Sa Paggamit sa Awtoridad, Sundoga si Kristo
PIPILA ka tuig kanhi, ang usa ka eksperimento bahin sa tawhanong kinaiya nagpatunghag makaiikag nga mga resulta. Kadtong misalmot niini nga eksperimento gibahin ngadto sa duha ka grupo. Ang usa ka grupo giasayn ingong mga guwardiya nga maoy magbantay sa laing grupo, kinsa giasayn ingong mga binilanggo. Unsay nahitabo?
Gitaho nga “sulod sa pipila ka adlaw, kadaghanan sa [mga guwardiya] nahimong abusado ug nanagmal, nga nagpahamtang ug subsob nga mga silot, samtang ang mga binilanggo may-kahadlok nga misunod sa kon unsay gipabuhat.” Ang nakab-ot nga konklusyon sa mga tigpanukiduki mao: Halos ang tanan mahimong mahulog sa lit-ag sa dili hustong paggamit sa awtoridad.
Awtoridad—Ang Husto ug Dili Hustong Paggamit
Siyempre, ang hustong paggamit sa awtoridad makahatag ug kaayohan. Kini maghatag ug nahiangayng pagtultol ug mahimong moresulta sa pisikal, emosyonal, ug espirituwal nga kaayohan. (Proverbio 1:5; Isaias 48:17, 18) Apan, sumala sa gipakita sa nahisgotang eksperimento, anaa kanunay ang kapeligrohan sa dili makataronganong paggamit sa awtoridad. Ang Bibliya naghisgot bahin niini nga kapeligrohan ug nag-ingon: “Sa dihang ang daotan magamando, ang katawhan manghupaw.”—Proverbio 29:2; Ecclesiastes 8:9.
Ang pag-abuso sa awtoridad nga nahuptan sa usa makadaot, bisan pag kini gibuhat nga may maayong motibo. Pananglitan, di pa dugay usa ka relihiyosong grupo sa mga magtutudlo sa Irlandia nangayog pasaylo tungod kay ang pipila ka magtutudlo nag-abuso sa ilang awtoridad ibabaw sa mga bata nga ilang giatiman. Dayag nga maayo ang katuyoan sa maong mga magtutudlo, apan ang pamaagi nga gigamit sa pipila maoy makadaot gayod. Usa ka mantalaan nagtaho nga “daghang bata ang nakaagom ug emosyonal nga kadaot sa usa ka paagi tungod sa sobrang kapintas ug kamapig-oton sa mga magtutudlong lalaki.” (The Irish Times) Nan, sa unsang paagi imong gamiton ang awtoridad aron sa pagtabang sa uban sa pagbuhat kutob sa ilang maarangan imbes mayugot sila kanimo gumikan sa imong gisulti o gibuhat?—Proverbio 12:18.
“Ang Tanang Awtoridad” Gihatag Kang Jesu-Kristo
Tagda ang panig-ingnan ni Jesu-Kristo. Sa hapit na siyang mosaka sa langit, siya miingon sa iyang mga tinun-an: “Ang tanang awtoridad gihatag na kanako sa langit ug sa yuta.” (Mateo 28:18) Kana bang mga pulonga nakapahadlok sa mga tinun-an? Sila ba naghunahuna nga si Jesus magpakita na karon ug samang espiritu sa mga Cesar sa Roma, kinsa gibantog sa paggamit ug puwersa sa pagpakgang sa bisan unsang protesta o rebelyon batok sa kagamhanan?
Ang rekord sa Bibliya kusganong nanghimakak niana! Si Jesu-Kristo naggamit sa awtoridad nga susama sa paggamit sa iyang Amahan. Bisan pag si Jehova ang may katungod ingong ang labing gamhanan nga Unibersohanong Soberano, buot niya nga ang iyang katawhan moalagad kaniya nga kinasingkasing, dili kay wala sa buot, tungod sa kahadlok, o wala-sa-lugar nga pagkamasinugtanon. (Mateo 22:37) Wala gayod gamita ni Jehova ang iyang awtoridad sa sayop nga paagi. Gipakita kini sa makapahingangha nga panan-awon nga gihatag ngadto kang manalagnang Ezequiel.
Niini nga panan-awon, nakita ni Ezequiel ang upat ka linalang nga mga manulonda nga nagtuboy sa pagkasoberano sa Diyos. Ang matag usa adunay upat ka nawong. “Kon bahin sa may-ong sa ilang mga nawong,” misulat si Ezequiel, “silang upat may nawong sa tawo nga may nawong sa leyon sa tuo, ug silang upat may nawong sa torong baka sa wala; silang upat usab may nawong sa agila.” (Ezequiel 1:10) Kining upat ka nawong naghawas sa upat ka timbang kaayo nga pangunang mga hiyas sa Diyos. Kining mga hiyasa espesipikong gihisgotan diha sa Pulong sa Diyos ingong ang: gugma, nga gihawasan sa nawong sa tawo; hustisya, nga gihawasan sa nawong sa leyon; ug kaalam, nga gihawasan sa nawong sa agila. Kining tulo ka hiyas nakigtambayayong sa ikaupat—gahom, sumala sa gipakita sa nawong sa torong baka. Unsay ipasabot niining tanan? Ang panan-awon nagpakita nga si Jehova dili gayod mogamit sa iyang walay-kinutobang gahom ug awtoridad sa paagi nga mosukwahi sa iyang ubang pangunang mga hiyas.
