhawon pa, hinuon ang tubig nga akong igahatag kaniya mahimong usa ka tuboran sa tubig diha kaniya nga magabugwak aron mohatag ug kinabuhing walay kataposan.” (Juan 4:5, 6, 14) Kanang tubiga naghawas sa mga tagana sa Diyos sa pagpasig-uli sa tanang katawhan ngadto sa kinabuhing walay kataposan, lakip na niadtong mopuyo sa yuta. Sa basahon sa Pinadayag, ang Diyos gihulagway nga nag-ingon: “Ngadto kang bisan kinsa nga giuhaw ako magahatag nga walay bayad gikan sa tuboran sa tubig sa kinabuhi.” (Pin. 21:5, 6; 22:17) Busa, gisultihan ni Jesus ang Samarianhong babaye nga ang kinabuhing walay kataposan dili lamang mabatonan sa dinihogang mga manununod sa Gingharian kondili sa matinuohon usab nga mga tawo nga may yutan-ong paglaom.
10. Human ayoha ang usa ka tawo diha sa linaw sa Bethzatha, unsay gisulti ni Jesus sa relihiyosong mga magsusupak bahin sa kinabuhing walay kataposan?
10 Pagkasunod tuig, si Jesus didto na usab sa Jerusalem. Didto iyang giayo ang tawong masakiton sa linaw sa Bethzatha. Giingnan ni Jesus ang mga Hudiyo nga nasuko sa iyang gihimo nga “ang Anak dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginabuhat sa Amahan.” Human sila sultihi nga ang Amahan ‘nagpiyal sa tanang pagpanghukom sa Anak,’ si Jesus miingon: “Siya nga magapatalinghog sa akong pulong ug magatuo kaniya nga nagpadala kanako adunay kinabuhing walay kataposan.” Siya nagpadayon: “Ang takna nagsingabot nga ang tanan nga anaa sa handomanang mga lubnganan makadungog sa . . . tingog [sa Anak sa tawo] ug manggula, ang mga nagbuhat ug maayong mga butang ngadto sa pagkabanhaw sa kinabuhi, ang mga nagbuhat ug mangil-ad nga mga butang ngadto sa pagkabanhaw sa paghukom.” (Juan 5:1-9, 19, 22, 24-29) Gisultihan ni Jesus ang maglulutos nga mga Hudiyo nga siya ang gitudlo sa Diyos sa pagtuman sa ilang gilaoman nga kinabuhing walay kataposan sa yuta ug nga mahimo niya kana pinaagi sa pagbanhaw sa mga patay.
11. Nganong nahibalo kita nga ang paglaom nga kinabuhing walay kataposan sa yuta nalakip sa gisulti ni Jesus sa Juan 6:48-51?
11 Sa Galilea, ang libolibo ka tawo nga gustong makakaon sa tinapay nga milagrosong gitagana ni Jesus misugod sa pagsunod kaniya. Si Jesus misulti kanila bahin sa laing matang sa tinapay—ang “tinapay sa kinabuhi.” (Basaha ang Juan 6:40, 48-51.) “Ang tinapay nga akong ihatag mao ang akong unod,” matod niya. Gihatag ni Jesus ang iyang kinabuhi dili lamang alang niadtong magmando uban niya sa langitnong Gingharian kondili “alang [usab] sa kinabuhi sa kalibotan” sa katawhan nga kinahanglang lukaton. “Kon may mokaon niini nga tinapay,” sa ato pa, magpasundayag ug pagtuo sa halad lukat ni Jesus, siya makabaton ug kinabuhing walay kataposan. Sa pagkatinuod, ang giingong ‘pagkahimong buhi hangtod sa kahangtoran’ naglakip sa dugay nang gituohan sa mga Hudiyo nga paglaom sa kinabuhing walay kataposan sa yuta panahon sa pagmando sa Mesiyas.
12. Unsang paglaom ang gitumong ni Jesus sa dihang siya miingon sa mga magsusupak nga ‘siya maghatag ug kinabuhing walay kataposan sa iyang mga karnero’?
12 Sa ulahi, panahon sa Pista sa Pagpahinungod nga gisaulog sa Jerusalem, giingnan ni Jesus ang mga magsusupak: “Dili kamo motuo, tungod kay dili man kamo akong mga karnero. Ang akong mga karnero magapatalinghog sa akong tingog, ug ako nakaila kanila, ug sila magasunod kanako. Ug ihatag ko kanila ang kinabuhing walay kataposan.” (Juan 10:26-28) Si Jesus ba nagtumong lamang sa kinabuhi sa langit, o siya naghunahuna usab sa kinabuhing dayon sa paraisong yuta? Di pa dugayng gipalig-on ni Jesus ang iyang mga sumusunod niining mga pulonga: “Ayaw kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.” (Luc. 12:32) Apan, panahon nianang maong Pista sa Pagpahinungod, si Jesus miingon: “Ako adunay ubang mga karnero, nga wala niining torila; kinahanglan nga dad-on ko usab sila.” (Juan 10:16) Busa, sa dihang nakigsulti si Jesus sa maong mga magsusupak, siya nagtumong sa paglaom nga kinabuhi sa langit alang sa “gamayng panon” ug kinabuhing walay kataposan sa yuta alang sa milyon-milyon nga “ubang mga karnero.”