Agig pagsundog sa iyang Amahan, si Jesu-Kristo kanunayng naggamit sa iyang awtoridad sa paagi nga bug-os kaharmonya sa gugma, kaalam, ug hustisya. Ang iyang mga tinun-an nakakaplag ug dakong kahayahay sa pag-alagad ilalom sa awtoridad ni Jesus. (Mateo 11:28-30) Kon may hiyas nga magpaila kang Jehova ug kang Jesu-Kristo, kini mao ang gugma, dili ang gahom o awtoridad!—1 Corinto 13:13; 1 Juan 4:8.
Unsaon Nimo Paggamit ang Awtoridad?
Unsaon nimo paggamit ang awtoridad? Pananglitan, diha sa pamilya, gamiton ba nimo ang imong awtoridad sa paagi nga gipasukad sa imong personal nga kagustohan? Ang uban ba diha sa imong pamilya mosunod sa imong mga desisyon tungod kay sila nahadlok kanimo o kay sila nahigugma kanimo? Tungod ba sa imong labawng gahom nga ang mga membro sa pamilya nagpasakop kanimo? Kining mga pangutanaha mahimong tagdon sa mga ulo sa pamilya aron mahuptan ang kahapsay sa teokratikanhong mga kahikayan diha sa pamilya.—1 Corinto 11:3.
Komosta kon ikaw adunay usa ka sukod sa awtoridad diha sa Kristohanong kongregasyon? Aron matino kon ikaw ba naggamit niana sa hustong paagi, itandi ang imong mga lihok sa mosunod nga mga prinsipyo nga giinspirar ni Jehova nga Diyos ug gipakita ni Jesu-Kristo.
“Ang ulipon sa Ginoo . . . kinahanglang magmalumo sa tanan, . . . nagapadayon sa pagpugong sa kaugalingon bisan ilalom sa daotan, malumong nagatudlo niadtong nagasupak.”—2 Timoteo 2:24, 25.
Ang pipila ka indibiduwal sa unang Kristohanong kongregasyon naggamit sa dakong awtoridad. Pananglitan, si Timoteo makahimo gani sa ‘pagbaod sa pipila sa dili pagtudlo ug lahi nga doktrina.’ (1 Timoteo 1:3) Apan, makaseguro kita nga si Timoteo nagsundog sa mga hiyas sa Diyos sa tanan niyang ginabuhat, tungod kay sa walay duhaduha siya milihok nga kaharmonya sa tambag ni Pablo sa pagpanudlo nga may ‘kalumo’ ug “magmalumo sa tanan” sa pagdumala sa Kristohanong kongregasyon. Tungod kay siya mas bata kon itandi sa kadaghanang mga ansiyano niadtong panahona, siya kinahanglang mogawi sama sa usa ka matinahorong anak ngadto sa mga tigulang ug mogawi sama sa usa ka mahangawaong magulang ngadto sa iyang mga manghod. (1 Timoteo 5:1, 2) Ilalom nianang mahigugmaong pag-atiman, ang Kristohanong kongregasyon magpakitag mainiton, mahigugmaon nga espiritu sa pamilya, dili sama nianang sa usa ka dili-mahigalaon, dili-mabination nga korporasyon sa negosyo.—1 Corinto 4:14; 1 Tesalonica 2:7, 8.
“Ang mga magmamando sa mga nasod mahariharion ibabaw kanila ug ang mga kadagkoan naggamit sa awtoridad ibabaw kanila. Dili kini ang paagi sa inyong taliwala; kondili si bisan kinsa nga buot mahimong dako sa inyong taliwala kinahanglang mahimong inyong alagad.”—Mateo 20:25, 26.
Ang diktador nga mga magmamando sa kalibotan “mahariharion” sa uban pinaagi sa pagpatuman sa ilang gusto ngadto sa ilang mga sakop ug pag-insistir nga buhaton ang mga butang sa usa ka tinong paagi, paghulga nga ilang silotan kon sila dili motuman. Apan, si Jesu-Kristo nagpasiugda sa pag-alagad sa uban dili sa pagpit-os kanila. (Mateo 20:27, 28) Kanunay niyang gitratar ang iyang mga tinun-an sa mahigugmaon, mahangawaong paagi. Kon imong sundogon ang panig-ingnan ni Jesus, ang uban mas dali rang makigtambayayong kanimo. (Hebreohanon 13:7, 17) Mas masayonan usab sila sa ‘pagsakripisyo alang sa uban’ kon maarangan nila, nga magbuhat niana sa kinabubut-on ug dili ilalom sa usa ka matang sa pagpamugos.—Mateo 5:41.
“Bantayi ninyo ang panon sa Diyos nga ubos sa inyong pag-atiman, [nga] dili . . . mahariharion ibabaw niadtong panulondon sa Diyos, apan mahimong mga panig-ingnan alang sa panon.”—1 Pedro 5:2, 3.
Ang mga magtatan-aw karon nasayod nga sila adunay tulubagon sa Diyos alang sa espirituwal nga kaayohan sa tanan diha sa kongregasyon. Seryoso nilang gidawat kini nga responsabilidad. Sa pag-atiman sa panon sa Diyos, sila naningkamot sa pagbuhat niini nga kinabubut-on, maikagon, ug sa mahigugmaong paagi. Sama kang apostol Pablo, sila naghago aron palig-onon ang pagtuo niadtong ubos sa ilang pag-atiman, nga dili molihok ingong mga agalon sa ilang pagtuo.—2 Corinto 1:24.
Kon dunay kinahanglang tambagan, ang mga ansiyano mohimo niana diha sa espiritu sa kalumo aron mapasibo ang nakasala o aron matabangan ang isigka-Kristohanon nga mouswag sa espirituwal. Ilang isilsil sa hunahuna ang tambag ni apostol Pablo: “Mga igsoon, bisan pag ang usa ka tawo makahimog sayop nga lakang sa dili pa niya himatngonan kini, kamo nga may espirituwal nga mga katakos paningkamoti nga ipasibo pag-usab ang maong tawo diha sa espiritu sa kalumo, samtang ang matag usa kaninyo magbantay sa iyang kaugalingon, basin unya ug kamo usab matental.”—Galacia 6:1; Hebreohanon 6:1, 9-12.
“Magpadayon sa pag-antos sa usag usa ug kinabubut-on nga magpasaylo sa usag usa . . . Isul-ob ninyo ang gugma, kay kini maoy usa ka hingpit nga bugkos sa panaghiusa.”—Colosas 3:13, 14.
Unsaon nimo sa pagdumala si bisan kinsa nga tingali mapakyas sa pagsunod nga bug-os sa Kristohanong mga sukdanan? Makahatag ka bag konsiderasyon sa ilang mga pagkadili-hingpit, sama sa gibuhat ni Jehova ug Jesu-Kristo? (Isaias 42:2-4) O iinsistir ba nimo ang estriktong pagpadapat sa balaod sa tanang kahimtang? (Salmo 130:3) Hinumdomi, haom ang pagpakitag kalumo kon maarangan ug pagpakitag kalig-on kon gikinahanglan. Ang pagpakitag gugma motabang nga malig-on ang pagsalig sa usag usa, tali kanimo ug kanila nga nailalom sa imong awtoridad.
Kon ikaw gisaligan sa bisan unsang matang sa awtoridad, paningkamoti gayod ang pagsundog kang Jehova ug Jesu-Kristo sa paggamit niini. Hinumdomi ang maanindot nga pagkahulagway sa salmista sa paglarawan sa paagi ni Jehova sa paggamit sa iyang awtoridad ibabaw sa iyang katawhan. Si David miawit: “Si Jehova mao ang akong Magbalantay. Walay makulang kanako. Siya nagapahigda kanako sa mga sibsibanan nga malunhaw; siya nagatultol kanako sa daplin sa mga dapit-pahulayan nga maayong pagkatubig. Siya nagapabaskog sa akong kalag. Siya nagaagak kanako sa mga alagianan sa pagkamatarong tungod sa iyang ngalan.” Sa susama, atong mabasa ang gisulti ni Jesus: “Ako ang maayong magbalantay, ug ako nakaila sa akong mga karnero ug ang akong mga karnero nakaila kanako, ingon nga ang Amahan nakaila kanako ug ako nakaila sa Amahan; ug akong itugyan ang akong kalag alang sa mga karnero.” Aduna pa bay mas maayong mga panig-ingnan nga mahimo natong sundogon bahin sa mahigugmaong paggamit sa awtoridad?—Salmo 23:1-3; Juan 10:14, 15.
[Blurb sa panid 18]
Ang paggamit ni Jehova sa gahom kanunayng bug-os nga kaharmonya sa iyang hustisya, kaalam, ug gugma
[Hulagway sa panid 18]
Usahay, ang mga ansiyano kinahanglang mohatag ug mahigugmaong tambag sa mga nakasala
[Hulagway sa panid 19]
Gitambagan ni Pablo si Timoteo sa paggawi sama sa usa ka matinahorong anak ug mahangawaong igsoon
[Hulagway sa panid 20]
Si Jesu-Kristo naggamit sa iyang awtoridad diha sa maalamon, makataronganon, ug mahigugmaong paagi