Paglaom nga Dili na Kinahanglang Ipatin-aw
13. Unsay gipasabot ni Jesus sa dihang siya miingon: “Ikaw makauban nako sa Paraiso”?
13 Sa dihang si Jesus nag-antos sa sakitanang estaka, siya naghatag ug dili-malalis nga pamatuod sa paglaom sa katawhan. Ang mamumuhat ug daotan nga gilansang tupad niya miingon: “Jesus, hinumdomi ako sa dihang moabot ka na sa imong gingharian.” Si Jesus misaad kaniya: “Sa pagkatinuod ako magaingon kanimo karong adlawa, Ikaw makauban nako sa Paraiso.” (Luc. 23:42, 43) Sanglit kining tawhana dayag nga usa ka Hudiyo, siya dili na kinahanglang saysayan pa mahitungod sa Paraiso. Siya nahibalo bahin sa paglaom nga kinabuhing walay kataposan sa yuta sa umaabot.
14. (a) Unsay nagpakita nga ang mga apostoles nalisdan sa pagsabot sa langitnong paglaom? (b) Kanus-a tin-awng nasabtan sa mga sumusunod ni Jesus ang langitnong paglaom?
14 Hinunoa, ang kinahanglang ipatin-aw mao ang langitnong paglaom nga gihisgotan ni Jesus. Sa dihang iyang gisultihan ang iyang mga tinun-an nga siya moadto sa langit aron sa pag-andam ug dapit alang kanila, sila wala makasabot niana. (Basaha ang Juan 14:2-5.) “Duna pa akoy daghang butang nga isulti kaninyo,” siya miingon kanila sa ulahi, “apan dili pa kamo makadaog sa pagdala niini sa pagkakaron. Hinunoa, sa dihang moabot siya, ang espiritu sa kamatuoran, siya magatultol kaninyo ngadto sa tibuok nga kamatuoran.” (Juan 16:12, 13) Human lamang sa Pentekostes 33 K.P., sa dihang sila gidihogan sa espiritu sa Diyos aron mahimong umaabot nga mga hari, nga nasabtan sa mga sumusunod ni Jesus nga ang ilang trono didto diay sa langit. (1 Cor. 15:49; Col. 1:5; 1 Ped. 1:3, 4) Ang paglaom sa usa ka langitnong panulondon gipadayag, ug kini gipasiugda sa inspiradong mga sulat diha sa Kristohanon Gregong Kasulatan. Apan kini bang mga sulata nagpalig-on sa paglaom sa katawhan nga kinabuhing walay kataposan sa yuta?
Unsay Gisulti sa Inspiradong mga Sulat?
15, 16. Sa unsang paagi ang inspiradong sulat ngadto sa mga Hebreohanon ug ang mga pulong ni Pedro nagpunting sa paglaom nga kinabuhing walay kataposan sa yuta?
15 Sa iyang sulat ngadto sa mga Hebreohanon, si apostol Pablo nagtawag sa iyang mga isigkamagtutuo nga “mga igsoong balaan, mga mag-aambit sa langitnong pagtawag.” Apan, siya nag-ingon usab nga gipasakop sa Diyos kang Jesus ang “puloy-anang yuta sa umaabot.” (Heb. 2:3, 5; 3:1) Diha sa Kristohanon Gregong Kasulatan, ang orihinal nga pulong alang sa “puloy-anang yuta” kanunayng nagtumong sa yuta nga gipuy-an sa mga tawo. Busa, ang “puloy-anang yuta sa umaabot” mao ang umaabot nga sistema sa mga butang sa yuta ubos sa pagmando ni Jesu-Kristo. Dayon tumanon ni Jesus ang saad sa Diyos: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Sal. 37:29.
16 Si apostol Pedro giinspirar usab sa pagsulat bahin sa umaabot sa katawhan. Siya misulat: “Ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.” (2 Ped. 3:7) Unsay mopuli sa daotang kagamhanan sa mga langit ug sa daotang katilingban sa mga tawo nga naglungtad karon? (Basaha ang 2 Pedro 3:13.) Pulihan kana sa “bag-ong mga langit”—Mesiyanikong Gingharian sa Diyos—ug sa “usa ka bag-ong yuta”—matarong nga tawhanong katilingban sa matuod nga mga magsisimba.
17. Giunsa paghubit sa Pinadayag 21:1-4 ang paglaom sa katawhan?
17 Ang kataposang basahon sa Bibliya, nga naundan sa panan-awon bahin sa katawhan nga napasig-uli ngadto sa kahingpitan, magtandog sa atong kasingkasing. (Basaha ang Pinadayag 21:1-4.) Mao na kana ang paglaom nga nabatonan sa matinuohong katawhan sukad nga giwala ni Adan ang kahingpitan sa tanaman sa Eden. Ang matarong nga mga tawo magpuyo sa Paraisong yuta hangtod sa hangtod ug dili na matigulang. Kini nga paglaom lig-ong gipasukad sa Hebreohanong Kasulatan ug sa Kristohanon Gregong Kasulatan, ug kini padayong naglig-on sa matinumanong mga alagad ni Jehova hangtod karon.—Pin. 22:1, 2.
Makapatin-aw Ka Ba?
• Unsay gipasabot ni Jesus “sa paglalang-pag-usab”?
• Unsay gihisgotan ni Jesus ngadto kang Nicodemo?
• Unsay gisaad ni Jesus ngadto sa mamumuhat ug daotan nga gilansang tupad niya?
• Sa unsang paagi ang sulat ngadto sa mga Hebreohanon ug ang mga pulong ni Pedro nagpalig-on sa paglaom nga kinabuhing walay kataposan sa yuta?
[Hulagway sa panid 8]
Ang mga karnerohon makadawat ug kinabuhing walay kataposan sa yuta
[Mga hulagway sa panid 10]
Si Jesus naghisgot ug kinabuhing walay kataposan ngadto sa uban